འགད་རྫས་ཀྱི་ཉེར་ལེན་དཔལ་འབར་དམ་དུམ།

ཁ་བ་སྐམ་པོ། 

ཁ་སང་དེ་རིང་གངས་ཅན་པའི་མི་རབས་གསར་བའི་ཡོ་ལང་ཁོལ་ཁོལ་དུ་འཕྱུར་ཏེ། སྔར་གྱི་བཙན་པོ་རིམ་བྱོན་དང་མཛངས་བློན་མཁས་ཆེན་དག་གི་དུར་ས་དང་འགྲོ་བཟའ་ཁྲི་མ་ལོད་དང་སྲས་མོ་སད་མ་གར་སོགས་ཀྱི་གནས་ས་གཤིན་པོ་དག་མིག་གིས་མཐོང་ཞིང་ལག་པས་མྱང་ནས། ཕ་ས་བྲང་མགོ་འདྲ་བོ་དང་མ་ས་འཇམ་རུས་འདྲ་བོ་རང་བདག་བྱེད་འདོད་ཀྱི་འདུན་པ་འགོག་མེད་རྦབ་ཆུའི་རྒྱུན་ལ་གཞོལ་པ་འདི་རེད། འདི་ནི་༸རྒྱལ་དབང་ཡིད་བཞིན་ནོར་བུས་སྟོབས་ཆེན་རྒྱ་ནག་གི་མགོ་གཙོ་དག་ལ། འགྲོ་མིའི་ཐོབ་དང་།  འགྲོ་མིའི་རང་དབང་། ཆོས་སྲིད་ཁེ་དབང་སྲུང་སྐྱོབ་ཀྱི་བདག་དབང་བོད་རང་ལ་དགོས་བས་རེ་འདུན་ཇི་ལྟར་བཏོན་ཡང་ཉན་རྒྱུ་ཕར་ཞོག་དེ་ལས་ལྡོག་སྟེ། གཟན་ཤམ་གྱོན་པའི་སྤྱང་ཀི་དང་མེས་རྒྱལ་ཁ་བྲལ་ལ་གཏོང་བའི་གཏེ་བོ། ད་དུང་ངོ་རྒོལ་ཀྱི་སྐུལ་འདེད་བྱེད་པོ་སོགས་ཀྱི་མིང་སྣ་ཚོགས་ཤིག་བཏེགས་ཤིང་འདོག་བཞིན་པ་དེ་རེད།

དེ་དག་དང་དེ་དག་གི་ཉེར་ལེན་དང་རྒྱུ་རྐྱེན་ལ་བརྟེན་ནས་བོད་མི་རིགས་དང་ནང་པའི་རྗེས་འཇུག་པ་དག་གི་སེམས་ལ་རྨ་ཁ་བཟོས་ཤིང་ཇེ་ཆེར་བཏང་། འདི་ནི་རྒྱ་ནག་ལ་མཚོན་ན་དགའ་འོས་བ་ཞིག་གཏན་ནས་མིན་མོད། རྒྱ་ནག་གི་གཙོ་འཛིན་དག་གིས་ཆེ་ཆེ་ཞིག་འཇོན་སོང་བའི་ཟོལ་གྱིས་རྒྱ་རིགས་དང་མི་རིགས་གང་མང་ལ་མགོ་སྐོར་མུ་མཐུད་ནས་བཏང་དང་གཏོང་བཞིན་སྒེར་འཛིན་རིང་ལུགས་ལ་མཐའ་གཅིག་ཏུ་གཞོལ་དང་འབད་ཀྱིན་པ་འདི་རེད། 

