མི་ཞུན། ཝཱར་ཎ།
དེ་རིང་ནས་བརྩིས་ཏེ་ལོ་ངོ་བཅོ་ལྔ་ལྷག་གི་ཡར་སྔོན་དུ་ང་རང་ཕ་ཡུལ་དུ་མཐོ་འབྲིང་གཉིས་པའི་སློབ་མ་ཡིན་སྐབས་ཀྱི་ཉིན་མོ་ཞིག་ལ་ངེད་ཚོའི་བོད་ཀྱི་སྐད་ཡིག་དགེ་རྒན་གྱིས་འཛིན་གྲྭའི་སློབ་ཕྲུག་ཚོ་ལ་དྲི་བ་གཅིག་དྲིས་སོང་། དྲི་བ་དེ་ནི་ད་ལྟ་ད་དུང་ཡང་ངའི་རྣ་ལམ་དུ་སིང་སིང་གྲགས་ཀྱི་འདུག་ལ་ངའི་དྲན་ངོགས་སུ་གཏན་ནས་ཡལ་ཐབས་མེད་པའི་རི་མོ་བཞིན་འབྱར་ནས་སྡོད་ཀྱི་འདུག དགེ་རྒན་གྱིས་གློ་བུར་དུ་སློབ་ཕྲུག་ཚོ་ལ་”ང་ཚོའི་རྒྱལ་ས་གང་རེད”་ཅེས་དྲིས་སོང་། འཛིན་གྲྭའི་ནང་དུ་སློབ་མ་བཞི་བཅུ་ལྷག་ཡོད་པ་ཚང་མས་མཉམ་གཅིག་ཏུ་ང་ཚོའི་རྒྱལ་ས་པེ་ཅིན་རེད་ཅེས་ལན་བཏབ་པ་ད་དུང་ཡང་ངས་དྲན་པ་སོས་ཀྱི་འདུག དེ་ནས་དགེ་རྒན་གྱིས་དེས་ན་”ང་ཚོ་བོད་ཀྱི་རྒྱལ་ས་གང་རེད་”ཅེས་བསྐྱར་དུ་དྲི་བ་གཅིག་བཀོད་སོང་། ད་ལྟ་བསམས་ན་དེ་ནི་ཧ་ཅང་གི་སྤྱིར་བཏང་བའི་དྲི་བ་གཅིག་རེད། ཁག་པོ་ཁྱོན་ནས་མ་རེད་དེ། སློབ་ཕྲུག་ཚོའི་སྨྲ་བ་ཅི་ཞིག་གིས་བསྡམས་སོང་བ་བཞིན་གྲགས་རྒྱུ་ཅི་ཡང་མི་འདུག ཚང་མ་ཁུ་སིམ་མེར་གྱུར། ཉིན་མོ་དེར་མཐོ་འབྲིང་གཉིས་པའི་སློབ་མ་བཞི་བཅུ་ལྷག་གི་ནང་ནས་དྲི་བ་དེ་ལ་ལན་འདེབས་ཤེས་མཁན་རྐང་གཅིག་ཀྱང་མ་བྱུང་ཐལ།
ང་ཚོས་དྲི་བ་དེ་ལ་ལན་རྒྱག་མ་སྤོབས་པ་མ་རེད་ལ་ལན་བརྒྱག་མ་འདོད་པ་དེ་བས་ཀྱང་མ་རེད། གང་ལྟར། དྲིས་ལན་སུ་གཅིག་གིས་ཀྱང་མ་ཤེས་པ་རེད། རྒྱུ་མཚན་ང་ཚོ་སྐྱེས་པ་ནས་བཟུང་བོད་ཀྱི་རྒྱལ་ས་ཟེར་བ་ཞིག་རྣ་ནང་ལ་རྦད་དེ་གོ་མ་མྱོང་བས་རེད་ལ་ཁ་ནས་བོད་སྐད་བཤད་ཀྱི་ཡོད་པ་ཙམ་ལས་རང་ཉིད་བོད་པ་ཞིག་ཡིན་པ་དང་ལྷག་པར་དུ་བོད་ནི་རྒྱལ་ཁབ་ཅིག་ཡིན་པ་ཡང་རྨང་ནས་ཤེས་ཀྱི་མེད་པས་རེད། དགེ་རྒན་གྱིས་མགོ་བོ་ཐད་དུ་གཡུག་བཞིན་ང་ཚོ་བོད་ཀྱི་རྒྱལ་ས་ལྷ་ས་རེད་ཅེས་སློབ་མ་ཚོ་ལ་འགྲེལ་བརྗོད་ཐུང་ཐུང་ཞིག་བྱས་སོང་། དེ་ནི་ངའི་མི་ཚེའི་ནང་ལ་ཡང་བོད་ཀྱི་རྒྱལ་ས་ཟེར་བའི་ཐ་སྙད་དེ་ཐོག་མར་གོ་བ་ཡིན་ལ་སྟོད་ཀྱི་ཉི་མ་ལྷ་ས་ནི་ང་ཚོའི་གནས་མཇལ་ཞུ་ས་ཙམ་མ་ཡིན་པར་བོད་ཀྱི་རྒྱལ་ས་ཡིན་པ་ཡང་དང་པོ་ངོ་ཤེས་པ་ཡིན།
ལྔ་བཅུ་ང་དགུ་ལོའི་ཚུན་ཆད་ནས་བཟུང་བོད་ཀྱི་མི་རབས་རྒན་པ་དག་རིག་གནས་གསར་བརྗེ་ཆེན་མོའི་མནར་གཅོད་དང་གདུག་རྩུབ་ཀྱི་སོ་ཁ་ནས་བཟོད་ཐབས་བྲལ་བའི་ན་ཟུག་གི་གཟེར་བ་ཚད་མེད་དང་བཅས་ཏེ་ལྷ་ཡུལ་ལྟ་བུའི་རང་ཡུལ་གྱི་འཇིག་རྟེན་ལ་མཁྲེང་ཞེན་གྱི་ཕྱིར་མིག་འཕེན་བཞིན་འདས་སོང་བའི་ལོ་མང་པོ་ཞིག་གི་རྗེས་ལ་ལོ་རབས་གསར་བ་དང་སྤྱི་ཚོགས་གསར་བའི་དཔྱིད་དཔལ་གྱི་ཁྲོད་ནས་མི་རབས་གསར་བ་དག་གཅིག་རྗེས་གཉིས་མཐུད་དུ་རྩྭ་དང་རྩི་ཤིང་བཞིན་སྐྱེས་ནས་ཡོང་བའི་ཁ་མཚམས་སུ་རྒྱ་ནག་གི་རྩ་ཁྲིམས་ཀྱང་དུས་ཀྱི་འཁོར་ལོ་དང་བསྟུན་ཏེ་ཅུང་ལྷོད་ལ་བབས་ཤིང་། བོད་ནང་གི་ས་གཞི་ཐམས་བཅད་ཡར་རྒྱས་ཀྱི་མིང་གིས་ཟིན་པའི་ཕྱི་ཤུན་མིག་ལ་མཛེས་པ་དང་དོན་སྙིང་ཡིད་ལ་གཙེས་པའི་ཁྲ་ཁྲ་ཟང་ཟིང་གིས་རྦད་དེ་བཀབ་ནས་གདའ་བ་དེས་རྒྱལ་སྤྱིའི་དང་བ་འདྲེན་པའི་མགོན་པོ་གང་གི་གསུང་སྐད་ལ་ཁ་གཏད་གཅོག་པར་འབད་ཀྱི་ཡོད་པ་ནི་ད་ལྟ་དང་དེ་རིང་གི་སྐབས་ལ་ཡང་མཐོང་ཆོས་སུ་མངའ་བ་དེ་རེད།
འོན་ཀྱང་ང་ཚོའི་ཀྲུང་གོ་དང་ང་ཚོའི་མེས་རྒྱལ་གྱི་སློབ་གསོ་དམར་པོའི་ཀློག་དེབ་ཀྱི་ཁྲོད་ན་འདའ་བཞིན་པའི་བོད་ཀྱི་མི་རྒྱུད་གསར་བའི་གཞོན་ནུ་ཕོ་མོ་དག་གིས་དྲི་མ་མེད་པའི་བོད་རྒྱུད་གདོང་དམར་ཆེན་མོའི་ལོ་རྒྱུས་ལྟ་ཞོག