མདོ་བ་འབྲོག་ཁུལ་གྱི་མང་ཚོགས་ཚོས་རང་ལུས་མེར་བསྲེགས་གཏོང་མཁན་དག་ལ་མྱ་ངན་མཆོད་འབུལ་དང་། ཤུལ་ལུས་ནང་མིར་སྐྱིད་སྡུག་མཉམ་མྱོང་མཚོན་ཆེད་ལོ་གསར་ལ་སྤྲོ་སྐྱིད་བཏང་མེད་པ་མ་ཟད། ལོ་གསར་གྲོལ་བའི་ཉིན་མར་མེ་ཁྲོམ་སྐོར་དང་རྒྱ་ནག་གི་རྒྱལ་དར་མར་ཕབ་སྟེ་ངོ་རྒོལ་གནང་ཡོད་འདུག
ཉེ་ལམ་གསར་འགོད་པས་བོད་ཨ་མདོ་རྨ་ལྷོ་ཁུལ་རེབ་གོང་མདོ་བ་ས་ཁུལ་གྱི་མིང་བརྗོད་འདོད་མེད་མཁན་ཞིག་དང་དྲ་ཐོག་ནས་གླེང་མོལ་བྱས་ཏེ་ཁོང་གིས་ཕ་ཡུལ་གྱི་གནས་ཚུལ་འགའ་ངོ་སྤྲོད་གནང་བ་ལྟར་ན། ཉེ་ལམ་ཨ་མདོའི་ལོ་གསར་ལ་ཉེ་བའི་བོད་ལོའི་གནམ་གང་དགོང་མོ་སྟེ། ལུགས་རྙིང་གི་ཟླ་ ༡༢ པའི་ཚེས་ ༢༩ ཉིན་རྨ་ལྷོ་ཁུལ་རེབ་གོང་མདོ་བ་འབྲོག་༼ མདོ་སྔགས་དར་རྒྱས་གླིང་༽ཞེས་པའི་དགོན་པར་ས་གནས་དེའི་སྐྱ་སེར་མི་མང་ ༤༠༠ ལྷག་འདུ་འཛོམས་གནང་སྟེ། འདས་ལོའི་ནང་བོད་ས་སྟོད་སྨད་བར་གསུམ་དུ་དོན་རྐྱེན་སྣ་ཚོགས་ཤིག་བྱུང་བ་དང་། ལྷག་པར་དུ་བོད་མི་རིགས་ཀྱི་མདུན་ལམ་ཆེད་རང་ལུས་མཆོད་འབུལ་གནང་ཟིན་པའི་སྤུན་ཟླ་ཕོ་མོ་དག་ལ་མྱ་ངན་གུས་འདུད་མཚོན་ཆེད་མར་མེ་མཆོད་འབུལ་རྒྱ་ཆེན་ཞིག་གནང་ཡོད་ཅིང་། དེ་དང་མཉམ་དུ་ཚེ་སྲོག་ཤོར་ཟིན་པ་དག་གི་ནང་མི་གཉེན་འབྲེལ་དག་ལ་སྐྱིད་སྡུག་མཉམ་མྱོང་མཚོན་སླད། ས་གནས་བོད་རིགས་ཡོངས་ཀྱིས་ད་ལོའི་ལོ་གསར་ལ་སྤྲོ་སྐྱིད་མི་གཏོང་རྒྱུའི་དམ་བཅའ་ཕུལ་ཡོད་འདུག