གཅིག་དགུ་གྱ་དགུ་ལོ་སོགས་སུ་ལྷ་ས་རུ་དགོས་འདུན་རང་དབང་གཞིར་བཞག་གིས་ངོ་རྒོལ་སྐད་འབོད་ཁྲོམ་སྐོར་རེ་བྱས་བ་ལས་བོད་ཤར་ཕྱོགས་སུ་དེ་འདྲ་མ་བྱུང་བ་ཞིག་རེད། འོན་ཀྱང་ངས་ཤེས་ཚོད་ལ་གོ་གཉིས་ལོར་རྭ་རྒྱ་བཀྲ་ཤིས་ལྗོངས་ནས་བོད་རང་དབང་སྒེར་ལངས་ཞེས་བའི་ཚོགས་པས་སྐྱབས་རྗེ་ཤིང་བཟའ་རིན་པོ་ཆེ་ཁྲིར་འགོད་དང་སྟབས་བསྟུན་བོད་ཀྱི་རྒྱལ་དར་འཕྱར་ཞིང་ཡིག་ཆ་མང་བོ་གང་སར་བཀྲམས། དེ་ནས་བཟུང་བོད་ཤར་ཕྱོགས་སོགས་ན་ཡང་བོད་རང་གི་བདེ་སྐྱིད་ཀྱི་ཆེད་ལ་ཅི་མི་སྙམ་པར་ངོ་རྒོལ་བྱེད་མཁན་ཇེ་མང་ནས་ཡོངས་རྫོགས་སུ་ཕྱིན། དེ་ལྟར་ཡང་དགུན་ནིང་ལོར་གངས་ལྗོངས་ཆོལ་ཁ་གསུམ་གྱིས་མ་གྲོས་གཅིག་མཐུན་སྒོས་རྒྱ་ནག་གཞུང་ལ་ང་ཚོར་རང་དབང་དགོས་བའི་ཞི་རྒོལ་བསམ་ཡིད་ལས་འདས་བ་ཞིག་བྱས་བ་དེ་རེད། ལོ་དེ་ནི་ཉིས་སྟོང་བརྒྱད་ལོ་རེད་ལ། དེ་ནས་ད་རག་བར་ལོ་བཞིའི་རང་ལ་ཕྱིར་བལྟས་ཤིག་བྱས་ན་རྒྱ་ནག་ལ་ཞི་རྒོལ་བྱེད་པའི་འཕེལ་རིམ་དང་རྣམ་པ་མེ་སྟག་ནས་མེ་ལྕེའི་རང་བཞིན་དུ་གྱུར་འདུག ད་ནི་ཞི་རྒོལ་ཀྱི་རྒོལ་སྟངས་ཛ་དྲག་དང་ཡང་རྩེར་བསྙེག་འདུག་པ་དང་། འདི་ལས་ལྷག་པའི་ཚད་མཐོའི་ཞི་རྒོལ་ཅིག་འཛམ་གླིང་དུ་རྙེད་སོན་མེད་པ་ཞིག་ཏུ་འཁུམས། རྒོལ་མཁན་ནི་མདོ་དབུས་ཁམས་གསུམ་གྱི་མི་ཡིན་པ་དང་། རྒོལ་ས་ནི་མདོ་དབུས་ཁམས་གསུམ་ཡིན་པར་མ་ཟད། རྒོལ་སྟངས་ཡང་འཚེ་མེད་ཞི་བ་ལ་མཐའ་གཅིག་ཏུ་གཞོལ་བ་རེད། སྐབས་དེ་དག་ཏུ་རྒྱ་ནག་གིས་གང་འདོད་མེ་མདའ་མི་མང་གསེང་དུ་རྒྱག་པ་དང་། ལག་པའི་ཟིན་ཚད་བཙོན་ལས་ལ་ཁྲིད་པ་སོགས་ནི་མི་གང་མང་ཞིག་གིས་མཁྱེན་རྟོགས་ཐུབ་ཡོད་པ་དེ་དག་རེད། 

ཉིས་སྟོང་དགུ་ལོར་ཡང་བསྐྱར་ཞི་རྒོལ་ཀྱི་རྣམ་པ་གཞན་ཞིག་སྟེ། དགོས་འདུན་རང་དབང་རྗོད་བཞིན་རྔ་པའི་དཔའ་བོ་བཀྲ་བྷེ་མེ་ལ་མཆོངས་ཤིང་རྭ་རྒྱའི་བཀྲ་ཤིས་བཟང་བོ་ཆུ་ལ་མཆོངས་བ་དེ་འཕེལ་རིམ་ཞིག་རེད། བོད་ནང་དང་ས་གནས་རང་དུ་སྐབས་དེ་དག་ཏུ་ངོ་རྒོལ་སྐད་འབོད་དང་བཙོན་འཇུག་མནར་གཅོད་ཡོད་ཡོད་པ་ཞིག་རེད་ལ། ད་དུང་ཤེས་ཡོན་པའི་སྡེ་ཁག་སྡེབ་ལངས་བྱས་ཤིང་སློབ་མ་ཚོ་ཞིབ་ལངས་ལ་འབད་པའང་འཕེལ་རིམ་ནས་འཕེལ་རིམ་ཞིག་རེད་དོ།། 