ཐ་ན་བོད་ཀྱི་རྒྱལ་དར་དང་བོད་ཀྱི་རྒྱལ་གླུ། བོད་ཀྱི་རྒྱལ་བོ་དང་བོད་ཀྱི་སྲོལ་རྒྱུན་སོགས་མིག་གིས་མཐོང་རྒྱུ་དང་རྣ་བས་གོ་རྒྱུ་ནི་རྐང་ནས་མི་སྲིད་པ་ཞིག་ཡིན་སྟབས་གོང་གི་དོན་དག་དེ་འདྲ་བྱུང་གི་ཡོད་པ་རེད། དེ་ནི་དངོས་གནས་འཇིགས་སུ་རུང་བའི་ཐབས་ཇུས་ཤིག་སྟེ་ད་ལྟ་དང་དེ་རིང་གི་རྒྱ་ནག་གིས་དྲག་ཆས་སྤྲས་ཏེ་བོད་མི་དམར་གསོད་གཏོང་གི་ཡོད་པ་ལས་ཀྱང་འཇིགས་སུ་རུང་བ་ཞིག་རེད། གལ་ཏེ་རྒྱ་ནག་གིས་ཁ་སང་དང་དེ་རིང་གི་འདི་ལྟར་བོད་མི་ཡིན་ནོ་ཅོག་གི་སྒང་ལ་དྲག་ཤུགས་ཀྱིས་གཉའ་གནོན་དང་གདུག་རྩུབ་ཀྱི་བྱ་འགུལ་མ་བརྩམས་ན་ལུས་ཀྱི་ཟུངས་ཁྲག་གཅིག་པའི་བོད་ནང་གི་ངའི་ཕུ་ནུ་སྤུན་ཟླ་ཚོ་དངོས་གནས་འཇིགས་སྐྲག་གི་ཅོང་བརྡ་མེད་པའི་དབེན་ལྗོངས་སུ་ཀྲུང་གོ་དང་མེས་རྒྱལ་ལ་དགའ་བའི་དར་ཆ་དམར་པོ་དེའི་འོག་ནས་ཁུ་སིམ་མེར་གཉིད་ལ་ཡེར་ཏེ། རྒྱ་ནག་མི་དམངས་དུང་ཕྱུར་བཅུ་གསུམ་གྱི་གསེང་ལ་འཐིམ་འགྲོ་བའི་ཉེན་ཁ་དེ་ཧ་ཅང་ཧ་ཅང་གི་ཐག་ཉེ་ཞིག་ན་འདུག་ཨང་བསམས་ནས་ང་སྐྱོ་མྱོང་།
དེ་ལྟ་ན་ཡང་། དུས་ཚོད་ཀྱི་མཐུ་ངོགས་སུ་འགྱུར་བཞིན་པའི་འཇིག་རྟེན་གྱི་བྱ་དངོས་ཡོད་ཚད་ལྟར་བོད་རྒྱ་གཉིས་ཀྱི་དཀའ་རྙོག་གི་ཐད་ལའང་རབ་དང་རིམ་པའི་འགྱུར་བ་སྣ་ཚོགས་པ་ཞིག་ད་བར་དུ་བྱུང་མ་མྱོང་བ་ག་ལ་ཡིན་ཏེ་རྩ་བ་ནས་མ་ཡིན། ཉིས་སྟོང་བརྒྱད་ལོར་རྒྱ་ནག་གིས་དམིགས་བསལ་གྱིས་བོད་རང་གི་ས་ཐོག་ནས་གྲོག་ཚང་ལ་རྡོ་ལོག་འཕང་བ་བཞིན་བོད་མི་རྣམས་ལ་བརྙས་པ་ཚད་མེད་བྱས་པར་བརྟེན་རང་གི་རྒྱལ་ཁབ་དང་རང་གི་མི་རིགས། རང་གི་རང་དབང་དང་རང་གི་ཐོབ་ཐང་ཆེད་དུ་ཚང་མས་མཉམ་གཅིག་ཏུ་གྱེན་ལངས་བྱས་ཡོད་པ་རེད་ལ། ཚང་མ་དུས་གཅིག་ཏུ་སྡེབ་ལངས་ཀྱིས་ངོ་རྒོལ་སྐད་འབོད་ལོ་རྒྱུས་ཐོག་བྱུང་མ་མྱོང་བ་ཞིག་བྱས་ཡོད་པ་མ་ཡིན་ནམ།
