དབུས་བོད་མིའི་སྒྲིག་འཛུགས་ཀྱིས་རྒྱ་ནག་གཞུང་ལ་འབོད་སྐུལ་ཞུས་ཏེ་རྔ་པ་ཁུལ་དུ་རང་ལུས་མེར་བསྲེགས་ཀྱི་གནས་ཚུལ་སྔ་ཕྱིར་འབྱུང་བཞིན་པ་དེ་དག་ལ་འགན་འཁུར་དགོས་ཟེར།
ཁ་སང་ཕྱི་ཚེས་ ༡༠ ཉིན་དབུས་བོད་མིའི་སྒྲིག་འཛུགས་ཀྱིས་རྒྱ་ནག་གཞུང་གིས་བོད་ནང་རང་ལུས་མེར་བསྲེགས་ཀྱིས་ལས་འགུལ་སྤེལ་མཁན་རྣམས་ལ་དྲག་གནོན་རབ་དང་རིམ་པ་བྱེད་བཞིན་པ་རྣམས་ཀློད་གྲོལ་དང་ཛ་དྲག་གི་གནས་སྟངས་ཞི་འཇགས་ཡོང་ཆེད། རྒྱ་ནག་གཞུང་དང་རྒྱལ་སྤྱིའི་སྤྱི་ཚོགས་ལ་འབོད་སྐུལ་གྱི་གསལ་བསྒྲགས་ཤིག་སྤེལ་འདུག
གསལ་བསྒྲགས་དེའི་ནང་། འདི་ལོའི་ཕྱི་ཟླ་ ༣ པའི་ཚེས་ ༡༠ ཉིན་གྱི་གསུམ་བཅུའི་དུས་དྲན་ཐེངས་ ༥༢ སྲུང་གཙི་བྱས་པ་ནས་བཟུང་། བོད་བྱང་ཤར་རྔ་པ་ཁུལ་དུ་བོད་མི་ ༦ དང་དཀར་མཛེས་ཁུལ་དུ་བོད་མི་ ༡ བཅས་བསྡོམས་བོད་མི་བདུན་གྱིས་རང་ལུས་མེར་བསྲེགས་བཏང་སྟེ། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ས་བཙན་བཟུང་བྱས་པར་ངོ་རྒོལ་དང་བོད་མི་ཚོར་རང་དབང་སྤྲོད་དགོས་པའི་འབོད་ཚིག་བསྒྲགས་ཡོད་པ་དང་། རྒྱ་ནག་གཞུང་གིས་བོད་ནང་འབྱུང་བཞིན་པའི་དོན་རྐྱེན་སྟངས་འཛིན་བྱེད་ཕྱོགས་དེར་དབུས་བོད་མིའི་སྒྲིག་འཛུགས་ཀྱིས་སྐྱོན་བརྗོད་ཤུགས་ཆེ་བྱེད་རྒྱུ་ཡིན་ལ། བོད་མིའི་དངོས་ཡོད་དཀའ་ངལ་གྲོས་མོལ་གྱི་ལམ་ནས་སེལ་རྒྱུའི་ཚབ་ཏུ་ཉེན་རྟོག་པ་དང་དམག་མིས་རང་ལུས་མེར་བསྲེགས་གཏོང་མཁན་གྱི་བོད་མི་ཚོ་འཛིན་བཟུང་བཀག་ཉར་དང་རྡུང་རྡེག་བྱས་པའི་གནས་ཚུལ་ཐོན་ཡོད། ཅེས་བཀོད་འདུག
