གཏན་ཁེལ་ཟིན་པའི་རྒྱ་ནག་གི་མ་འོངས་པའི་མགོ་ཁྲིད།

ཧོ་ཕིན་(Ho Pin)བརྩམས། འཕྲིན་ལས་རྒྱ་མཚོས་བསྒྱུར།

རྒྱ་ནག་གི་ཡིད་ཆེས་ཀྱི་ནང་དུ་རྡོ་ལ་རི་མོ་བརྐོས་པ་ལྟར་ཤུགས་ཆེན་དུ་གྲུབ་པ་ནི། ཉམས་མྱོང་ཞན་ཞིང་ལོ་ན་གཞོན་པའི་འབྱུང་འགྱུར་གྱི་མགོ་ཁྲིད་དག་ལ་འཇིག་རྟེན་དངོས་ཀྱི་ལས་དོན་བསྒྲུབ་པ་ལ་ཉམས་མྱོང་ངེས་པར་ཡོད་དགོས་ལ། དེ་ལྟར་མ་བྱུང་ཚེ་ནུབ་ཕྱོགས་ཀྱི་རྒྱལ་ཁབ་ཅིག་ཏུ་དུས་ཚོད་ངེས་ཅན་ཞིག་གཏོང་དགོས། “གསེར་རྩི་བྱུགས་”པའམ་རྒྱ་སྐད་དུ་ “du-jin” ཞེས་པའི་བརྒྱུད་རིམ་འདིས་མི་དེའི་བྱ་བ་ལམ་ལྷོངས་ཡོང་བའི་ནུས་པ་དང་གོ་སྐབས་མཐོར་འདེགས་ཤུགས་ཆེན་བྱེད། གཞན་གང་ལ་བལྟས་ཀྱང་ཡིད་ཆེས་འདི་ཆབ་སྲིད་ཀྱི་ཁྲོད་དུ་མངོན་གསལ་ཡིན། མགོ་ཁྲིད་གསར་པ་ཞིག་གིས་ཕོ་བྲང་དཀར་པོའི་སྤང་ཐང་དུ་གོམ་པ་སྤོས་པ་དང་ཨ་རིའི་སྲིད་འཛིན་དང་མཉམ་དུ་ལག་འཇུ་བྱས་པས་ཁོ་རང་ནི་རྒྱལ་ཁབ་ཀྱི་མགོ་ཁྲིད་ངོ་མ་ཞིག་ཡིན་པའི་བདེན་དཔང་བྱས་མ་ཟད། རྒྱ་ནག་གི་སྟོབས་ཤིག་རྒྱས་བཞིན་པ་ཕྱིར་ངོམ་པ་ཡིན།

ད་ལྟའི་རྒྱ་ནག་གི་སྲིད་འཛིན་ཧུའུ་ཅིན་ཐོ་ཡིས་ཆེས་མཐོའི་ལས་གནས་ལག་ཏུ་མ་བླངས་པའི་ཡར་སྔོན་ལོ་བཅུའི་གོང་དུ་ཝ་ཤིན་ཊོན་ལ་སྐོར་སྐྱོད་བྱས་པ་རེད། རྒྱ་ནག་ནང་གི་མི་དམངས་ཀྱི་མཐོང་ཚུལ་དུ་ཧུའུ་ཅིན་ཐོ་ཡིས་སྲིད་འཛིན་བྷུ་ཤི་ལ་ཐུག་འཕྲད་བྱས་པ་དེ་ནི་ཁོ་རང་གིས་དངོས་སུ་རྒྱལ་སྤྱིའི་སྡིངས་ཆའི་སྟེང་དུ་སྟ་གོན་བྱས་པ་ཞིག་ཡིན།

