༧གོང་ས་མཆོག་གིས་ཟླ་འདིའི་ཕྱི་ཚེས་ ༩ ནས་ཡུ་རོབ་རྒྱལ་ཁབ་ཁག་ལྔའི་ནང་མཛད་འཕྲིན་སྐྱོང་བཞིན་ཡོད་པ་དང་། གཟའ་ཉི་མ་ནས་འཇར་མན་དང་ཧྥིན་ལན་ཌའི་ནང་ཆིབས་སྒྱུར་གྱིས་རྒྱལ་སྤྱིའི་མཁས་པའི་ལྷན་ཚོགས་སྟེང་མཉམ་ཞུགས་གནང་ཡོད།
ཉིན་འདི་འགར་༧གོང་ས་མཆོག་གིས་ཡུ་རོབ་སུད་སི་དང་ཧྥ་རན་སི། ཨོ་སི་ཊའོ་ནེ་ཡ། ཧྥིན་ལན་ཌི། འཇར་མན་རྒྱལ་ཁབ་ཁག་ལྔའི་ནང་ཆོས་ཕྱོགས་ཀྱི་མཛད་འཕྲིན་སྐྱོང་གི་ཡོད་པ་དང་། འཇར་མན་ཧམ་བྷག་ (Hamburg) གཙུག་ལག་སློབ་གྲྭ་དང་འཇར་མན་བོད་རིགས་ཚོགས་པ་གཉིས་ཐུན་མོང་གི་གོ་སྒྲིག་འོག ཟླ་འདིའི་ཕྱི་ཚེས་ ༢༡ ཉིན་༧གོང་ས་མཆོག་གྲོང་ཁྱེར་ཧམ་བྷག་ཏུ་ཆིབས་བསྒྱུར་བསྐྱངས་ཏེ། ཡུལ་དེའི་བརྒྱུད་ལམ་འདྲ་མིན་གྱི་གསར་འགོད་པ་ཚོར་འགྲོ་བ་མིའི་རིན་ཐང་དང་ཆོས་ལུགས་མཐུན་སྒྲིལ་སྐོར་དྲི་བ་དྲིས་ལན་གནང་ཡོད་པ་མ་ཟད། སྐབས་དེར། ཉེ་ཆར་བོད་ནང་དུ་འདས་གྲོངས་སུ་ཕྱིན་པའི་གྲྭ་ཚེ་དབང་ནོར་བུ་ལགས་ཀྱི་གནས་སྟངས་ཐོག་ཐུགས་ཕམ་ཚད་བྱུང་ཡོད་སྐོར་དང་། གཞིས་ལུས་རྒྱ་ཆེའི་མི་མང་གི་འཚེ་མེད་ཞི་བའི་བྱ་སྤྱོད་ལ་ཡི་རངས་བསྔགས་བརྗོད་གནང་འདུག
ཉིན་དེར་༧གོང་ས་མཆོག་འཇར་མན་དུ་འཚོགས་བཞིན་པའི་རྒྱལ་སྤྱིའི་མཁས་པའི་ལྷན་ཚོགས་ཞིག་གི་སྟེང་ཆིབས་བསྒྱུར་བསྐྱངས་ཏེ། དྲན་པ་ཉེར་བཞག་ཐོག་བློ་སྦྱངས་སྟངས་སྐོར་བཀའ་བསྡུར་ལྷུག་པོར་གནང་ཡོད་འདུག་ལ། ལྷན་ཚོགས་དེར་འཛམ་གླིང་གྲགས་ཅན་སྨན་པ་དང་སེམས་ཁམས་རིག་པ། ཆེད་ལས་མཁས་པ་སོགས་མི་ ༣༠ ལྷག་ཕེབས་ཡོད། སྐབས་དེར་༧གོང་ས་མཆོག་གིས་ “ ང་ཚོས་དྲན་ཤེས་ཞེས་བརྗོད་སྐབས་ནང་ཆོས་ལས་གསུངས་པའི་ཉམས་ལེན་བྱེ་བྲག་པ་ཞིག་མིན་པར། དེ་ནི་ང་ཚོའི་ཉིན་རེའི་འཚོ་བ་དང་འབྲེལ་བ་ཡོད་པའི་ལས་དོན་ཚང་མའི་ཐོག་བེད་སྤྱོད་བྱེད་ཀྱིན་ཡོད། སེམས་ཀྱི་རྣམ་གཞག་ཅེས་བརྗོད་སྐབས་མིག་གིས་དངོས་སུ་མཐོང་རྒྱུ་མེད་ནའང་། མི་སྒེར་དང་ནང་མི། སྤྱི་ཚོགས་བཅས་ཀྱི་བདེ་སྡུག་ལ་ཕན་གནོད་ཀྱི་འབྲེལ་བ་ཧ་ཅང་དམ་པོ་ཡོད། སེམས་ནི་ང་ཚོར་ཞི་བདེ་དང་རྙོག་དྲ་བཟོ་མཁན་གཉིས་ཀ་ཆགས་ཡོད། ཡུལ་ལ་དཔྱད་པ་གཏོང་སྐབས་སེམས་མ་འཁྲུག་པར་ཞི་བར་གནས་དགོས་ཀྱི་ཡོད། དྲན་ཤེས་བསྟེན་སྐབས་ཆུ་ཚོད་ ༢༤ རིང་བློ་ལ་སྟངས་འཛིན་དགོས་པ་མ་ཟད། རྨི་ལམ་དུའང་སེམས་ལ་དྲན་ཤེས་བག་ཡོད་བསྟེན་དགོས་པ་རེད། དྲན་ཤེས་ཀྱི་བློ་ཐོག་མར་སྦྱོང་སྐབས་ཡུལ་གཅིག་ལ་སེམས་དགེ་བའི་དམིགས་པ་རྩེ་གཅིག་ཏུ་གཏད་དེ། དབུགས་འབྱིན་རྔུབ་ལ་བསམ་བློ་གཏོང་དགོས། དེ་འདྲ་བྱས་ཚེ་སེམས་ལྷོད་ལ་འབབ་ཐུབ་ཀྱི་རེད་ ” ཅེས་གསུངས་ཡོད།
དེང་དུས་འཛམ་གླིང་ནང་སེམས་ཀྱི་རིན་ཐང་ལ་དོ་སྣང་དེ་ཙམ་སྤྲོད་ཀྱི་མེད་པའི་ཐད་ལ་༧གོང་ས་མཆོག་གིས་མུ་མཐུད་དོན། “ དེང་དུས་ཤེས་ཡོན་ལམ་ལུགས་དེ་གཙོ་བོ་ཕྱི་དངོས་པོའི་གནས་སྟངས་ལ་གཞི་བཅོལ་ཡོད་པ་རེད། ལོ་ངོ་སྟོང་ཕྲག་སྔོན་གྱི་ཤེས་ཡོན་ལམ་ལུགས་ཐོག་མར་འཛུགས་སྐབས། སེམས་ཀྱི་རིན་ཐང་དང་འབྲེལ་བའི་བཟང་སྤྱོད་སློབ་གསོ་ཐོག་འགན་གཙོ་བོ་འཁུར་མཁན་ནི་ཡེ་ཤུའི་ལྷ་ཁང་ཁག་ཆགས་ཡོད། ད་ཆར་དེང་དུས་ཤེས་ཡོན་ལམ་ལུགས་ནང་ཀླད་པའི་རྣམ་དཔྱོད་ཡར་རྒྱས་གཏོང་རྒྱུ་དེ་གལ་ཆེར་རྩི་བཞིན་ཡོད་སྟབས། བུ་གསོ་ཁང་ནས་མཐོ་སློབ་བར་ཆོས་ལུགས་རིས་མེད་ཐོག་སེམས་ཀྱི་རིན་ཐང་གོང་མཐོར་གཏོང་རྒྱུའི་སློབ་ཚན་གཏན་འབེབས་གནང་དགོས་ཀྱི་འདུག ང་ཚོས་དཀོན་མཆོག་དང་དགེ་སྡིག་གི་སྐད་ཆ་གང་ཡང་བཤད་ཀྱི་ཡོད་པ་མ་རེད། དེང་སང་ཚགས་ཤོག་དང་བརྙན་འཕྲིན། རླུང་འཕྲིན་ཁག་ཚང་མའི་ངོས་ནས། ཚོང་དང་སྒོར་མོའི་སྐོར་བཤད་རྒྱུུ་ལས་སེམས་ཀྱི་རིན་ཐང་ཐོག་སྐད་ཆ་བཤད་མཁན་ཉུང་ལས་མི་འདུག མཐར་ཐུག་གི་བདེ་བ་དེ་ང་ཚོའི་རྒྱུད་ལ་ཡོད་པ་ཞིག་རེད། ཚོང་དང་སྒོར་མོ་གལ་ཆེ་ནའང་དེས་ང་ཚོར་མཐར་ཐུག་གི་བདེ་སྐྱིད་སྤྲོད་ཐབས་ཡོད་པ་མ་རེད་ ” ཅེས་གསུངས་འདུག
འཇར་མན་དུ་ཆིབས་བསྒྱུར་མ་གནང་གོང་༧གོང་ས་མཆོག་གིས་ཧྥིན་ལན་ཌིའི་ཡུལ་དུ་ཆེས་མཐའ་མའི་མཛད་འཕྲིན་ཁག་བསྐྱངས་ཡོད་ཅིང་། ཕྱི་ཚེས་ ༡༩ ཉིན་ཡུལ་དེའི་རྒྱལ་སར་ཡོད་པའི་ (The Helsinki Bourse Club) ཞེས་པར། ས་གནས་ཁག་འདྲ་མིན་ནས་ཕེབས་པའི་གསར་འགོད་པ་ ༧༠ བརྒལ་བར་དུས་ཡུན་ཆུ་ཚོད་གཅིག་ལྷག་རིང་དྲི་བ་དྲིས་ལན་གནང་ཡོད་འདུག་ལ། སྐབས་དེར་ཡུལ་དེའི་གྲོས་ཚོགས་འཐུས་མི་ ༢༠ ལྷག་དང་མཇལ་འཕྲད་ཀྱིས་བོད་ནང་གནས་སྟངས་ཐོག་གླེང་མོལ་བཅས་གནང་འདུག ཕྱི་ཚེས་ ༢༠ ཉིན་ཁལ་མིག་ནས་ཆེད་དུ་གསུང་ཆོས་ཞུ་རུ་བཅར་མཁན་བོད་ཀྱི་དགེ་འདུན་པ་ ༢༥༠ ཙམ་ལ་མཇལ་ཁ་བསྩལ་ཏེ་བཀའ་སློབ་གནང་རྗེས། ཡུལ་དེའི་རང་དབང་ལྷ་མོའི་མདུན་ཐང་དུ་མི་མང་ ༣༥༠༠ ལྷག་ལ་དགེ་བཤེས་གླང་རི་ཐང་པའི་མཛད་པས་༼བློ་སྦྱོང་ཚིག་བརྒྱད་མའི་༽བཀའ་ཁྲིད་བཅས་གནང་ཡོད། ཕྱི་དྲོ་གྲོང་ཁྱེར་ཨེ་སི་ཕཱོ་ Espoo ཞེས་པར་ཡོད་པའི་བྷ་རོ་ཎ་ཚོགས་ཁང་ཆེན་མོར། ས་གནས་མི་མང་ ༧༠༠༠ བརྒལ་བར་༼བྱམས་བརྩེའི་ནུས་སྟོབས་༽ཞེས་པའི་བརྗོད་གཞིའི་ཐོག་བཀའ་སློབ་གནང་འདུག་ལ། སྐབས་དེར་༧གོང་ས་མཆོག་གིས་མི་སྒེར་དང་ཁྱིམ་ཚང་། དེ་བཞིན་སྤྱི་ཚོགས་བཅས་ཀྱི་བདེ་སྐྱིད་ནི། སོ་སོའི་སེམས་རྒྱུད་ཀྱི་བྱམས་བརྩེི་ནུས་པ་གོང་མཐོར་བཏང་སྟེ་འབྱུང་དགོས་པ་མ་ཟད། བྱམས་བརྩེ་དེའང་ཆོས་དང་མ་འབྲེལ་བ་ཞིག་ཡོད་དགོས་སྐོར་སོགས་གསུངས་ཡོད་འདུག
༧གོང་ས་མཆོག་གིས་འཇར་མན་གྱི་དུས་ཡུན་ཉིན་བཞིའི་རིང་གི་མཛད་འཕྲིན་ཁག་ལེགས་པར་འགྲུབ་རྗེས། སང་ཉིན་ཕྱི་ཚེས་ ༢༤ ཉིན་རྒྱ་གར་ནང་ཆིབས་བསྒྱུར་བསྐྱང་རྒྱུ་ཡིན་པ་དང་། ལྷོ་ཤར་ཨེ་ཤ་ཡའི་དད་ལྡན་པའི་གསོལ་འདེབས་ཞུས་དོན་ལྟར། ཟླ་འདིའི་ཕྱི་ཚེས་ ༣༠ ནས་ཕྱི་ཟླ་ ༩ པའི་ཚེས་ ༡ ཉིན་བར་བཞུགས་སྒར་དུ་སློབ་དཔོན་ཞི་བ་ལྷས་མཛད་པས་༼ སྤྱོད་འཇུག ༽ བཀའ་ཁྲིད་གནང་རྒྱུ་ཡིན་འདུག
གསར་འགོད་པ། དཔལ་ལྡན།
རང་སྣང་གང་དྲན་གྱི་གྲོགས་པོ་སྣང་བ་སྐྱིད་པོ། གསལ་ལེ་རྒྱལ་ལགས། གསར་འགྱུར་གྱི་ལྡོག་ཕྱོགས་སུ་ག་འདྲ་སེ་ཕྱིན་འདུག ཕྱིན་སྟངས་དེ་ཤོད་དང་། རྩྭ་འཐུངས་ནས་བཟི་བའི་སྐད་ཆ་ཞིག་ཡིན་ན་དམིགས་བསལ་ཡིན་ཤོད་མི་དགོས།
ཚད་མེད་ཀྱི་མེད་ཆད་དེ་གསར་འགྱུར་ལྡོག་ཕྱོགས་སུ་སོང་འདུག་པས་མཆན་དེ་བཏང་བ་ཡིན།
འདི་དྲ་ཐོག་ལ་མ་གཏོང་།འོག་གི་དེ་ར་བསུབ་རོགས།
(འདས་གྲོངས་སུ་ཕྱིན་པའི་གྲྭ་ཚེ་དབང་ནོར་བུ་ལགས་ཀྱི་གནས་སྟངས་ཐོག་ཐུགས་ཕམ་ཚད་བྱུང་ཡོད་སྐོར་དང་། )
de ka re red
སྙིགས་དུས་ཀྱི་སེམས་པ་ཆེན་པོ། ཏཱ་ལའི་བླ་མ།
བདག་གི་སྙན་ངག་ཅིག་གི་ཁ་བྱང་ཡིན།