གསལ་བསྒྲགས་ནང་མུ་མཐུད་དུ། རྒྱ་ནག་གཞུང་གིས་བྱ་སྤྱོད་དེ་དག་གཞི་རྩའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ཙམ་མ་ཟད། རང་གི་ཡུལ་ཁྲིམས་དང་ཡང་ཡོངས་སུ་འགལ་བ་ཞིག་ཆགས་ཡོད་སྟབས། རྒྱ་ནག་གཞུང་གིས་རང་ལུས་མེར་བསྲེགས་བཏང་སྟེ་རྨས་སྐྱོན་ཕོག་པ་རྣམས་འཕྲལ་མར་ཀློད་གྲོལ་བཏང་སྟེ་ཁོང་ཚོར་སྨན་བཅོས་ཚུལ་ལྡན་གནང་རྒྱུའི་འབོད་སྐུལ་དང་། བོད་མི་ཚོ་དང་ལྷག་པར་འཛམ་གླིང་ཡུལ་ཕྱོགས་གང་སར་ཡོད་པའི་བོད་མིར་སེམས་ཐག་ཉེ་བའི་མཛའ་གྲོགས་ཚོས་རྔ་པའི་མི་མང་ཚོར་གདུང་སེམས་མཉམ་སྐྱེད་ཐོག་བོད་ནང་གི་ཛ་དྲག་གི་གནས་སྟངས་དེ་བཞིན་རྒྱལ་སྤྱིའི་སྟེང་གསལ་སྟོན་དང་། རྒྱལ་སྤྱིའི་ཚོགས་སྡེ་ཁག་ནས་བོད་ཀྱི་གནད་དོན་དེ་གྲོས་མོལ་གྱི་ལམ་ནས་སེལ་ཐབས་ཡོང་སླད་གནོན་ཤུགས་སྤྲོད་དགོས་པའི་འབོད་སྐུལ་ཞུ་རྒྱུ་ཡིན། ཞེས་འཁོད་འདུག
གསར་འགོད་པ། དོན་གོ
བཀའ་བློན་ཁྲི་པ་བློ་བཟང་སེང་གེ་མཆོག་ལ་ཞུ་རྒྱུ། ད་ལྟའི་ང་ཚོའི་བོད་ཀྱི་གནས་སྟངས་དེ་ཛ་དྲག་གི་ཐོག་ལ་ཡོད་པ་ཁྱེད་ཀྱིས་ལོས་ཤེས། འོན་ཀྱང་ཁྱེད་རང་ཁུང་སིམ་མེ་ག་རེ་གནང་སོང་། བོད་མི་ཚོའི་ཁྱེད་རང་ལ་གཞན་ལས་ཁྱད་དུ་འཕགས་པའི་མཁས་དབང་ཞིག་གཞོན་སྐྱེས་འཇོན་ཐང་ཅན་ཞིག་ལ་ངོས་འཛིན་བྱས་ནས། ང་ཚོ་བོད་མི་ཚོའི་ཁྱེད་རང་ལ་འོས་བླུགས་པ་རེད། ད་དུང་ཁྱེད་རང་འདི་འདྲ་ཞིག་བསྡད་ན་འགྲིག་གམ། ཁྱེད་ཀྱིས་ཅི་ནས་ཀྱང་གཞིས་བཞུགས་སྤུན་ཟླ་ཡོངས་ལ་ཐུགས་བསམ་བཞེངས་ནས། འབོད་སྐུལ་དང་དྲིལ་བསྒྲགས་ཙམ་མ་ཡིན་པ། དོན་ཕན་ལྡན་པའི་ལས་འགུལ་ཞིག་སྤེལ་དགོས་པ་སྙམ། ཁོང་རྣམས་ནི་ཉིན་རེ་ཉིན་རེ་བཞིན་སྡུག་བསྔལ་ཆེ་རུ་འགྲོ་བ་དང་། རྒྱ་གཞུང་གིས་དྲག་གནོན་དང་སྡུག་རྩུབ་ཆེ་རུ་འགྲོ་གི་ཡོད། ཁྱེད་ཀྱིས་ཅི་ནས་ཀྱང་ཐུགས་བསམ་བཞེངས་རོགས་ཞུ་རྒྱུ་ཡིན།