སྲིད་འཛིན་གཞོན་པ་ཞི་ཆིན་ཕིན་གཟའ་མིག་དམར་ཉིན་ཝ་ཤིན་ཊོན་དུ་འབྱོར་བཞིན་པ་འདིས་སྲོལ་རྒྱུན་དེའི་མཇུག་སྐྱོང་བ་ཞིག་རེད།  སྐུ་ཞབས་ཞི་ཆིན་ཕིན་ལགས་ནི་ལོ་འདིའི་ལོ་མཇུག་ཏུ་རྒྱ་ནག་དམར་ཕྱོགས་ཚོགས་པའི་སྤྱི་ཁྱབ་དྲུང་ཆེ་རུ་འགྱུར་རྒྱུ་དང་། འབྱུང་འགྱུར་ ༢༠༡༣ གྱི་ལོ་མགོར་རྒྱ་ནག་གི་སྲིད་འཛིན་དུ་འགྱུར་རྒྱའི་འཆར་གཞི་བཏིང་ཟིན་ཡོད།

དམངས་ཀྱི་མིག་ལམ་དུ་སྐུ་ཞབས་ཞི་ཆིན་ཕིན་ལགས་ནི་དམངས་ཀྱི་ཕྱོགས་སུ་ཡོད་པའི་མི་ཞིག་ཏུ་མཐོང་བཞིན་ཡོད། སྐུ་ཞབས་ཞི་ཆིན་ཕིན་རང་ལོ་དགུ་ཡིན་པའི་སྐབས་སུ། དམར་པོའི་གསར་བརྗེ་ཡི་འཐབ་འཁྲུག་ལ་ཞུགས་མྱོང་པའི་ཁོ་རང་གི་ཨ་ཕ་ཞི་ཀྲོན་ཤོན་མགོ་ཁྲིད་མའོ་ཡིས་ཚོགས་པ་ནས་ཕྱིར་འཕུད་བྱས། དེ་ནས་ཁོ་རང་གི་ཨ་ཕ་བཙོན་དུ་བཅུག་ཅིང་ལོ་ངོ་བཅུ་དྲུག་ལ་ངལ་རྩོལ་ར་བར་ལྷག་པ་མ་ཟད། ཁྱིམ་ཚང་དབུལ་ཕོངས་ཀྱི་གནས་སུ་བསྐྱལ། རིག་གནས་གསར་བརྗེ་ཡི་སྐབས་སུ་རང་ལོ་བཅོ་ལྔར་སོན་པའི་སྐུ་ཞབས་ཞི་ཅིན་ཕིན་ཡང་རྒྱ་ནག་གི་བྱང་ཕྱོགས་ས་ཁུལ་གྱི་དབུལ་ཕོངས་ཀྱི་གནས་སུ་ལྷུང་བའི་གྲོང་གསེབ་ཅིག་ལ་རྒྱང་འཕུད་དུ་བཏང་། གྲོང་གསེབ་དེ་རུ་ཁོ་རང་གིས་མ་རྨོས་ལོ་ཏོག་གི་ཕྱི་ཤུན་གྱིས་བཟོས་པའི་བག་ལེབ་ཟོས་ཤིང་ལྕི་བ་ཡིས་ཁེངས་པའི་མལ་ཁྲིའི་སྟེང་ཉལ་ཏེ་ལོ་བདུན་ལ་ཞིང་བ་ཚོ་དང་མཉམ་དུ་ངལ་རྩོལ་བྱས།

ཁོ་རང་གི་ཨ་ཕ་རྗེས་སུ་རྒྱ་ནག་གི་དཔལ་འབྱོར་བཅོས་སྒྱུར་བྱེད་པའི་མི་སྣ་གལ་ཆེན་ཞིག་ཏུ་གྱུར་པ་དང་དུས་དེར་མདུན་སྐྱོད་ཀྱི་ལྟ་བ་ཡོད་མཁན་ཚོར་རྒྱབ་སྐྱོར་བྱས་པ་མ་ཟད། ༡༩༨༩ གནམ་བདེ་སྒོ་མོ་ཆེའི་ཐང་ཆེན་དུ་སློབ་མའི་ངོ་རྒོལ་ལ་དྲག་གནོན་བྱེད་པར་མོས་མཐུན་མ་བྱས་པར་བཤད། མི་མང་ཚོས་ཀྱང་ཁོ་རང་ཨ་ཕའི་དཔེ་མཚོན་གྱི་རྗེས་འབྲང་བ་ཞིག་ཏུ་རེ་བ་བྱེད་ཅིང་། འདས་པའི་དུས་སུ་མྱངས་པའི་སྡུག་བསྔལ་གྱིས་ཁོ་རང་མི་དམངས་ཀྱི་ཁེ་ཕན་ལ་རྒྱབ་སྐྱོར་བྱེད་མཁན་ཞིག་བཟོ་བར་ཧ་ཅང་ངེས།

