བཀའ་ཤག་སྐབས་བཅུ་བཞི་པས་བོད་ཀྱི་སྲིད་བྱུས་ཉམས་ཞིབ་ཁང་ཞིག་སྒོ་འབྱེད་གནང་སོང་ལ། དེ་སྔའི་རྒྱ་ནག་གི་རྒྱབ་ཤ་དཀར་པོའི་ལན་འདེབས་ཚོགས་ཆུང་ཟླ་སྒྲིལ་བཏང་སྟེ། ཕྱི་དྲིལ་དྲུང་ཆེ་ཐུབ་བསྟན་བསམ་འཕེལ་ལགས་འགན་འཛིན་དུ་བསྐོ་བཞག་གནང་སོང་། སྤྱིར་གནད་འགག་ཅན་གྱི་ལས་སྣེ་ཞིག་སྒོ་བརྒྱབ་ཏེ་འཆར་སྣང་ཁྲོད་ཀྱི་ལས་གཞི་ཞིག་མགོ་འཛུགས་བྱས་ན། གྲུབ་འབྲས་གང་འདྲ་འབྱུང་མིན་ད་ལྟ་ཚོད་དཔག་བྱེད་དཀའ་ཡང་། ལས་གཞི་འདི་ད་ལྟའི་བཀའ་བློན་ཁྲི་པ་བློ་བཟང་སེང་གེ་མཆོག་ཐོག་མར་བཀའ་ཁྲིའི་འོས་མིར་བཞེངས་སྐབས། སྤྱི་ཚོགས་ནང་ཁྱབ་བསྒྲགས་བྱས་པའི་ཁོང་གི་ལས་འཆར་ནང་གི་གཙོ་གྲས་ཤིག་ཡིན་ལ། ཆབ་སྲིད་ཐོག་ཐུགས་སྣང་ཡོད་མཁན་ཚོའི་ཡིད་ཀྱི་དྭངས་བ་འདྲེན་པའི་ལྕགས་ཀྱུ་ཞིག་ཀྱང་ཆགས་ཡོད་སྲིད།
བཀའ་ཁྲི་མཆོག་གིས་མ་འོངས་པར་སྲིད་བྱུས་ཉམས་ཞིབ་ཁང་ཚད་ལྡན་ཞིག་འཛུགས་རྒྱུ་ཡིན་པ་དང་། ས་བྱི་ཞི་རྒོལ་ཆེན་མོའི་འབྱུང་རྐྱེན་དང་སྔ་ཕྱིའི་བྱུང་རིམ་ལ་བསྐྱར་ཞིབ་ཁྲུན་ཐག་ཆོད་པ་ཞིག་བྱས་ཏེ་མ་འོངས་པར་རྩ་དོན་འཐབ་རྩོད་བྱེད་ཕྱོགས་ལ་འཆར་གཞི་བསྒྲིག་རྒྱུའི་ཁས་ལེན་བྱས་ཡོད་ལ། བརྒྱད་པའི་བརྒྱད་ཉིན་གྱི་དམ་འབུལ་གསུང་བཤད་ནང་དུ་ཡང་། འབྱུང་འགྱུར་ལོ་ལྔ་བཅུའི་འཕྲལ་ཕུགས་ཀྱི་འཆར་སྣང་ཐད། མཁས་པ་དང་ཤེས་ཡོན་ཅན་ཚོའི་ཐབས་བྱུས་དང༌། རྣམ་དཔྱོད་འདོན་སའི་སྡིངས་ཆ་བསྐྲུན་ཆེད་བོད་ཀྱི་སྲིད་བྱུས་ཞིབ་འཇུག་ཁང་ཞིག་འཛུགས་རྒྱུ་ཡིན་ཞེས་དམ་བཅའ་མཛད་ཡོད།
རང་དབང་འཐབ་རྩོད་མཁན་གྱི་མི་རིགས་ཤིག་དང་། མིའི་ལུང་པར་ཆབ་སྲིད་སྐྱབས་བཅོལ་དུ་སྡོད་མཁན་ཞིག་གི་ངོས་ཐད་ནས་བལྟས་ན། ལས་གཞི་འདི་ཧ་ཅང་ཁ་ཚ་དགོས་གཏུགས་ཀྱི་ལས་དོན་རླབས་ཆེན་ཞིག་ཆགས་ཡོད་ལ། ཤེས་ལྡན་མི་སྣ་དང་ཆབ་སྲིད་ཉམས་ཞིབ་པ་དག་གིས་ཨམ་ཅོག་གྲུང་གྲུང་གིས་ཉན་ས་ཞིག་ཀྱང་ཆགས་ཡོད། འདས་པའི་མི་ལོ་ལྔ་བཅུའི་རྩ་དོན་འཐབ་རྩོད་ཁྲོད་ཞིབ་འཇུག་དཔྱད་བསྡུར་གྱིས་མ་འདང་པར་ཁ་ཆག་སྣ་རལ་གྱི་གནས་ཚུལ་མང་པོ་བྱུང་ཡོད་ལ། སྲིད་འབྱོར་རིག་གསུམ་ཐོག་ཏུའང་བསམ་བློའི་ཕུ་ཐག་གིས་མ་འདང་བར་ཐལ་ཆ་འཐུས་ཤོར་གྱི་གནད་དོན་མང་པོ་ལྷག་ཡོད།
དེ་སྔ་བཀའ་ཁྲི་མཆོག་གིས་ཉམས་ཞིབ་ཁང་འདིའི་གྲུབ་ཆའི་སྐོར་ལ། བཙན་བྱོལ་ནང་མཐོ་སློབ་ཚད་ལྡན་ཐོན་ཏེ་ལས་ཀ་མ་རག་པར་ལྷག་ཡོད་མཁན་ཚོ་དང་ཕྱི་རྒྱལ་ཁག་གི་བོད་རིགས་ཆེད་མཁས་པ། བོད་ནས་ཕེབས་པའི་བོད་རྒྱ་སྐད་ཡིག་ཚད་ལྡན་མཁྱེན་མཁན་དང་། བཞུགས་སྒར་ཁུལ་གྱི་ཤེས་ལྡན་མི་སྣ་སོགས་བསྡུ་སྐོང་བྱ་རྒྱུ་ཡིན་ཚུལ་བཤད་ཡོད། ད་ནི་འདས་པའི་ལོ་རྒན་ལྔ་བཅུའི་ཉམས་མྱོང་གཞི་ལ་བཞག་སྟེ་འབྱུང་འགྱུར་ལ་འཕེན་པ་གཏོང་རྒྱུའི་དུས་ཚོད་ཤར་ཡོད་ལ། བཙན་བྱོལ་སྤྱི་ཚོགས་ནང་གི་ཤེས་ལྡན་ལས་མེད་ཚོར་རྩ་དོན་ཐོག་ནུས་པ་འདོན་རྒྱུའི་གོ་སྐབས་ཤིག་ཀྱང་བསྐྲུན་ཡོད་ལས་ཆེ།
ལས་དོན་གང་ཞིག་ཡིན་རུང་མགོ་འཛུགས་རྒྱུ་སླ་བ་དང་མཇུག་སྐྱོང་རྒྱུ་དཀའ་བའི་ཆོས་ཉིད་ལྟར། བཀའ་ཤག་སྐབས་སྔ་མ་དག་གིས་ཀྱང་ཞིབ་འཇུག་ཚོགས་ཆུང་དང་ཉམས་ཞིབ་ཁང་རབ་དང་རིམ་པ་བཙུགས། བོད་མི་འབུམ་བཅུ་གཉིས་རྒྱ་ལག་ནས་གྲོངས་པའི་མཚན་ཐོ་འཚོལ་ཞིབ་ཚོགས་ཆུང་བཙུགས་ཀྱང་གྲུབ་འབྲས་ནམ་མཁའི་པདྨོ་ཆགས་སོང་ལ། བདེ་སྲུང་ཉམས་ཞིབ་ཁང་གི་ལས་དོན་ཡང་ཉིན་མོའི་སྐར་མའི་རྗེས་སུ་འགྲོ་བཞིན་ཡོད། ད་ཆར་སྨྱུ་གུ་འབུས་བཞིན་པའི་བོད་ཀྱི་སྲིད་བྱུས་ཉམས་ཞིབ་ཁང་འདིས་ཀྱང་མི་མང་གི་རེ་བ་སྟོང་ཟད་མི་གཏོང་རྒྱུ་དང་། བཀའ་ཁྲིའི་ཐུགས་རེ་དང་དམ་བཅའ་གང་མཛད་པ་བཞིན་ལས་གཞི་ལེགས་འགྲུབ་བྱུང་སྟེ་གྲུབ་འབྲས་གཡུར་དུ་ཟ་བ་ཞིག་འཐོན་ཐུབ་པའི་སྨོན་ལམ་རྒྱག་གི་ཡོད།
