དེ་རིང་དབུ་མའི་ལམ་ལས་འགུལ་ཁང་གིས་ཛ་དྲག་གི་གསར་འགོད་གསལ་བསྒྲགས་སྤེལ་ཏེ། རྒྱ་གཞུང་གིས་བོད་ནང་དྲག་གནོན་མཚམས་འཇོག་བྱས་ཏེ། བོད་རྒྱ་འབྲེལ་མོལ་བསྐྱར་གསོ་དགོས་པའི་རེ་འདུན་བཏོན་སོང་ལ། བོད་པ་མི་རེ་ངོ་རེ་ནས་ནུས་པ་འདོན་རྒྱུའི་དུས་ལ་སླེབས་ཡོད་པའི་སྐུལ་མ་ཡང་གནང་བྱུང་།
དེ་རིང་ཕྱི་ཚེས་ ༤ ཉིན་གྱི་སྔ་དྲོའི་ཆུ་ཚོད་ ༡༡ སྟེང་ངྷ་ས་མེག་གྷན་ཆོལ་གསུམ་ཆིག་སྒྲིལ་ཚོགས་པའི་ཚོགས་ཁང་དུ། དབུ་མའི་ལམ་མི་མང་ལས་འགུལ་ཁང་གིས་ཛ་དྲག་གསར་འགོད་གསལ་བསྒྲགས་ཤིག་བསྐྱངས་སོང་། གསར་འགོད་ལྷན་ཚོགས་ཐོག་དབུ་མའི་ལམ་ལས་འགུལ་ཁང་གི་ཚོགས་གཞོན་སྤྱི་ཟུར་ཡོན་ཏན་རྒྱ་མཚོ་ལགས་ཀྱིས་ད་ལྟའི་བོད་ནང་གི་གནས་སྟངས་ངོ་སྤྲོད་གནང་སྟེ། ད་ལོའི་ཕྱི་ཟླ་ ༣ ཚེས་ ༡༦ ཉིན་ནས་ཟླ་འདིའི་ཕྱི་ཚེས་ ༤ ཉིན་བར། བོད་ནང་བོད་མི་ ༡༡ གིས་བོད་མིའི་རང་དབང་ཆེད་སྐུ་ལུས་མེར་བསྲེགས་བཏང་བ་དེས། བོད་ནང་ལག་བསྟར་བྱེད་བཞིན་པའི་རྒྱ་གཞུང་གི་སྲིད་བྱུས་ནོར་འཁྲུལ་ཡིན་པ་དང་། ༧གོང་ས་མཆོག་དང་བོད་མིའི་སྒྲིག་འཛུགས་གཉིས་བོད་མིའི་མགྲིན་ཚབ་པ་ཡིན་པ་ར་སྤྲོད་གསལ་པོ་བྱས་ཡོད་པ། བོད་མི་དེ་དག་གིས་བོད་ནང་གི་ཆོས་དད་རང་དབང་དང་རྩོམ་འབྲིའི་རང་དབང་། འགྲོ་བ་མིའི་ཐོབ་ཐང་སྲུང་སྐྱོབ། ༧གོང་ས་མཆོག་བོད་དུ་གདན་ཞུ་དགོས་པའི་འབོད་ཚིག་བསྒྲགས་པ་སོགས་ནི། འབྲེལ་མོལ་ཐེངས་ ༨ པའི་སྐབས་རྒྱ་གཞུང་ལ་སྤྲད་པའི་༼ བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་༽དང་། དེའི་༼རྒྱབ་ལྗོངས་འགྲེལ་བཤད་༽ཀྱི་དགོངས་དོན་དང་ཡོངས་སུ་མཐུན་པས། རྒྱ་གཞུང་གིས་རང་སྲོག་བློས་བཏང་བའི་བོད་མིའི་མངོན་འདོད་རྡོག་རོལ་མི་གཏོང་བར་དྲག་སྤྱོད་མཚམས་འཇོག་དང་། རྔ་པ་དང་དཀར་མཛེས་ཁུལ་གྱི་དམ་དྲག་སྲིོད་བྱུས་ཕྱིར་འཐེན་གྱིས། རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་གཞི་རྩར་བཞག་སྟེ་འབྲེལ་མོལ་བསྐྱར་གསོ་དགོས་སྐོར་སོགས་བརྗོད་ཡོད།
