གད་སྙིགས་བསྡུས་ཏེ་སློབ་མའི་མཁོ་ཆས་བཟོ་བའི་སྤྱི་ཚོགས་ཞབས་ཞུ།

དེ་རིང་དབུས་བོད་མིའི་སྒྲིག་འཛུགས་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། བོད་ཁྱིམ་དབྱིན་ཡིག་སློབ་སྟོན་པ་བསྟན་འཛིན་དཔལ་མོ་ལགས་ཀྱིས་འོ་མའི་ཤོག་སྒམ་དང་། ཤིང་ཏོག་ཁུ་བའི་སྣོད་ཆས་རིགས་ཀྱིས་བཟོས་པའི་སློབ་མའི་མཁོ་ཆས་རིགས་ཁག་ཅིག་འགྲེམས་སྟོན་གནང་བཞིན་འདུག

དེ་རིང་ཕྱི་ཚེས་ ༢༥ ཉིན་དབུས་བོད་མིའི་སྒྲིག་འཛུགས་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། ངྷ་སྟེང་བོད་ཕྲུག་ཁྱིམ་སྡེའི་དབྱིན་ཡིག་སློབ་སྟོན་པ་རྒན་བསྟན་འཛིན་དཔལ་མོ་ལགས་ཀྱིས་༼གད་སྙིགས་སྐོར་གྱི་ཤེས་ཡོན་འགྲེམས་སྟོན་༽ (Trash for education exhibition ) ཞེས་པ་ཞིག་དབུ་འབྱེད་གནང་སོང་ལ། འགྲེམས་སྟོན་དེ་ནི་ངྷ་སྟེང་བོད་ཕྲུག་ཁྱིམ་སྡེའི་སྤྱི་ཐབ་དང་། བྱིས་གཉོར་ཁྱིམ་ཚང་ ༤༢ ། དེ་བཞིན་དགེ་ལས་དག་གིས་བཀོལ་སྤྱོད་བྱས་པའི་འོ་མའི་ཤོག་སྒམ་དང་ཤིང་ཏོག་ཁུ་བའི་སྣོད་ཆས། འོད་སྡེར་དང་ཧྥི་ལཱོ་པེ་(floppy)ཤེལ་དམ་ཁ་གཅོད། དུས་དེབ་དང་ཚགས་པར་རྙིང་པ་སོགས་བསྡུ་རུབ་ཀྱིས་སློབ་མའི་མཁོ་ཆས་རིགས་སྣ་ཚོགས་ཤིག་བཟོས་ཏེ། བོད་ཁྱིམ་སློབ་གྲྭ་ཁག་ ༡༧ ནང་འགྲེམས་སྤེལ་གྱིས་བེད་སྤྱོད་གཏོང་བཞིན་ཡོད་ཅིང་། དེ་ནི་གཙོ་བོ་བོད་ཁྱིམ་སློབ་གྲྭ་ཁག་གི་ཁོར་ཡུག་སྲུང་སྐྱོབ་དང་ཤེས་ཡོན་སློབ་སྦྱོང་ལ་དམིགས་པ་ཞིག་ཡིན་འདུག

དེ་དག་སྐོར་ལ་བོད་ཁྱིམ་དབྱིན་ཡིག་སློབ་སྟོན་པ་བསྟན་འཛིན་དཔལ་མོ་ལགས་ཀྱིས་ངོ་སྤྲོད་གནང་དོན་ལྟར་ན། ལས་གཞི་དེ་ནི་ ༢༠༠༦ ལོར་ཁོ་མོ་སྒེར་ངོས་ནས་དང་བླང་ཐོག་མགོ་འཛུགས་བྱས་པ་ཞིག་ཡིན་རུང་། ཐོག་མའི་ཀུན་སློང་དེ་༧གོང་ས་མཆོག་གི་བཀའ་སློབ་ཅིག་ཏུ།  “མི་ཞིག་ཡིན་ན་རང་ཉིད་ལ་གོ་སྐབས་དང་ལས་འགན། ནུས་པ་གསུམ་ ” ཡོད་སྐོར་གསུངས་ཡོད་པ་མཇལ་རྗེས། རང་ཉིད་ལ་ཆ་རྐྱེན་དེ་གསུམ་ཚང་ཡོད་པ་ཤེས་ཏེ། ལས་ཀ་འདི་བསྒྲུབ་རྒྱུའི་སེམས་ཐག་བཅད་པ་ཞིག་ཡིན་སྐོར་དང་། ད་ཆར་འཛམ་གླིང་སྟེང་ཁོར་ཡུག་གཅེས་ཉར་དང་ཤེས་ཡོན་སློབ་གསོ། བཟང་སྤྱོད་ཡར་རྒྱས་ཐོག་དོ་སྣང་དང་ལས་འགུལ་འདྲ་མིན་སྤེལ་གྱི་ཡོད་སྟབས། བོད་པ་ཚོས་ཀྱང་བོད་པར་ཕྱི་ལ་ངོམས་རྒྱུ་རྩ་ཆེན་པོ་ཞིག་ཡོད་པ་ནི་ནང་ཆོས་དང་བཟང་སྤྱོད་གཉིས་ཆགས་ཀྱི་ཡོད་དུས། ཚང་མས་མཉམ་རུབ་ཐོག་སོ་སོའི་ཁོར་ཡུག་གཙང་ཉར་དང་། མི་སྒེར་གྱི་བཟང་སྤྱོད་ཐོག་ནས་སྤྱི་ཚོགས་ལ་ཞབས་ཞུའི་ལས་དོན་བསྒྲུབ་དགོས་སྐོར་སོགས་བརྗོད་སོང་།   