ལོ་གསར་ཚེས་གཅིག་ཉིན་ས་གནས་ཀྱི་(ཏང་ཡོན)ཟེར་བའི་གུང་ཁྲན་ཏང་གི་ཚོགས་མི་རེ་ཟུང་གིས་ཤོག་སྦག་སྒྲོན་པ་སོགས་བྱས་ཏེ། བོད་རིགས་ནང་ཁུལ་གྱི་གྲོས་དོན་ལ་མ་གནས་པར་ལོ་གསར་ལ་སྤྲོ་སྐྱིད་གཏོང་གི་ཡོད་པའི་རྣམ་པ་ཐོན་ཡོད་སྟབས། གྲོང་སྡེའི་མི་མང་རྣམས་ཁོང་ཁྲོ་ཆེན་པོ་ལངས་ཡོད་འདུག རྒྱུ་མཚན་དེ་ལ་བརྟེན་ཏེ། ལོ་གསར་གྲོལ་བའི་ཉིན་སྟེ། ཚེས་ ༡༦ ཉིན་བོད་མི་མང་པོ་ཞིག་མདོ་བ་འབྲོག་སྡེའི་ཞང་སྲིད་གཞུང་གི་ལས་ཁུངས་མདུན་དུ་འཛོམས་ཏེ། ༧གོང་ས་མཆོག་གི་སྐུ་པར་དང་བོད་ཀྱི་རྒྱལ་དར་བཟུང་ནས་མར་མེ་ཁྲོམ་སྐོར་ཞིག་བྱས་ཡོད་པ་མ་ཟད། “ང་ཚོར་ཆོས་དད་རང་དབང་ཡོད་པ་བདེན་པ་ཡིན་ན། ༧གོང་ས་མཆོག་བོད་དུ་གདན་འདྲེན་ཞུ་དགོས་” ཞེས་པའི་འབོད་ཚིག་བསྒྲགས་ཤིང་། ཞང་སྲིད་གཞུང་མདུན་གྱི་རྒྱ་ནག་གི་རྒྱལ་དར་མར་ཕབ་སྟེ་བཤགས་རྗེས། དེ་སྔ་ལོ་གསར་ཚེས་གཅིག་ཉིན་ཤོག་སྦག་སྒྲོན་མཁན་ཏང་ཡོན་ཁྱིམ་ཚང་དག་གི་སྒོ་རྭའི་ནང་གཡུགས་ཡོད་འདུག
གནས་ཚུལ་ཁོ་སྤྲོད་པས་མུ་མཐུད་དུ་མདོ་བ་ས་ཁུལ་གྱི་དཀའ་ངལ་གཞན་ཞིག་ངོ་སྤྲོད་གནང་བ་ལྟར་ན། རྒྱ་ནག་གཞུང་གིས་འདས་པའི་ལོ་འགའ་སྔོན་ནས་བོད་པའི་འབྲོག་པ་རྣམས་(གྲོང་བརྡལ་ཅན)་དུ་བསྒྱུར་བ་དང་། ས་གནས་རེ་ཟུང་ནང་(མཉམ་ལས་ཁང)གསར་འཛུགས་བྱེད་ཀྱི་ཡོད་པ་ལྟར། མདོ་བ་འབྲོག་ཁུལ་དུ་རྒྱ་གཞུང་གིས་མཉམ་ལས་ཁང་ཐོག་མར་ལག་བསྟར་བྱས་པའི་ས་ཁུལ་ཞིག་ཆགས་ཡོད་པ་དང་། ས་གནས་མི་མང་ཚོས་མཉམ་ལས་ཁང་ཟེར་བ་དེ་ལ་ཡིད་ཆེས་རྩ་བ་ནས་བྱེད་ཀྱི་མེད་ཀྱང་། སྲིད་གཞུང་གིས་ས་གནས་དཔོན་རིགས་དང་བོད་རིགས་ལས་བྱེད། དེ་བཞིན་སྡེ་བའི་ནང་གི་ཏང་མི་དང་སྡེ་དཔོན་བླ་ཚོང་བ་འགའ་རེར་ལྐོག་རྔན་སྤྲད་དེ་མང་ཚོགས་ལ་གཡོ་ཐབས་ཀྱིས་མཉམ་ལས་ཁང་དུ་འཛུལ་དགོས་པའི་སྐུལ་སློང་བྱེད་ཀྱིན་ཡོད་འདུག