བསྒྲགས་ཡིག་དེའི་ནང་དགོས་འདུན་ཁག་ཅིག་བཏོན་ཡོད་པ་ནི། “ གཅིག རྔ་པ་ཀིརྟི་དགོན་དང་རྟའུ་ཉ་མཚོ་དགོན་པ་གཙོས་པའི་བོད་ཀྱི་དགོན་སྡེ་ཁག་ཏུ། ཆོས་ལུགས་ཀྱི་ནོར་འཁྲུལ་སྲིད་བྱུས་རྒྱལ་གཅེས་ཆོས་གཅེས་ཟེར་བ་དང་། ཡང་སྲིད་དོ་དམ་བྱེད་ཕྱོགས་ཡིག་ཆ་ཨང་ ༥ ཟེར་བ་སོགས་ཀྱི་དམ་དྲག་སྲིད་བྱུས་ཕྱིར་འཐེན་གྱིས། གྲྭ་བཙུན་ཚོར་གྲོས་བསྡུར་ཐབས་ལམ་བརྒྱུད་ཁོང་ཚོའི་མངོན་འདོད་ལག་བསྟར་དགོས་རྒྱུ། གཉིས། རྒྱ་ནག་གི་སྲིད་བློན་ཝུན་ཅཱ་པའོ་གཙོས་པའི་ཆེས་མཐོའི་དཔོན་རིགས་ཚོ། མེར་བསྲེགས་དོན་རྐྱེན་བྱུང་སའི་རྔ་པ་དང་དཀར་མཛེས་ཁུལ་དུ་ཕེབས་ཏེ། ས་གནས་མང་ཚོགས་ཀྱི་བསམ་ཚུལ་ལ་གསན་ཞིབ་གནང་རྒྱུ་དང་། རྒྱལ་སྤྱིའི་རྟོག་ཞིབ་སྡེ་ཚན་དང་གསར་འགོད་པའི་ཚོགས་པ་ཞིག་བོད་ནང་བསྐྱོད་དེ་དངོས་ཡོད་གནས་སྟངས་ལ་རྒྱུས་ལོན་དགོས་རྒྱུ།
གསུམ། སྐུ་གཤེགས་བོད་མི་ ༡༡ གཙོས་བོད་ཀྱི་བདེན་དོན་ཆེད་རང་སྲོག་བློས་གཏོང་མཁན་ཚོར་བཀའ་དྲིན་རྗེས་དྲན་དང་། ཁོང་ཚོའི་ཞལ་ཆེམས་མངོན་འགྱུར་ཡོང་བར་ང་ཚོའི་ངོས་ནས་གང་ཐུབ་གནང་རྒྱུ་དང་། རྒྱལ་ཚོགས་དང་ཨ་རིའི་གཞུང་། ཡུ་རོབ་གྲོས་ཚོགས་དང་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་ཁག་གིས། བོད་ནང་ཛ་དྲག་གནས་སྟངས་ཐོག་སྔར་ལས་རྒྱབ་སྐྱོར་ཡོང་བར་འབོད་སྐུལ་ཞུ་རྒྱུ། བཞི། ཉེ་ཆར་ཨ་རིའི་ཧར་ཝར་ཌི་གཙུག་ལག་སློབ་ཆེན་གྱི་མཁས་དབང་སྐུ་ཞབས་ཡཱང་ཅན་ལིས་སྣེ་ཁྲིད་པའི་རྒྱ་རིགས་ཤེས་ཡོན་ཅན་དང་རྩོམ་པ་པོ་ ༢༠༠ ལྷག་གིས། ས་རྟགས་བསྡུ་རུབ་ཀྱིས་བོད་ནང་ལག་བསྟར་བྱེད་བཞིན་པའི་རྒྱ་གཞུང་གི་ནོར་འཁྲུལ་སྲིད་བྱུས་ལ་གསལ་ཁ་འདོན་པ་དང་། ཨ་རི་དང་འཇར་མན་དུ་རྟེན་གཞི་བྱས་པའི་རྒྱ་ནག་དམངས་གཙོ་ཚོཊ་པ་ཁག་གིས་ས་རྟགས་བརྒྱབ་པའི་སྙན་ཞུ་དེ། རྒྱལ་ཚོགས་དང་ཨ་རིའི་གཞུང་། ཡུ་རོབ་སྤྱི་མཐུན་བཅས་ལ་འབུལ་འཆར་ཡོད་པར་བསྔགས་བརྗོད་ཞུ་རྒྱུ་ ” ཞེས་འཁོད་འདུག
