རྡོར་གདན་དུས་དབང་ཐོག་དབུས་སྣེ་ལེན་ཁང་གིས་བོད་ནས་ཕེབས་མཁན་ཚོར་སྣེ་ལེན་གནང་གི་ཡོད་པ་ལྟར། འདི་གའི་གསར་འགོད་པས་ས་གནས་སུ་གྲ་སྒྲིག་བྱེད་བཞིན་པའི་དབུས་སྣེ་ལེན་ཁང་གི་འགན་འཛིན་ངག་དབང་ནོར་བུ་ལགས་སུ་ཐུག་འཕྲད་ཀྱིས་བཅར་འདྲི་ཞུས་ཡོད།
དྲི་བ། སྐུ་ཉིད་ཀྱིས་ཐེངས་འདིར་བོད་ནས་ཆེད་དུ་ཕེབས་པའི་ཆོས་ཞུ་བ་ཚོར་འདིར་དབུས་སྣེ་ལེན་ཁང་གི་ངོས་ནས་གྲ་སྒྲིག་གང་འདྲ་གནང་ཡོད་པ་དང་། དཀའ་ངལ་ག་རེ་འཕྲད་ཡོད་མེད་སྐོར་ངོ་སྤྲོད་ཅིག་གནང་རོགས།
ལན། ང་ཚོའི་སྣེ་ལེན་ཁང་གི་ངོས་ནས་འདས་པའི་ཟླ་བ་གཉིས་ཙམ་གོང་ནས་ང་རང་འགན་འཛིན་དང་རྩིས་པ། ལས་བྱེད་གཞན་གཉིས་བཅས་ང་ཚོ་ལས་བྱེད་ ༤ ཙམ་འདིར་ཡོང་ནས་གྲ་སྒྲིག་བྱེད་བཞིན་ཡོད། སང་ཉིན་གནངས་ཉིན་ངྷ་རམ་ས་ལས་སྣེ་ལེན་ཁང་སྒོ་བརྒྱབ་སྟེ་ལས་བྱེད་ཚང་མ་ཡོང་རྒྱུ་རེད་ལ། ལྡི་ལི་སྣེ་ལེན་ཁང་གི་ལས་བྱེད་ཡོངས་དང་བལ་ཡུལ་སྣེ་ལེན་ཁང་གི་ལས་བྱེད་ ༢ བཅས་འདིར་ཕེབས་ཏེ་ཕྱག་ལས་གནང་རྒྱུ་རེད། བོད་ནས་ཕེབས་མཁན་ཚོ་ཐེངས་འདིའི་དུས་འཁོར་དབང་ཆེན་གྱི་སྐུ་མགྲོན་གཙོ་བོ་ཆགས་ཀྱི་ཡོད་སྟབས། བཞུགས་གནས་ཡག་པོ་ཞིག་གོ་སྒྲིག་ཞུ་རྒྱུ་དེ་ང་ཚོའི་ལས་འགན་ཡིན་དུས། ཐོག་མ་སྣེ་ལེན་ཁང་ལ་གུར་རྒྱག་སའི་ས་ཆ་མ་རག་པའི་དཀའ་ངལ་ཆེན་པོ་འཕྲད་སོང་། དུས་དབང་གོ་སྒྲིག་ཚོགས་ཆུང་ལ་རེ་སྐུལ་ཞུས་ཏེ་ས་ཆ་དང་གུར་རག་སོང་། དུས་འཁོར་དབང་ཆེན་ཐོག་མི་མང་བཞུགས་ཡུལ་ཁ་ཤས་གོ་སྒྲིག་བྱས་ཡོད་པ་དག་ལས་སྣེ་ལེན་ཁང་གི་གུར་རྒྱག་ཡུལ་དེ་ས་ཆ་ཡག་ཤོས་དང་མཐུན་རྐྱེན་འཛོམས་ཤོས། གསུང་ཆོས་ར་བ་དང་བར་ཐག་ཉེ་ཤོས་དེ་ཆགས་ཡོད།