དེང་སྐབས་མདོ་བ་འབྲོག་ཁུལ་དུ་ཁྱོན་བསྡོམས་དུད་ཁྱིམ་ཆིག་སྟོང་ ༡༠༠༠ ལྷག་ཡོད་པ་ལས་བརྒྱ་ཆ་ ༤༠ ཙམ་ཞིག་རྒྱ་གཞུང་གི་གཡོ་འོག་ཏུ་ཚུད་དེ་མཉམ་ལས་ཁང་དུ་འཛུལ་ཡོད་ཀྱང་། རྗེས་སུ་རིམ་གྱིས་རྒྱ་གཞུང་གི་སྲིད་ཇུས་དེའི་རང་མདོག་མཐོང་ཡོང་སྐབས། མང་པོ་ཞིག་གིས་མཉམ་ལས་ཁང་ནས་ཕྱིར་ཐོན་ཐབས་བྱེད་ཀྱི་ཡོད་ཀྱང་། ད་ཆར་རང་དབང་གིས་ཕྱིར་ཐོན་ཆོག་ཆོག་ཅིག་མེད་པའི་དཀའ་ངལ་འཕྲད་བཞིན་ཡོད་འདུག གནས་ཚུལ་མཁོ་སྤྲོད་པས་བརྗོད་དོན། “ ལས་གཞི་འདིའི་ཐོག་ས་གནས་བོད་རིགས་ལས་བྱེད་དང་ཤེས་ལྡན་མི་སྣ་ཚོས་ཀྱང་ནུས་པ་དེ་ཙམ་འཐོན་ཐུབ་ཀྱི་མི་འདུག གང་ཡིན་ཟེར་ན། མ་གཞི་བོད་པའི་འབྲོག་ཁུལ་གྱི་སློབ་གསོ་རྗེས་ལུས་ཡིན་པ་དང་། ཡང་སྒོས་བོད་རིགས་ལས་བྱེད་ཚོར་དབང་ཚད་མེད་པའི་རྐྱེན་གྱིས་མང་ཚོགས་ལ་སྣེ་འཁྲིད་ཀྱི་ནུས་པ་མི་འདུག ལྷག་པར་དུ་མཉམ་ལས་ཁང་ཟེར་བ་དེ་ཚུགས་ཆེད་རྒྱ་དམར་གྱིས་བོད་རིགས་ལས་བྱེད་པ་དང་། སྡེ་དཔོན་སོགས་ལ་མི་མང་ལ་སྐུལ་སློང་གིས་མཉམ་ལས་ཁང་དུ་འཛུལ་ཐུབ་ཚེ་གོ་ས་སྤར་བ་དང་ཟླ་ཕོག་སྤར་བ་སོགས་ཀྱི་བསླུ་ཐབས་སྣ་ཚོགས་བཀོལ་ཏེ། ད་ཆ་བོད་རིགས་ནང་ཁུལ་དུ་ཡང་མི་མཐུན་པའི་གནས་ཚུལ་རེ་ཟུང་ཡོང་གི་འདུག” ཅེས་བརྗོད་བྱུང་།
ཡང་གསར་འགོད་པས་མཉམ་ལས་ཁང་ཟེར་བ་དེའི་ངོ་བོ་དང་ལས་ཀ་གང་འདྲ་ཡོད་མེད་དང་། ས་གནས་མང་ཚོགས་ཚོས་མཉམ་ལས་ཁང་ལ་ཡིད་ཆེས་མི་བྱེད་པའི་རྒྱུ་མཚན་གང་ཡིན་སོགས་དྲིས་པའི་ལན་དུ། ཁོང་གིས་(མཉམ་ལས་ཁང་)ཟེར་བ་དེ་ནི་མ་རྩ་མཉམ་འཇོག་གི་ལས་གཞི་ཞིག་ཡིན་ཞིང་། དེའི་དམིགས་ཡུལ་གཙོ་བོ་ནི། བོད་རིགས་ཚོའི་ས་ཞིང་དང་ཕྱུགས་ཟོག