དེའི་ཐད་དབུ་མའི་ལམ་ལས་འགུལ་ཁང་གི་མགོ་ལོག་དམ་ཆོས་དཔལ་བཟང་ལགས་ཀྱིས་བརྗོད་དོན། “ ཁ་སང་དེ་རིང་བོད་ནང་གི་གནས་ཚུལ་རེ་རེ་ཐོས་ཡོང་སྐབས། སྡོད་མ་ཚིགས་པ་ཞིག་དང་འགྲོ་མ་ཤེས་པ་ཞིག་ཡོང་གི་འདུག བོད་པ་མི་རེ་ངོ་རེ་ཡིས་ནུས་པ་འདོན་རྒྱུའི་དུས་ཚོད་བསླེབས་ཡོད། ད་ལྟ་ལས་འགུལ་ནང་ཞུགས་ཐུབ་མཁན་ཚོ་ལས་འགུལ་ནང་ཞུགས། ཞུགས་མི་ཐུབ་མཁན་ཚོས་སྒོར་མོའི་ཞལ་འདེབས་གནང་དགོས་ཀྱི་འདུག ཆོས་བསྒྲུབ་མཁན་ཚོས་ཆོས་ཕྱོགས་ནས་ལས་ཀ་བྱས་ཏེ། ཚང་མ་མཉམ་རུབ་ཐོག་ལས་འགུལ་མཐར་འཁྱོལ་པ་ཞིག་སྤེལ་དགོས་ཀྱི་འདུག ང་རང་ལ་མཚོན་ན། ལུས་སེམས་གཉིས་ཀྱི་མི་ལྕོགས་ནའང་། བོད་ནང་མེར་བསྲེགས་བཏང་བའི་བོད་མི་ཚོར་ཉིན་རེར་མ་ཎི་ཆིག་ཁྲི་རེ་གསོག་བཞིན་ཡོད་ལ། སྒོར་མོ་ཡོད་མེད་ལ་མ་ལྟོས་པར་དུས་འཁོར་དབང་ཆེན་སྐབས་གྲྭ་པ་རེར་སྒོར་མོ་ ༡ རེ་འབུལ་རྩིས་ཡོད” ཅེས་བརྗོད་བྱུང་།
དབུ་མའི་ལམ་ལས་འགུལ་ཁང་ནི་ ༢༠༠༨ ལོར་གསར་དུ་བཙུགས་པ་ཞིག་ཡིན་ཞིང་། ད་ཆར་ཚོགས་པ་དེར་ས་གནས་ཁག་ ༢༥ ནང་ཚོགས་མི་༩༦ ཙམ་ཡོད་འདུག་ལ། ད་བར་དེབ་སྐྱེལ་བྱེད་མཁན་ ༡༥༠༠༠ ལྷག་བྱུང་ཡོད་འདུག
གསར་འགོད་པ། དཔལ་ལྡན།
གསར་འགོད་གསལ་བསྒྲགས་འདི་རིན་ཐང་ལྡན་པ་ཞིག་རེད།
ལ་ལ་ཞིག་གིས་འོག་གི་ཁ་བརྡའི་ནང་གི་དཔའ་རྒོད་ཚོའི་འབོད་ཚིག་ཕྱོགས་བསྡེབས་དེར་གཅིག་གཟིགས་དང་དེ་ནས་མངོན་འདོད་ངོ་མ་དེ་མཐོང་ཐུབ།
http://www.khabdha.org/
ཤར་ཕྱོགས་ཁུག་རྟ་ལ་གོ་ས་ཡག་པོ་ཐོབ་འདུག རྒན་དམ་ཆོས་དང་དྭངས་ཤར་གཉིས་ཀྱི་སར་སླེབས་འདུག དགའ་བསུ་ཞུ།
ཚེ་སྔོན་ལས་དབང་གིས་ཤ་ཁྲག་གཅིག་དང་རྒྱལ་ཁབ་གཅིག་གི་མི་ཡིན་པའི་དབུ་མའི་ལམ་གྱི་ལས་འགན་ཁང་གི་སྤུན་གྲོགས་རྣམས་པའི་དྲུང་དུ། གུས་པ་ཅོ་རི་ཡིས་ཁ་ཁོག་མེད་པར་སྐད་ཆ་དྲང་པོ་ཞུ་རྒྱུ་ཡིན།
