བོད་སྐད་ཡིག་གི་ཁྱབ་ཁོངས་ཆེ་རུ་གཏོང་དགོས་ཀྱི་འདུག

དེ་རིང་གཟའ་མིག་དམར་ཉིན་གངས་སྐྱིད་དཔེ་མཛོད་ཚོགས་ཁང་དུ། རྒྱལ་སྤྱིའི་སྐད་ཡིག་ཉིན་མོ་དང་སྲུང་གཙི་དང་འབྲེལ། བོད་ཀྱི་རྩོམ་པ་པོ་དང་རྩོམ་སྒྲིག་པ་ཁག་ཅིག་གིས་སྐད་ཡིག་སྲུང་སྐྱོབ་ཐོག་བགྲོ་གླེང་གནང་སོང་།

བོད་ཀྱི་སྐད་ཡིག་རྒྱུན་འཛིན་ཚོགས་པའི་གོ་སྒྲིག དེ་རིང་ཕྱི་ཚེས་ ༢༡ ཉིན་གྱི་སྔ་དྲོའི་ཆུ་ཚོད་ ༩ པའི་སྟེང་གངས་སྐྱིད་དཔེ་མཛོད་ཚོགས་ཁང་དུ། བོད་ཀྱི་སྐད་ཡིག་སྲུང་སྐྱོབ་སྐོར་གྱི་བགྲོ་གླེང་ཚོགས་འདུ་ཞིག་ཚོགས་སོང་ལ། ཐེངས་འདིའི་བགྲོ་གླེང་སྟེང་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཉམས་ཞིབ་འགན་འཛིན་རྡོ་རྗེ་དབང་ཕྱུག་ལགས་དང་། བོད་ཀྱི་དཔེ་མཛོད་ཁང་གི་ཉམས་ཞིབ་འགན་འཛིན་ནཱ་ག་སངས་རྒྱས་བསྟན་དར་ལགས། རྩོམ་པོ་པོ་སྤྲེལ་ནག་པ་བློ་གྲོས་དཔལ་བཟང་ལགས་དང་། རྩོམ་པ་པོ་གཡང་ཁོ་རྒྱལ་ལགས་གཙོས་ངྷ་ས་ཁུལ་གྱི་དུས་དེབ་དང་ཚགས་པར་ཀྱི་སྐུ་ཚབ། དེ་བཞིན་མང་ཚོགས་བཅས་ཁྱོན་ ༥༠ ཙམ་འདུ་འཛོམས་བྱུང་ཡོད།  

མཛད་སྒོའི་ཐོག་མར་བོད་ཀྱི་སྐད་ཡིག་རྒྱུན་འཛིན་ཚོགས་པའི་ཚོགས་གཙོ་འབྲོག་རུ་ཆོས་དར་ལགས་ཀྱིས། རྒྱལ་སྤྱིའི་སྐད་ཡིག་གི་གནས་སྟངས་ངོ་སྤྲོད་དང་སྦྲགས། བོད་སྐད་ཡིག་སྐད་ཡིག་རྒྱུན་ཚོགས་པས་རྒྱལ་སྤྱིའི་སྐད་ཡིག་ཉིན་མོ་དང་སྟབས་བསྟུན་ཏེ། བོད་རིགས་མཁས་དབང་ཁག་གདན་ཞུས་ཀྱིས་བོད་ཀྱི་སྐད་དང་ཡི་གེའི་གནས་བབ་སྐོར་བགྲོ་གླེང་གནང་རྒྱུ་དང་། བོད་མིའི་ཟ་ཁང་དང་ཚོང་ཁང་། དུས་དེབ་དང་དྲ་རྒྱ། ཚགས་ཤོག་བཅས་ཀྱི་ཡིག་ནོར་ཐེར་འདོན། གཞི་རིམ་མང་ཚོགས་ཁྲོད་བོད་སྐད་ཡིག་སྲུང་སྐྱོབ་ཐོག་སྔར་ལས་ཤུགས་སྣོན་རྒྱག་དགོས་པའི་འབོད་སྐུལ་བཅས་ཞུས་སོང་།