དངུལ་སྒོར་ཡོངས་རྫོགས་ཚོགས་པ་ལྟ་བུའི་མཉམ་ལས་སྡེ་ཚོགས་སམ། ཡང་ན་ཚོང་པ་ཞིག་ལ་མ་རྩར་མཁོ་སྤྲོད་བྱས་ཏེ། མ་རྩ་དེ་དག་མི་གཅིག་གམ་ཡང་ན་ཚོགས་པ་ཞིག་གིས་འགན་གཙང་ལེན་གྱིས་མི་མང་ལ་བརྒྱ་ཆའི་དོད་ཀྱི་སྐྱེད་ཀ་ལྟ་བུ་ཞིག་ཐོབ་པར་བྱ་དགོས་པ་ཞིག་ཡིན་འདུག སྲིད་གཞུང་གིས་ལས་བྱེད་རུ་ཁག་ས་གནས་སུ་ཆེད་གཏོང་གིས་མཉམ་ལས་ཁང་ལག་བསྟར་བྱེད་ཀྱི་ཡོད་པ་མ་ཟད། རྒྱ་གཞུང་གི་མགྲིན་ཚབ་པར་གྱུར་ཡོད་པའི་བོད་ཁུལ་གྱི་གསར་འགྱུར་བརྒྱུད་ལམ་ཁག་གིས་ཀྱང་། ལས་གཞི་དེ་ལ་གཞོགས་འདེགས་བྱས་ཏེ། “ས་གནས་བོད་རིགས་མང་ཚོགས་ཕྱུག་འགྱུར་གྱི་ལམ་དུ་ཁྲིད་པའི་མཉམ་ལས་ཁང་” ཞེས་དྲིལ་བསྒྲགས་ཤུགས་ཆེན་བྱེད་ཀྱི་ཡོད་འདུག འོན་ཀྱང་། བོད་མི་ཚོས་ལས་གཞི་དེ་ནི་རྒྱ་དམར་སྲིད་གཞུང་གི་གཡོ་ཇུས་ཤིག་སྟེ། བོད་མི་ཚོས་རང་ཁ་རང་གསོ་དང་རང་མགོ་རང་ཐོན་གྱི་གཏན་འཇགས་འཚོ་བ་ལ་གཏོག་བཤིག་གཏོང་ཐབས་དང་། རྒྱ་གཞུང་གི་དཔལ་འབྱོར་བསླུ་བྲིད་འོག་བོད་མིའི་འཚོ་བའི་འདུ་ཤེས་གཏོར་ཐབས། བོད་པ་ནང་ཁུལ་དཀྲུག་ཤིང་བྱེད་པ། དེ་བཞིན་སྲིད་གཞུང་གི་བཀོད་འདོམས་སྟངས་འཛིན་འོག་བཅུག་བདེ་བའི་ཆེད་སོགས་ཡིན་པ་ལས། བོད་པར་འཕྲལ་ཕུགས་ཀྱི་ཁེ་ཕན་ཡོད་པ་ཞིག་རྩ་བ་ནས་མིན་ཚུལ་གླེང་སློང་བྱེད་ཀྱི་ཡོད་འདུག
ཨ་རིའི་ས་གནས་གསར་འགོད་པ། སངས་རྒྱས་བཀྲ་ཤིས།
མཉམ་ལས་ཁང་ནི་འདི་འདྲ་རེད། འབྲོག་པ་ཚོར་ཕྱུག་ཟོག་མང་དྲག་པ་ན།འཁོར་ཡུག་ལ་གནོད་པ་མ་ཟད། རྩྭ་སས་མི་འདང་བས། ཕྱུག་ཟོག་ཆེས་ཉུང་ངུ་ཞིག་ས་ཆ་ངེས་ཅན་ཞིག་ཏུ་ཁྱིམ་ཚང་ཚད་བཅད་ཅིག་གིས་འཚོ་སྐྱོང་བྱེད་རྒྱུ་དང་གཞན་བཙོང་བའི་མ་དངུལ་མཉམ་འཇོག་གམ་མཉམ་ཚོང་རྒྱག་རྒྱུ་དེ་འདྲ་ཞིག་ཡིན་ཚོད་འདུག ༼མ་ཤེར་ཉོ་བ་ལྟ་བུ་མིན་ནམ་སྙམ༽ ས་ཆ་གང་མང་མང་སྟོང་བར་ཕུལ་ནས་ཤིང་ནགས་འདེབས་འཛིུགས་བྱེད་དགོས་པ་ཞིག་གོ།
