སྤོན་ཊ་གཏན་སློབ། པདྨ་བསམ་གྲུབ།
ཉིས་སྟོང་བཅུ་གཅིག་ལོ་འདིར་འཛམ་གླིང་ལོ་རྒྱུས་ཐོག་མིའི་རིགས་ཀྱི་སྙིང་སྟོབས་དཔེ་མཚོན་དུ་བགྲང་འོས་པའི་ཆབ་སྲིད་གསར་བརྗེ་ཡི་རྡོ་རིང་དུ་མ་ཞིག་བསླངས་བྱུང༌། རྒྱལ་ཁབ་དེ་ཚོའི་མི་མང་གི་ཚེ་སྲོག་དང་ཁྲག་དྲོན་གྱི་བློས་གཏོང་ཆེན་པོ་དེས། ད་གཟོད་ཁོང་ཚོས་ཡུན་རིང་སྙིང་ལ་བརྣག་པའི་མངོན་འདོད་དེ། དམངས་གཙོའི་འཚོ་བར་རང་དབང་གིས་རོལ་བའི་སྟ་གོན་བྱས་སོང་། དེ་ལྟ་ནའང༌། སྒེར་སྡོམ་དང་དྲག་སྤྱོད་ལ་ཞེན་པའི་རྒྱ་ནག་ཏུ་འགྱུར་བ་སྤུ་ཉག་ཙམ་ཡང་མ་སོང༌། དེ་བས་རྒྱ་རིགས་སྒྱུ་རྩལ་པ་གྲགས་ཅན་ཨེ་ཝེ་ཝེ་ཡིས་པེ་ཅིན་ལ་“འཚེ་བའི་གྲོང་ཁྱེར”ཞེས་བོས་པ་བཞིན། ཁོང་གིས་ཡར་ཐོན་ཆེ་བའི་པེ་ཅིན་གྲོང་ཁྱེར་ཏེ་རྒྱ་ནག་གི་རྒྱལ་སའི་མི་མང་གི་གཞི་རྩའི་རང་དབང་ཐད། ཁོང་གླིང་ག་ཞིག་ཏུ་སྐྱོད་སྐབས་ཀྱི་འཕྲད་རྐྱེན་དཔེ་རུ་དྲངས་ཏེ་“མི་ཉུང་ཤས་ཤིག་ངའི་སར་ཡོང་ནས་ང་ལ་མཐེ་བོང་སྟོན་པ་དང་ཕྲག་པར་ལག་པ་འཇོག ཅིའི་ཕྱིར་ཁོང་ཚོས་དེ་འདི་འདྲའི་གསང་སྟབས་ཀྱིས་བྱེད་པ་ཡིན་ནམ། སུ་གང་གིས་ཀྱང་སྨྲ་སྒོ་འབྱེད་པར་མི་ནུས། ཁོང་ཚོས་ཅི་ཞིག་ལ་ངང་སྒུག་བྱེད་ཀྱིན་ཡོད་དམ།”ཞེས་གསུངས།
དཔལ་འབྱོར་དང་ཚོང་ལས་དར་ཆེ་བའི་རྒྱལ་ས་པེ་ཅིན་དུའང་མི་མང་ལ་རང་དབང་དང་དམངས་གཙོའི་རྣམ་པ་ཙམ་ཡང་མི་མངོན་པའི་ཚུལ་ལ་འདི་ལྟར་སྡུག་སྨྲེ་འདོན་དགོས་ན། ང་ཚོའི་ཕ་ཡུལ་བོད་དེ་ཉམ་ཐག་པའི་གྲངས་ཉུང་མི་རིགས་ཀྱི་ས་ཁུལ་དུ་བཙན་འཛུལ་བས་དེ་ལྟར་མི་བྱེད་ག་ལ་སྲིད། དྲག་གནོན་ཅི་འདྲ་རྩུབ་ཅིང་དཀའ་སྡུག་གང་འདྲ་ཆེ་ཡང༌། བོད་བཙན་པོའི་སྙིང་སྟོབས་ཀྱི་ཁྲག་རྒྱུན་མ་ཉམས་པའི་བོད་རྒྱ་ཆེའི་མི་མང་གིས་གཅིག་རྗེས་གཉིས་