དུས་དེ་ནས་བཟུང་སྟེ། རིམ་གྱིས་རང་གི་རྒྱལ་ཁབ་དང་རང་གི་མི་རིགས་ཀྱི་རང་དབང་མཐོང་གི་མེད་པའི་ངའི་ཕུ་ནུ་སྤུན་ཟླ་ཚོའི་མིག་ཟུང་སྒྲིབ་བྱེད་ཀྱི་ཡོལ་རས་ནག་པོ་དེ་ཡང་རྒྱ་ནག་ཁོ་རང་གི་གདུག་རྩུབ་ཀྱི་ལག་པས་ཕྱིས་སོང་བ་ནི། དངོས་གནས་རྐྱེན་ངན་གྲོགས་ཤར་བ་རེད་ཨང་བསམ་ནས་དེ་རིང་ང་དགའ་ཡོད། ངར་ལྕགས་ལྟ་བུའི་བོད་རིགས་གཞོན་སྐྱེས་ཚོའི་བསམ་བློའི་ནང་གི་རབ་རིབ་ཀྱི་བོད་དང་བོད་རྒྱལ་ཁབ་ཆེན་མོའི་གདོང་རིས་ངོ་མ་དེ་གཞི་ནས་ཁོང་ཚོ་ལ་ཇེ་གསལ་དུ་གྱུར་བ་ནི་རྒྱ་ནག་གི་གདུག་རྩུབ་ལས་བྱུང་བ་ཤ་སྟག་ཡིན་པས་ངས་དེ་ལ་བཀའ་དྲིན་ཆེ་ཞུ་ན་འདོད།
ལག་ལ་འཕྲུལ་མདའ་ཐོགས་ཤིང་ལུས་ལ་དྲག་ཆས་སྤྲས་པའི་ཇག་རྐུན་ལྟ་བུའི་དམག་མི་ཚོ་དུས་ངེས་མེད་ལ་འཇབ་རྒྱུག་དང་འཇབ་རྒོལ་གྱིས་ཁྱིམ་ཚང་རེ་རེ་དང་གྲྭ་ཤག་རེ་རེ་བཞིན་སྔོག་བཤེར་བྱས་ཤིང་། འཕྲོག་བཅོམ་དང་བརྡུང་བསྲེག་གི་ངན་སྤྱོད་ཚད་མེད་བྱེད་ཀྱི་ཡོད་པ་དེས་བདག་གི་ཕུ་ནུ་མཆེད་གྲོགས་ཚོས་རང་ངོ་རང་ཤེས་དང་། རང་འགན་རང་འཁུར་གྱི་བགྱི་བ་དང་དུ་བླངས་ཏེ་བོད་རྒྱལ་ཁབ་དང་བོད་མི་རིགས་ཀྱི་རང་དབང་གི་སླད་དུ་ལུས་སྲོག་དམར་པོ་མེ་ལ་སྒྲོན་བཞིན་སྐད་འབོད་ཀྱི་དུང་བརྡ་གནམ་འོག་ལ་བསྒྲགས་པ་དེ་ལོ་རྒྱུས་སྟེང་། དེ་སྔ་གཏན་ནས་བྱུང་མ་མྱོང་བའི་འཛམ་གླིང་ཐོག་གི་ཆེས་མཐོ་བའི་འཚེ་མེད་ཞི་བའི་གྱེན་ལངས་ངོ་རྒོལ་ཞིག་ཏུ་གྱུར་སོང་བ་ནི། དངོས་གནས་ཧ་ལས་པ་དང་ཧང་སང་པའི་ཅི་འདྲའི་བླ་མེད་ཀྱི་སྙིང་སྟོབས་བརྗིད་པོ་ཞིག་རེད་ཨང་།