དེའི་གནོད་པ་འམ་དམིགས་ངན་ནི། དེ་ལྟར་བྱས་རྗེས་སྒོར་རྡོག་འགའ་སྤྲད་པས་ལོ་གཅིག་ཡས་མས་རྗེས་སུ་དཀའ་ངལ་ཕྲད་ངེས་ཡིན། མ་གཞི་ནས་དེའི་རྗེས་དེ་མ་ཐག་སྟོང་བ་བཟོས་པའི་འབྲོག་ས་ཁག་ལ་ལྕག་ར་བསྐོར་ཅིང་རྒྱལ་ཁབ་ཀྱི་འཁོར་ཡུག་སྲུང་སྐྱོབ་ས་ཁུལ་དུ་གྱུར་ཟིན་པས། ཕྱིར་འབྲོག་པ་སོ་སོར་བདག་དབང་རྩ་བ་ནས་མེད་དོ།།
རྒྱ་ནག་ནང་གི་ཆུ་ལོག་གི་གནོད་པར་ཕན་སེམས་ཀྱིས་འབྲོག་པའི་ས་ཆ་འཕྲོག་པའི་རྒྱལ་ཁབ་ཀྱི་གཡོ་ཇུས་ཤིག་གོ།
མགོ་ཡོད་པའི་ཐོག་ལ་མཇུག་མ་ཡོད།།
དཔའ་ཡོད་པའི་སྒང་ལ་ལ་རྒྱ་ཡོད།།
ད་དམ་ཚིག་གཙང་ཞིང་ཆིག་སྒྲིལ་དགོས།།
ཨ་ཧ་ཧ་སྐྱིད་པའི་བྲོ་གར་ཁྲོབ།།
འོ་ཡ།མཉམ་ལས་ཁང་འཛུགས་ན་མ་འགྲིག་པ་རེད།དེ་ནི་བོད་མི་རིགས་ལག་འོག་ཏུ་བཅུག་པའི་ལག་ཆ་གཙོ་བོ་རེད།རྒྱུ་དངོས་ཅི་ཡོད་ཐམས་ཅད་རྒྱ་གཞུང་གི་ལག་ཏུ་ཡོད་པ་ལས་བོད་མི་ལ་མེད།དེ་ལ་བསྐུལ་བྱེད་མི་བོད་མི་གླ་ཚོང་བ་དེ་ཚོས་རང་ཡང་བཙོང་གི་ཡོད་པ་ཤེས་ཀྱི་མེད་པ་འདྲ།ད་་་་་མ་འགྲིག་ཐལ།
བོད་ཀྱི་བདག་པོ་བོད་མི་འགྱུར་བཞིན་པར་སྙིང་ནས་དགའ་སྤྲོ་ཆེ་བ་ཡང་། གཞིས་ལུས་མི་མང་གི་སྙིང་སྟོབས་དང་སྤོབས་པ་ལ་དཔེ་ལྟས་ནས། ཕྱི་ཡུལ་དུ་ཡོད་པའི་སྤུན་ཟླ་ཚོས། རང་དབང་ལུང་པར་ཡོད་བོད་མི་ཚོས་གུང་གསེང་དང་། ལོ་གསར་གལ་ཆེན་དུ་མི་བརྩི་བར། ཐབས་ཤེས་ཡོད་ཚད་རྩལ་དུ་སྟོན་ནས། རང་ནུས་གང་ཡོད་ཀྱིས་ལས་འགུལ་གང་མང་སྤེལ་ཐུབ་པའི་རེ་སྐུལ་ཞུ་བཞིན་ཡོད།