དུད་སྤྲིན་དང་མེ་ཞགས་བར་གྱི་གཟན་ཤམ།

རྐང་གསུམ།

ནམ་ ཡང་མིའི་རིགས་ཀྱི་རྣ་བར་རྒྱོབ་སོད་གཅོར་རྡུང་གི་ལྕེ་རྩེའི་གི་སྒྲ་འཇགས་མི་སྲིད་པའི་སྒེར་གཅོད་སྲིད་གཞུང་གིས་བཙིར་གནོན་དམའ་འབེབ་འོག  དྲང་བདེན་དང་རང་དབང་གི་བླ་སྲོག་གཙུག་ཏུ་བཀུར་ནས་བགྲང་བྱའི་ཉག་མ་དྲུག་ཅུ་འཁོར་བའི་ཡར་སྔོན་དེར།  ང་ཚོ་ནི་བདེན་དོན་དང་།  རང་དབང་།  འདྲ་མཉམ་དང་།  ཐོབ་ཐང་སོགས་འཐོབ་པར་སྨོན་ཞིང་དགའ་མཁན་ཞིག་གཏན་ནས་མིན།  ཅིའི་ཕྱིར་མི་ལོ་དྲུག་ཅུའི་ཡར་སྔོན་དེར་ང་ཚོར་མིའི་རིགས་ཀྱི་ཐོབ་དབང་དང་།  དད་མོས།  རྩིས་ཐང་སོགས་འཐོབ་པར་འདོད་པའི་ཚུགས་ཐུབ་ཀྱི་འདུ་ཤེས་ཤིག་མ་ཡོད་པ་རེད།  ལོ་ཟླ་དེར་ང་ཚོས་རང་ཉིད་རང་གིས་སྐྱོང་ཞིང་རང་ཁྱིམ་རང་གིས་འཛིན་གྱིན་ཡོད་པ་མ་ཟད།  བོད་བཙན་པོ་གོང་མའི་སྤྱོད་ཚུལ་ཇི་བཞིན་དྲང་བདེན་དང་ཀུན་མཐུན་གྱི་ཉི་ཟེར་འོག  གཞུང་ས་དགའ་ལྡན་ཕོ་བྲང་གི་ལུགས་གཉིས་ཆབ་སྲིད་ཀྱིས་འགྲོ་བ་མི་སྤྱི་མཚུངས་ཀྱི་དད་མོས་དང་།  རང་དབང་གི་ལྗགས་ཕྱེ་གང་འདོད་དུ་སྟེར་གྱིན་ཡོད་པར་བརྟེན།  ང་ཚོར་དད་མོས་རང་དབང་གི་ལྟོགས་སྐོམ་ཤིག་དང་།  གནས་ལུགས་སྨྲ་འདོད་ཀྱི་ཟུག་གཟེར་ཞིག  ཨ་ཆད་ཨུ་ཐུག་གི་སྨྲེ་ངག་ཅིག་དང་།  སྐྲག་འཇིགས་དོགས་ཟོན་གྱི་སྡུག་བསྔལ་ཞིག  ད་དུང་བདེན་དོན་སྨྲ་འདོད་ཀྱི་འདུ་ཤེས་སོགས་ཀྱིས་དེང་གི་དུས་བཞིན་རང་གི་མགོ་བོ་ན་ནམ་ཡང་འཇུག་མྱོང་མེད།

དེ་བས་ན་བགྲང་བྱའི་ཉག་མ་སུམ་སྟོང་ལྷག་གི་ཡར་སྔོན་དེར་ས་མཐོའི་ཡུལ་ལྗོངས་འདིར་ཐོག་མའི་ཁྱིམ་གཞིའི་ཞིང་ས་དྲོད་ཀྱིས་གསོ་མཁན་ནི།  སྒང་བ་བོད་མི་རིགས་ཀྱི་མེས་པོ་སྙིང་རུས་ཅན་ཚོ་ཡིན་པ་མ་ཟད།  