སྤུན་ཟླ་ཚོ་ག྄ཞུང་འཛིན་མི་སྣ་ཚོས་མ་འཇོན་རབ་དང་ཐོས་ཤོར་སོང་རབ་རྐྱང་རྐྱང་བཤད་ནས་དགེ་མཚན་ཞིག་ཡོད་དམ།. དཔེར་ན་ཀླུ་མཁར་དང་ལྷ་བཟང་སོགས་མང་པོས་བོད་དོན་བརྩོད་དགོས་ན་ཁྲག་དང་རྣག་གི་འགྲོ་སོང་མ་བཏང་ན་ཡོང་ཐབས་མེད་རབ་བཤད་མཁན་ཚོ་ལ་གཅིག་ལྟོས་དང་གོ་ཐོས་ཙམ་ཡང་མི་འདུག་གོ། ་་་ངོ་མ་ཁ་སྟོང་ནང་གི་ཚིག་སྟོང་བཤད་མཁན་ཚོ་ལ་རྒྱུས་ལོན་ཡག་པོ་བྱུང་ཚོད་ཡིན། ་་་གང་ལྟར་བཙན་བྱོལ་གཞུང་ལས་རེ་བ་རྒྱག་ས་ཞིག་མེད་པ་གསལ་བོ་ཆགས་ཡོད། ་
རྒྱབ་སྐྱོར་དང་ཡི་རངས་རོད།
དྲང་མོར་བཤད་ན་བོད་མིའི་སྒྲིག་འཛུགས་གིས་འབོད་སྐུལ་ཙམ་དོན་ཕན་ལྡན་པའི་ལས་འགུལ་ཞིག་སྤེལ་ཤེས་ཀྱི་མེད་པ་དེ་རེད། གཞུང་འབྲེལ་མ་ཡིན་པའི་ཚོགས་ཁག་གིས་འཆར་ཅན་གྱི་ལས་འགུལ་རབ་དང་རིམ་པ་མང་པོ་ཞིག་སྤེལ་ཡོང་དུས་སྒྲིག་འཛུགས་ཀྱི་ངོས་ནས་ཀྱང་རྣམ་འགྱུར་ཞིག་མ་བསྟན་རང་སྟོན་ཆགས་པ་ཙམ་རེད། དེ་ཡང་འཆར་ཅན་གྱི་ཚིག་རིས་ཙམ་བརྗོད་དེ་རྣམ་འགྱུར་ཉམ་ང་བ་ཞིག་བསྟན་པ་རེད། ཡང་གཅིག་བསམ་ན། བྱེ་མ་བཙུར་ནས་ཆུ་ཡི་དཔེ་ལྟར་ཡིན་པ་འདྲ། དེ་མིན་མི་རབས་གསར་བའི་སྒྲིག་འཛུགས་གཞུང་འཛིན་པ་རྣམ་པའི་ཁྱད་དུ་འཕགས་པའི་རྣམ་དཔྱོད་དེ་བེད་སྤྱོད་གཏོང་བའི་དུས་ལ་སླེབ་ཡོད་འདུག གཞན་དུ། ཁ་བཤད་ཆུ་ཡི་ལྦུ་བ། ལག་ལེན་གསེར་གྱི་ཐིགས་པ་ཞེས་ཀྱང་ཞུ་བར་ཐལ་ལོ།།
ཐུགས་རྗེ་ཆེ།
རྒྱལ་ཁབ་དང་རྒྱལ་ཁབ་བར་ལ་གྲོས་མོང་མང་དྲག་པ་འགྲོ་གི་མ་རེད།
དྲྭ་གྲོགས་ཚོ་ཁ་བརྒྱག་པ་མ་གསུངས་ན་ཡག་གི་རེད། ལོ་རྒན་ལྔ་བཅུའི་ནང་དུ་འབོད་བསྐུལ་དང་གྲོས་མོལ་སོགས་བརྒྱུད་ནས་བོད་དོན་འདི་དེང་སྐབས་འཛམ་གླིང་གི་སྒང་ཐོན་ཐུབ་པ་བྱུང་བ་ནི་གྲུབ་འབྲས་ནང་གི་གྲུབ་འབྲས་ཆེས་ཤོས་རེད།
