དེ་རིང་གཟའ་མིག་དམར་ཉིན་གངས་སྐྱིད་དཔེ་མཛོད་ཚོགས་ཁང་དུ། རྒྱལ་སྤྱིའི་སྐད་ཡིག་ཉིན་མོ་དང་སྲུང་གཙི་དང་འབྲེལ། བོད་ཀྱི་རྩོམ་པ་པོ་དང་རྩོམ་སྒྲིག་པ་ཁག་ཅིག་གིས་སྐད་ཡིག་སྲུང་སྐྱོབ་ཐོག་བགྲོ་གླེང་གནང་སོང་།
བོད་ཀྱི་སྐད་ཡིག་རྒྱུན་འཛིན་ཚོགས་པའི་གོ་སྒྲིག དེ་རིང་ཕྱི་ཚེས་ ༢༡ ཉིན་གྱི་སྔ་དྲོའི་ཆུ་ཚོད་ ༩ པའི་སྟེང་གངས་སྐྱིད་དཔེ་མཛོད་ཚོགས་ཁང་དུ། བོད་ཀྱི་སྐད་ཡིག་སྲུང་སྐྱོབ་སྐོར་གྱི་བགྲོ་གླེང་ཚོགས་འདུ་ཞིག་ཚོགས་སོང་ལ། ཐེངས་འདིའི་བགྲོ་གླེང་སྟེང་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཉམས་ཞིབ་འགན་འཛིན་རྡོ་རྗེ་དབང་ཕྱུག་ལགས་དང་། བོད་ཀྱི་དཔེ་མཛོད་ཁང་གི་ཉམས་ཞིབ་འགན་འཛིན་ནཱ་ག་སངས་རྒྱས་བསྟན་དར་ལགས། རྩོམ་པོ་པོ་སྤྲེལ་ནག་པ་བློ་གྲོས་དཔལ་བཟང་ལགས་དང་། རྩོམ་པ་པོ་གཡང་ཁོ་རྒྱལ་ལགས་གཙོས་ངྷ་ས་ཁུལ་གྱི་དུས་དེབ་དང་ཚགས་པར་ཀྱི་སྐུ་ཚབ། དེ་བཞིན་མང་ཚོགས་བཅས་ཁྱོན་ ༥༠ ཙམ་འདུ་འཛོམས་བྱུང་ཡོད།
མཛད་སྒོའི་ཐོག་མར་བོད་ཀྱི་སྐད་ཡིག་རྒྱུན་འཛིན་ཚོགས་པའི་ཚོགས་གཙོ་འབྲོག་རུ་ཆོས་དར་ལགས་ཀྱིས། རྒྱལ་སྤྱིའི་སྐད་ཡིག་གི་གནས་སྟངས་ངོ་སྤྲོད་དང་སྦྲགས། བོད་སྐད་ཡིག་སྐད་ཡིག་རྒྱུན་ཚོགས་པས་རྒྱལ་སྤྱིའི་སྐད་ཡིག་ཉིན་མོ་དང་སྟབས་བསྟུན་ཏེ། བོད་རིགས་མཁས་དབང་ཁག་གདན་ཞུས་ཀྱིས་བོད་ཀྱི་སྐད་དང་ཡི་གེའི་གནས་བབ་སྐོར་བགྲོ་གླེང་གནང་རྒྱུ་དང་། བོད་མིའི་ཟ་ཁང་དང་ཚོང་ཁང་། དུས་དེབ་དང་དྲ་རྒྱ། ཚགས་ཤོག་བཅས་ཀྱི་ཡིག་ནོར་ཐེར་འདོན། གཞི་རིམ་མང་ཚོགས་ཁྲོད་བོད་སྐད་ཡིག་སྲུང་སྐྱོབ་ཐོག་སྔར་ལས་ཤུགས་སྣོན་རྒྱག་དགོས་པའི་འབོད་སྐུལ་བཅས་ཞུས་སོང་།
བགྲོ་གླེང་སྟེང་ནོར་གླིང་ཉམས་ཞིབ་འགན་འཛིན་རྡོ་རྗེ་དབང་ཕྱུག་ལགས་ཀྱིས་བརྗོད་པ་ལྟར་ན། ད་ལྟའི་བོད་སྐད་ཡིག་གི་དཀའ་ངལ་ཆེ་ཤོས་གཅིག་ནི། དུས་དེབ་དང་དྲ་རྒྱ། ཚགས་ཤོག་བཅས་ཀྱི་ནང་ཏུ་ཡིག་ནོར་དང་གཏགས་ནོར་མང་དྲགས་པ་དང་ཁ་སྐད་བེད་སྤྱོད་གཏོང་བ་གཉིས་ཡིན་པ་དང་། ཡིག་ནོར་མ་དག་རྒྱུན་འབྱམས་སུ་ཕྱིན་པ་དེས་སློབ་གྲྭ་ཁག་གི་སློབ་ཕྲུག་ཚོར་དོ་ཕོག་འགྲོ་བཞིན་ཡོད་པ་མ་ཟད། བོད་སྐད་ཡིག་གི་རིན་ཐང་དང་ནུས་པའང་ཉམས་རྒུད་དུ་འགྲོ་བཞིན་ཡོད་སྐོར་དང་། དཀའ་ངལ་གཞན་ཞིག་ནི། བོད་ཀྱི་རྩོམ་པ་པོ་ཁག་ཅིག་གིས་རྩོམ་ཡིག་རྣམས་ཁ་སྐད་ནང་བྲིས་པ་དེའི་ཐོག་ནས། ཆོལ་ཁ་བྱེ་བྲག་པའི་ཀློག་མཁན་ཚོར་གོ་བརྡ་མི་འཕྲོད་པའི་དཀའ་ངལ་འཕྲད་ཀྱི་ཡོད་སྐོར་བརྗོད་སོང་ལ། སྐབས་དེར་ཁོང་གིས་ “རྩོམ་པ་པོ་ཞིག་ལ་མཚོན་ན། ཀློག་མཁན་དང་སྐད་ཡིག་གི་མདུན་ལམ་གཉིས་ཀར་བསམ་བློ་བཏང་སྟེ། རྩོམ་ཡིག་རྣམས་ངེས་པར་དུ་ཡིག་སྐད་ཐོག་འབྲི་ཐུབ་པ་ཞིག་གནང་དགོས་ཀྱི་འདུག་ ” ཅེས་བརྗོད་བྱུང་།
རྩོམ་པ་པོ་སྤྲེལ་ནག་པ་བློ་གྲོས་དཔལ་བཟང་ལགས་ཀྱིས་བོད་ཆོལ་ཁ་གསུམ་གྱི་ཡུལ་སྐད་མི་འདྲ་བའི་དབང་གིས་༸གོང་ས་མཆོག་གི་གསུང་ཨ་མདོ་བས་གོ་མི་ཐུབ་པ་དང་། ཨ་མདོའི་མཁས་པའི་གསུང་དབུས་གཙང་ནས་གོ་མི་ཐུབ་པའི་གནས་སྟངས་ཆགས་ཡོད་སྐོར་དང་། སྐད་ཡིག་ཀྱི་དཀའ་ངལ་དེ་མི་སྒེར་བ་ཞིག་དང་ཚོགས་སྡེ་ཞིག་གིས་གཅིག་གྱུར་ཐུབ་པ་ཞིག་མིན་པར། མི་རིགས་ཀྱི་ཤེས་རིག་དང་དཔལ་འབྱོར་ཡར་རྒྱས་དང་བསྟུན་ཏེ་ཡོང་དགོས་པ་ཞིག་ཡིན་ཚུལ་བརྗོད་དེ། “ སྐད་ཡིག་སྲུང་སྐྱོབ་དང་གཅིག་གྱུར་ཡོང་བའི་སྔོན་འགྲོའི་ལམ་ཁ་ནི། ཆོལ་ཁ་གསུམ་གྱི་བོད་མི་ཚོས་རང་གི་ཆོལ་ཁ་ལས་གཞན་པའི་ཆོལ་ཁ་གཉིས་ཀྱི་སྐད་རིགས་ལ་གོ་བ་ལེན་ཐུབ་རྒྱུ་དང་། བཙན་བྱོལ་སློབ་གྲྭ་ཆེ་ཁག་ཏུ་ཡིག་བསྒྱུར་སྡེ་ཚན་ཆེད་འཛུགས་ཀྱིས། ཚན་རིག་དང་སྒྱུ་རྩལ་སོགས་ཕྱིའི་རིག་གཞུང་ནང་འདྲེན་བྱས་ཏེ། བོད་སྐད་ཡིག་གི་ཁྱབ་ཁོངས་ཆེ་རུ་གཏོང་དགོས་ཀྱི་འདུག ” ཞེས་བརྗོད་སོང་།
རྩོམ་པ་པོ་ནཱ་ག་སངས་རྒྱས་བསྟན་དར་ལགས་ཀྱིས་རྒྱལ་སྤྱིའི་སྟེང་སྐད་ཡིག་ལ་ངོས་འཛིན་གནང་ཕྱོགས་དང་། བོད་ཀྱི་སྐད་ཡིག་གི་རིན་ཐང་སྐོར་ངོ་སྤྲོད་དང་འབྲེལ། བོད་ལ་ཡུལ་སྐད་མང་དྲགས་པའི་སྟབས་ཀྱིས། སྐད་འཆད་ཉན་སྐབས་སྐད་ཡིག་གཅིག་པ་ཡིན་ནའང་། བོད་མི་ཕན་ཚུན་གོ་བརྡ་མ་འཕྲོད་པའི་དཀའ་ངལ་འཕྲད་ཀྱིན་ཡོད་ཚུལ་དང་། མདོ་དབུས་ཁམས་གསུམ་གྱི་བོད་མིའི་བརྡ་སྤྲོད་གཅིག་པ་དང་ཚིག་འགྲོས་གཅིག་པ། ཐ་སྙད་མང་ཆེ་བ་ཡང་གཅིག་གྱུར་ཡིན་སྟབས། བོད་མི་ཚོས་ཆོལ་ཁ་གསུམ་གྱིས་སྐད་རྒྱག་མི་ཐུབ་ཀྱང་། ཆོལ་ཁ་གསུམ་གྱི་སྐད་ལ་ཉན་ཐུབ་པ་ཞིག་གནང་དགོས་སྐོར་དང་། ཡང་ཁོང་གིས། རྒྱ་གར་ནང་མདོ་དབུས་ཁམས་ཀྱི་བོད་པ་འདུ་འཛོམས་བྱུང་ཐུབ་པ་འདི་ནི། སྐད་ཡིག་སྲུང་སྐྱོབ་ཀྱི་གོ་སྐབས་ཡག་ཤོས་ཤིག་ཡིན་པ་དང་། ཤེས་རབ་དགའ་ཚལ་གླིང་དང་སུ་ཇཱ་བོད་ཁྱིམ། སཱ་ར་མཐོ་སློབ་བཅས་སུ་ཡོད་པའི་མདོ་དབུས་ཁམས་གསུམ་གྱི་སློབ་ཕྲུག་ཚོས། ཆོལ་ཁ་རིས་མེད་ཀྱི་སྐད་རྒྱག་མ་ཐུབ་ཀྱང་གསལ་པོ་ཉན་ཐུབ་ཀྱི་ཡོད་སྐོར་དང་། དེ་ལས་ལྡོག་སྟེ་ཉིན་ཞིག་བོད་མི་ཞིག་ཚོས་བོད་སྐད་འཆད་ཉན་མ་ཤེས་ན་སྐབས་དེ་ནས་སྐད་ཡིག་ཉམས་མགོ་བཙུགས་ཡོད་སྐོར་སོགས་བརྗོད་བྱུང་།
མཐར་མར་རྩོམ་པ་པོ་གཡང་ཁོ་རྒྱལ་ལགས་ཀྱིས་བརྗོད་པ་ལྟར་ན། བོད་ཀྱི་རིག་གནས་ཐོག་མར་དགོན་སྡེ་ཁག་དང་སྐུ་དྲག་ཁྱིམ་རྒྱུད་ནས་དར་བ་ཞིིག་དང་། ལོ་རབས་ལྔ་བཅུའི་ནང་གཞི་ནས་བོད་ཆོལ་ཁ་གསུམ་གྱི་རོང་འབྲོག་ས་ཁུལ་གྱི་མང་ཚོགས་ཁྲོད་རྒྱ་ཁྱབ་ཏུ་དར་བ་ཞིག་ཡིན་པ་དང་། ༡༩༥༩ ལོར་བོད་གཞིས་བྱེས་གཉིས་སུ་གྱེས་རྗེས། ལོ་རྒྱུས་ཐོག་གི་བོད་ཀྱི་སྐད་ཡིག་གནས་སྟངས་ལ་གནོད་འཚབ་ཆེན་པོ་བྱུང་ཡོད་སྐོར་དང་། བཙན་བྱོལ་ནང་དགོན་སྡེ་ཁག་ཏུ་བོད་ཀྱི་སྐད་ཡིག་སྲུང་སྐྱོབ་ཐོག་ནུས་པ་གང་འཚམ་ཐོན་ཡོད་ཀྱང་། སློབ་གྲྭ་ཁག་ཏུ་སློབ་མཐར་ཕྱིན་པའི་འབུམ་རམས་པ་དང་རབ་འབྱམས་པ་དག་གི་བོད་ཡིག་ཤེས་ཚད་སྐྱོ་བ་དང་། སྐད་ཡིག་ཐོག་བཅངས་བའི་འདུ་ཤེས་ཞན་པ་བཅས་ཀྱིས་སྐད་ཡིག་སྲུང་སྐྱོབ་ཐོག་གནོད་པ་ཆེན་པོ་ཐེབས་བཞིན་ཡོད་ཚུལ་དང་། སྐད་ཡིག་སྲུང་སྐྱོབ་ཀྱི་ལས་གཞི་འདི་སྐད་ཡིག་ཚོགས་པ་ཁོ་ནའི་འགན་འཁྲི་ཙམ་མིན་པར། མི་སྒེར་སོ་སོ་སྐད་ཡིག་བེད་སྤྱོད་དང་དོ་སྣང་བྱ་དགོས་པ་ཞིག་དང་། སྒྲིག་འཛུགས་ཀྱི་ངོས་ནས་སྟངས་འཛིན་ནན་མོ་བྱས་ཏེ། སློབ་གྲྭ་དང་དགེ་རྒན་ལ་དམིགས་བསལ་དགོངས་བཞེས་གནང་སྐོར་སོགས་བརྗོད་སོང་།
མཉམ་འབྲེལ་རྒྱལ་ཚོགས་ཀྱིས་ཞིབ་འཇུག་ལྟར་ན། འཛམ་གླིང་སྟེང་ཁྱོན་སྐད་རིགས་ ༦༠༠༠ ཙམ་ཡོད་པའི་ཁྲོད་བཀོལ་སྤྱོད་བྱེད་བཞིན་པའི་སྐད་རིགས་ ༣༠༠༠ ཙམ་ལས་མེད་ལ། ད་ཆར་ཆ་སྙོམས་ཟླ་རེར་སྐད་རིགས་ ༢ རེ་ཉམས་རྒུད་དུ་འགྲོ་བཞིན་ཡོད་འདུག
གསར་འགོད་པ། དཔལ་ལྡན།
བོད་སྐད་ཡིག་གི་སྐོར་ལ་བླ་མ་གཅིག་གིས་འདི་ལྟར་བཤད་འདུག
http://www.youtube.com/watch?v=IRKDEmiDhBg&feature=related
བགྲོ་གླེང་འདི་དང་འདིའི་བགྲོ་གླེང་བ་ཚང་མ་ལ་ཡི་རང་དང་ཐུགས་རྗེ་ཆེ་ཞུ།