བགྲོ་གླེང་སྟེང་ནོར་གླིང་ཉམས་ཞིབ་འགན་འཛིན་རྡོ་རྗེ་དབང་ཕྱུག་ལགས་ཀྱིས་བརྗོད་པ་ལྟར་ན། ད་ལྟའི་བོད་སྐད་ཡིག་གི་དཀའ་ངལ་ཆེ་ཤོས་གཅིག་ནི། དུས་དེབ་དང་དྲ་རྒྱ། ཚགས་ཤོག་བཅས་ཀྱི་ནང་ཏུ་ཡིག་ནོར་དང་གཏགས་ནོར་མང་དྲགས་པ་དང་ཁ་སྐད་བེད་སྤྱོད་གཏོང་བ་གཉིས་ཡིན་པ་དང་།  ཡིག་ནོར་མ་དག་རྒྱུན་འབྱམས་སུ་ཕྱིན་པ་དེས་སློབ་གྲྭ་ཁག་གི་སློབ་ཕྲུག་ཚོར་དོ་ཕོག་འགྲོ་བཞིན་ཡོད་པ་མ་ཟད། བོད་སྐད་ཡིག་གི་རིན་ཐང་དང་ནུས་པའང་ཉམས་རྒུད་དུ་འགྲོ་བཞིན་ཡོད་སྐོར་དང་། དཀའ་ངལ་གཞན་ཞིག་ནི། བོད་ཀྱི་རྩོམ་པ་པོ་ཁག་ཅིག་གིས་རྩོམ་ཡིག་རྣམས་ཁ་སྐད་ནང་བྲིས་པ་དེའི་ཐོག་ནས། ཆོལ་ཁ་བྱེ་བྲག་པའི་ཀློག་མཁན་ཚོར་གོ་བརྡ་མི་འཕྲོད་པའི་དཀའ་ངལ་འཕྲད་ཀྱི་ཡོད་སྐོར་བརྗོད་སོང་ལ། སྐབས་དེར་ཁོང་གིས་ “རྩོམ་པ་པོ་ཞིག་ལ་མཚོན་ན། ཀློག་མཁན་དང་སྐད་ཡིག་གི་མདུན་ལམ་གཉིས་ཀར་བསམ་བློ་བཏང་སྟེ། རྩོམ་ཡིག་རྣམས་ངེས་པར་དུ་ཡིག་སྐད་ཐོག་འབྲི་ཐུབ་པ་ཞིག་གནང་དགོས་ཀྱི་འདུག་ ” ཅེས་བརྗོད་བྱུང་།

རྩོམ་པ་པོ་སྤྲེལ་ནག་པ་བློ་གྲོས་དཔལ་བཟང་ལགས་ཀྱིས་བོད་ཆོལ་ཁ་གསུམ་གྱི་ཡུལ་སྐད་མི་འདྲ་བའི་དབང་གིས་༸གོང་ས་མཆོག་གི་གསུང་ཨ་མདོ་བས་གོ་མི་ཐུབ་པ་དང་། ཨ་མདོའི་མཁས་པའི་གསུང་དབུས་གཙང་ནས་གོ་མི་ཐུབ་པའི་གནས་སྟངས་ཆགས་ཡོད་སྐོར་དང་། སྐད་ཡིག་ཀྱི་དཀའ་ངལ་དེ་མི་སྒེར་བ་ཞིག་དང་ཚོགས་སྡེ་ཞིག་གིས་གཅིག་གྱུར་ཐུབ་པ་ཞིག་མིན་པར། མི་རིགས་ཀྱི་ཤེས་རིག་དང་དཔལ་འབྱོར་ཡར་རྒྱས་དང་བསྟུན་ཏེ་ཡོང་དགོས་པ་ཞིག་ཡིན་ཚུལ་བརྗོད་དེ།  “ སྐད་ཡིག་སྲུང་སྐྱོབ་དང་གཅིག་གྱུར་ཡོང་བའི་སྔོན་འགྲོའི་ལམ་ཁ་ནི། ཆོལ་ཁ་གསུམ་གྱི་བོད་མི་ཚོས་རང་གི་ཆོལ་ཁ་ལས་གཞན་པའི་ཆོལ་ཁ་གཉིས་ཀྱི་སྐད་རིགས་ལ་གོ་བ་ལེན་ཐུབ་རྒྱུ་དང་། བཙན་བྱོལ་སློབ་གྲྭ་ཆེ་ཁག་ཏུ་ཡིག་བསྒྱུར་སྡེ་ཚན་ཆེད་འཛུགས་ཀྱིས། ཚན་རིག་དང་སྒྱུ་རྩལ་སོགས་ཕྱིའི་རིག་གཞུང་ནང་འདྲེན་བྱས་ཏེ། བོད་སྐད་ཡིག་གི་ཁྱབ་ཁོངས་ཆེ་རུ་གཏོང་དགོས་ཀྱི་འདུག ” ཞེས་བརྗོད་སོང་།