སྐུ་ཞབས་ཧུའུ་ཅིན་ཐོ་ནི་ཚན་རིག་ལག་རྩལ་ལ་མཁས་པའི་ཆབ་སྲིད་པ་གཟབ་ནན་ཅན་ཞིག་ཡིན་མོད། ཁོ་རང་ལ་རྒྱལ་ཁབ་དེ་ལམ་ཁ་གསར་པ་ཞིག་ཏུ་འཁྲིད་པའི་རྩལ་དང་ཆབ་སྲིད་ཀྱི་འདུན་པ་མེད་པའི་དབང་གིས་བློ་ཕམ་འབྱུང་བཞིན་པའི་སྐབས་འདིར་སྐུ་ཞབས་ཞི་ཆིན་ཕིན་གྱི་ཁ་ལོ་བའི་གོ་གནས་ལེན་རྒྱུ་རེད། ཁྲོམ་རའི་བཅོས་བསྒྱུར་བེད་སྤྱོད་བྱས་པ་ལ་བརྟེན་ནས་རྒྱ་ནག་དཔལ་འབྱོར་གྱི་ཐད་ནས་སྟོབས་ལྡན་རྒྱལ་ཁབ་ཅིག་ཏུ་གྱུར་པ་རེད་མོད། འོན་ཀྱང་སྲིད་གཞུང་ནམ་རྒྱུན་ཟིང་འཁྲུག་འབྱུང་བར་སྐྲག་སྣང་གིས་བསྡད་ཡོད།

རྒྱ་ནག་ཏུ་རྒྱུ་དངོས་དང་གོ་སྐབས་རྣམས་སྲིད་དབང་དང་འབྲེལ་བའི་མི་ཁ་ཤས་ཀྱིས་ཁྱེར་ཞིང་། ལྐོག་ཟ་རུལ་སུངས་གང་སར་གནས་པར་མ་ཟད། ཕྱུག་པོ་དང་འབྱོར་མེད་བར་གྱི་ཧེ་བག་ཆེ་རུ་འགྲོ་བཞིན་ཡོད། སྲིད་འཛིན་ཧུའུ་ཅིན་ཐོ་ཡིས་ད་ལྟའི་བར་དུ་ཆབ་སྲིད་ལམ་ལུགས་ལ་འགྱུར་བ་གཏོང་དགོས་པའི་འབོད་སྐུལ་ངོས་ལེན་བྱས་མེད་པར་མ་ཟད། ཁོ་རང་གིས་མའོ་ཡི་དུས་ཀྱི་སྲིད་ཇུས་ལག་ལེན་བྱས་ཏེ་སྲིད་གཞུང་ལ་དབང་བའི་ཚོང་ལས་བཟོ་གྲྭ་ཆེན་པོ་འཛུགས་སྐྲུན་བྱས་པ་དང་། སྲིད་གཞུང་དང་ལྟ་བ་མི་མཐུན་པ་ཚོར་དུས་ལྟར་དྲག་གནོན་བྱེད་པའི་བདེ་སྲུང་ལག་ཆའི་སྟེང་དུ་ཨ་སྒོར་དུང་ཕྱུར་མང་པོ་བཏང་ཡོད།