ཁོང་ཚོས་རང་གི་རིགས་རུས་ཀྱི་ངོ་བོ་དང་རྒྱལ་ཁབ་ཀྱི་བརྟན་ལྷིང་གི་ཆེད་དུ་དཔའ་དང་སྟོབས་ཀྱིས་སུམ་གཉིས་ས་ལ་མངའ་དབང་སྒྱུར་སའི་ཕ་གཞིས་དྲོད་མོ་ཡང་འདི་ཡིན་ལ།  མ་ཟད་རིགས་དང་དད་མོས་རང་དབང་གི་ཆེད་དུ་རྒྱའི་གོང་མ་ཁྲི་ལས་ཕབ་པའི་དམག་དཔུང་གཡུལ་ངོར་འདྲེན་སའི་ཐོག་མའི་མལ་ས་ཡང་འདི་རེད།  འོན་ཀྱང་དུས་དང་ལོ་ཟླའི་འགྱུར་འགྲོས་ནི་ཆུ་ཡི་ཆུ་བུར་ཇི་བཞིན་འབུར་འཇོམས་ཐང་གཅིག་གི་འགྲུལ་བཞུད་དང་འདྲ་བས་ན།  ཡིད་དབང་འཕྲོག་པའི་གནའ་བོའི་འཚོ་བ་དེར་ང་ཚོ་ཁད་ཀྱིས་རྒྱང་ནས་རྒྱང་དུ་སྲིང་དགོས་བྱུང་བ་རེད།  ཡིན་ནའང་ང་ཚོའི་མིག་ལམ་དུ་ད་ལྟའམ་ད་དུང་འཆར་ངེས་པ་ནི་འདས་ཟིན་པའི་མེས་པོ་ཚོའི་ཁྲག་དང་རྔུལ་ཆུའི་བརླན་པའི་གཞིས་ཀ་དྲོད་མོ་དེ་ཡིན་པར་བརྟེན། གནའ་བོའི་འུ་ཚང་གི་འཚོ་བ་ནི་བྱམས་དང་བརྩེ་བའི་གོས་དར་གྱི་གཡོགས་ཤིག  དད་མོས་རང་དབང་གི་སྙིང་སྟོབས་འབའ་ཞིག་གི་ཀློང་ན་འཐིམ་པའི་ཁྱིམ་གཞིས་སྣ་འཛོམས་ཤིག་ཡིན་པ་སུ་ཞིག་ཚོམ་ཞེས་དེང་འདིར་གླེང་རྒྱུ་ལས་འཛམ་གླིང་ཡིག་ཚགས་ཀྱི་མངལ་དུ་འཐུམས་ནས་ལོ་ཡི་ཉག་མ་དྲུག་ཅུ་འཁོར་སོང་བ་རེད། 

འོན་ཏེ་མེས་པོའི་བླ་མཁར་འདི་ལྟར་སྐྱིད་སྡུག་འདྲེས་མའི་འགྱུར་བག་རེ་རེའི་སོ་བར་ནས་གློ་བུར་ཉིད་དུ་ཁྱུར་མིད་དུ་བཏང་ཚར་ནའང་།  དཔའ་དང་སྟོབས་ཀྱིས་ཁེངས་པའི་མེས་པོའི་བརླ་རྐང་རང་གི་བུ་རབས་ཚ་རྒྱུད་ཚོའི་སྙིང་རྩའི་ཁྲག་དྲོད་དང་ལྷན་དུ་གནས་ཡོད་སྟབས།  བཙིར་གནོད་གཅལ་རྡུང་ཅི་འདྲ་ཞིག་མྱངས་དང་མྱོང་དགོས་བྱུང་རུང་ནམ་ཡང་འཇིག་མི་སྲིད་པ་ཞིག་རེད།

འོ་ན།  སུ་ཞིག་གིས་གང་ཞིག་ནས་ང་ཚོར་འཇིག་རྟེན་ཚུལ་ལུགས་དང་མི་མཐུན་པའི་ཁྲིམས་མེད་ལུགས་ཀྱི་གཉའ་གནོད་བྱེད་མགོ་རྩོམ་པ་རེད།  དེ་ནི་ལྟ་ཚུལ་དང་དད་མོས་སྣ་གཅིག་མཆོག་ཏུ་བཀུར་དགོས་པའི་སྒེར་གཅོད་སྲིད་གཞུང་གིས་མདོ་དབུས་མཐོ་སྒང་གི་བུ་རབས་ཚ་རྒྱུད་ཚོའི་བྲང་གཞུང་ཚ་བིར་གཤགས་པའི་ཉི་མ་དེ་རེད།  