དེ་ཡང་རང་རིགས་ནང་དུ་ཁུལ་དུ་བསམ་ཚུལ་མ་མཐུན་པ་དང་ལམ་ཕྱོགས་མ་མཐུན་པ། འཐབ་རྩོད་ཀྱི་ལམ་ཕྱོགས་མ་མཐུན་པ། མཐར་ཐུག་གི་མཇུག་འབྲས་མ་མཐུན་པ། ཐོབ་ཐང་གི་རྩོད་ལེན་མ་མཐུན་པ། འཐབ་རྩོད་ཀྱི་འབོད་ཚིག་མ་མཐུན་པ། རྒྱལ་སྤྱིའི་ཐོག་རེ་ཞུ་མ་མཐུན་པ། ཨ་རི་ལ་འབོད་སྐུལ་མ་མཐུན་པ། ཡུང་རོལ་ལ་སྙན་ཞུ་མ་མཐུན་པ་སོགས།
མི་མཐུན་སའི་ས་མཚམས་མང་ཙམ་ཡོད། ང་རང་ཚོ་ལ་མཐུན་ལམ་དང་ཆིག་སྒྲིལ་མེད་ན་ལས་འགུལ་གྱི་ནུས་པ་ཐོན་གྱི་མེད་པ་ཡང་ཕྲུ་གུ་ལོ་བརྒྱད་ཅན་གྱིས་ཀྱང་བཤད་ཀྱི་འདུག་ལ་དྲ་ཐོག་གི་ཤེས་ཡོན་པ་ཚོས་ཁ་གཅིག་གྲགས་རེད། བོད་གངས་པའི་ཕོ་ཉ་ཚོས་ཆིག་སྒྲིལ་ཞེས་གླུ་དབྱངས་ལེན་བཞིན་འདུག རྒྱུ་མཚན་ཆེན་པོ་གཅིག་རེད།
མེད་ཏུ་མི་རུང་བ་ནི་ཆིག་སྒྲིལ་། ཆིག་སྒྲིལ་་་་་་་་་་་་་མཐུན་ལམ་་་་་ཡིན་པར་ཆ་ཞོགས། དབུ་མ་ལམ་གྱི་ལས་འགུལ་ཁང་གིས་་་་བསྒྲགས་གཏམ་ནང་དུ་བོད་རང་དབང་རང་བཙན་ཞེས་པའི་ཚིག་ཙམ་ཡང་བཏོན་མེད་པ་ནི་་་་རང་ལུས་མཆོད་མེ་ཕུལ་མཁན་གྱི་རྒྱལ་གཅེས་པ་ཚོའི་རྣམ་ཤེས་ཀྱང་སེམས་སྐྱོ་ཡོད་ངེས་ཡིན། མ་ཟད་ཤུལ་ལུས་རྒྱལ་གཅེས་པ་ཚོའི་སེམས་སུ་སྨྲ་ཁ་བཟོ་ཡི་ཡོད། དེ་འདྲ་མ་གནང་རོགས། སྐྱེས་ཕ་བཟང་གི་བུ། བོད་རང་བཙན་གྱི་ཆེད་དུ་རང་སྲོག་བཏང་གི་ཡོད་པར་རྣམས་པ་ཚོས་མཁྱེན་ངེས་རེད།
བོད་ཀྱི་རྩ་དོན་ཆེད་དུ་ལས་འགན་སྤེལ་མཁན་ཞིག་བྱུང་ན་དེ་ཐུགས་རྗེ་བླ་མེད་ཞུ་མཁན་ཞིག་ཡིན། རང་གི་མི་འཇོན་གཞན་གྱི་ལས་དོན་ལ་འགག་པ་རྒྱུ་འདི་ཞེ་དྲག་གི་ལས་སླ་བོ་ཞིག་མ་ཡིན་པ་ཤེས་ཡོད། རྒྱབ་སྐྱོར་མཐའ་གཅིག་ཏུ་ཡོད།
དབུ་མ་ལམ་གྱི་ལས་འགུལ་ཁང་གིས་ག་རེ་བྱེད་ཀྱི་འདུག སྐུ་སྒེར་དྲུང་ཡིག་བྲེ་སྲང་དང་དབུ་མའི་ལས་འགུལ་ཁང་གིས་ད་བར་དུ་རྒྱ་མི་ལ་ལས་འགུལ་སྤེལ་རབས་གོ་མ་མྱོང་། བོད་པའི་ལས་འགུལ་བ་ཚོར་མགོ་རྡུང་སྤྲད་པ་གོ་མྱོང་། བོད་རང་བཙན་ཡིན་ཟེར་མཁན་ཚོ་རྒྱ་མིའི་སོ་བ་ཡུལ་ཚུལ་བསྒྲགས་པ་གོ་མྱོང་། གཞོན་ནུ་ཚོགས་པ་དང་༸རྒྱལ་བ་རིན་པོ་ཆེའི་བར་འགལ་བ་བཟོས་པ་གོ་མྱོང་ཡོད། དབུ་མའི་ལམ་ཟེར་བ་ཁ་ལ་ཁྱེར་ནས་བོད་པ་ནང་ཁུལ་སེམས་ཤུགས་ཅན་ཚོ་ལ་གནོད་ཤུགས་སྤྲད་པ་གོ་མྱོང་ཡོད། ནང་དཀྲུགས་བྱས་བ་གོ་མྱོང་ཡོད་ཡ།