དཔལ་འབྱོར་ཡར་རྒྱས་ཀྱི་བཀའ་དྲིན་ལ་བརྟེན་ནས་སྐུ་ཞབས་ཧུའུ་ཅིན་ཐོ་ལ་རེ་ཞིག་བདེ་བ་ཐོབ་མོད། སྐུ་ཞབས་ཞི་ཆིན་ཕིན་ནི་དེ་འདྲའི་ལས་ཅན་ཞིག་ཏུ་མི་འགྱུར། རྒྱ་ནག་གི་དཔལ་འབྱོར་འཕེལ་ཤུགས་ཆུང་དུ་འགྲོ་བཞིན་པའི་རྟགས་སྟོན་གྱིན་ཡོད་ལ། སྡོད་ཁང་ཚོང་ལས་ཀྱང་ཉམས་རྒུད་དུ་འགྲོ་སྲིད་པར་མ་ཟད། སྟངས་འཛིན་མ་བྱས་པ་དང་ལྐོག་ཟ་རུལ་སུངས་ཀྱི་དབང་གིས་སྒོར་མོ་གཡར་པར་བརྟེན་ཏེ། དངུལ་ཁང་གི་ལམ་ལུགས་ལ་ཡང་གནོན་སྐྱོན་བཟོས་ཡོད། དུས་མཚུངས་སུ་མ་འོངས་པའི་མི་རབས་ལ་བསམ་གཞིག་མེད་པར་རང་བྱུང་ཐོན་རྫས་རྣམས་མེད་བརླག་ཏུ་གཏོང་བཞིན་པ་དང་སྟབས་བསྟུན་ལྐོག་ཟ་རུལ་སུངས་དང་སྤྱི་ཚོགས་ཁྲོད་ཀྱི་དྲང་བདེན་མིན་པའི་ལས་དོན་ལ་ངོ་རྒོལ་བྱེད་པ་ཤུགས་ཆེ་རུ་འགྲོ་བཞིན་ཡོད།

སྐུ་ཞབས་ཞི་ཆིན་ཕིན་ལ་མཚོན་ན། ལས་དོན་རྣམས་རང་འགུལ་དུ་འཇོག་པ་ནི་གདམ་ཀ་ཞིག་མིན། ཁོ་རང་གིས་ལྐོག་ཟ་རུལ་སུངས་ལ་འཐབ་འཛིང་བྱ་དགོས་པར་མ་ཟད། ཞིང་བ་དང་གྲོང་ཁྱེར་གྱི་ཕྱི་ལོགས་ནས་ཡོང་བའི་ལས་ཀ་རྣམས་ཀྱི་སྲུང་སྐྱོབ་ཡར་རྒྱས་སུ་གཏོང་དགོས་ལ། སྒེར་གྱི་ཚོང་ལས་ཀྱང་བསྐྱར་གསོ་བྱ་དགོས།

ཁོ་རང་གི་ཨ་ཕས་བཀག་སྡོམ་བྱས་པའི་དཔེ་དེབ་ཅིག་ལ་རྒྱབ་སྐྱོར་བྱས་པའི་དབང་གིས་ཉེས་པ་ཕོག་པར་བརྟེན། ཁོ་རང་གིས་སྨྲ་བརྗོད་རང་དབང་གི་གལ་ཆེའི་རང་བཞིན་ཧ་གོ་དགོས་པ་ཞིག་རེད་ལ། ཁོ་རང་གིས་ཤེས་ཡོན་ཅན་གྱི་སྡེ་ཡི་ཡིད་ཆེས་བསྐྱར་དུ་རྙེད་པའི་ཕྱོགས་སུ་ལས་ཀ་བྱེད་པར་རེ་བ་རྒྱག་བཞིན་ཡོད། ཡིན་ན་ཡང་། རང་དབང་ལྡན་པའི་འོས་བསྡུ་དང་གསར་འགྱུར་བརྒྱུད་ལམ། ཁྲིམས་དཔོན་སོགས་མེད་པར་སྲིད་གཞུང་གིས་ལྐོག་ཟ་རུལ་སུངས་མེད་པར་བཟོ་རྒྱུ་དང་འདྲ་མཉམ་དང་དྲང་བདེན་གྱི་སྤྱི་ཚོགས་ཤིག་འཛུགས་སྐྲུན་བྱ་བར་མི་ནུས།