འོ་མའི་ཤོག་སྒམ་གཙོས་པའི་གད་སྙིགས་རིགས་གཙང་ཉར་དང་བེད་སྤྱོད་བྱེད་སྟངས་ཐད་ལ་ཁོ་མོས། ཐོག་མར་འོ་མའི་ཤོག་སྒམ་གཙོས་པའི་སྣོད་ཆས་རིགས་བསྡུ་རུབ་གནང་རྗེས་གཙང་མ་ཞིག་བཀྲུས་ཏེ་ཉིན་གཅིག་རིང་ཉི་མར་སྐམ་གྱི་ཡོད་པ་དང་། དེ་ནས་སོ་སོས་རིག་པ་རྩལ་དུ་བཏོན་ཏེ་ཆེ་བ་ཡ་མཚན་དངོས་བྱུང་རིགས་དང་། ༧གོང་ས་མཆོག་གི་བཀའ་སློབ་བཞེངས་སྐྲུན། སློབ་མའི་དཔེ་ཁུག་དང་དངུལ་ཁུག་སོགས་བཟོ་བཞིན་ཡོད་འདུག་ལ། ཆུང་བ་སློབ་མའི་སྨྱུག་སྒམ་དང་རྩེད་ཆས་སྣ་ཚོགས། བོད་ཡིག་དང་དབྱིན་ཡིག་གི་དབྱངས་གསལ་དང་། བོད་དབྱིན་གྱི་རྨང་གཞིའི་ཤེས་བྱ། ཨང་རྩིས། ཤིང་ཏོག་རིགས་དང་མེ་ཏོག་རིགས།  ཚལ་རིགས། སེམས་ཅན་སྣ་ཚོགས་ཀྱི་འགྲེལ་བཤད་བཅས་བཟོས་ཏེ་སློབ་ཁྱིམ་སློབ་གྲྭ་ཁག་ཏུ་བེད་སྤྱོད་གཏོང་བཞིན་ཡོད་འདུག

གསར་འགོད་པས་བསྟན་འཛིན་དཔལ་མོ་ལགས་སུ་ལས་གཞི་འདིར་སྤྱི་ཚོགས་ནང་རྒྱབ་སྐྱོར་གང་འདྲ་ཡོད་མེད་དྲིས་པར།  “ ལས་གཞི་འདིར་༧གོང་ས་མཆོག་གིས་ཐུགས་ཧ་ཅང་མཉེས་པོ་གནང་གི་འདུག བོད་ཁྱིམ་སློབ་གྲྭའི་ངོས་ནས་ཀྱང་རྒྱབ་སྐྱོར་ཆེན་པོ་གནང་གི་འདུག  ལྷག་པར་དུ་ད་ཆར་སོ་སོ་འོ་མའི་ཤོག་སྒམ་བསྡུ་རུབ་བྱེད་དུ་མང་པོ་འགྲོ་དགོས་ཀྱི་མི་འདུག བོད་ཕྲུག་ཁྱིམ་སྡེའི་ཁྱིམ་ཚང་ ༤༢ དང་། དགེ་ལས་ཚོས་འོ་མའི་སྒམ་གཙང་མ་བཟོས་ཏེ་དུས་ཐོག་ང་ལ་སྤྲོད་ཀྱི་ཡོད་སྟབས། སྔོན་མ་དང་བསྡུར་ན་ལས་ཀའི་ཐོག་སྟབས་བདེ་རུ་སོང་ཡོད། ང་རང་གིས་བཟོས་པ་དེ་ཚོར་སློབ་ཕྲུག་ཚོས་ཧ་ཅང་དགའ་བོ་བྱེད་ཀྱི་འདུག སློབ་ཕྲུག་ཁ་ཤས་ཀྱིས་ང་ཚོར་འོ་མའི་ཤོག་སྒམ་རག་ན་རྒན་ལགས་སྤྲད་ཀྱི་ཡིན་ཟེར་མཁན་ཡང་འདུག སློབ་ཕྲུག་ནང་གད་སྙིགས་རེད་ཟེར་ནས་མི་དགའ་མཁན་དེ་འདྲ་གཅིག་ཀྱང་བྱུང་མ་སོང་ ” ཟེར།  