རྩོམ་པ་པོ་ནཱ་ག་སངས་རྒྱས་བསྟན་དར་ལགས་ཀྱིས་རྒྱལ་སྤྱིའི་སྟེང་སྐད་ཡིག་ལ་ངོས་འཛིན་གནང་ཕྱོགས་དང་། བོད་ཀྱི་སྐད་ཡིག་གི་རིན་ཐང་སྐོར་ངོ་སྤྲོད་དང་འབྲེལ། བོད་ལ་ཡུལ་སྐད་མང་དྲགས་པའི་སྟབས་ཀྱིས།  སྐད་འཆད་ཉན་སྐབས་སྐད་ཡིག་གཅིག་པ་ཡིན་ནའང་། བོད་མི་ཕན་ཚུན་གོ་བརྡ་མ་འཕྲོད་པའི་དཀའ་ངལ་འཕྲད་ཀྱིན་ཡོད་ཚུལ་དང་། མདོ་དབུས་ཁམས་གསུམ་གྱི་བོད་མིའི་བརྡ་སྤྲོད་གཅིག་པ་དང་ཚིག་འགྲོས་གཅིག་པ། ཐ་སྙད་མང་ཆེ་བ་ཡང་གཅིག་གྱུར་ཡིན་སྟབས། བོད་མི་ཚོས་ཆོལ་ཁ་གསུམ་གྱིས་སྐད་རྒྱག་མི་ཐུབ་ཀྱང་། ཆོལ་ཁ་གསུམ་གྱི་སྐད་ལ་ཉན་ཐུབ་པ་ཞིག་གནང་དགོས་སྐོར་དང་། ཡང་ཁོང་གིས། རྒྱ་གར་ནང་མདོ་དབུས་ཁམས་ཀྱི་བོད་པ་འདུ་འཛོམས་བྱུང་ཐུབ་པ་འདི་ནི། སྐད་ཡིག་སྲུང་སྐྱོབ་ཀྱི་གོ་སྐབས་ཡག་ཤོས་ཤིག་ཡིན་པ་དང་། ཤེས་རབ་དགའ་ཚལ་གླིང་དང་སུ་ཇཱ་བོད་ཁྱིམ། སཱ་ར་མཐོ་སློབ་བཅས་སུ་ཡོད་པའི་མདོ་དབུས་ཁམས་གསུམ་གྱི་སློབ་ཕྲུག་ཚོས། ཆོལ་ཁ་རིས་མེད་ཀྱི་སྐད་རྒྱག་མ་ཐུབ་ཀྱང་གསལ་པོ་ཉན་ཐུབ་ཀྱི་ཡོད་སྐོར་དང་། དེ་ལས་ལྡོག་སྟེ་ཉིན་ཞིག་བོད་མི་ཞིག་ཚོས་བོད་སྐད་འཆད་ཉན་མ་ཤེས་ན་སྐབས་དེ་ནས་སྐད་ཡིག་ཉམས་མགོ་བཙུགས་ཡོད་སྐོར་སོགས་བརྗོད་བྱུང་།