དེ་ནི་གདོང་དམར་ཚང་གི་དཔའ་རྒོད་སྙིང་རུས་ཅན་ཚོས་རང་ལུས་དུམ་བུར་གཤགས་རུང་དབུགས་ཀྱི་རྒྱུ་བ་མ་ཆད་པར་དུ།  ཡབ་མེས་ཚོའི་ཕ་ཁྱིམ་དགྲ་ལག་ཏུ་མི་འཇོག་པའི་སྙིང་རུས་མདུན་དུ་གཏད་ནས་གཡུལ་ངོར་འཐབ་པའི་ཉི་མ་དེར།  དེ་ནི་མེ་སྒྱོགས་དང་དབང་ཤེད་ཀྱི་སོ་བར་ནས་པོ་ཏ་ལའི་ཕོ་བྲང་དཀར་བོ་ཧར་གྱིས་གཏོར་ཏེ་ནོར་གླིང་སྐལ་བཟང་ཕོ་བྲང་གི་མགོ་རྟེང་སློག་པའི་ཉི་མ་དེ་རེད།  དེ་ནི་ཆོས་དང་རིག་གནས།  དད་མོས་རང་དབང་སོགས་བཙན་སྒྱུར་གྱི་དབང་ཤེད་འོག  གཙུག་ལག་གསུང་རབ་ཀྱི་ཕུང་བོ་དུད་སྤྲིན་དང་མེ་ཞགས་པར་ནས་འཇིག་རྟེན་དང་དུས་གཏན་དུ་ཁ་གྱེས་པའི་ཉི་མ་དེ་རེད།  དེ་ནི་གཞུང་ས་དགའ་ལྡན་ཕོ་བྲང་གི་ལུགས་གཉིས་ཆབ་སྲིད་ཀྱི་སྲིད་ཐམ་ཧི་མ་ལ་ཡི་རི་རྒྱབ་ཏུ་ཁུར་ཏེ།  ཞབས་རྗེས་ཡར་ཀླུངས་གཙང་བོའི་འགྲམ་དུ་པར་དགོས་བྱུང་བའི་ཉི་མ་དེ་རེད།  དེ་ནི་བོད་ཀྱི་དགོན་སྡེ་དྲུག་སྟོང་ལྷག་གི་ཞལ་རས་མི་ཡུལ་དང་གཏན་དུ་ཁ་གྱེས་ཏེ།  དཔུང་རྟགས་དམར་བོ་ཅན་ཚོས་རྨོད་འདེབས་ངལ་རྩོལ་གྱི་ཞིང་ས་རུ་སྒྱུར་བའི་ཉི་མ་དེ་རེད།  དེ་ནི་པཎ་ཆེན་ཆོས་ཀྱི་རྒྱལ་མཚན་གྱིས་བོད་མི་ས་ཡ་དྲུག་གི་ཆེད་དུ་མི་ཡུལ་གྱི་དམྱལ་ཁམས་འགྲིམ་པའི་ཉི་མ་དེ་རེད།

དེ་བས་ན་འདི་ལྟར་བསམ་ཞིང་དྲན་དུས་ཕངས་སེམས་ལྕི་མོ་ཞིག་དང་འགྱོད་གདུང་དྲག་པོ་ཞིག་གིས་ང་ཚོའི་སྙིང་རླུང་སྟོད་དུ་བཙིར་ཡོང་རུང་ཉི་མ་དེར་གཞིས་བྱེས་གཉིས་སུ་གྱེས་དགོས་བྱུང་བ་ནི་ང་ཚོ་ཡིན་ལ།  མ་ཟད་སྐབས་དེ་ནས་བཟུང་བོད་མི་རྒན་འཁོགས་སྐྲ་དཀར་ནས་བྱིས་པ་སྣབས་ལུག་ཚོས་ཤས་མི་བཟོད་པའི་དམྱལ་བ་མི་ཡུལ་ནས་མྱངས་དགོས་འབྱུང་བ་མ་ཟད།  