དེ་མིན་ད་དུང་་ཡང་་དེ་ལྟར་བྱེད་རྒྱུ་ལས་གནས་སྐབས་ཐབ་གཞན་ཅི།
ལས་འགུལ་འདི་དག་ཧ་ཅང་ཡག་པོ་རེད། མཁས་དབང་བཀའ་ཁྲི་བློ་བཟང་སེང་གེ་མཆོག་འགའ་ཁྲི་ལ་ཐོན་ནས་ད་བར་ལས་འགུལ་གང་ཞིག་སྤེལ་དང་སྤེལ་བཞིན་ཡིན་པ་བོད་མས་བསྒྲིག་འཛིག་གྱི་དྲྭ་བ་ལ་གཟུགས་དང་། ་དེ་མིན་དགྲ་དཀའ་གཉེན་སྡིག་གི་བཀའ་མོལ་མ་གསུངས་ན་ཡག་གི་རེད། རྒྱུན་དུ་ཕལ་ཕྱོགས་ཀྱི་མ་ཐོན་རབ་སྐྱང་སྐྱང་གསུངས་པ་ལས་རང་ཉིད་ཀྱི་ཉིན་གཅིག་ཀྱང་བོད་མི་རིག་གྱི་རྩ་དོནལ་ཕན་པ་གང་ཞིག་བསྒྲུབ་ཡོད་མེད་ཀྱང་ཐུགས་བསམ་ཐོང་། འོས་ལང་ས་ལགས་ཁྱེད་རང་བཀའ་ཁྲི་མཆོག་ལ་སྒེར་གྱི་ཞེ་མཁོན་ཡོད་ཀྱང་དེང་སྐབས་ཁོང་བོད་མི་ས་ཡ་དྲུག་གི་ཆབ་ཁྲིད་ཀྱི་དབུ་འཛིན་རེད། དེས་ན་ཁྱེད་ཀྱི་ཁོང་ལ་རྒྱ་དམར་གོང་ཁྲན་གི་མིང་འདོག་བཞིན་བློ་སེང་ཞེས་བོས་ན་དགྲ་དགའ་གཉེན་སྡིག་ལས་གཞན་གང་ཡང་མེད། དེས་ན་རང་ཉིད་བོད་མིའི་ཡུལ་མི་ཞིག་ཡིན་པ་ནམ་ཡང་མ་བརྗེད་ཅེས་གུས་པས་འབོད་བསྐུལ་ཙམ་ཞུས་ན་ཞུ་ཧམ་དུ་མི་དགོངས་པ་མཁྱེན་ལགས།
འབོད་སྐུལ་འདི་སྤྱིར་བཏང་བ་ཞིག་རེད། ཉམ་ཆུང་ཞིག་རེད། འཛིན་སྐྱོང་བཀའ་ཤག་ནས་རང་གི་དབང་ཚད་སྤྱད་ནས་དོན་གཅོད་ཁང་དང་བོད་རིགས་ཚོགས་པ་ཁག་ལ་ལས་འགུལ་སྤེལ་དགོས་པའི་བཀའ་ཁྱབ་གཏོང་མི་ཐུབ་པ་ག་རེ་ཡིན་ན། ག་དུས་ཡིན་ན་རེ་འབོད་་རེ་སྐུལ། ང་ཚོ་ལྟ་བུའི་ཚོགས་པ་ཆུང་ཆུང་དང་མི་སྒེར་བ་དག་གིས་རེ་སྐུལ་མ་གཏོགས་ཞུ་ཐུབ་རྒྱུ་དཀའ། བཀའ་ཁྲི་བློ་སེང་དང་ཁོང་གི་བཀའ་ཤག་ཀྱང་ང་ཚོ་འདྲ་བོ་ཞིག་ཆགས་སོང་རེད་དམ།