སྐུ་ཞབས་ཞི་ཆིན་ཕིན་གྱིས་བཀག་རྒྱ་མང་པོ་ཞིག་གདོང་ལེན་བྱ་དགོས། ཁོ་རང་གིས་འཇིག་རྟེན་འདིའི་སྟེང་གི་མི་འབོར་ཆེས་མང་བའི་རྒྱལ་ཁབ་ལ་དབང་བསྒྱུར་རྒྱུ་ཡིན་ཞིང་དངོས་སུ་ཕྱོགས་འགལ་ཚོགས་པ་ལ་གདོང་ལེན་བྱ་མི་དགོས་ན་ཡང་། དམངས་གཙོའི་ལམ་ནས་བདམས་པའི་མགོ་ཁྲིད་ཚོར་ཡོད་པའི་ལུགས་མཐུན་གྱི་དབང་ཚད་མེད། མའོ་དང་ཏིན་ཞོ་ཕིན་དང་མི་འདྲ་བར་ཁོ་རང་གིས་རྒྱ་ནག་གི་དབང་ཤུགས་ཀྱི་གོ་རིམ་མམ་སྒྲོམ་གཞི་ལ་དབང་བསྒྱུར་པའི་རེ་བ་རྒྱག་མི་ཐུབ། ད་ལྟའི་རྒྱ་ནག་ནང་དུ་ཐག་གཅོད་ཡོད་ཚད་ལ་ཕྱོགས་ཚང་མའི་ཆབ་སྲིད་ཀྱི་ཁེ་ཕན་དོ་མཉམ་དགོས། ཉེ་ཆར་ཁ་ཆེ་རྒྱལ་ཁབ་ཁག་ཏུ་ངོ་རྒོལ་བྱུང་བ་དེས་རྒྱ་ནག་གི་མགོ་ཁྲིད་ཚོར་སྲིད་གཞུང་འཇིག་པའི་ཉིན་མོར་རང་རང་གི་ཆབ་སྲིད་ལས་གནས་ལ་བརྟན་པོ་མེད་པའི་ངེས་པ་རྙེད་དུ་བཅུག་ཡོད། ཁོང་ཚོས་རང་ཉིད་ཀྱི་མི་ཚེ་ནང་དུ་དེ་ལྟར་མི་འབྱུང་བའི་དོན་དུ་ལས་དོན་གང་ཞིག་ཡིན་ཡང་བསྒྲུབ་ངེས་ཡིན།

དེ་ལྟར་ན་ཡང་། ཁ་ཕྱོགས་དེར་བསྒྱུར་ཐབས་མེད། ལྐོག་ཟ་རུལ་སུངས་ཀྱིས་འཚོད་ཡོད་པའི་མགོ་ཁྲིད་དག་གི་འདོད་རྔམ་ལ་ཁེངས་རྒྱུ་མེད་པ་དང་འདྲ་མཉམ་མིན་པའི་དཔལ་འབྱོར་ལམ་ལུགས་ཀྱིས་དམངས་ལ་ཁོང་ཁྲོ་དང་ཞེ་སྡང་སློང་བཞིན་པར་བརྟེན། དཔལ་འབྱོར་ཉམས་རྒུད་དང་། ཡང་ན། ཞིང་བ་དང་གྲོང་ཁྱེར་ཕྱི་ལོགས་ནས་ཡོང་བའི་ལས་ཀ་བ་དག་གིས་ངོ་རྒོལ་བྱས་ཏེ་གཞི་རྒྱ་ཆེ་བའི་དོན་རྐྱེན་འབྱུང་སྲིད།  