ཉིས་སྟོང་བཅུ་གཅིག་ནས་རང་ལུས་མེ་བསྲེགས་ཀྱི་ངོ་རྒོལ་རྒྱུན་མཐུད་དེ་སྐྱ་སེར་དབྱེ་མེད་དང་རྒན་གཞོན་བར་མེད་དུ་གཅེས་བའི་ཚེ་སྲོག་གི་གཟུངས་ཐག་མེ་ལྕེ་ལ་བསྟིམས་པ་གྲངས་སུ་བསྟར། འདི་དག་ཆེས་ཚད་མཐོ་བའི་ཞི་རྒོལ་ཞིག་ཡིན་ལ།  འཕེལ་རིམ་ལ་མཐའ་མེད་པ་ཞིག་ཡིན་ཙང་།  རྒྱ་ནག་སྒེར་གཅོད་པའི་ད་དུང་དྲག་གནོན་ལ་ཐད་སྐྱོད་བྱས་ན་འདིའི་རྗེས་ཀྱི་འཕེལ་རིམ་ལ་རྒྱ་ནག་རང་ཉིད་ཀྱིས་འགན་འཁུར་དགོས་བར་མ་ཟད། རྒྱལ་སྤྱིའི་དྲང་བདེན་པ་དག་གིས་ཀྱང་འདི་དག་ལ་གསལ་ཁ་ཡང་དག་བཟོ་དགོས་ཀྱི་འདུག་གོ།

ད་འཕེལ་རིམ་གང་རེད་ཟེར་ན་ད་ནི་འགད་རྫས་ལུས་ལ་བཏགས་ཏེ་རྒྱ་དང་མཉམ་ཤི་བྱེད་པ་དང་ཁང་བརྩེག་མཐོན་པོ་དང་མི་ཚོགས་མང་བོ། དེ་ལས་ཀྱང་རྒྱ་མི་འཚོགས་ས་དང་། གནམ་གྲུ་དང་མེ་འཁོར་སྐྱོད་ལམ་སོགས་ཡིན་རྒྱུ་ཡིན་པར་མ་ཟད། གྲངས་ཉུང་ས་ཁུལ་དུ་ལྟ་སྐོར་ལ་མཚམས་རེར་ཡོང་བའི་གཙོ་འཛིན་ཞིག་དང་མཉམ་དུའང་ཡིན་ན་ཐང་། འདི་འདྲ་ཞིག་ཡོང་བའི་རྒྱུ་མཚན་ཅི་ཟེར་ན། བྱ་བ་གང་ཡིན་ཡང་དེར་ཞུགས་ན་འཕེལ་རིམ་ཡོད་པ་འདི་ཆོས་ཉིད་གཤོལ་ཐབས་བྲལ་བ་ཞིག་རེད་དོ།། 

དེས་ཕྱིར་འདིའི་རྗེས་ཀྱི་འཕེལ་ས་འགད་རྫས་ཡིན་པ་ནི་བཤད་མི་དགོས་བ་ཞིག་རེད། དེས་ན་རྒྱ་ནག་གི་གཙོ་འཛིན་རྣམས་ཀྱིས་ངེས་དོན་གྱི་ལྷིང་འཇགས་ལྡན་པའི་རྒྱ་ནག་ཅིག་དང་། སྒྲོག་བཞིན་པའི་ཞི་བདེ་བརྟན་ལྷིང་ལྡན་ཞིང་མཐུན་སྒྲིལ་སྤར་ཁ་དམ་པའི་རྒྱ་ནག་ཅིག་བསྐྲུན་འདོད་ན། བོད་དང་ཡུ་གུར་གྱིས་མཚོན་པའི་གྲངས་ཉུང་མི་རིགས་ལ་རང་ཡུལ་སྐྱོང་བའི་ཁྱིམ་གཞི་རེ་རེ་བཞིན་སྤྲོད་དགོས་བ་དང་། ཕྱི་རྒྱལ་ན་སྐྱབས་བཅོལ་ལ་བཞུགས་ཡོད་པའི་༸ཏཱ་ལའི་བླ་མ་དང་རྒྱ་ནག་དམངས་གཙོ་དོན་གཉེར་བ། ད་དུང་ཡུ་གུར་བ་དང་མི་རིགས་གཞན་ཚོ་ཡང་དགའ་བསུའི་ཁྲོད་ཕྱིར་རང་རྒྱལ་ལ་འབོད་འགུག་བྱེད་དགོས་བ་འདི་ཅི་འདྲའི་ཤེས་དགོས་བ་ཞིག་རེད་ཨང་། འདི་ནི་ཆུ་མ་ཡོང་གོང་གི་རགས་ངོ་མ་དེ་མ་རེད་དམ། འགད་རྫས་ཀྱི་ཉེར་ལེན་དུ་གྱུར་དང་འགྱུར་བཞིན་པའི་དཔལ་འབར་ལྟ་བུའི་མེ་ལྕེ་འདི་མཚམས་འཇོག་པ་ལ་ཅིས་ཀྱང་འབད་དགོས་བ་ཞིག་མ་རེད་དམ།

༢༠༡༢/༢/༡༨ཉིན་བྲིས།