བོད་མི་རེ་རེའི་སྨྲ་སྒོར་ཉི་མ་དེ་ནས་བཟུང་སྒེར་གཅོད་གཏུམ་དབང་ཅན་ཚོས་ལྕགས་ཟ་རྒྱབ་ཏེ་ལྟོས་ལྟོས་ཉོན་ཉོན་གྱི་ངེས་མེད་ཁྲིམས་གཅོད་འདྲ་མིན་བྱས་ནས།  བོད་མི་ཁྲི་ཁྲི་འབུམ་འབུམ་གྱི་ཚེ་སྲོག་གི་རྒྱུ་བ་འཇིག་རྟེན་འདི་དང་དུས་གཏན་དུ་ཁ་གྱེས་སུ་བཅུག་པ་རེད། 

རེ་ཆད་ཨུ་ཐུག་གི་ཉི་མ་དེ་ནས་བཟུང་དུས་དེ་རིང་བར་ང་ཚོས་སྐྲག་འཇིགས་དོགས་ཟོན་གྱི་འཚོ་བ་སྐྱེལ་ཏེ་ལོ་ཡི་བགྲང་བྱ་དྲུག་ཅུ་འཁོར་ཟིན་ནའང་།  དེ་རིང་ད་དུང་སྒེར་གཅོད་སྲིད་གཞུང་གིས་ལྟ་ཚུལ་དང་དད་མོས་སྣ་གཅིག་མཆོག་ཏུ་བཀུར་དགོས་པའི་དྲག་གནོད་དམའ་འབེབས་ཀྱི་སྤྱོར་བ་བཀོལ་ཤུགས་ཆེ་རུ་གཏོང་གི་ཡོད་པ་མ་ཟད།  རྒྱུ་འབྲས་བློ་མིག་གི་ཞིང་ས་དང་དུས་གཏད་དུ་ཁ་གྱེས་ཟིན་པའི་དྲག་དཔུང་དམག་གི་ཚོགས་སྤྱི་ཆེན་མོ་དེ་ཡང་།  ང་ཚོའི་མིག་མདུན་དུ་ཉིན་རེ་ཟླ་རེ་ཇེ་མང་ནས་ཇེ་མང་དུ་བཏང་སྟེ།  བཟོད་དཀའ་བའི་ཁྲིམས་མེད་ལུགས་མེད་ཀྱི་དྲག་སྤྱོར་གང་འདོད་གང་ཐུབ་ཏུ་བཀོལ་བཞིན་ཡོད་ནའང་།  དུས་ཀྱི་འགྱུར་འགྲོས་རེ་རེ་མིའི་རིགས་ཀྱི་བསམ་བློའི་ངེས་རྟོགས་དང་།  རིག་གནས་ཀྱི་ཆབ་ཚད།  སྤྱི་དམངས་ཀྱི་ཐོབ་དབང་དང་།  ཁོར་ཡུག་གི་ཆག་འཇིག  དད་མོས་རང་དབང་གི་འཁོར་རྒྱ་སོགས་ཀྱི་འཕེལ་ཕྱོགས་ནི་མི་སུ་ཞིག་གིས་བཀག་ཀྱང་ཁོགས་མི་སྲིད་པའི་ཚོགས་སྤྱི་ཆེན་མོ་ཞིག་དང་འདྲ་བས་ན།  དུས་རབས་ཉེར་གཅིག་པའི་མིའི་རིགས་ཀྱི་ཤེས་རྟོགས་རིག་པའི་མྱིར་ཚད་རྒྱ་མཚོའི་རླབས་རིས་ཇི་བཞིན་ཤར་ནས་ལྷོ་དང་ལྷོ་ནས་ནུབ་ལ་ཁད་ཀྱིས་འཕྱུར་བཞིན་ཡོད་པར་བརྟེན།  བཙིར་གནོན་གཅར་རྡུང་ཙམ་གྱིས་མིའི་རིགས་ཀྱི་དཔའ་དང་སྟོབས་ནུས་འཇོམས་མི་ཐུབ་པ་ནི་འཛམ་གླིང་ལོ་རྒྱུས་ཀྱིས་ང་ཚོར་དཔང་ཡིག་གསལ་བོ་བྱེད་ངེས་རེད། 

