༧གོང་ས་མཆོག་ནས་གནས་བརྟན་སྡེ་བའི་ལུགས་ཀྱི་ས་ག་ཟླ་བར་འཚམས་འཕྲིན་མཛད།

གནས་བརྟན་སྡེ་བའི་ལུགས་ཀྱི་ས་ག་ཟླ་བའི་ཚེས་བཅོ་ལྔ་ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་བཅོམ་ལྡན་འདས་ཀྱི་རྗེས་འཇུག་པ་རྣམས་དུས་རབས་ཉེར་གཅིག་པའི་ནང་པ་གནང་དགོས་པའི་བཀའ་སློབ་བསྩལ།

དེ་རིང་ཕྱི་ཟླ་ ༥ ཚེས་ ༡ སྟེ། ས་ག་ཟླ་བའི་དུས་ཆེན་གསུམ་འཛོམས་དང་བསྟུན་༧གོང་ས་རྒྱལ་བ་རིན་པོ་ཆེ་མཆོག་ནས་གསུང་འཕྲིན་ཞིག་བསྩལ་བའི་ནང་། དེ་རིང་སངས་རྒྱས་བཅོམ་ལྡན་འདས་སྐུ་བལྟམས་པ་དང་། མངོན་པར་རྫོགས་པར་སངས་རྒྱས་པ། སྐུ་མྱ་ངན་ལས་འདས་པའི་དུས་ཆེན་གྱི་ཉིན་མོ་འདིར་འཛམ་གླིང་སྤྱི་དང་བྱེ་བྲག་ནང་པའི་ཆོས་གྲོགས་ཚང་མར་སྨོན་འདུན་དང་འཚམས་འདྲི་ཞུ་རྒྱུ་ཡིན་ཞེས་གསུངས་འདུག

དེ་རིང་གི་རྩ་ཆེ་བའི་ཉིན་མོ་འདིས་ལོ་ངོ་ ༢༥༠༠ ལྷག་གི་སྔོན་དུ་སངས་རྒྱས་ཤཱཀྱ་ཐུབ་པས་འཛམ་གླིང་འདིར་བྱིན་རླབས་བསྩལ་བ་དྲན་གསོ་བྱེད་ཀྱི་ཡོད། དེ་ནས་བཟུང་འཛམ་གླིང་འདིར་བློ་ཡུལ་ལས་འདས་བའི་འགྱུར་བ་ཕྱིན་ཡོད་པ་དང་།  ཁོང་གི་བཀའ་སློབ་དང་ད་ལྟ་བར་དུ་འབྲེལ་བ་ཆགས་ཡོད། ཁོང་གི་རྟེན་འབྱུང་གི་གནས་ལུགས་ཟབ་མོ་དང་།  སུ་ལའང་གནོད་པ་མི་སྐྱེལ་བ་དང་སེམས་ཅན་ཐམས་ཅད་ལ་ཕན་ཐོགས་བྱེད་པའི་འབོད་སྐུལ་བྱས་ཡོད། དེ་ནི་དུས་སྐབས་འདིའི་དཀའ་ངལ་ཆེ་བའི་འཚོ་བའི་ཁྲོད་བྱམས་བརྩེ་དང་དོན་དངོས་ལ་གཞི་བཅོལ་བའི་ལམ་སྟོན་ཆེས་ལེགས་ཤོས་དེ་ཡིན། ཞེས་གསུངས་འདུག

ཡང་༧མགོན་པོ་གང་ཉིད་མཆོག་ནས། ངོས་ཀྱིས་ག་དུས་ཡིན་ཡང་ནང་པའི་རྗེས་འཇུག་པ་རྣམས་དུས་རབས་ཉེར་གཅིག་པའི་ནང་པ་ཞིག་ཆགས་དགོས་པའི་སྐུལ་མ་བྱེད་ཀྱི་ཡོད། དེ་ཡང་བསླབ་བྱའི་གནས་ལུགས་ཀྱི་དོན་རྟོགས་པ་དང་། དེ་དག་ལག་ལེན་དུ་བསྟར་བ་ལ་གོ་དགོས། ཐོས་པ་དང་ཀློག་པ་གཉིས་ལ་བསམ་གཞིག་བྱས་ཏེ་གོ་དོན་གཏིང་ཟབ་མོ་ཞིག་ལོན་དགོས། སངས་རྒྱས་བཅོམ་ལྡན་འདས་སྐུ་འཁྲུངས་ནས་ལོ་ངོ་ ༢༥༧༠ འཁོར་བའི་དུས་ཆེན་འདིར་ངོས་ཀྱིས་ནང་པའི་གཅེན་གཅུང་ཚང་མར་འཚམས་འདྲི་ཞུ་རྒྱུ་ཡིན་ལ། ང་ཚོའི་ཉིན་རེའི་འཚོ་བའི་ཁྲོད་དུ་སངས་རྒྱས་ཀྱི་བཀའ་སློབ་ཐོག་ཉམས་ལེན་བྱས་ཏེ་འཛམ་གླིང་ནང་བདེ་སྐྱིད་དང་ཞི་བདེ་བསྐྲུན་ཐུབ་པའི་སྨོན་འདུན་ཞུ་རྒྱུ་ཡིན། ཞེས་གསུངས་འདུག

