ཁྱོད་ཀྱི་གླུ་སྐད་ཅིག་གིས་བསད་སོང་།

ཆུང་དུས་སུ་ངས་ཡང་དང་བསྐྱར་དུ་ཉན་ཁོམ་མ་བྱུང་བའི་སྐད་དེ་ནི་སུ་ཞིག་གི་གླུ་སྐད་ཡིན་ནམ། ངས་འདི་ལྟར་བསམ་གཞིགས་ཞིབ་མོ་ཞིག་བཏང་བ་ཡིན། དོན་དངོས་སུ་ང་རང་གི་གཤིས་སུ་འཇགས་པ་དང་སེམས་སུ་ཟུག་པའི་གླུ་སྐད་དེ་ནི་དེ་རིང་གཞི་ནས་ཤེས་སོང་།

དེ་ནི་ཁྱོད་ཀྱིས་བླངས་པའི་གླུ་སྐད་རེད། ཁྱོད་ཀྱི་སྐད་ངག་ནི་བདག་གི་སེམས་པའི་བདེ་སྡུག་དང་འབྲེལ་འདུག་ལ། ཁྱེད་ཀྱི་སྐད་ཆ་ནི་བདག་གི་སེམས་ཀྱི་ཚོར་འདུ་དང་བསྲེས་ཡོད། ཁྱེད་ཀྱི་གླུ་སྐད་ལ་ཉན་ཐེངས་རེར། ང་ནི་གཏན་དུ་ཕྱིར་མི་ལོག་པའི་མི་དེ་མིན་པར་ཁྱེད་རང་ལ་ཞིབ་དུ་བཤད་འདོད་ཀྱང་། ཁྱེད་རང་ནི་རྒྱང་རིང་བའི་ཡུལ་དེ་ན། སུ་ཞིག་གི་ཆེད་དུ་འཚོ་ཡོད་མེད་བཤད་ཚོད་མི་ཐུག་ཡང་། མདུན་མ་ཞིག་གི་ཆེད་དུ་འདུར་ཞིང་འཚོ་བར་གྲགས་སོང་།

ཁྱོད་ཀྱི་སྐད་དེ་ནི་ངའི་ཕ་ཡུལ་གྱི་སྐད་རེད་འདུག ཁྱོད་ཀྱི་སྙིང་གཏམ་དེ་ནི་ང་རང་ཆུང་དུས་སུ་སྙམ་འཇོག་ཁོམ་མ་བྱུང་བའི་གཏམ་རྒྱུད་དེ་རེད་འདུག ད་ལྟ་སེམས་པ་ལྷོད་དུ་བཞག་ནས་བསམ་གཞིགས་ཤིག་བྱས་དུས། ངས་སྐབས་དེར་སྙམ་མ་བཞག་པ་དེར་ནོར་འཁྲུལ་དུ་མཐོང་སོང་། ནོར་འཁྲུལ་དེ་ཡི་སྟབས་ཀྱིས་ངས་ཁྱེད་ཀྱི་གླུ་སྐད་ལ་ཉན་ཐེངས་རེར། ང་རང་ཁྱོད་ཀྱིས་གླུ་སྐད་ཀྱི་བསད་སོང་།

བེམ་པོ་ལྟ་བུའི་ང་རང་ནི། ད་ལྟ་གཞན་ཡུལ་ཞེས་པའི་མི་སྡེ་ཞིག་ན། སྐད་རིགས་མི་གཅིག་པའི་མི་ཚོགས་ཤིག་དང་། སེམས་པ་མི་འདྲིས་པའི་རིགས་རུས་མི་གཅིག་པའི་བུད་མེད་བཟང་མོ་ཞིག་གི་མཉམ་དུ་ལུས་དེ་ཡོད། འདི་ཡང་ངས་བཟོས་པའི་ནག་ཉེས་དེ་དག་གི་ཉེས་པ་དང་ཁྲིམས་ཆད་མིན་ན་གང་ཡིན། ད་ལྟ་ངས་ཞིབ་དུ་དྲ་ལམ་ནས་ཁྱོད་ཀྱི་གླུ་སྐད་དེར་ཉན་དུས། ཁྱོད་ཀྱིས་ཁྱེད་དང་ང་ཞེས་པའི་གླུ་ཞིག་བླངས། ང་རང་དེ་ལ་ཉན་ཞོར་དུ་ཤི་སོང་།