ངས་འབྲི་འདོད་པ་ནི་བོད་ཀྱི་བརྡ་དག་དང་འབྲེལ་བའི་དོགས་པ་བྱེ་བྲག་པ་ཞིག་སྟེ། འདིའི་འགོ་བརྗོད་ཀྱི་བོད་སྐད་ཡིག་གི་ཁྱབ་ཁུངས་ཞེས་པའི་བོད་དང་སྐད་ཡིག་གཉིས་ཀྱི་བར་དུ་དྲུག་སྒྲ་མ་སྦྱར་ན་བཀླག་མི་བདེ་དང་། རང་གི་བརྡ་སྤྲོད་དང་ཡང་འགལ་བ་ཞིག་ཏུ་བསམ་ཡོད་ན་ཁུངས་ལྡན་གྱི་དོགས་སེལ་རེ་ཡོད་ན་བཀའ་དྲིན་ཆེ།
ཞར་ལ་དུས་བབ་རྩོམ་སྒྲིག་པས་མཚོན་འབྲེལ་ཡོད་ཚང་མས་ཆད་ལྷག་དང་དག་ཆ་ལ་གཟབ་ན་མ་གཏོགས་སྐྱོན་གསུམ་པོ་དེས་དུས་བབ་ཀྱི་དཔལ་ཡོན་གནོན་བཞིན་འདུག་གོ།
སྐད་ཡིག་རྒྱུན་འཛིན་ཚོགས་པའི་བོད་སྐད་ཡིག་གི་ཁྱབ་ཁོངས་ཆེ་རུ་གཏོང་དགོས་ཀྱི་འདུག་ཞེས་པའི་བགྲོ་གླེང་ཚོགས་པ་ཐོས་པའི་དགའ་བསུ་ཡོད།
ལས་འགུལ་འདི་ལྟ་བའི་སྐབས་སུ་ཆོས་ཁ་དང་ཆོས་ལུགས་རེས་སུ་མ་ཆད་པའི་ཐོག་ནས་ཤུགས་གནོན་རྒྱབ་རྒྱུ་གལ་ཆེན་པོ་རེད་ལ་བྱེད་བཞིན་ཡང་ཡོད་པས་ཡག་པོ་འདུག སླད་མར་ཞུ་རྒྱུ་ཞིག་ལ་ཐེངས་འདིའི་བགྲོ་གླེང་སྟེང་བོད་ཀྱི་སྐད་ཡིག་སྲུང་སྐྱོབ་སྐོར་གྱི་བགྲོ་གླེང་བྱེད་མཁན་རྣམ་གྱི་བསམ་ཚུལ་སྐོར་བགྲོ་གླེང་ཡག་པོ་བྱས་འདུག་ཐུགས་རྗེ་ཆེ།
མུ་མཐུད་ས་གནས་གང་སར་ཚོགས་ཆུང་དང་ཚོགས་འདུ་བསྐོང་ཚོགས་བྱེད་རྒྱུའི་རེད་ཡོད།
བོད་རྒྱལ་ལོ། བདེན་པ་ཉིད་རྒྱལ་གྱུར་ཅིག
འོ་ན་གངས་ཅན་པའི་ལས་དབང་ལ་བསམ་ཞིང་སྲོལ་རྒྱུན་ལ་དུངས་བ་ཡོད་ན། ཆོལ་གསུམ་སྐད་རིགས་གཅིག་གྱུར་བྱེད་དགོས། ཁྱད་པར་ཐ་སྙད་མིང་མཛཽད་ཁག་ལ་བདག་པོ་རྒྱག་དགོས་པ་མ་ཟད། གོང་བཀུར་གནང་དགོས། དེང་དུས་བོད་ན་མཁས་ཚུལ་ཁྲིམས་བློ་གྲོས་ཀྱིས་ཕྱོགས་གནང་བཞིན་པའི་མི་མཛོད་ཁག་ལ་གུས་བཀུར་དང་རྒྱབ་སྐྱོར་གནང་དགོས་པ་ལས། ཕར་ན་གཅིག་བསྒྲིག ཚུར་ན་གཅིག་བསྒྲིག་གི་བདད་ན་ཡག་པོ་ཨེ་ཡོད་ད། བོད་ལ་འགྲན་བསྡུར་རྣམ་པར་བཟུང་ནས་འཇོན་ལ་མི་འཇོན་པས་ཡང་བསྐྱར་གཅིག་བསྒྲིག་ན་དོན་དམ་པའི་ཐ་སྙད་གང་ལ་གཞི་བཅོལ། བོད་ན་ཆོལ་ཁ་གསུམ་གྱི་མཁས་དབང་རབ་འབྱམས་པ་དག་འ་རེད་