གལ་ཏེ་དེ་ལྟར་བྱུང་ཚེ་སྔོན་གྱི་མགོ་ཁྲིད་རྣམས་དང་བསྡུར་ན་སྐུ་ཞབས་ཞི་ཆིན་ཕིན་གྱིས་དམར་ཕྱོགས་ཚོགས་པའི་ཕྱི་ནང་གཉིས་ཀར་གནས་ཤིང་མདུན་སྐྱོད་ཀྱི་ལྟ་བ་ཡོད་པའི་མི་རྣམས་བསྐོང་ཐུབ་ངེས་པར་མ་ཟད། གོ་སྐབས་དང་བསྟུན་ནས་ཕྱོགས་ཡོངས་སུ་ལས་འགུལ་སྤེལ་ཏེ་རྒྱ་ནག་གི་ཆབ་སྲིད་ལམ་ལུགས་ལ་འགྱུར་བ་ངོ་མ་ཞིག་འབྱུང་སྲིད། འགན་འཁྲི་དང་དུ་ལེན་ཞིང་འགྲོ་བ་མིའི་ཐོབ་ཐང་དང་རྒྱལ་སྤྱིའི་ཁྲིམས་ལ་བརྩི་བའི་རྒྱ་ནག་ཅིག་གྲུབ་པ་ཡིན་ན། དེ་ཡིས་འཇིགས་སྐུལ་དྲག་སྤྱོད་རིང་ལུགས་པ་དང་སྒེར་སྤྱོད་ཅན་གྱི་མགོ་ཁྲིད་ལ་གདོང་ལེན་བྱ་བར་མ་ཟད། ཁྱིམ་མཚེས་རྒྱལ་ཁབ་དག་གི་ཡིད་ཆེས་རྙེད་པར་འགྱུར།

ད་ལྟའི་བར་དུ་རྒྱ་ནག་གིས་རྒྱལ་སྤྱིའི་སྤྱི་ཚོགས་ཀྱིས་འགྱུར་བ་དགོས་པར་བསྐུལ་བའི་གནོན་ཤུགས་ལ་གཡོལ་ཐུབ་པ་རེད་ལ། དེའི་རྒྱུ་མཚན་ནི་གཙོ་བོ་ནི་རྒྱ་ནག་གི་ཁྲོམ་ར་དང་ཕྱི་རྒྱལ་ཁག་ལ་གཡར་བའི་སྒོར་མོའི་དབང་གིས་སྒོར་མོར་དགའ་བའི་ནུབ་ཕྱོགས་པའི་མ་དངུལ་འཇོག་མཁན་དང་། སྐབས་འཚོལ་རིང་ལུགས་པའི་ཤེས་ཡོན་ཅན། འུ་ཐུག་པའི་ཆབ་སྲིད་པ་རྣམས་ཀྱིས་རྒྱ་ནག་སྲིད་གཞུང་གི་ངོ་འཚོས་པ་རེད། རེ་བ་ཞིག་རྒྱག་ཆོག་པ་ནི་ཨ་རིའི་གཞུང་གིས་སྒོར་མོ་ལ་མི་ལྟ་བར་འགྱུར་བ་དགོས་པར་སྨྲ་མཁན་དང་ཆབ་སྲིད་བཅོས་སྒྱུར་རང་ཤུགས་ཀྱིས་འབྱུང་བའི་ཕྱིར་དུ་ཤུགས་གནོན་བྱ་དགོས། རྒྱ་ནག་གིས་སྐད་ཆ་མཁྲེགས་པོ་བཤད་ན་ཡང་ནུབ་ཕྱོགས་ཀྱི་གནོན་ཤུགས་ལ་ལྟ་བ་མ་ཟད་དེ་ཡིས་འགྱུར་བ་ཡང་གཏོང་ཐུབ།

མཆན།

༼ རྩོམ་པ་པོ་ཧོ་ཕིན་(Ho Pin)ལགས་ནི། ཞི་ཅིན་ཕིན་གྱི་མི་ཚེ་ལོ་རྒྱུས་འབྲི་མཁན་ཡིན་ཞིང་། གོང་གི་རྩོམ་ཡིག་འདི་ཟླ་འདིའི་ཕྱི་ཚེས་ ༡༣ ཉིན་ནེའུ་ཡོག་དུས་བབ་སྟེང་སྤེལ་འདུག ༽