ད་ཡང་བོད་ནང་གི་དཔའ་ཚོས་བྱས་རྗེས་དེ་དག་རྒྱ་རི་བླ་རྫུན་ལ་རྒྱ་ཚེ་ཞིམ་པོ་ཟ་རྒྱུ་གོ་སྐབས་ཙམ་ལ་མ་བརྗེ་རོགས། སྐུ་མཁྱེན།
བོད་དོན་ཆེད་གཞུང་དང་སྒེར་གྱི་ཚོགས་པ་གང་དང་མི་སྒེར་གང་ཡིན་ཡང་ལས་འགུལ་རིགས་ག་འདྲ་ཞིག་སྤེལ་མཁན་འབྱུང་ན་དེ་ལ་མཐའ་གཅིག་ཏུ་རྒྱབ་སྐྱོར་དང་ཡི་རངས་བྱེད་རན་འདུག
གནས་ལུགས་མི་དགོས་ས་ན་དྲག་གནོན་ཡོད་པ་རེད། དེ་ན་དམ་པ་མང་པོའི་གཟི་བརྗིད་ཀྱིས་བཞེངས་པའི་འོད་ཀྱི་དབུ་ཁྱུད་ཀྱང་དེ་རུ་ཡོད་ལ། དེ་ཡི་བདེན་དཔང་ནི་ད་ལྟའི་འུ་ཚང་གི་དཔའ་བོ་དཔའ་མོ་ཚོ་ཅི་ལ་མིན།
རྒྱལ་གཅེས་དཔའ་བོ་དཔའ་མོ་ཚོས་རང་སྲོག་བློས་བཏང་གིས་བོད་རང་དབང་རང་བཙན་གྱི་ཆེད་དུ་འཐབ་རྩོད་བྱས་དང་བཞིན་པ་རེད། ཡིན་ནའང་ཁ་ཡོད་ལག་གི་ཁེ་ཕན་གང་ཡང་ཐོབ་མེད།
འཐབ་རྩོད་པ་རྒྱལ་གཅེས་དཔའ་བོ་དཔའ་མོ་རྣམས་ཀྱིས་འབོད་ཚིག་དང་དམིགས་ཡུལ། རེ་བཞག་རྣམས་ཇི་མ་ཇི་བཞིན་ཡུང་རོ་གྲོས་ཚོགས་དང་རྒྱལ་སྤྱིའི་སྤྱི་ཚོགས་ནང་དུ་འགྲོ་ཐུབ་ཀྱི་མེད་པ་རེད།
རྒྱལ་གཅེས་དཔའ་བོ་དཔའ་མོ་ཚོས་ཤི་ཁའི་འབོད་ཚོག་གི་་ནང་དུ་་་བོད་རང་དབང་རང་བཙན་དགོས་ཟེར་བ་དང་༧གོང་ས་མཆོག་བོད་ཀྱི་མི་རྗེ་ཕོ་བྲང་པོ་ཏ་ལའི་ནང་དུ་ཁྲི་ལ་འཁོད་དགོས་ཞེས་པ་འདི་གཉིས་རེད།
རང་ལུས་གསོན་བསྲེགས་བྱས་པའི་རྒྱུ་མཚན་ཡང་བོད་རང་བཙན་ཐོབ་ཆེད་དང་༧གོང་ས་མཆོག་བོད་ཀྱི་མི་རྗེ་ལ་་ཕོ་བྲང་པོ་ཏ་ལའི་ཆོས་སྲིད་ཀྱི་བདག་དབང་བསྐྱར་གསོ་བྱེད་ཆེད་དུ་རེད།
དབུ་ལམ་གྱི་ལས་འགུལ་ཁང་གིས་ངོས་ནས་རྒྱལ་གཅེས་དཔའ་བོ་དཔའ་མོ་ཚོས་།།།།།་
