ཕྱི་ཚེས་ ༥ ཉིན་དབྱིན་ཇིའི་ཕྱི་སྲིད་དྲུང་ཆེ་ཝེ་ལེམ་(William Hague) འབར་མའི་ནང་ཕྱི་འབྲེལ་གཟིགས་སྐོར་དུ་ཕེབས་ཡོད་འདུག ཁོང་ནི་འདས་པའི་ལོ་ ༥༠ རིང་གི་དབྱིན་ཇིའི་གཞུང་འབྲེལ་མི་སྣ་འབར་མའི་ནང་ཕེབས་མཁན་ཐོག་མ་དེ་ཆགས་ཡོད་ཀྱང་། ཐེངས་འདིའི་ཕྱི་འབྲེལ་གཟིགས་སྐོར་སྐབས་ཁོང་འབར་མའི་སྲིད་འཛིན་ཐེན་སེན་དང་མཇལ་འཕྲད་ཀྱིས། འབར་མའི་དམངས་གཙོ་བཅོས་བསྒྱུར་ལ་སྐུལ་འདེད་དང་ཆབ་སྲིད་བཙོན་པ་ལྷག་མ་རྣམས་གློད་བཀྲོལ་གཏོང་རྒྱུ་བཅས་ཀྱི་ཐད་གྲོས་བསྡུར་བྱ་འཆར་ཡོད་འདུག ཝེ་མེལ་འབར་མར་གཟིགས་སྐོར་དུ་མ་ཕྱིན་པའི་སྔོན་དེར་གསར་འགོད་གསལ་བསྒྲགས་ཤིག་སྤེལ་བའི་ནང་། ཁོང་གིས་འབར་མའི་དམངས་གཙོ་བཅོས་བསྒྱུར་ཕྱི་གསལ་ནང་གསལ་ཡོང་རྒྱུའི་རེ་བ་དང་། སྲིད་འཛིན་ཐེན་སེན་དང་མཇལ་འཕྲད་ཀྱིས་འབར་མའི་དམངས་གཙོ་བཅོས་བསྒྱུར་གྱི་གོམ་པ་མདུན་སྤོ་བྱ་རྒྱུ་དང་། འབར་མའི་ནང་གི་འགྲོ་བ་མིའི་ཐོབ་ཐང་དང་ཆབ་སྲིད་རང་དབང་གོང་འཕེལ་གཏོང་དགོས་སོགས། གནད་དོན་དེ་དག་ཐད་དབྱིན་གཞུང་གིས་རྒྱབ་སྐྱོར་ག་རེ་བྱ་དགོས་མིན་དང་། ལྷག་པར་དུ་ཆབ་སྲིད་བཙོན་པ་ལྷག་མ་རྣམས་གློད་བཀྲོལ་གཏོང་དགོས་པ་བཅས་ཀྱི་ཐད་གྲོས་བསྡུར་བྱ་འཆར་ཡོད་པ་མ་ཟད། དམངས་གཙོ་དོན་གཉེར་པ་ལྕམ་ཨང་སན་སུའུ་ཀེ་དང་མཇལ་འཕྲད་གནང་འཆར་ཡོད་པ་བརྗོད་འདུག
གསར་འགོད་པ། བནྡེ་སྐྱབས།
ཡུལ་ལུང་འདི་ལ་དམངས་གཙོ་ཡང་དག་པ་ཞིག་ཡོང་བར་ཤོག