དྲི་བ། ད་ལོ་བོད་ནས་ཆོས་ཞུ་བ་ག་ཚོད་ཅིག་ཕེབས་རྒྱུར་ཚོད་དཔག་བྱེད་ཀྱི་ཡོད་པ་དང་། དེ་དག་ལ་འདང་ངེས་ཀྱི་བཞུགས་ཡུལ་དང་མཐུན་འགྱུར་གང་འདྲ་གོ་སྒྲིག་ཞུས་ཡོད་དམ།
ལན། ང་ཚོས་ཐོག་མ་བོད་ནས་ཕེབས་པའི་ཆོས་ཞུ་བ་ ༤༠༠༠ ཙམ་ཕེབས་རྒྱུར་རྩིས་བརྒྱབ་པ་ཡིན། འོན་ཀྱང་དེ་རིང་ཁ་སང་བལ་ཡུལ་སྣེ་ལེན་ཁང་ནས་ཐོ་གཞུང་འབྱོར་བ་ལྟར་ན་མི་གྲངས་ ༦༠༠༠ ལས་བརྒལ་འདུག ད་དུང་དབང་གསུང་རྒྱུར་ཉིན་བཅུ་གྲངས་ཤིག་ཡོད་སྟབས་མི་ཇེ་མང་དུ་འགྲོ་རྒྱུ་ཡིན་པ་གསལ་བོ་རེད། དེར་བརྟེན། ཐོག་མའི་ཚོད་དཔག་ལྟར་གུར་གྱིས་འདང་གི་ཡོད་པ་མ་རེད། ད་སྔ་ང་ཚོས་གྲ་སྒྲིག་བྱས་ཟིན་པ་མི་ ༤༠ ཤོང་བའི་གུར་ ༧༠ ཙམ་དང་། མི་ ༢༠ ཤོང་བའི་གུར་ ༡༢༠ བཅས་ཁྱོན་བསྡོམས་གུར་ ༡༩༠ ལྷག་ཡོད། འདི་ཙམ་མ་གཏོགས་གུར་རྒྱག་སའི་ས་ཆ་རག་གི་ཡོད་པ་མ་རེད། གལ་སྲིད་གུར་གྱིས་མ་འདང་བའི་དཀའ་ངལ་འཕྲད་ཚེ། ང་ཚོ་སྣེ་ལེན་ཁང་གིས་ལས་ཁུངས་ཤིག་དང་སྨན་ཁང་ཞིག དེ་བཞིན་ཚོགས་ཁང་ཆེན་པོ་གཅིག་བཅས་རྒྱག་གི་ཡོད་པ་དག་ཏུ་ཡང་ཆོས་ཞུ་བ་སྡོད་དུ་འཇུག་རྒྱུ་ཡིན།
དྲི་བ། བོད་ནས་ཕེབས་མཁན་ཞིག་ལ་མཚོན་ན་ཐོག་མ་བལ་ཡུལ་སྣེ་ལེན་ཁང་ལ་འབྱོར་བ་ནས་དུས་དབང་མཇུག་བསྒྲིལ་རག་བར་ཆ་རྐྱེན་དང་འགྲོ་ལུགས་གང་དག་བསྒྲུབ་དགོས་ཀྱི་ཡོད་དམ།
ལན། བོད་ནས་ཕེབས་མཁན་ཆོས་ཞུ་རྣམས་ལ། བལ་ཡུལ་སྣེ་ལེན་ཁང་ནས་མཇལ་ཁ་དང་གནས་སྐོར་གྱི་འཛིན་བྱང་དཀར་པོ་རེ་སྤྲོད་ཀྱི་ཡོད། ཤོག་བུ་དཀར་པོ་དེ་མ་གཏོགས་ཁྲིམས་ཐོག་ནས་ཕེབས་ལེན་ཞུ་སྒོ་གང་ཡང་ཡོད་པ་མ་རེད། འཛིན་བྱང་དཀར་པོ་དེ་བསྣམས་ཡོང་མཁན་དག་ལ་འདི་ནས་འབྱོར་ཐོ་རྒྱག་དགོས། དེ་ནས་གདན་རེ་སྤྲད་དེ་སྡོད་གུར་གོ་སྒྲིག་ཞུ་རྒྱུ་ཡིན། དེའི་རྗེས་སུ་གསུང་ཆོས་ཞུ་བའི་ལག་འཁྱེར་བཟོ་དགོས་པ་རེད། ནམ་རྒྱུན་བོད་ནས་ཕེབས་མཁན་དང་གསུང་ཆོས་ཞུ་མཁན་བྱིངས་གཉིས་ཀྱི་འཛིན་བྱང་གཅིག་པ་ཡིན་སྟབས། མཚམས་རེར་ང་ཚོར་དཀའ་ངལ་འཕྲད་ཀྱི་འདུག ད་ལོར་བདེ་སྲུང་ལས་ཁུངས་ལ་ཞུས་ཏེ་བོད་ནས་ཕེབས་མཁན་ཚོར་མི་མང་བྱིངས་དང་མ་འདྲ་བའི་ལག་འཁྱེར་ཞིག་བཟོ་རྒྱུ་བྱས་ཡོད།
དྲི་བ། སྣེ་ལེན་ཁང་གིས་བོད་ནས་ཕེབས་མཁན་ཚོར་ག་དུས་ནས་སྣེ་ལེན་ཞུ་རྒྱུ་ཡིན་པ་དང་། དེ་སྔ་ནས་འབྱོར་བ་མང་པོ་ཞིག་ལ་ཉིན་འདི་གར་སྡོད་གནས་མ་རག་པའི་དཀའ་ངལ་འཕྲད་ཀྱི་ཡོད་པ་ཤེས་རྟོགས་བྱུང་ཡོད་དམ།
ལན། བལ་ཡུལ་སྣེ་ལེན་ཁང་འགག་སྒོ་གཙོ་བོ་ཡིན་སྟབས། ཐོག་མ་ང་ཚོས་བོད་ནས་ཕེབས་པའི་ཆོས་ཞུ་བ་ཚོར་ཕྱི་ཟླ་ ༡༢ པའི་ཚེས་ ༢༠ ཉིན་ནས་བཟུང་སྣེ་ལེན་ཞུ་རྒྱུ་ཡིན་ཞེས་གསལ་བསྒྲགས་བསྐྱངས་ཡོད། མི་ཧ་ཅང་མང་པོ་ཞིག་ཟླ་འདིའི་ཚེས་མགོ་ནས་རྡོ་རྗེ་གདན་དུ་འབྱོར་ཡོད་པ་དང་། ས་གནས་མགྲོན་ཁང་དང་རྒྱ་གར་ཡུལ་མིའི་ཁང་པ་བཅས་ལ་རིན་གོང་ཧ་ཅང་མཐོན་པོ་ཆགས་ཏེ་དཀའ་ངལ་ཆེན་པོ་འཕྲད་ཀྱི་ཡོད་པ་གོ་སོང་། ཁག་ཅིག་ང་ཚོའི་མདུན་ཕྱོགས་ཀྱི་རྒྱ་གར་མགྲོན་ཁང་ཞིག་ནང་སྡོད་དུ་བཅུག་པ་ཡིན། ང་ཚོའི་གུར་སྔོན་མ་ནས་བརྒྱབ་ཚར་ཡོད་ཀྱང་ཆུ་དང་གློག་མ་འགྲིག་པའི་དབང་གིས་བོད་ནས་ཕེབས་མཁན་ཚོར་ཁ་ཐུག་ཁ་ཐུག་ལ་སྣེ་ལེན་ཞུ་ཐུབ་མ་སོང་། ཕྱི་ཚེས་ ༡༦ ཉིན་ནས་བཟུང་གླིང་གཅིག་ལ་ཆུ་འགྲིག་སོང་བས་ཚེས་ ༡༧ ནས་བཟུང་གུར་ནང་སྡོད་དུ་མི་འཇུག་ཐབས་མེད་ཆགས་སོང་། ད་ཆར་མི་ ༡༠༠༠ ལྷག་གུར་ནང་བསྡད་ཡོད་པ་རེད།