མ་འོངས་པར་ལས་གཞི་འདི་རྒྱ་ཇེ་ཆེར་གཏོང་འཆར་ཡོད་མེད་དྲིས་པར།  “ འོ་མའི་གད་སྙིགས་བསྡུས་ཏེ་ཤེས་ཡོན་ཐོག་བེད་སྤྱོད་གཏོང་བ་འདི་བོད་ཁྱིམ་སློབ་གྲྭའི་ཁོར་ཡུག་གཙང་མ་ཡོང་ཆེད་རེད། བོད་ཁྱིམ་གྱི་གད་སྙིགས་ང་ཚོས་གཙང་མ་བཟོ་ཐུབ་དགོས་པ་རེད། ཡིན་ནའང་། སྤྱི་ཚོགས་ནང་འོ་མའི་སྒམ་ང་ཚོར་སྤྲོད་མཁན་ཡོད་ན། འོ་མའི་སྒམ་གཙང་མ་བཟོས་ཏེ་ཕྱི་དྲིལ་ཁོར་ཡུག་སྡེ་ཚན་ལ་ཕུལ་ན་འགྲིག་གི་རེད། ཁོར་ཡུག་སྲུང་སྐྱོབ་ནི་བཟང་སྤྱོད་ཐོག་བཤད་ན་ང་ཚོའི་ལས་འགན་ལྟ་བུ་ཆགས་ཡོད་དུས། ངས་ལས་གཞི་འདི་བརྒྱུད་བོད་པའི་སྤྱི་ཚོགས་ནང་ཁོར་ཡུག་ཐོག་གོ་རྟོགས་གསར་པ་ཞིག་ཡོང་བའི་རེ་བ་རྒྱག་བཞིན་ཡོད་ཅེས་ ” བརྗོད་སོང་།  

ལས་ཀའི་ཐོག་དཀའ་ངལ་འདྲ་ཡོད་མེད་དྲིས་པར།  “ ང་རང་ལས་ཀ་འདི་ལ་དོ་སྣང་ཆེན་པོ་ཡོད་སྟབས། དཀའ་ལས་ག་ཚོད་ཡོད་ཀྱང་ཉོབ་སྣང་ཡོང་གི་མི་འདུག སྔོན་མ་ལས་ཀ་བྱེད་མཁན་ང་རང་ལས་ཡོད་པ་མ་རེད། ད་ཆར་རོགས་པ་མི་གཉིས་ཡོད་པ་རེད། ཁོང་གཉིས་ཀྱི་གཅིག་ལ་བོད་ཁྱིམ་གྱི་གླ་ཆ་སྤྲོད་ཀྱི་ཡོད། གཞན་དེར་བཀྲས་མཐོང་བསྟན་འཛིན་དགེ་བྱེད་ལགས་ཀྱིས་རོགས་ཕོག་གནང་གི་ཡོད་ཅེས་ ” ཅེས་བརྗོད་བྱུང་།

བོད་ཁྱིམ་དབྱིན་ཡིག་སློབ་སྟོན་པ་བསྟན་འཛིན་དཔལ་མོ་ལགས་ནི། ཕྱི་ལོ་ ༡༩༦༥ ལོར་སིམ་ལར་སྐྱེས་ཤིང་། ད་ཆར་བོད་ཕྲུག་ཁྱིམ་སྡེའི་དབྱིན་ཇིའི་སློབ་སྟོན་པའི་འགན་འཁུར་བཞིན་ཡོད་འདུག

གསར་འགོད་པ། དཔལ་ལྡན།