ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཁམས་དཀར་མཛེས་རྟའུ་ཉ་མཚོ་དགོན་པར་ས་གནས་མི་མང་ཆིག་ཁྲི་ཙམ་འཛོམས་ཏེ་མྱ་ངན་ཞུ་བཞིན་ཡོད་འདུག
སྐར་མ་ ༣༠ ཙམ་གྱི་གོང་དུ། ཨེ་ཕེ(AP)གསར་ཁང་གིས་རྒྱ་ནག་པེ་ཅིན་ནས་སྤེལ་བའི་གནས་ཚུལ་ནང་། “ དེ་རིང་རེས་གཟའ་ཉི་མའི་ཉིན་བོད་མི་ཆིག་ཁྲི་ ༡༠༠༠༠ ཙམ་རྒྱ་ནག་ནུབ་ཕྱོགས་བོད་ཁུལ། ཁམས་དཀར་མཛེས་རྟའུ་ཉ་མཚོ་དགོན་པར་འཛོམས་ཏེ་མྱ་ངན་ཞུ་བཞིན་ཡོད་འདུག དེ་ནི་བདུན་ཕྲག་འདིའི་ནང་མའི་ནང་ས་གནས་དེ་གའི་བཙུན་མ་རང་ལོ་ ༣༥ ཡིན་པ་ཞིག་གིས་རྒྱ་གཞུང་ལ་ངོ་རྒོལ་བྱས་ཏེ་རང་ལུས་མེར་བསྲེགས་བཏང་སྟེ་སྐུ་གྲོངས་ཡོད་པ་རེད” ཅེས་བཀོད་འདུག
དེ་བཞིན། ས་གནས་དེ་ཁུལ་དུ་ཉིན་འདི་གར་རྒྱ་ནག་གི་ཉེན་རྟོག་པ་དང་དམག་མི་འབོར་ཆེན་འགྲེམས་འཇོག་གིས་དམ་དྲག་ཤུགས་ཆེན་བྱེད་བཞིན་ཡོད་པ་དང་། དེ་རིང་ས་གནས་བོད་མི་ཆིག་ཁྲི་ཙམ་འཛོམས་ཏེ་གནས་ཚུལ་ཧ་ཅང་ཛ་དྲག་ཆགས་ཡོད་འདུག ཨེ་ཕེ་གསར་ཁང་གིས་ཁམས་དཀར་མཛེས་སྤྱི་བདེ་ཉེན་རྟོག་ཚན་པར་ཁ་པར་བརྒྱུད་སྐད་ཆ་དྲིས་སྐབས། གནས་ཚུལ་དེ་འདྲ་ཞིག་མེད་པ་མ་ཟད། ས་གནས་དེ་ཁུལ་དུ་དམག་མིའི་དམ་དྲག་ཀྱང་མེད་ཚུལ་བརྗོད་ཡོད་འདུག
གསར་འགོད་པ། དོན་འགྲུབ་བཀྲ་ཤིས།
བཙན་བྱོལ་བོད་མི་རྣམས་ཀྱིས་རྟའུ་བ་ལ་སློབ་སྦྱོང་བྱོས་ཞེས་ཞུ་རྒྱུ་ཡིན། ཁོང་རྣམས་པས་གནང་སྟངས་དངོས་གནས་ཡག་པོ་འདུག
ཆིག་སྒྲིལ་་་ཡ་་་་ཆིག་སྒྲིལ།
འགོ་བླ་མས་ཞལ་ནས་ཆིག་སྒྲིལ་ཐར་ར་ར།
བར་དཔོན་པོའི་ངག་ནས་ཆིག་སྒྲིལ་གསལ་ལྷང་ལྷང་།
མཐའ་མི་སེར་ཁ་ནས་ཆིག་སྒྲིལ་རྔ་རྡུང་རྡུང་།
དོན་ལག་ལེན་བསྟར་མཁན་རྟའུ་མི་དམངས་རེད།
རྟའུ་་་་ཡ་་་་་རྟའུ།
རྗེ་བླ་མའི་བཀའ་གསུངས་སྒྲུབ་བཞིན་འདུག
གོང་དཔོན་པོའི་རེ་བ་སྒྲུབ་བཞིན་འདུག
སྡེ་མི་སེར་ཐོབ་ཐང་རྩོད་བཞིན་འདུག
བོད་མི་རིགས་དཀྱུས་ཀྱི་རིགས་བཟང་རེད།
ཆིག་སྒྲིལ་འདི་འདྲ་ཞིག་བོད་མི་ཚང་མ་ལ་ཡོད་ན་ཅི་འདྲའི་དགའ་ལ་ཨང་།
བོད་རྒྱལ་ལོ།།།
བོད་དོན་ཚིག་གཅིག་བཤད་པ་ལའང་ལུས་བློས་གཏོང་དགོས་པའི་རྒྱ་ནག་གི་དྲག་གནོན་འདི་ལྟ་བུའི་འོག་ནས་ཀྱང་མིང་ཆིག་ཁྲི་ལྷག་འཛོམས་ནས་བོད་དོན་གྱི་ལས་འགུལ་སྤེལ་ཡོང་དུས། ང་ཚོ་རང་དབང་ལུང་པར་སྡོད་པ་ཚོས་མི་མང་སྟོང་གསུམ་གཅིག་པུ་འཛོམས་པའི་ལས་འགུལ་ཤིན་ཏུ་ཆུང་ཆུང་ཞིག་སྤེལ་ནས་ད་དུང་རྒྱས་བཤད་བྱེད་དུས་ངོ་ཚ་དགོས་རེད་དམ། སྤོབས་པ་སྐྱེད་དགོས་རེད། ད་དུང་ལས་འགུལ་དེར་སྲིད་སྐྱོང་པའམ་བཀའ་བློན་ཁྲི་པ་མཆོག་དངོས་སུ་མ་ཞུགས་པར་བློ་ཕམས་མི་བྱེད་མཁན་ཞིག་ཡོད་དམ།
དྲག་དམག་ཚོན་ཆའི་སོ་ཁ་ནས།།
ཉམ་ཆུང་དམངས་ཀྱིས་རྒོལ་བ་ནི།།
དྲག་པོའི་བཙན་གནོད་མ་བཟོད་པར།།
རྒྱལ་ཞེན་བསམ་པས་ལངས་པ་ཡིན།།
དཔའ་ཁེར་རྒྱུགས་ཀྱིས་རང་ལུས་བསྲེགས་སར།
གཉེན་ཕུ་ནུ་ཚོས་རྒྱབ་སྐྱོར་བྱེད་སྟངས།
ཁམས་རྟའུ་ཡི་རྡོག་རྩ་ཆིག་སྒྲིལ།
བོད་མི་རིགས་སུ་ངོམ་རིན་ཆོག་འདུག
བོད་ནང་གི་བོད་མི་ཚོའི་སྙིང་སྟོབས་འདི་གཞན་ལས་ལྷག བཙན་པོའི་གདུང་རྒྱུད་ཟེར་ན་ངོ་མ་ཁྱེད་ཚོ་རེད། བོད་རྒྱལ་ལོ།
དྲག་མཚོན་དམག་དཔུང་གིས་བསྐོར་ཡོད་པས། ད་མྱ་ངན་དང་བསྔོ་སྨོན་གནང་བ་ཙམ་གྱིས་ཆོག་གི ངོ་མ་མང་པོ་འཛོམས་འདུག ད་ངོ་མ་ཞི་རྒོལ་གྱི་རླབས་ཕྲེང་མི་འཇགས་པའི་རེ་སྤོབས་འདུག བདེན་པའི་སྟོབས་ཀྱིས་འགྲེངས་ཤིང་འཚེ་མེད་ཞི་རྒོལ་གྱི་མཐུས་བདེན་པ་ཉིད་རྣམ་པར་རྒྱལ་གྱུར་ཅིག
བོད་ནང་གི་བོད་མི་ཚོས་གནང་སྟངས་འདིས་ག་ལེར་བཙན་བྱོན་སྤྱི་ཚོགས་ལ་ཆབ་སྲིད་ཐད་ལས་འགུལ་སྤེལ་སྟངས་ཀྱི་སྣེ་ཁྲིད་ངེས་ན། དགའ་སྤྲོ་དེ་བས་ཆེའོ། ང་ཡང་དེ་རིང་ཁྱོད་ཚོ་དང་ལྷན་དུ་མྱ་ངན་ཞུ་བར་བཅར་ཡོད། ངའི་སེམས་མཐུན་ཚོ།
ཁྱོད་ཀྱིས་གཟའ་ཉི་མར་ཡང་འདི་ལྟར་གསར་འགྱུར་མཁོ་སྤྲོད་གནང་བཞིན་པའི་ཡི་རང་ཞུ། སྤྱིར་རྩོམ་སྒྲིག་གི་ཕྱག་ལས་གནང་སྟངས་དང་སེམས་ཤུགས་སོགས་གང་ཐད་ལ་སྔ་མོ་ནས་སེམས་ཀྱིས་བསྔགས་བརྗོད་ཞུ་བཞིན་ཡོད། གསར་གནས་མཁོ་གཏོང་གནང་བར་བཀའ་དིན་ཆེ་ཞུ།