མཐུད་དུ་བཙན་གནོན་ལ་ངོ་རྒོལ་བྱས་ཤིང༌། རང་གི་གཅེས་པའི་ལུས་སྲོག་ཚུན་ཆད་མི་རིགས་ཀྱི་རང་དབང་དང་བདེན་པའི་དཔལ་འབར་དུ་བསྒྲོན་དང་སྒྲོན་བཞིན་ཡོད། སྐབས་དེ་འདྲའི་ཚེ་ན་༧གོང་ས་ཏཱ་ལའི་བླ་མ་མཆོག་གིས་རང་གི་སྐུ་དབང་ཡོད་ཚད་མི་དམངས་ལ་བརྒྱུད་སྤྲོད་ཀྱིས་འཛམ་གླིང་ལ་མིག་དཔེ་གསོན་ཉམས་ལྡན་པ་ཞིག་བཞག་གནང་མཛད། དེ་ན་ཚེ་སྲོག་དང་ཁྲག་དྲོན་གྱི་འགྲོ་གྲོན་མེད་ལ། བཙན་དབང་དང་གདུག་རྩུབ་ཀྱི་མནར་གཅོད་ཀྱང་མེད། དེ་ན་བྱམས་པ་དང་བརྩེ་བའི་དྲོད་ཁོད་འབའ་ཞིག དེ་ལྟའི་འཇིག་རྟེན་ན་དཀོན་པའི་ཁོང་གི་བཀའ་དྲིན་ཟླ་མེད་ཀྱིས། འདི་ལོའི་ཕྱི་ཟླ་ ༩ ཚེས་ ༢ ཉིན་རྒྱ་གར་བྱང་ཕྱོགས་ཀྱི་རི་སུལ་རྡ་རམ་ས་ལ་གཙོས་པའི་འཛམ་གླིང་གི་ས་ཕྱོགས་གང་སར་བོད་མི་ཚོས་གཟི་བརྗིད་ཀྱི་ངང་ནས་དམངས་གཙོའི་དུས་དྲན་ཐེངས་ང་གཅིག་པ་སྲུང་བརྩི་བྱས་ཤིང༌། བཙན་བྱོལ་བོད་མིའི་ཡང་དག་པའི་དམངས་གཙོ་ཞེས་པའི་ཁ་གཡང་བསྒྲགས།
དོན་དངོས་སུ་ཡང་དེ་ལྟར་ཡིན་ཏེ། རླབས་ཆེ་བའི་གྲུབ་འབྲས་འདི་ནི་རྒྱལ་བ་རིན་པོ་ཆེ་ཁོང་ཉིད་ཀྱིས་ལོ་ངོ་ལྔ་བཅུ་ལྷག་གི་རིང་ལ་འབད་འབད་དུང་དུང་གིས་བཙན་བྱོལ་བོད་པའི་སྤྱི་ཚོགས་ལ་རིམ་པས་སྦྱོང་བརྡར་སྤྲད་པའི་འབྲས་བུ་ཁོ་ན་ཞིག་ཡིན་ལ། འདི་ནི་ལོ་རྒྱུས་ཤིག་གི་ངོས་དང་ཆབ་སྲིད་ལམ་ལུགས་ཀྱི་འཕེལ་རིམ་ཞིག་གི་ངོས་ནས་བསམ་ན་དེ་བས་ཀྱང་བླ་ན་མེད་པའི་གྲུབ་འབྲས་ཤིག་རེད། གྲུབ་འབྲས་འདི་ཁྱེར་ཏེ་ང་ཚོས་དགའ་སྤོབས་དང་རྒྱལ་ཁའི་ངང་དམངས་གཙོའི་དུས་དྲན་སྲུང་བརྩི་བྱས་ཡོད། འོན་ཀྱང༌། ཞིབ་དུ་བསམ་ན་དུས་དྲན་སྲུང་བརྩི་འདིས་འུ་ཅག་ལ་ངང་ངམ་ཤུགས་ཀྱིས་འགན་ཁུར་ལྕི་མོ་ཞིག་ཀྱང་བསྣམས་ཏེ་ཡོད། འགན་ཁུར་དེ་ཅི་ཞིག་ཡིན་ནམ། དེ་ནི་ཆབ་སྲིད་ཀྱི་ལམ་ལུགས་དང་ཁྲིམས་ལུགས་ཀྱི་ཁེ་དབང༌། སྤྱི་ཚོགས་ཀྱི་སྒྲོམ་གཞི་ལས་ལྷག་ཅིང༌། དེ་དག་དང་ནམ་ཡང་འབྲལ་དུ་མེད་པའི་སེམས་ཉིད་ཀྱི་དམངས་གཙོའོ།། འདི་ནི་སློབ་གསོ་དང་སྤྱི་ཚོགས་ལག་ལེན་རྒྱུད་ནས་འོངས་བའི་བློ་སྦྱོང་ཞིག་ཡིན་ལ། འདི་ནི་སུས་ཀྱང་སྤྲོད་ལེན་བྱེད་ཐབས་མེད་པའི་བློ་སྦྱོང་དང་སློབ་སྦྱོང་ཟུང་དུ་སྦྲགས་མའི་བློས་གཏོང་ཆེན་པོ་ཞིག་དང་། མཆོངས་སྐྱོད་ཆེན་པོ་ཞིག་གི་ཁ་ཕྱོགས་ཡིན། དེ་བས་ང་ཚོས་མི་རབས་གསར་བ་ཞེས་པའི་ཁ་ཕོ་དང་ལྷན་དུ་རང་ཉིད་ཀྱི་མི་འདང་ས་ངོས་ཟིན་དགོས་ལ། ང་ཚོའི་སྤྱི་ཚོགས་ཀྱི་རྒྱབ་མདུན་དག་ན། ད་ལྟ་ད་དུང་ཡང་མིའི་བསམ་གཤིས་ཐོག་གི་ནག་ཉེས་དང་རྨོངས་མུན་མཐུག་པོ་རུ་ཆགས་འདུག་ཅིང༌། བཤད་མཁན་གྱི་འོས་འགན་འདུ་ཤེས་དང་ཉན་མཁན་གྱི་ཁག་ཁུར་བསམ་པ་སོགས་ཀྱི་ཧྲག་བར་དག་ན་ཡང་དག་པའི་དམངས་གཙོའི་བློ་སྟོབས་ཀྱིས་གཙང་ཕྱག་བྱ་དགོས་པའི་སྙིགས་རོ་མང་བས། ང་ཚོར་རང་ཉིད་ནས་མགོ་བརྩམ་དགོས་ས་དང་། རང་ཉིད་ཀྱིས་རང་ཉིད་ལ་འཕྱི་དོར་བྱ་དགོས་པའི་འོས་འགན་ཤིན་ཏུ་ལྗིད་དོ།
དེ་སྔ་ནི་གནམ་ཟམ་གདོང་ལ་དབང་བའི་ལོ་ངོ་དག་ཡིན་པས་བཙན་བྱོལ་བོད་མའིསྒྲིག་འཛུགས་སུ་མང་གཙོ་ཞེས་འབོབ་དགོས་པ་ཡང་ཡང་བཤད་པས་རེད་མ་གཏོགས་དོན་ངོ་མ་དམངས་གཙོ་ཞེས་འབྲི་རྒྱུ་རེད། ཚིག་འདི་གཉིས་ཀྱི་དབྱེ་འབྱེད་དེ་ཟམ་གདོང་གིས་ཐོག་མར་བྱས་པ་རེད།
སི་ནེ་བོད་རིགས་མཐུན་ཚོགས་ཀྱི་རྒྱུན་ལས་ངོས་ལེན་མེད་ཟེར།
ཨོ་སི་ཁྲུ་ལི་ཡ་སི་ནེ་བོད་རིགས་མཐུན་ཚོགས་ཀྱི་གོ་སྒྲིག་འོག་མང་གཙོའི་དུས་ཆེན་ཉིན་གཅིག་ཕྱིར་འཐེན་གྱིས་ཟླ་འདིའི་ཚེས་༣ ཉིན་སྲུང་བརྩི་བྱས་པ་དང་། སྐུ་མགྲོན་གཙོ་བོ་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་དང་དྲུང་ཆེ་དངོས་གྲུབ་རྒྱལ་མཚན་གཉིས་ཕེབས་ཡོད་པ་རེད།