།༼༼༼བོད་མི་དེ་དག་གིས་བོད་ནང་གི་ཆོས་དད་རང་དབང་དང་རྩོམ་འབྲིའི་རང་དབང་། འགྲོ་བ་མིའི་ཐོབ་ཐང་སྲུང་སྐྱོབ། ༧གོང་ས་མཆོག་བོད་དུ་གདན་ཞུ་དགོས་པའི་འབོད་ཚིག་བསྒྲགས་པ་སོགས་ནི། འབྲེལ་མོལ་ཐེངས་ ༨ པའི་སྐབས་རྒྱ་གཞུང་ལ་སྤྲད་པའི་༼ བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་༽དང་། དེའི་༼རྒྱབ་ལྗོངས་འགྲེལ་བཤད་༽ཀྱི་དགོངས་དོན་དང་ཡོངས་སུ་མཐུན་པས། རྒྱ་གཞུང་གིས་རང་སྲོག་བློས་བཏང་བའི་བོད་མིའི་མངོན་འདོད་རྡོག་རོལ་མི་གཏོང་བར་དྲག་སྤྱོད་མཚམས་འཇོག་དང་། རྔ་པ་དང་དཀར་མཛེས་ཁུལ་གྱི་དམ་དྲག་སྲིོད་བྱུས་ཕྱིར་འཐེན་གྱིས། རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་གཞི་རྩར་བཞག་སྟེ་འབྲེལ་མོལ་བསྐྱར་གསོ་དགོས་སྐོར་སོགས་བརྗོད་ཡོད།༽༽༽༽ ཞེས་གསུངས་འདུག་པས་རྒྱལ་གཅེས་དཔའ་བོ་དཔའ་མོ་ཚོས་འབོད་ཚིག་དང་རེ་བཞག་རྣམས་བརྩིས་མེད་རྡོག་རོལ་དུ་བཏང་འདུག
རྒྱལ་དཔའ་བོ་དཔའ་མོ་ཚོས་རང་ལུས་གསོན་གྱིས་རེ་འབོད་བྱས་པ་ནི་བོད་རང་དབང་རང་བཙན་རེད། དབུ་མའི་ལམ་གྱི་ལས་འགུལ་ཁང་གི་བསྒྲགས་གཏམ་འདིའི་ནང་དུ་བོད་རང་དབང་རང་བཙན་ཞེས་པའི་ཚིག་ཙམ་ཡང་མེད་པར་བོད་མི་རྒྱལ་གཅེས་པ་ཚོའི་དམིགས་ཡུལ་ངོ་མར་རྡོག་རོལ་བཏང་འདུག གནས་ཚུལ་འདི་དག་གིས་སྐྱོན་པས་བོད་མི་རྒྱལ་གཅེས་པ་ཚོའི་ཚེ་སྲོག་དོན་མེད་གཏོང་གི་ཡོད་པས་བོད་མི་སེམས་ཡོད་་ཚོས་ཐུགས་བསམ་བཞེས་དགོས་པར་འདོད།
འགའ་རེས་རང་སྲོག་རང་བཙན་ཆེད་དུ་ཕུལ།
འགའ་རེས་རང་བཙན་རྡོག་རོལ་གཏོང་ཐབས་བྱེད།
གནད་ལུགས་མགོ་མཇུག་ལོག་པའི་འགལ་ཟླ་འདིས།
མེ་ལྕེའི་འཐབ་རྩོད་ནུས་པ་ཐོན་མི་བཅུག
ཚང་མ་དཔུང་པ་མཉམ་རུབ་ཐོག་ལས་འགུལ་མཐར་འཁྱོལ་པ་ཞིག་སྤེལ་དགོས་ཀྱང་། རང་ལུས་མེར་བསྲེག་བཏང་ནས་མ་གནོངས་རོགས། རང་གི་ལུས་པོ་དང་དཔུང་པ་མཆོད་མེར་ཕུལ་ན་དཔུང་པ་མཉམ་རུབ་གྱི་དཔུང་པ་ཉམས་པས། བོད་དོན་ནུས་པ་ཡང་ཉམས་འགྲོ་བས། བོད་ལུས་མེར་བསྲེག་གཏོང་རྒྱུ་འཚམས་འཇོག་གནང་རོགས་ཞུ་རྒྱུ་ལགས།