ཁ་སང་དེ་རིང་ཨ་མདོ་རྔ་བ་ས་ཁུལ་མི་དམངས་རྣམས་སྡུག་བསྔལ་གྱི་གནས་སུ་ལྷུང་ཡོད་ལ། རྒྱལ་གཅེས་དཔའ་དག་གི་ཚེ་སྲོག་རིན་ཐང་ཅན་པོ་དེ་བསམ་ན་རྔ་བའི་མི་དམངས་ལ་དངོས་གནས་ཁག་ཅི་ལ་ཡོད། གོ་ཐོས་ལྟར་ན་ཁ་སང་དེ་རིང་རྔ་བའི་ཁྲོམས་གཞུང་ན་ར་མ་མང་པོའི་སྐེ་ལ་བོད་ལ་རང་དབང་དགོས་སྐོར་ཡིག་བྱུང་བཏགས་ནས་ཡོད་པས། ཉེན་རྟོགས་པ་དག་གིས་ར་མ་མང་བོ་དེ་ཡང་འཛིན་བཟུང་བྱེད་ཀྱིན་ཡོད་པས་གནས་ཚུལ་འདུག ཅིག་གིས་མཐོང་ན་དགོད་སྐྱེད་ཅིག་ཡིན་ས་རེད་ལ། དམངས་ཀྱི་གཉའ་བ་ཞོན་མཁན་གྱི་སྲིད་གཞུང་ཞིག་གི་ཇུས་ཀ་ངོ་མ་འདི་འདྲ་ཞིག་རེད། གནས་ལུགས་ཞུ་བ་དེ་རྡོག་འོག་ན་ཡོད་ཡོད་པའི་སྲིད་གཞུང་དེའི་འོག་ནས་དངོས་གནས་མི་དམངས་ཀྱིས་དཀའ་ངལ་མྱོངས་བ་དག་ནི་སྨྲ་བརྗོད་ཀྱི་ཡུལ་ལས་འདས་པ་ཞིག་རེད་ལ། མཉམ་འབྲེལ་རྒྱལ་ཚོགས་ཞུ་བའི་གྲགས་པ་ཅན་པོ་དེས་ཀྱང་སྲིད་གཞུང་འདི་བ་ཚང་ལ་སྐད་ཆ་ཞིག་ཤོད་མྱོང་མེད།
རང་གཞུང་བཀའ་ཤག་གི་ངོས་ནས་ཀྱང་རྔ་བ་ལྟ་བུའི་ས་ཁུལ་དག་ལ་ནང་མོལ་གྱི་ལམ་སྟོན་ཞིག་བྱས་ན་མི་འགྲིག་པ་ཡོད་རྒྱུ་མ་རེད་ཀི།
ལོ་རྒན་ལྔ་བཅུའི་ནང་དུ་འབོད་བསྐུལ་དང་གྲོས་མོལ་མང་མ་དྲག་ན་ཉུང་དྲག་མེད་གྲུབ་འབྲས་གང་ཐོན་སོང།
ཉམས་ཞིན་ཡག་པོ་གྱིས་དང།
ད་བཀའ་ཤག་གསར་པས་འཆར་གཞི་དང་ལས་འགུལ་གསར་པ་གང་མེད་དམ།
འབོད་སྐུལ་ཙམ་གྱིས་མི་འགྲིག་པར་མི་མང་དང་སྤྱི་ཚོགས་ཀྱི་སྣེ་ཁྲིད་དགོས། སྔོན་ཆད་བཀའ་ཁྲི་བློ་སེང་གིས་ཨོ་སྦ་མ་ནང་བཞིན་འགྱུར་བ་ཡང་བཤད་བསྡད་པ་རེད། བོད་ནང་གི་རྒྱལ་གཅེས་དཔའ་བོ་ཁོང་ཚོའི་ཁ་ཚེམས་དང་འབོད་སྒྲ་དེ་དག་ལ་ནན་གྱིས་གསན་དགོངས་གནང་རོགས།