གྲྭ་ཕུན་ཚོགས་ལགས་ཀྱི་ནང་མིའི་དཀའ་ངལ།

ཉེ་ཆར་བོད་ནས་གསར་དུ་འབྱོར་ཞིང་ད་ལྟ་བཞུགས་སྒར་ངྷ་རམ་ས་ལའི་དབུས་སྣེ་ལེན་ཁང་དུ་ཡོད་པའི་རྔ་པ་ཀིརྟི་དགོན་པའི་གྲྭ་བློ་བཟང་རབ་བརྟན་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། འདི་ལོ་ཕྱི་ཟླ་ ༣ པའི་ཚེས་ ༡༦ ཉིན་རྔ་པ་ཀིརྟི་དགོན་པའི་གྲྭ་བློ་བཟང་ཕུན་ཚོགས་ལགས་ཀྱིས་རང་ལུས་མེར་བསྲེག་བཏང་རྗེས། རྒྱ་ནག་གཞུང་གིས་རྔ་པ་ཀིརྟི་དགོན་པའི་གྲྭ་བ་མང་པོ་འཛིན་བཟུང་བཀག་ཉར་དང་ཁྲིམས་ཆད་བཙོན་འཇུག་བྱས་པར་མ་ཟད།  ས་གནས་མང་ཚོགས་ལའང་དགོན་ནང་མཆོད་མཇལ་འགྲོ་བ་སོགས་ཀྱི་ཐད་དཀའ་ངལ་རབ་དང་རིམ་པ་བཟོས་ཡོད་འདུག ཉེ་ཆར་རྔ་པ་ཀིརྟི་དགོན་པའི་གྲྭ་བློ་བཟང་དཀོན་མཆོག་དང་གྲྭ་བློ་བཟང་ཕུན་ཚོགས་ལགས་ཀྱིས་སྤུན་ཆུང་བ་བློ་བཟང་སྐལ་བཟང་ལགས་གཉིས་ཀྱིས་རང་ལུས་མེར་བསྲེག་གིས་རྒྱ་ནག་གཞུང་ལ་ངོ་རྒོལ་སྐད་འབོད་བྱས་ཏེ་འཛིན་བཟུང་བཀག་ཉར་བྱས་རྗེས། གྲྭ་ཕུན་ཚོགས་ལགས་ཀྱི་ཕ་གྱར་ཚེ་ལགས་ཀྱིས་ས་གནས་འབྲེལ་ལས་ཁུངས་ལ་ཡར་ཞུ་བརྒྱུད་ཐུག་འཕྲད་དུ་ཕྱིན་ཡོད་ཀྱང་། འབྲེལ་ཡོད་ཚན་པས་ཁོང་ལ་ཐུག་གྱི་གོ་སྐབས་སྤྲད་མེད་པའི་ཁར། ད་ལྟའི་ཆར་ཁོང་གར་ཡོད་ཀྱི་གནས་ཚུལ་ཅི་ཡང་ཤེས་རྟོགས་མ་བྱུང་པར་ལྷག་ཡོད་པ་དང་།  ད་དུང་གྲྭ་ཕུན་ཚོགས་ལགས་ཀྱི་སྤུན་ཆེ་བ་བཀྲ་ཤིས་ཀྱང་རང་ཁྱིམ་དུ་བཟང་བཙོན་གྱི་ཚུལ་དུ་བསྡད་ཡོད་འདུག  

གནས་ཚུལ་མཁོ་སྤྲོད་པས་བརྗོད་པ་ལྟར་ན། གྲྭ་ཕུན་ཚོགས་ལགས་ཀྱི་ཁྱིམ་དུ་རང་ལོ་ ༦༠ ཡིན་པའི་ཕ་གྱར་ཚེ་དང་རང་ལོ་ ༥༠ ཡིན་པའི་མ་རྫོགས་ཀར་གཉིས་དང་། རང་ལོ་ ༨༧ ཡིན་པའི་རྨོ་མོ་དཀར་མོ། རང་ལོ་ ༢༢ ཡིན་པའི་བློ་བཟང་དར་རྒྱས། ལོ་གསུམ་ཡར་སྔོན་ནས་དབང་བོ་སྐྱོན་ཅན་དུ་གྱུར་ཏེ་ད་ལྟ་དབྱུགས་རྟེན་ལ་བརྟེན་ནས་འགྲོ་བཞིན་པའི་གྲྭ་བྱང་ཆུབ། ཉེ་ཆར་རང་ལུས་མེར་བསྲེག་བཏང་བའི་རང་ལོ་ ༡༨ ཡིན་པའི་གྲྭ་བློ་བཟང་སྐལ་བཟང་ལགས་བཅས་བསྡོམས་སྤུན་མཆེད་ ༧ ཡོད་ཀྱང་། འདི་ལོ་གྲྭ་ཕུན་ཚོགས་ལགས་དང་བློ་བཟང་སྐལ་བཟང་རྣམ་གཉིས་ཀྱིས་རང་ལུས་མེར་བསྲེག་གིས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་སྤེལ་རྗེས། ཁོང་གི་ནང་མིར་རྒྱ་གཞུང་གིས་སྔ་ཕྱི་བར་གསུམ་དུ་འཇིགས་སྐུལ་དང་དྲག་གནོན་བྱས་ཡོད་པ་དང་། ཉེ་ཆར་ཕ་རྒན་གར་ཡོད་མི་ཤེས་པའི་གནས་སུ་གྱར་བ་དང་སྤུན་ཆེ་བ་བཀྲ་ཤིས་ཀྱང་བཟང་བཙོན་གྱི་ཚུད་དུ་བཀག་ཉར་བྱས་ཡོད་པར་བརྟེན།  ནང་མི་ཚོར་དཀའ་ངལ་ཆེན་པོ་འཕྲད་ཀྱི་ཡོད་འདུག  

ད་ལྟའི་ཆར་རྒྱ་ནག་གཞུང་གིས། རྨེའུ་རུ་མ་སྡེ་བའི་ཁྱིམ་ཚང་ཡོངས་ལ་༸གོང་ས་མཆོག་དང་བཙན་བྱོལ་བོད་གཞུང་ལ་དགག་རྒྱག་དང་། རྒྱ་ནག་གི་རྒྱ་དར་བསྒྲེངས་དགོས་པའི་བཙན་བཀའ་གཏོང་བཞིན་པར་མ་ཟད། རྔ་པ་ཀིརྟི་དགོན་པའི་དགེ་འདུན་པ་རྣམས་ལའང་སྡེ་ཚན་མི་འདྲ་བ་ ༢༦ ལ་བགོས་ཏེ། རྒྱལ་གཅེས་ཆོས་གཅེས་ཀྱི་སློབ་གསོ་སྤེལ་བཞིན་ཡོད་འདུག 

རང་ལོ་ ༡༧ ཡིན་པའི་གྲྭ་བློ་བཟང་རབ་བརྟན་ལགས་ནི། རྔ་པ་རྫོང་རྨེའུ་རུ་མ་ནས་ཡིན་ཞིང་། གྲྭ་བློ་བཟང་ཕུན་ཚོགས་དང་སྡེ་བ་གཅིག་པ་ཡིན་པར་མ་ཟད། ཀིརྟི་དགོན་པའི་ནང་ཁོང་གཉིས་དགེ་རྒན་གཅིག་དགེ་ཕྲུག་ཡིན་འདུག