ཡིན་ནའང་དབང་ཤེད་དང་སྟོབས་ཀྱིས་འགྱིང་བའི་དེ་རིང་གི་རྒྱ་ནག་སྲིད་གཞུང་གིས་མི་ཆོས་ལས་འདས་པའི་དྲག་སྦྱོར་གྱི་མདུང་སྣེ། རྟེན་འབྲེལ་རིག་པའི་མ་རྐང་སྲོག་ཏུ་བཟུང་བའི་བོད་ཀྱི་གྲྭ་རྒན་སྐྲ་དཀར་ནས་ལོ་ཆུང་སྣབས་ལུག་ཚོའི་ཕྲག་གོང་ལ་གཏད་ཡོད་པ་ནི།  དམར་བོའི་སྲིད་གཞུང་ལ་བདེན་དོན་དང་རང་དབང་གི་འཇིག་རྟེན་ལ་ལྟ་བྱེད་ཀྱི་མིག་དང་།  གནས་ལུགས་དང་དྲང་དོན་གྱི་ཁྱིམ་གཞིས་བསྐྱར་འཛུགས་ཀྱི་སྤོབས་པ་ཡོངས་སུ་འཁུམ་པའི་རྟགས་ཤིོག་ལས་གཞན་གང་ཡང་མིན་ནའང་། དྲག་ཤུགས་ཀྱི་སྦྱོར་བ་ནག་པོས་གྲྭ་རྒན་སྐྲ་དཀར་ནས་གྲྭ་ཕྲུག་སྣབས་ལུག་ཚོའི་མགོ་ཐོག་ཏུ་རྒྱོབ་སོད་གཅོར་རྡུང་གི་ཐ་ཚིག་མི་སྙན་པ་གང་མང་ཞིག་སྒྲོག་གིན་ཡོད་པ་ནི།  ཅང་ཙེ་མེད་ཤོག་ཁག་གི་སྒེར་གཅོད་དབང་འཛིན་པ་ཚོས་རང་ཉིན་དང་རང་ཉིན་གྱི་རྐུབ་སྟེགས་བརྟན་ལྷིང་གི་ཆེད་ཁོ་ནར་དམིགས་ནས་ཡིན་མིན་བདེན་མིན་ལ་མ་བལྟས་པར་དཀར་ནག་གོ་ལྡོག་གི་ཁྲིམས་ལུགས་དྲིལ་བསྒྲགས་སློབ་གསོ་གཏིང་ཟབ་བྱེད་ཁུལ་བྱས་པ་ཞིག་ཡིན་པ་མ་ཟད།  ལས་གཞི་འདིའི་དམིགས་དོན་གཙོ་བོ་ཡང་སངས་རྒྱས་ཆོས་ལུགས་དང་སངས་རྒྱས་ཆོས་ལུགས་ལ་དད་མོས་དང་སློབ་སྦྱོང་བྱེད་མཁན་ཚོའི་བརླ་རྐང་གཅོག་འདུན་དང་།  བྱམས་བརྩེ་དང་ཤེས་རབ་ཀྱི་སློབ་གླིང་འདི་དག་དམག་སྦྱོང་རྩལ་འགྲན་གྱི་འཁྲབ་ར་ཞིག་ཏུ་སྒྱུར་འདུན་དང་། བསམ་བློ་དང་ཀུན་སྤྱོད་ཀྱི་ངེས་རྟོགས་ཟབ་པའི་སློབ་བུ་འདི་ཚོའི་བློ་རིག་སྐྱེ་འཕེལ་གྱི་མྱུ་གུ་རྨང་ནས་བསྐམས་ན་འདོད་པ་དེ་མ་ཡིན་ནམ།

ངོ་མ་ཡིད་འགྱོད་ཆེ་བའི་གནམ་ཟླ་འདི་ཚོར།  རང་སྲོག་དམར་བོ་གཉན་ཡང་འབེན་དུ་མི་འཇོག་ཐབས་མེད་ཀྱི་གཅར་རྡུང་དང་མནར་གཅོད་མྱངས་དང་མྱོང་བཞིན་ཡོད་པ་ནི།  འཇིག་རྟེན་འདིར་སྐྱེས་ནས་ལོ་ཡི་བགྲང་བྱ་བཅོ་བརྒྱད་དང་བཅུ་དགུ་ལས་མ་འདས་པའི་གྲྭ་ཕྲུག་སྣབས་ལུག་འདི་ཚོ་ཡིན་དོན་ཅི་རེད།  