གནས་བརྟན་ལུགས་ཀྱི་ས་ག་ཟླ་བའི་དུས་ཆེན་དང་བསྟུན། ཕྱི་ཟླ་ ༣ ཚེས་ ༢༩ ཉིན་ལ་དྭགས་ནང་པའི་ཚོགས་པ་དང་ལ་དྭགས་དགོན་པ་ཚོགས་པའི་གོ་སྒྲིག་འོག རྒྱ་གར་གྱི་རྒྱལ་ས་ལྡི་ལིའི་འགྲེམས་སྟོན་ཁང་དུ་ཡོད་པའི་སངས་རྒྱས་ཀྱི་རིང་བསྲིལ་རིན་པོ་ཆེ་དེ་ལ་དྭགས་ཀྱི་རྒྱལ་ས་གླེ་རུ་གདན་འདྲེན་ཞུས་ཡོད་ཅིང་། དེ་རིང་གླེ་ཞི་བའི་ཚལ་འགྲེམས་སྟོན་ཁང་དུ་སངས་རྒྱས་ཀྱི་རིང་བསྲིལ་རིན་པོ་ཆེར་མཇལ་ཁ་ཞུ་བའི་དབུ་འབྱེད་མཛད་སྒོའི་ཐོག་རྒྱ་གར་དབུས་ནང་སྲིད་བློན་ཆེན་ཨ་མི་ཐི་ཤཱ་ཧ་( Amit Shah) མཆོག་ཕེབས་ཡོད་པ་དང་། ཕྱི་ཟླ་ ༥ ཚེས་ ༡ ནས་ཉིན་བཅུ་བཞིའི་རིང་ལ་དྭགས་མི་མང་གིས་སངས་རྒྱས་ཀྱི་རིང་བསྲིལ་རིན་པོ་ཆེར་མཇལ་ཁ་ཞུ་རྒྱུ་ཡིན་འདུག

ཕྱི་ལོ་ ༢༠༢༤ ཟླ་ ༤ ཚེས་ ༤ ཉིན། ཤྲཱི་ལངྐའི་རཱ་ཇཱ་གུ་རུ་ཤྲཱི་སུ་བྷུ་ཏི་མཧཱ་བི་ཧཱ་ར་ཡའི་དགོན་པའི་ (the Raja Guru Shri Subuti Mahavihara Monastery of Sri Lanka) རྟེན་གྱི་གཙོ་བོ་སེར་སྐྱའི་གྲོང་ནས་རྙེད་པའི་སྟོན་པའི་རིང་བསྲེལ་ཞིག་༧གོང་ས་རྒྱལ་བ་རིན་པོ་ཆེ་མཆོག་ལ་ཕུལ་ཡོད་པ་དང་། སངས་རྒྱས་ཀྱི་རིང་བསྲེལ་དེ་ནི་རྒྱ་གར་དབྱིན་ཇིའི་འོག་ཏུ་ཡོད་སྐབས་ཝིལ་ཡམ་པེ་པེ་ (William C Peppé) ཞེས་པའི་ཨིན་ཇི་བ་ཞིག་གིས་སངས་རྒྱས་བཅོམ་ལྡན་འདས་སྐུ་བལྟམས་སའི་གནས་མཆོག་སེར་སྐྱའི་གྲོང་ནས་རྙེད་སོན་བྱུང་བ་དང་། ཕྱི་ལོ་ ༡༨༩༨ ལོར་ཤྲཱི་ལངྐའི་གནས་བརྟན་སུ་བྷུ་ཏི་མཧཱ་ནཱ་ཡ་ཀེ་ཐེ་རོ་ (Subhuthi Mahanayake Thero) ལགས་ལ་གནང་བ་ཞིག་ཡིན་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།