དྲི་བ། དུས་དབང་གོ་སྒྲིག་ཚོགས་ཆུང་དང་སྣེ་ལེན་ཁང་གཉིས་ཀྱིས་མང་ལ་སྣེ་ལེན་ཞུ་ཕྱོགས་ཐད་ཁྱད་པར་ག་རེ་ཡོད་དམ།
ལན། སྤྱིར་བཏང་དུས་དབང་གོ་སྒྲིག་ཚོགས་ཆུང་གི་ངོས་ནས་མི་དམངས་སྤྱི་བྱིངས་དང་། ལྷག་པར་དུ་དེ་སྔ་ནས་གོ་སྒྲིག་ཚོགས་ཆུང་གི་སྡོད་གུར་སྔོན་མངགས་བྱས་ཡོད་པ་དག་ལ་སྣེ་ལེན་ཞུ་བཞིན་ཡོད་པ་རེད། ང་ཚོ་སྣེ་ལེན་ཁང་གི་ངོས་ནས་བོད་ནས་ཕེབས་པའི་ཆོ་ཞུ་བ་ཁོ་ནར་སྣེ་ལེན་ཞུ་བཞིན་ཡོད་པ་རེད། གོ་སྒྲིག་ཚོགས་ཆུང་གིས་ཕྱི་ཟླ་ ༡༠ པ་ཙམ་ནས་གསར་ལམ་ཁག་ཏུ་གསལ་བསྒྲགས་མང་པོ་ཕྱིན་པ་རེད། ང་ཚོས་དེ་འདྲ་གནང་མ་ཐུབ་པའི་དབང་གིས་མི་མང་ལ་མགོ་ཉོག་པོ་ཆགས་འདུག གོ་སྒྲིག་ཚོགས་ཆུང་གི་གུར་དེ་ཕྱི་ཚེས་ ༢༥ ནས་མི་མང་ལ་གཏོང་རྒྱུ་རེད། ཐོག་མའི་འཆར་གཞི་ལྟར་ན་སྣེ་ལེན་ཁང་གི་གུར་དེ་ཕྱི་ཟླ་ ༡༢ པའི་ཚེས་ ༢༠ ནས་གཏོང་རྒྱུ་དང་། ཕྱི་ཚེས་ ༢༥ ཉིན་ནས་ཞོགས་ཇ་འབུལ་རྒྱུའི་གྲ་སྒྲིག་ཡོད་པ་རེད།
དྲི་བ། འདིར་སྣེ་ལེན་ཁང་དུ་བོད་ནས་ཕེབས་མཁན་ཚོར་འཕྲོད་བསྟེན་སྨན་ཁང་དང་བདེ་འཇགས་སྲུང་སྐྱོབ། དེ་བཞིན། སྡོད་གུར་ནང་ཅ་དངོས་གྱི་མཐུན་རྐྱེན་གང་དག་སྦྱར་ཡོད་དམ།
ལན། བོད་ནས་ཕེབས་མཁན་ཚོར་བལ་ཡུལ་སྣེ་ལེན་ཁང་ནས་རླངས་འཁོར་འཚོལ་རྒྱུ་དང་འགྲོ་སོང་གཏོང་རྒྱུ་དེ་འདྲ་གནང་ཐུབ་ཡོད་པ་མ་རེད་དེ། འདིར་འབྱོར་རྗེས་བཞུགས་གུར་དང་། མི་རེར་ཉལ་གདན་རེ། ཕྱི་ཚེས་ ༢༥ ནས་བཟུང་ཞོགས་ཇ་ཡང་གོ་སྒྲིག་ཞུ་རྒྱུ་ཡིན། ཉིན་གུང་གསུང་ཆོས་ལ་ཕེབས་ཀྱི་ཡོད་སྟབས་ཆོས་རྭ་ནས་ཞལ་ལག་རག་འགྲོ་བ་རེད། དགོང་མོ་ཆབ་ཁོལ་མ་ཙམ་ལས་ཞལ་ལག་གྲ་སྒྲིག་ཞུ་ཐུབ་མ་སོང་། གཞན། སྨན་ཁང་གི་ཐད་དུ་དེ་སྔ་དུས་དབང་གོ་སྒྲིག་ཚོགས་ཆུང་དང་བདེ་ལེགས་སྨན་ཁང་བཅས་ལ་བཀའ་མོལ་ཞུས་ཏེ་ཡར་མར་བྱས་མཐར་དགའ་ལྡན་བྱང་རྩེའི་སྨན་ཁང་ཆ་ཚང་འདིར་ཕེབས་རྒྱུ་བྱས་ཡོད། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་བདེ་ལེགས་སྨན་ཁང་ཡང་རྟོག་ཞིབ་ལ་ཕེབས་རྒྱུ་རེད། ང་ཚོའི་གྲ་སྒྲིག་ཐད་ཉེ་ཆར་དབུས་བོད་མིའི་སྒྲིག་འཛུགས་ཆོས་རིག་བཀའ་བློན་མཆོག་ཐེབས་ཏེ་གཟིགས་སྐོར་གནང་སོང་།
དྲི་བ། བལ་ཡུལ་སྣེ་ལེན་ཁང་དང་ངྷ་རམ་ས་ལའི་སྣེ་ལེན་ཁང་ལ་བོད་ནས་སྐྱབས་བཅོལ་དུ་འབྱོར་ཡོད་པ་དག་འདིར་དས་དབང་ཐོག་ཕེབས་ཐུབ་ཀྱི་ཡོད་མེད་དང་། རྡོར་གདན་སྣེ་ལེན་འཕྲལ་སེལ་ལས་ཁུངས་ག་དུས་སྒོ་རྒྱག་གི་ཡོད་དམ།
ལན། བོད་ནས་སྐྱབས་བཅོལ་དུ་འབྱོར་ཡོད་རིགས་ཡོངས་རྫོགས་གནས་སྐབས་རིང་བལ་ཡུལ་སྣེ་ལེན་ཁང་ནས་འགོག་རྒྱུ་བྱས་ཡོད། རང་ངོས་ནས་འགྲོ་སོང་བཏང་སྟེ་ཕེབས་མཁན་ཡོད་ན་གཏོང་རྒྱུ་ལས་གཞུང་འབྲེལ་ཐོག་དུས་དབང་ལ་གཏོང་ཐུབ་ཀྱི་ཡོད་པ་མ་རེད། རྒྱ་གར་གཞུང་གི་ལག་འཁྱེར་ཐད་ནས་ཀྱང་དཀའ་ངལ་ཡོད་པ་རེད། དེ་སྔ་ནས་ངྷ་རམ་ས་ལའི་སྣེ་ལེན་ཁང་ལ་འབྱོར་ཡོད་པ་ཚང་མ་གྲྭ་ས་ཁག་དང་སློབ་གྲྭ་ཁག་སོགས་སུ་བཏང་ཚར་ཡོད། དུས་འཁོར་དབང་ཆེན་མཇུག་བསྒྲིལ་རྗེས་གཞི་ནས་བལ་ཡུལ་སྣེ་ལེན་ཁང་དུ་བཀག་ཉར་བྱས་ཡོད་པ་རྣམས་ངྷ་རམ་ས་ལར་གཏོང་རྒྱུ་ཡིན། ཕྱི་ཟླ་ ༡ ཚེས་ ༡༠ ནས་དབང་རྫོགས་ཀྱི་ཡོད་སྟབས་ཚེས་ ༡༥ ནས་སྣེ་ལེན་ཁང་སྒོ་རྒྱག་རྒྱུ་ཡིན། བོད་ནས་ཕེབས་པའི་ཆོས་ཞུ་བ་རེ་ཟུང་རྗེས་སུ་ལྷག་སྲིད་ཀྱང་། ཕལ་ཆེར་ང་ཚོའི་གཞུང་འབྲེལ་གྱི་ངོས་ནས་གོ་སྒྲིག་དེ་འདྲ་ཡོད་པ་མ་རེད།
གསར་འགོད་པ་དོན་འགྲུབ་བཀྲ་ཤིས་ཀྱིས། གནས་མཆོག་རྡོ་རྗེ་གདན་ནས་སྤེལ།
བཀྲ་ཤིས་སྒྲོལ་མས་ག་རེ་ལབ་བཞིན་ཡོད་དམ། བུད་མེད་ཁ་ན་འདི་ལས་ཅི་ཡོད། སྣེ་ལེན་ཁང་གིས་ཡག་པོ་མ་བྱས་པ་ཡོད་ན་འདི་རེད། ཅེས་གཅིག་གཅིག་དང་གཉིས་གཉིས་ཤོད་ཅིག གཞན་བུད་མེད་ཀྱིས་ངུ་སྐད་མ་རྒྱག
༄༅།།བོད་ནས་གསར་དུ་འཕེབས་པའི་ཆོས་གཞུ་བ་རྣམས་ལ་སྤྱི་གསར་དུས་ཆེན་ལ་འཚམས་འདྲིའི་བཀྲིས་བདེེགས་ཞུ།
སྣེ་ལེན་ཁང་གིས་ནམ་རྒྱུན་ནས་བོད་ནས་ཕེབས་མཁན་ཚོར་ལམ་སྟོན་རོགས་རམ་གང་ཡག་ཡག་བྱེད་ཐུབ་རྒྱུ་ཧ་ཅང་གལ་ཆེ། སྤྱིའི་ཆ་ནས་ལེགས་པོ་བྱུང་ན་འགྲིགས་པ་རེད། ཐམས་ཅད་ཀྱི་འདོད་པ་ཁེངས་པ་ཞིག་སུས་ཀྱང་བྱེད་མི་ཐུབ།
བོད་ནས་འཕེབས་པའི་ཆོས་བཞུ་བ་རྣམས་ལ་སྣེ་ལེན་གང་ཟབ་ཡོང་བའི་རེ་བ་ཆེ།
བཙན་བྱོལ་བོད་པས། བོད་ནས་ཕེབས་པའི་ཆོས་ཞུ་བར་སྣེ་ལེན་བྱེད་སྟངས་ལ་རྗེས་སུ་ཡི་རང་ཡོད་ལགས། དཀའ་ལས་བསྐྱོན་དང་། རང་ཉིད་རང་གཞན་གཉིས་ཕན་དང་། འདི་ཕྱི་གཉིས་ཡོད་ཆགས་པ་རེད་ལགས།
རེད་དངོས་ཡོད་གནས་ཚུལ་རེད། བདེན་པ་རེད། བོད་ནས་གསར་དུ་འབྱོར་བ་ཚོར་སྣེ་ལེན་ཚད་ལྡན་བྱེད་དགོས་པ་རེད། མགུ་ཁ་གང་བ་ཞིག་བྱེད་དགོས་པ་རེད། དེ་ལ་ཐེ་ཚོམ་གང་ཡང་མེད། ངེས་པར་དགོས་ངེས་རེད། འོན་ཀྱང་སྡེ་བ་གཞུང་དང་དབུས་སྣེ་ལེན་ཁང་གིས་བྱེད་མིན་ང་ཚོར་གསལ་ཆ་གང་འཚམས་ཡོད་པ་རེད། དེའི་ཕྱིར་ང་ལ་ཐེ་ཚོམ་ཡོད་ལབ་ཡིན། ཡིད་ཆེས་མེད་ལབ་ཡིན། ལབ་རྒྱུས་གླེང་རྒྱུ་རྗེས་ནས་ཡོང་གི་རེད། གནས་ཚུལ་བལྟས་ནས་ང་ཚོ་སུ་བདེན་གླེང་ཆོག་གི་རེད།
གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་སུ་འདྲ་ཞིག་ཡིན་ན་ད་ཐེངས་བོད་ནང་ནས་གསར་དུ་འབྱོར་བའི་སྤུན་ཟླ་དག་ལ་རོགས་རམ་དང་མཐུན་འབྱོར་གང་ཐུབ་བྱེད་དགོས་ངེས་རེད་ལ། བྱེད་འོས་པ་ཞིག་ཀྱང་རེད། ང་ཚོ་གཞན་ཡུལ་ལ་ཡོད་དུས་དེ་ཙམ་ཡང་རོགས་རམ་མ་ཐུབ་ན་སྐྱིད་སྡུག་གཅིག་པ་ཞེས་པའི་ནམ་རྒྱུན་གྱི་སྐད་ཆ་དེ་དོན་གྱིས་སྟོང་སོང་བ་རེད། དེ་བས་གཞུང་སྒེར་སུ་ཡིན་ཡང་རོགས་རམ་གང་ཐུབ་བྱེད་པའི་འབོད་སྐུལ་ཤུགས་ཆེར་ཞུ།
བུད་མེད་མིང་ཅན་ལགས་ཁྱེད་ལ་ཡིད་ཆེས་མེད་ན་ད་བར་དུ་རྒྱ་གར་ནང་ག་རེ་བྱས་ནས་བསྡད་ཡོད་རང་གཞུང་དང་༧སྐྱབས་མགོན་རིན་པོ་ཆེ་་ལ་སྨད་པ་བྱེད་མི་འདི་ཚེ་རྒྱ་མའི་སོ་བ་ཡིན་པ་ཐེ་མི་ཚོམ་ཡང་དཀྲུག་ཤིང་ཞིག་གི་འགོ་བཙུག་ན་བསམ་གི་ཡོད་ས་རེད། ངོ་མ་ངོ་ཚ་མེད་པ་འདི་ཚོ་ཁྱི་དང་འདྲ་འདྲ་རེད་་་་་་་་་་་་་
སྣེ་ལེན་ཁང་གིས་སྣེ་ལེན་ཡག་པོ་ཞིག་བྱེད་ཀྱི་ཡོད་པའི་ཡིད་ཆེས་མེད། འོན་ཀྱང་ང་ཚོས་མིག་བལྟ་བཞིན་རྣ་བས་ཉན་ནས་འདུག་དང་སྣེ་ལེན་ཡག་པོ་བྱེད་ཀྱི་ཡོད་མེད་ཉིན་ཤས་རྗེས་སུ་དངོས་སུ་མཐོང་ཐོས་འབྱུང་གི་རེད།
ཤིན་ཏུ་ལེགས། འདི་ལྟར་ཞབས་ཞུ་གནང་འོས་གནང་དགོས་པ་ང་ཚོའི་འགན་འཁྲི་རེད། ཁོང་ཚོ་གལ་ཆེན་གྱི་སྐུ་མགྲོན་རྐྱང་རེད།
ཡིད་གཟབ་གནང་དགོས་པ་དེ་འདྲ་ཡང་ཡོད་པ་རེད།
ཐུགས་རྗེ་ཆེ།