ལྷག་པར་དུ་ཤ་དར་ཁྲག་དར་གྱི་ལང་ཚོ་གསར་བའི་གཞོན་ནུ་ལོ་ཆུང་ཚོས་རང་ཉིད་ནི་རྒྱ་ནག་དང་རྦད་དེ་ཐ་དད་ཀྱི་རྒྱལ་ཁབ་ཅིག་གི་འབངས་མི་ཡིན་པའི་ངེས་པ་གཏིང་ནས་རྙེད་དེ། རང་གི་རྒྱལ་ཁབ་ཀྱི་དར་ཆ་དགུང་ལ་འཕྱར་བཞིན་རང་དབང་གི་འབོད་སྒྲ་ཆད་མེད་དུ་སྒྲོག་གིན་པ་འདི་སྔོན་ཆད་ཀྱི་ང་ཚོ་དང་བསྡུར་ན་དངོས་གནས་རྟོག་སད་ཅན་དང་རྒྱལ་ཞེན་ཅན་གྱི་དཔའ་ལ་རྟུལ་བའི་ཕོ་རྒོད་རྐྱང་རྐྱང་གི་རང་གཤིས་རེད་འདུག་ཨང་བསམ་ནས་བླ་མེད་ཀྱི་གུས་འདུད་ཅིག་དབང་མེད་དུ་ཤོར་སོང་ངོ་།།
དྲ་གྲོགས་མི་ཞུན་ལགས། ཕྱིར་དྲན་གྱི་ངོགས་ནས་རྩོམ་ཡིག་ཡག་པོ་ཞིག་སྤེལ་འདུག ངོ་མ་རེད། བོད་ནང་དུ་མཚོན་ན་རྒྱ་ནག་སྲིད་གཞུང་གི་བཀོད་ཁྱབ་དང་སློབ་དེབ་ཀྱི་སྒྲིག་གཞི་ལས་ང་ཚོ་ལྟ་བུའི་གྲངས་ཉུང་མི་རིགས་ཀྱི་སློབ་མ་ཚོའི་ཀླད་པའི་ནང་དུ་མཚོན་རྩི་དམར་པོ་དེ་ཇི་ཙམ་བླུགས་ཡོད་པ་རེད། དེ་ལྟ་བུའི་ཆབ་སྲིད་ཀྱི་རྒྱ་ལས་ཐར་རྒྱུ་ཧ་ཅང་གི་ཁག་པོ་རེད། ཡིན་ནའང་། ཁ་སང་དེ་རིང་བོད་ཕྱི་ནང་གི་དྲ་རྒྱ་འདིའི་རོགས་ཕན་ལ་བརྟེན་ནས་སྔར་བཞིན་གྱི་སྨག་ནག་གི་ཞིང་ཁམས་མིན་པ་འདྲ།
གྲོགས་ཀྱིས་དེ་རིང་འདས་ཟིན་པའི་དོན་དག་ཅིག་གཞི་ལ་བཞག་སྟེ་ད་ལྟའི་གནས་བབ་དང་མཐུན་པའི་སྒོ་ནས་འབྲེལ་བཤད་ཡང་དག་པ་ཞིག་གནང་འདུག་པས་དགའ་ཡོད། མུ་མཐུད་ནས་ཕྲིས།
དྲི་ལན་དེ་དང་ལན་མ་ཐུབ་པའི་དྲི་བ་དེ་གཉིས་ཀྱིས་དགེ་རྒན་དེའི་སེམས་པ་གྲང་ཤུར་ཤུར་དང་འཁྱག་འཁྱག་སུམ་སུམ་བཏང་སོང་མོད། དགེ་ཕྲུག་གམ་སློབ་བུ་དག་གིས་ཁོང་གི་འགྲེལ་བཤད་ལ་ཡང་དོ་སྣང་བྱས་ཡོད་མོད་ཅི་རིགས་རེད། ཉིད་ཀྱིས་སེམས་ནས་མ་བརྗེད་པ་དེ་ནི་དྲན་རིག་རྒོད་པའི་སློབ་བུ་ཞིག་གི་ཁྱད་ཆོས་རེད།
མི་ཞུན་ལགས། ཀྱིས་ཁོང་གི་ཉམས་མྱོང་དང་སྦྲགས་ཏེ་དོན་དངོས་བཀོད་པ་འདིར་བསྟོད་བསྔགས་ཞུའོ།།
དེ་རིང་མེ་ཞུན་གྱིས་ཡག་པོ་ཞིག་བྲིས་འདུག བཀའ་དྲིན་ཆེ་ཨ་རོད།