ཁོང་ཚོར་འགྲོ་བ་མིའི་གཞི་རྩའི་ཐོབ་དབང་དང་དད་མོས།  མི་ཆོས་ཀུན་སྦྱོད་ཀྱི་རྩ་བ་མི་རིགས་རང་གི་ཆོས་དང་རིག་གནས་སྦྱང་བརྩོན་རྒྱུད་འཛིན་མི་ཆོག་པའི་བཀག་གཅིར་དང་རང་དབང་།  དཔྱོད་ཤེས་དང་བློ་མིག་གིས་སྐྲུན་པའི་རྩོམ་འབྲི་དཔེ་སྐྲུན་གྱི་ཐོབ་དབང་དང་གཏན་དུ་ཁ་གྱེས་སུ་འཇུག་གི་ཡོད་པ་མ་ཟད།  ཁོང་ཚོའི་གཉའ་བར་ཐེག་དཀའ་བའི་མི་རིགས་ཤིག་གི་ལོ་རྒྱུས་དང་རིག་གནས་ཤིག་གི་ཆག་འཇིག བརྗེད་དཀའ་བའི་དཔའ་བོ་ཚོའི་ཁ་ཆེམས་དང་ཁྲག་དྲོད་འཕྱུར་ཡོད་སྟབས།  ཁོ་ཚོས་སྒེར་གཅོད་སྲིད་གཞུང་ལ་མཐའ་མའི་ཐ་ཚིག་གི་རིན་དོད་དུ་༧གོང་ས་མཆོག་གི་དགོངས་དོན་ཅི་བཞིན་ཚེ་མེད་ཞི་བའི་ལྟ་གྲུབ་སྲོག་ཏུ་བཟུང་ནས།  རྒྱལ་སྲས་བྱང་ཆུབ་སེམས་དཔའི་སྟག་མོ་ལུས་སྦྱིན་གྱི་སྤྱོད་པ་ཁུར་དུ་བླངས་ཏེ།  སྒེར་གཅོད་གཏུམ་དབང་ཅན་ཚོར་རང་གི་ལུས་སྲོག་དམར་བོ་མཆོད་མེ་རུ་བསྒྲོན་ནས་ཐ་ཚིག་བསྒྲགས་པ་རེད།  

དེ་བས་ན་དམར་བོའི་སྲིད་གཞུང་གིས་རྫུན་ལས་རྣོག་ལས་ཅི་འདྲ་ཞིག་བྱས་རུང་།   ཤེས་རབ་དང་སྙིང་རྗེ།  བྱམས་བརྩེ་དང་བཟོད་པ།  གཞན་ཕན་དང་ལྷག་བསམ།  དྲང་བདེན་དང་གནས་ལུགས།  རང་དབང་དང་རྩིས་ཐང་སོགས་སློབ་གཞིར་བཟུང་བའི་ལོ་ཆུང་གྲྭ་ཕྲུག་འདི་ཚོར།  ལོ་རྒྱུས་རྫུན་མ་དང་གསར་འགྱུར་རྫུན་མ།  དྲིལ་བསྒྲགས་རྫུན་མ་ཞིག་གིས་ནམ་ཡང་ཁོང་ཚོའི་མགོ་བོ་འཐོམ་དུ་འཇུག་མི་ཐུབ་པ་མ་ཟད།  མི་བཟོད་པའི་བཀག་གཅིར་གཅར་རྡུང་ཅི་འདྲ་ཞིག་བྱས་རུང་ཁོང་ཚོས་རྫུན་ལ་རྒོལ་ཞིང་རྫུས་མ་ལ་འཐབ་འདུན་གྱི་སེམས་དང་སྲོག་གི་མིག་ཤེས་ནམ་ཡང་རྒྱ་ནག་སྲིད་ གཞུང་གིས་འཇོམས་མི་ཐུབ་པ་ཁོང་ཚོའི་ཤེས་རབ་ཀྱི་སྟོབས་ནུས་ལས་གསལ་བོ་ཁ་གྲག་ཚར་བ་རེད།