དེ་དང་སྟབས་བསྟུན་སི་ནེ་བོད་རིགས་མཐུན་ཚོགས་ཀྱི་རྒྱུན་ལས་གསར་རྙིང་གིས་རྩིས་སྤྲོད་རྩིས་ལེན་བྱེད་སྐབས། བཀྲ་ཤིས་རྒྱ་མཚོ་ཞེས་པ་ཡར་ལངས་ནས་དེ་སྔོན་༧གོང་ས་མཆོག་གིས་མང་གཙོ་མི་མང་ལ་གནང་སྟེ་མི་ལོ་ལྔ་བཅུ་ལྷག་ཙམ་འགྲོ་བཞིན་ཡོད་ཀྱང་། ད་དུང་ས་གནས་འདིར་རྒྱ་གུང་ཁྲན་གྱི་སྲིད་བྱུས་དང་གཅིག་མཚུངས་འདྲ་བོ་ཞིག་བྱེད་ཀྱི་ཡོད་པ་རེད། ངའི་ངོས་ནས་རྒྱུན་ལས་གསར་པ་ཚོར་ངོས་ལེན་བྱེད་ཐུབ་ཀྱི་མེད་ཅེས་བཤད།
དེ་རྗེས་དཔལ་འབྱོར་ཚེ་རིང་ཞེས་པ་ཡར་ལངས་ཏེ་རྒྱུན་ལས་གསར་འདེམས་བྱུང་བ་དེ་དོན་དངོས་ཐོག་ཡག་པོ་དང་དྲང་པོ་བྱུང་མེད་པ་དེ། སྐུ་ཚབ་དོན་གཅོད་ཀྱིས་ཤེས་ཀྱི་ཡོད་དམ་མེད།འདིའི་ཐོག་ལ་དོན་གཅོད་ཀྱིས་གསལ་བཤད་དྲང་པོ་མ་བྱས་ན། ངས་ཟས་བཅད་ངོ་རྒོལ་བྱེད་རྒྱུ་ཡིན་ཞེས་བཤད།
དེ་ནས་ཨ་པོ་དགའ་དགའ་ཞེས་པ་ཡར་ལངས་ཏེ་ང་མི་རྒན་ཞིག་གི་རེ་བ་ལ། ཁྱེད་ཅག་འདིར་ཡོད་བོད་མི་ཚོར་བསམ་པ་རྣམ་དག་གིས་རེ་འདུན་ཡོད་པ་ནི་མཐུན་ལམ་རྡོག་རྩ་གཅིག་སྒྲིལ་བྱས་ནས་སྡོད་དགོས་སྐོར་སོགས་མི་མང་ལ་བསླབ་བྱ་བརྒྱབ་སྟེ། མི་མང་གིས་ཀྱང་ཉན་བཞིན་པའི་སྐབས་སུ་གློ་བུར་དུ་རྡོ་རྗེ་སྒྲོལ་མ་དང་ཆོས་སྒྲོན་སོགས་ཀྱིས་འབོད་འགུག་བྱས་པའི་ས་གནས་ཉེན་རྟོག་པ་སླེབས་ཏེ། དཔལ་འབྱོར་ཚེ་རིང་ཁྲིད་བཅུག་ཡོད་པ་རེད། སྐབས་དེར་ཁག་ཅིག་དགའ་ནས་ལག་པ་བརྡབ་ཡོད་ཀྱང་མི་མང་པོ་ཧང་སང་བ་དང་། ཡང་ཁག་ཅིག་ནི་བོད་མི་ནང་ཁུལ་ལ་བསམ་ཚུལ་བཤད་པ་ཙམ་གྱིས་ཉེན་རྟོག་མི་སྣར་རྩིས་སྤྲོད་བྱས་པར་བློ་ཕམ་ཡོད་ཅེས་ངར་ཤུགས་ཀྱིས་བཤད་མཁན་བྱུང་ཡོད་པ་རེད།
