བོད་
ཕྱི་ལོ་ ༢༠༠༦ སྟེ་པགས་རིགས་མེར་བསྲེགས་ཀྱི་ལོ་ནས་ ༢༠༡༡ ལོའི་རང་ལུས་མེར་བསྲེགས་ཀྱི་ལོ་བར་དུ་ལོ་ ༦ འགོར་ཡོད་པ་དང་། ལོ་འདི་དག་གི་རིང་བོད་མི་ཚོས་རྒྱ་རིགས་དང་འཛམ་གླིང་མི་དམངས་ལ་བོད་མིའི་ཐོབ་ཐང་དང་རིན་ཐང་ལྟ་ཚུལ་བཅས་ཆོད་སེམས་ཆེན་པོའི་སྒོ་ནས་སྔར་བྱུང་མ་མྱོང་བའི་གསལ་བཤད་ཅིག་བྱས་པ་རེད། རེ་བ་དང་འབད་བརྩོན་འདི་དག་གི་སྐབས་ང་ཚོས་རྨི་ལམ་མཉམ་དུ་རྨིས་ཤིང་། མིག་ཆུ་མཉམ་དུ་ཕུད་པ་རེད།
ང་ཚོས་རྒྱུ་འབྲས་དང་མི་རིགས་རང་གི་མཛེས་དཔྱོད། རིག་གཞུང་སྲུང་སྐྱོབ་བཅས་ཀྱི་ཐད་ཆོད་སེམས་དང་བློས་གཏོང་གི་སྒོ་ནས་རི་དྭགས་ཀྱི་པགས་རིགས་མེར་བསྲེགས་བཏང་བ་རེད། མི་རིགས་ཀྱི་ཤི་གསོན་དང་རིག་གཞུང་སྲུང་སྐྱོབ་ཀྱི་ཕྱོགས་ནས་རང་ལུས་མེར་བསྲེགས་བཏང་བ་རེད། ད་ནི་ང་ཚོས་ཆོད་སེམས་ཅི་ཞིག་དང་། ཁ་ཕྱོགས་ཅི་ཞིག་འཚོལ་དགོས་པ་རེད། འདི་ནི་ད་རེབ་ཀྱི་དུས་དབང་འདི་དང་བསྟུན་གོ་བསྡུར་བྱས་ཏེ། ཕ་ཡུལ་དང་བཙན་བྱོལ་གྱི་བོད་མིའི་སྤྱི་ཚོགས་དང་སྒྲིག་འཛུགས་ཀྱི་ནང་དུ་ཕྱིར་ཕེབས་སྐབས་འཁྱེར་འོས་པའི་བརྡ་ལན་དེ་ཡིན་འོས་པར་འདོད།
ང་ཚོར་ད་ནི་གཡོལ་དུ་མེད་པའི་གདོང་ལེན་ཞིག་ཡོད་པ་ནི། བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་ཀྱི་ཕྱོགས་རེད། བོད་ནང་ལ་མཚོན་ན། སྲིད་བྱུས་གུ་ཡངས་ཀྱི་རྗེས་ནས་བོད་ནང་གི་མཁས་པ་མི་བཞི་ལྟ་བུའི་སྐྱེས་ཆེན་དམ་པ་དག་གིས་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་ཀྱི་ཐད་ཕྱག་རྗེས་བླ་ན་མེད་པ་བཞག་པ་ནི་སུ་ལ་ཡང་བསྙོན་དུ་མེད་པ་ཞིག་རེད། ད་སྐབས་སླར་ཡང་། ཨ་ལགས་དོར་ཞི་དང་རྒྱ་ཡེ་བཀྲ་བྷོ། མཁན་པོ་ཚུལ་ཁྲིམས་བློ་གྲོས་ཀྱིས་གཙོས་པའི་ཤེས་ཡོན་པ་དག་གིས་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་ཀྱི་ཐད་ནུས་པ་བླ་ལྷག་ཏུ་འདོན་བཞིན་པ་ནི་ཚང་མར་མངོན་སུམ་དུ་གྱུར་ཡོད་པ་རེད།
ད་དུང་མཚོ་སྔོན་དུ་བོད་ཀྱི་གསོ་རིག་ཚིག་མཛོད་ཆེན་མོ་དང་ཕྱི་ལུགས་ཀྱི་གསོ་རིག་དཔེ་གཞུང་ ༢༨ བོད་སྒྱུར་བྱེད་པ་དང་བསྟུན། མི་འགྱངས་པར་བོད་ལ་ཡང་བོད་ལུགས་དང་ཕྱི་ལུགས་ཀྱི་གསོ་རིག་སློབ་ཁྲིད་གཉིས་ཀ་བོད་ཡིག་གི་ནང་དུ་འཐོན་བཞིན་པ་ལྟ་བུ་རེད། བོད་ཕྱི་ལོགས་ལ་མཚོན་ན་ཡང་། བཙན་བྱོལ་བོད་མིའི་ཤེས་ཡོན་སྲིད་བྱུས་དང་། ཉེ་ཆར་སྐུའི་གསུང་སྒྱུར་བ་མཁས་དབང་ཐུབ་བསྟན་སྦྱིན་པ་མཆོག་གིས་བོད་ཀྱི་བརྡ་སྤྲོད་ལ་ཁ་གསབ་ཀྱི་ཚུལ་དུ་དགོངས་འཆར་ཕུལ་བ་ལྟ་བུའི་ཡར་རྒྱས་དང་བཟང་ཕྱོགས་ཀྱི་ལས་རིམ་འགྲོ་བཞིན་པ་རེད། འདི་ལྟར་བསམ་ན་ང་ཚོས་ནུས་པ་ཕྱོགས་གཅིག་ཏུ་སྤུངས། མཐུན་འགྱུར་མཉམ་གཅིག་ཏུ་ཕུལ་ན་བོད་ཀྱི་སྐད་ཡིག་དང་ཤེས་ཡོན་གྱི་རིག་ཚན་ཚང་མར་ལེགས་ཕྱོགས་ཀྱི་འགྱུར་བ་ཞིག་ཡོང་རྒྱུ་ངེས་གཏན་རེད།
དེས་ན། ད་རེབ་ཀྱི་དུས་དབང་འདིའི་སྐབས་སུ་བརྡ་ལན་ཐམས་ཆད་ཀྱི་ནང་ནས་གལ་ཆེ་ཤོས་དེ་བོད་ཀྱི་སྐད་ཡིག་སྲུང་སྐྱོབ་དང་ཤེས་རིག་གོང་སྤེལ་གྱི་ཆ་རེད་འདོད། འདི་ནི་ང་ཚོར་ཁ་ཚ་དགོས་གཏུགས་དང་དུས་ཐོག་ཆར་པ་ཡི་ཚུལ་དུ་འདུག་སྟབས། ཚང་མས་དོ་སྣང་དང་བགྲོ་གླེང་བརྒྱུད་ཕྱིར་འཁྱེར་རྒྱུའི་ལེགས་སྐྱེས་གྱ་ནོམ་པ་དེ་ཡང་ཡིན་པར་འདོད།
