༧གོང་ས་མཆོག་གིས་མེག་སི་ཁོའི་མི་མང་སུམ་ཁྲི་ ༣༠༠༠༠ ལྷག་ལ་བཀའ་སློབ་དང་། ༼ རྗེས་དྲན་དང་བཟོད་སྲན་གྱི་འགྲེམས་སྟོན་༽ཞེས་པ་དབུ་འབྱེད་སོགས་གནང་འདུག
ཟླ་འདིའི་ཕྱི་ཚེས་ ༡༠ ཉིན་ནས་༧གོང་ས་མཆོག་གིས་མེག་སི་ཁོའི་ཡུལ་དུ་མཛད་འཕྲིན་སྐྱོང་གི་ཡོད་པ་དང་། ཕྱི་ཚེས་ ༡༡ ཉིན་མེག་སི་ཁོ་སཱི་ཊིའི (Mexico City) ཀ་ར་ཛི་ཨ་ཛུལ་ཞེས་པའི་ (Cruz Azul) རྩེད་ཐང་ཆེན་མོར། ས་གནས་ཁག་འདྲ་མིན་ནས་ཕེབས་པའི་མི་མང་སུམ་ཁྲི་བརྒལ་བར་ ༣༠༠༠༠ རྙོག་འཛིང་ཆེ་བའི་སྐབས་སུ་༼བདེ་སྐྱིད་འཚོལ་ཐབས༽ཞེས་པའི་བརྗོད་གཞིའི་ཐོག་བཀའ་སློབ་གནང་སྟེ། འགྲོ་བ་མིའི་རིགས་ཚང་མ་བདེ་བ་འདོད་མཁན་གཅིག་མཚུངས་ཡིན་སྟབས། ཚང་མར་བདེ་བ་བསྒྲུབ་རྒྱུའི་ཐོབ་ཐང་གཅིག་མཚུངས་སུ་ཡོད་སྐོར་གསུངས་འདུག་ལ། སྐབས་དེར་མང་ཚོགས་ཁྲོད་བོད་ཀྱི་རྒྱལ་དར་བསྒྲེངས་འཛུགས་བྱེད་བཞིན་པར་གཟིགས་ཏེ། “ ངོས་རང་ ༡༩༥༤ ལོར་རྒྱ་ནག་ཏུ་བསྐྱོད་སྐབས། མའོ་ཙེ་ཏུང་གིས་བོད་མི་ཚོས་རང་ལ་རྒྱལ་དར་ཞིག་ཡོད་པ་དེ་བེད་སྤྱོད་གཏོང་དགོས་པ་རེད་ལབ་སོང་། དེར་བརྟེན་ཁྱེད་ཚོས་བོད་ཀྱི་རྒྱལ་དར་འཕྱར་སྐབས་གཞན་གྱིས་དགག་པ་བརྒྱབ་ན། མའོ་ཙེ་ཏུང་གིས་བོད་ཀྱི་རྒྱལ་དར་ལ་དགག་པ་བརྒྱབ་ཡོད་པ་མ་རེད་ཅེས་ལེན་འདེབས་དགོས ” ཞེས་གསུངས་འདུག
ཉིན་རྒྱབ་༧གོང་ས་མཆོག་གིས་ཁུལ་དེའིོ་ལི་ཡན་ཌོ་ཝ་ལེ་རིག་གཞུང་བསྟི་གནས་ཁང་ཞེས་པར། མེག་སི་ཁོའི་ཤེས་ཡོན་ལམ་སྟོན་པ་ ༡༠༠༠ ཙམ་ལ་༼ སེམས་བཟང་པོ་དང་ཤེས་རབ་གོང་འཕེལ་གཏོང་ཐབས་ ༽སྐོར་གྱི་བཀའ་སློབ་གནང་ཡོད་པ་མ་ཟད། ཁོང་གི་བཀའ་སློབ་དེ་མེག་སི་ཁོ་རྒྱལ་ཡོངས་གྲགས་ཅན་བརྙན་འཕྲིན་ཨ་ཛི་ཊེཀ་ (Azteca TV) ནང་ཐད་གཏོང་བྱས་འདུག ཉིན་དེར་ཨ་རིའི་གློག་བརྙན་འཁྲབ་སྟོན་པ་རི་ཆཱ་ཊི་གྷར་ལགས་ཀྱིས་གཙོ་འགན་འཁུར་བའི་༼རྗེས་དྲན་དང་བཟོད་སྲན་གྱི་འགྲེམས་སྟོན་༽དབུ་འབྱེད་མཛད་སྒོར་ཕེབས་ཏེ། གསར་འགོད་པ་ ༢༠༠ ལྷག་ལ་ཐེངས་འདིའི་པར་རིས་འགྲེམས་སྟོན་དེ་བོད་ཀྱི་དངོས་ཡོད་གནས་ཚུལ་ཤེས་རྟོགས་ཡོང་རྒྱུར་ཕན་ཐོགས་ཆེན་པོ་ཡོད་སྐོར་གསུངས་ཤིང་། འགྲེམས་སྟོན་དེར་ཆིབས་སྒྱུར་མ་གནང་གོང་མེག་སི་ཁོའི་ནང་སྲིད་བློན་ཆེན་ཟུར་པ་དང་གྲོས་ཚོགས་འཐུས་མི་སྐུ་ཞབས་སན་ཊི་ཡ་གོ་ཁི་རིལ་མི་རན་ཌ་ (Senator Santiago Creel Miranda) མཆོག་དང་མཇལ་འཕྲད་གནང་འདུག དེའི་རྗེས་ཁུལ་དེའི་མེ་ཊོ་པོ་ལི་ཊན་ཚོགས་ཁང་ཆེན་མོའི་ནང་ས་གནས་མང་ཚོགས་ ༣༥༠༠ ཙམ་ལ་དགེ་བཤེས་གླང་རི་ཐང་པས་མཛད་པའི་༼བློ་སྦྱོང་ཚིག་བརྒྱད་མའི་༽ཆོས་འབྲེལ་བཅས་གནང་ཡོད།
༧གོང་ས་མཆོག་གིས་མེག་སི་ཁོའི་དུས་ཡུན་ཉིན་གསུམ་རིང་གི་མཛད་འཕྲིན་ཁག་ལེགས་པར་བསྐྱངས་རྗེས། ཕྱི་ཚེས་ ༡༣ ཉིན་ཨར་ཅིན་ཊི་ཎའི་ཕྱི་འབྲེལ་ཚན་པ་དང་ཡུལ་དེའི་བཀའ་བརྒྱུད་ཚོས་ཚོགས་གཉིས་ཀྱི་ཕེབས་བསུའི་ཁྲོད། རྒྱལ་ས་རྒྱལ་ས་བྷོ་ནོ་སི་ཨ་རི་སི་རུ་ (Buenos Aires) ཆིབས་བསྒྱུར་བསྐྱངས་ཏེ། ཨར་ཅིན་ཊི་ཎའི་གྲོས་ཚོགས་འཐུས་མི་ལྕམ་སྐུ་མ་རི་ཡ་ལུར་ (Dr./Ms. Maria Laura Leguizamon) མཆོག་དང་མཇལ་འཕྲད་གནང་ཡོད་འདུག་ལ། མཇལ་འཕྲད་གྲུབ་རྗེས་ཡུལ་དེའི་ཁོ་སི་ལོའི་ཚོགས་ཁང་ཆེན་མོ་རུ་ས་གནས་མི་མང་ ༢༠༠༠ བརྒལ་བར། ༼གཞོན་སྐྱེས་ཚོར་སློབ་གསོ་སྤྲད་དེ་འཛམ་གླིང་བཟང་དུ་གཏོང་ཐབས་༽ཞེས་པའི་བརྗོད་གཞིའི་ཐོག་བཀའ་སློབ་གནང་སྟེ། “ དུས་རབས་ཉེར་གཅིག་པ་དེ་གཞོན་སྐྱེས་ཚོར་དབང་ཡོད་སྟབས། དུས་རབས་འདིར་ཞི་བདེ་དང་ཡར་རྒྱས། འཆམ་མཐུན། བརྟན་ལྷིང་ཡོང་མིན་གཞོན་སྐྱེས་ཚོར་རག་ལས་ཡོད་ལ། ཤེས་ཡོན་རྐྱང་པས་ཞི་བདེ་བསྐྲུན་ཐུབ་ཀྱི་མེད་པར། ཞི་བདེ་དང་བདེ་སྐྱིད་ངོ་མ་ནི་བྱམས་དང་སྙིང་རྗེ་ལས་ཡོང་དགོས་པ་རེད ” ཞེས་གསུངས་ཡོད།
ཕྱི་ཚེས་ ༡༦ ཉིན་ནས་༧གོང་ས་མཆོག་གིས་མུ་མཐུད་དུ་བྷར་ཟིལ་ཡུལ་དུ་མཛད་འཕྲིན་ཁག་བསྐྱང་རྒྱུ་ཡིན་འདུག
གསར་འགོད་པ། དཔལ་ལྡན།
སྐྱབས་སུ་མཆི། ངོ་མ་བོད་པ་ཚང་ལ་འདི་འདྲ་བའི་སྐྱེ་བུ་འགའ་ཤས་ཤིག་ཡོད་ན་འཛམ་གླིང་སུམ་གཉིས་ཀྱི་བདག་པོ་འགྱུར་བ་ལ་ངལ་དུབ་ཅི་ཞིག་ཡོད།