དཔལ་འབྱོར་ཚེ་རིང་གི་སྐྱེ་དམན་གཡང་ཕྱུག་སྐྱིད་ཀྱིས་ངའི་བཟའ་ཟླ་ཉེན་རྟོག་མི་སྣར་རྩིས་སྤྲད་བྱེད་དགོས་དོན་གང་ཡིན་རྒྱུན་ལས་དང་སྐུ་ཚབ་དོན་གཅོད་སོགས་ཀྱིས་ངེས་པར་དུ་གསལ་བཤད་བྱེད་དགོས་ཞེས་ངར་ཤུགས་ཆེན་པོའི་ཐོག་ནས་བཤད་ཀྱང་། སྐུ་ཚབ་དོན་གཅོད་དང་རྒྱུན་ལས་གསར་རྙིང་སུ་ཞིག་གིས་གསལ་བཤད་རྒྱག་རོགས་མ་བྱས་པའི་དབང་གིས་མོའི་རོགས་པ་ཁག་ཅིག་ངར་ཤུགས་ལངས་ཏེ་ཁ་རྩོད་ཤུགས་ཆེན་བརྒྱབ་ཡོད་པ་རེད།
དེ་སྔོན་སྐབས་བཅུ་གཅིག་པའི་རྒྱུན་ལས་འོས་འདེམས་བྱེད་སྐབས། ས་གནས་འོས་བསྡུའི་འགན་ལེན་ཚོགས་ཆུང་གི་ངོས་ནས་འོས་བསྡུ་ཚགས་ཚུད་བྱུང་ཡོད་མེད་ཀྱི་གླེང་རྙོག་ཅིག་མི་མང་ནང་ཡིག་ངག་གཉིས་ཀྱི་ཐོག་ནས་ཁྱབ་སྤེལ་བྱེད་བཞིན་ཡོད་པའི་དབང་གིས། ས་གནས་བོད་མི་བཀྲ་ཤིས་རྒྱ་མཚོ་དང་དཔལ་འབྱོར་ཚེ་རིང་སོགས་ཀྱིས་གསར་འདེམས་བྱུང་བའི་རྒྱུན་ལས་སྐབས་བཅུ་གཅིག་པ་དེ་དྲང་བདེན་གྱི་ལམ་ནས་འོས་འདེམས་བྱེད་ཐུབ་མེད་སྐོར་སོགས་བཤད་པའི་དབང་གིས། གསར་དུ་འདེམས་ཐོན་བྱུང་བའི་རྒྱུན་ལས་རྡོ་རྗེ་སྒྲོལ་མ་དང་ཆོས་སྒྲོན་སོགས་ཀྱིས། ས་གནས་ཉེན་རྟོག་མི་སྣ་སྐད་བཏང་སྟེ། དཔལ་འབྱོར་ཚེ་རིང་དུས་རྒྱུན་བོད་མི་མཉམ་འཛོམས་སྐབས་སུ་རྙོག་གྲ་སློང་མཁན་རེད་ཅེས་ཉེན་རྟོག་རྩིས་སྤྲོད་བྱས་ཡོད་པ་རེད།
མི་མང་ནང་རྙོག་གླེང་ཆེན་པོ་བྱུང་བ་དང་། ད་ཐེངས་ཀྱི་དུས་ཆེན་མཛད་སྒོ་མཇུག་སྒྲིལ་མ་ཐུབ་པར་གྲོལ་དགོས་བྱུང་ཡོད་པ་རེད།
འོན་ཀྱང་དཔལ་འབྱོར་ཚེ་རིང་ཉེན་རྟོག་པས་སྐར་མ་འགའ་ཤས་རྗེས་སུ་ཕྱིར་བཏང་སོང་ལ། ཁོ་སྔར་ལྟར་རྩོད་པ་རྒྱག་ཏུ་སླེབས་སྐབས་ཉེན་རྟོག་པ་སྐད་གཏོང་མཁན་ཚོ་ངོ་གནོང་ནས་སྡོད་དགོས་བྱུང་ཡོད་པ་རེད།