མཐར་མར་རྩོམ་པ་པོ་གཡང་ཁོ་རྒྱལ་ལགས་ཀྱིས་བརྗོད་པ་ལྟར་ན། བོད་ཀྱི་རིག་གནས་ཐོག་མར་དགོན་སྡེ་ཁག་དང་སྐུ་དྲག་ཁྱིམ་རྒྱུད་ནས་དར་བ་ཞིིག་དང་། ལོ་རབས་ལྔ་བཅུའི་ནང་གཞི་ནས་བོད་ཆོལ་ཁ་གསུམ་གྱི་རོང་འབྲོག་ས་ཁུལ་གྱི་མང་ཚོགས་ཁྲོད་རྒྱ་ཁྱབ་ཏུ་དར་བ་ཞིག་ཡིན་པ་དང་། ༡༩༥༩ ལོར་བོད་གཞིས་བྱེས་གཉིས་སུ་གྱེས་རྗེས། ལོ་རྒྱུས་ཐོག་གི་བོད་ཀྱི་སྐད་ཡིག་གནས་སྟངས་ལ་གནོད་འཚབ་ཆེན་པོ་བྱུང་ཡོད་སྐོར་དང་། བཙན་བྱོལ་ནང་དགོན་སྡེ་ཁག་ཏུ་བོད་ཀྱི་སྐད་ཡིག་སྲུང་སྐྱོབ་ཐོག་ནུས་པ་གང་འཚམ་ཐོན་ཡོད་ཀྱང་། སློབ་གྲྭ་ཁག་ཏུ་སློབ་མཐར་ཕྱིན་པའི་འབུམ་རམས་པ་དང་རབ་འབྱམས་པ་དག་གི་བོད་ཡིག་ཤེས་ཚད་སྐྱོ་བ་དང་། སྐད་ཡིག་ཐོག་བཅངས་བའི་འདུ་ཤེས་ཞན་པ་བཅས་ཀྱིས་སྐད་ཡིག་སྲུང་སྐྱོབ་ཐོག་གནོད་པ་ཆེན་པོ་ཐེབས་བཞིན་ཡོད་ཚུལ་དང་། སྐད་ཡིག་སྲུང་སྐྱོབ་ཀྱི་ལས་གཞི་འདི་སྐད་ཡིག་ཚོགས་པ་ཁོ་ནའི་འགན་འཁྲི་ཙམ་མིན་པར། མི་སྒེར་སོ་སོ་སྐད་ཡིག་བེད་སྤྱོད་དང་དོ་སྣང་བྱ་དགོས་པ་ཞིག་དང་། སྒྲིག་འཛུགས་ཀྱི་ངོས་ནས་སྟངས་འཛིན་ནན་མོ་བྱས་ཏེ། སློབ་གྲྭ་དང་དགེ་རྒན་ལ་དམིགས་བསལ་དགོངས་བཞེས་གནང་སྐོར་སོགས་བརྗོད་སོང་།

མཉམ་འབྲེལ་རྒྱལ་ཚོགས་ཀྱིས་ཞིབ་འཇུག་ལྟར་ན། འཛམ་གླིང་སྟེང་ཁྱོན་སྐད་རིགས་ ༦༠༠༠ ཙམ་ཡོད་པའི་ཁྲོད་བཀོལ་སྤྱོད་བྱེད་བཞིན་པའི་སྐད་རིགས་ ༣༠༠༠ ཙམ་ལས་མེད་ལ། ད་ཆར་ཆ་སྙོམས་ཟླ་རེར་སྐད་རིགས་ ༢ རེ་ཉམས་རྒུད་དུ་འགྲོ་བཞིན་ཡོད་འདུག

གསར་འགོད་པ། དཔལ་ལྡན།