དེའི་མཚན་མོ་སྐུ་ཚབ་དོན་གཅོད་ཀྱིས་རྒྱུན་ལས་གསར་རྙིང་གཉིས་ཆ་བསྡུ་བསྐོང་བྱས་ཏེ། ཁྱོད་རང་ཚོས་ཉེན་རྟོག་མི་སྣ་སྐད་བཏང་ནས་མི་འཇུ་བཟུང་བྱེད་བཅུག་པ་ནི་ནོར་འཁྲུལ་ཆེན་པོ་ཡིན་སྐོར་སོགས་བཤད་ཡོད་པ་རེད་འདུག གནས་ཚུལ་འདིའི་རིགས་ད་ཐེངས་གཅིག་པུ་མིན་པར། ས་གནས་འདིར་ཡོད་པའི་བོད་མི་ཚོའི་བར་དུ་ལྷག་བསམ་དག་དང་མ་དག བསྟུན་མཁས་དང་བྱེད་སྟངས་འགྲིག་མིན་ཇི་སྙེད་ཅིག་གིས་དཀའ་ངལ་གང་མང་ཞིག་འཕྲད་ཀྱི་ཡོད་པ་རེད།
བོད་པ་ཚོས་སྨོན་ལམ་འདོན་ས་དང། ཚོགས་འདུ་སོགས་འདུ་འཛོམས་བྱེད་ས་ཡི་ཤུ་ལྷ་ཁང་ཞིག་ནམ་རྒྱུན་གཡར་གྱི་ཡོད་ཡོད་ནའང། ད་ཐེངས་འདིར་ཉེན་རྟོག་མི་སྣ་ཁྲིད་དེ་བོད་མི་ཚོར་རྙོག་གླེང་བྱུང་བའི་རྐྱེན་གྱིས་ད་ནས་བཟུང་སྟེ། བོད་པ་ཚོར་ལྷ་ཁང་གཡར་མི་ཆོག་པའི་བརྡ་ཁྱབ་ཀྱང་འབྱོར་ཟིན་ཡོད་པ་རེད།།
ས་གནས་གསར་འགོད་པ་སེར་ཤུལ་དཀོན་མཆོག་གིས་ཨོ་སི་ཁྲུ་ལི་ཡའི་སིར་ནེ་གྲོང་ཁྱེར་ནས།
མཐའ་མའི་བསྐྱར་བཅོས། ( ‘༢༠༡༡, ༠༩, ༧’ )
མཐའ་མའི་བསྐྱར་བཅོས། ( ‘༢༠༡༡, ༠༩, ༧’ )
འདི་ནི་བོད་ཀྱི་བང་ཆེན་ལས་འདྲེན་བཀོད་བྱས་བ་ཡིན། དམངས་གཙོ་ལག་ལེན་བསྟར་རྒྱུ་ཕར་བཞག་ནས་རྒྱ་ནག་གི་སྲིད་ཇུས་དངོས་སུ་བཙན་བྱོལ་བོད་མིའི་སྤྱི་ཚོགས་ནང་ལག་བསྟར་གཏོང་བཞིན་པའི་ཟུར་ཞིག་རེད།
སྤྱིར་བཏང་བརྗོད་བྱ་རྗོད་བྱེད་གང་གི་ཆ་ནས་ཀྱང་ཡག་པོ་ཞེ་དྲགས་གསུངས་འདུག འོན་ཀྱང་ཁྱེད་ཀྱིས་དམངས་གཙོ་ཞེས་པའི་ཚིག་དེ་ཡང་ཡང་བེད་སྤྱོད་གནང་འདུག མཇུག་ཏུ་བཀའ་དྲི་ཞུ་རྒྱུར། དམངས་གཙོ་དང་མང་གཙོ་གཉིས་ལ་ཁྱད་པར་གང་ཡོད་དམ། གལ་སྲིད་གཅིག་པ་ཡིན་ན་བཙན་བྱོལ་བོད་མིའི་སྒྲིག་འཛུགས་ཀྱིས་དམངས་གཙོ་ཞེས་པའི་ཚིག་འདི་བཀོལ་སྤྱོད་མི་བྱེད་དོན་ཅི་ཡིན།