རྡ་སའི་སྤྲེལ་ནག་པས། ཨ་མདོ་མཁས་པའི་གསུང་དབུས་གཙང་ནས་གོ་མི་ཐུབ་པའི་གནས་སྟངས་ཆགས་ཡོད་ཅེས་པ་འདི་མི་འཐད་དེ།
ཨ་མདོའི་སྔ་རབས་ཀྱི་མཁས་པ་རྗེ་རིན་པོའི་གསུང་དབུས་གཙང་ནས་གོ་ཐུབ་ལ། ཉེ་རབས་ཀྱི་མཁས་པ་དགེ་འདུན་ཆོས་འཕེལ་ལགས་ཀྱི་གསུང་དབུས་གཙང་ནས་གོ་ཐུབ། དེང་རབས་ཀྱི་མཁས་པ་ཨ་ལགས་དོར་ཞི་སོགས་ཀྱི་གསུང་དབུས་གཙང་ནས་གོ་ཐུབ།
འོན་ཀྱང་དེང་རབས་ཨ་མདོ་ཕྱོགས་ནས་རྩོམ་པ་པོར་མཁས་ཆེས་པ་རེ་གཉིས་ཀྱིས། ཡུལ་སྐད་སྟེང་ངག་ནས་གང་ཐོན་བྲིས་པ་རྣམས་དབུས་གཙང་བ་ཟད། ཨ་མདོའི་ཕྱོགས་ནས་ཀྱང་རེ་འགས་གོ་ཡི་མེད།
འདི་ལྟ་བུའི་སྐད་ཡིག་བགྲོ་གླེང་གནང་བར་ཡིད་རང་དང་དགའ་བསུ་ཡོད། ད་དུང་རྒྱུན་པར་བགྲོ་གླེང་ཐུབ་པའི་རེ་སྨོན་ཡོད།
རེད། སྐད་ཡིག་ཟེར་ན་གཙོ་བོ་བརྡ་སྤྲོད་དང་བསྟུན་ནས་ཡིག་གེ་དང་སྐད་གཉིས་བེད་སྤྱོད་བྱེད་དགོས་པ་དེ་རེད། དེ་ཡང་ང་ཚོར་ཆོས་སྐད་དང་། མི་ནག་གི་སྐད་རང་བཞིན་པ། ད་དུང་སྙན་ངག་དང་། མངོན་བརྗོད་སོགས་ཀྱི་བརྡ་སྐད་མང་བས་དཀའ་ངལ་དང་། ཡིག་ཐོག་དང་། ངག་ཐོག་གི་བརྡ་དྲག་ཞན་སོགས་ཀྱི་དཀའ་ངལ་ལ་བསྟེན་སྐད་ཡིག་གཉིས་ཉམས་ཞན་དང་། སྙོག་འཛིང་ཅན་དུ་འགྲོ་བཞིན་ཡོད། འོན་ཀྱང་ད་ཆ་བརྡ་འཕྲིན་གྱི་བཀོལ་སྤྱོད་ཧ་ཅང་མྱུར་བས་ཚང་མས་གཅིག་གྱུར་ཤུགས་སྣོན་བྱེད་རྒྱུ་དཀའ་ཚགས་དེ་ཙམ་མེད་པས་ངེས་པར་དུ་རྩོམ་ཡིག་དང་། གསལ་བསྒྲགས་སྤེལ་མཁན། གཞུང་གི་ཡིག་ཆ་དང་། བརྡ་སྦྱོར་གནང་སྟངས་སོགས་ལ་ཧ་ཅང་ཡིད་གཟབ་ཀྱི་ངང་ནས་གཅིག་གྱུར་ལྟ་བུར་སྤེལ་དགོས།
ཕལ་ཆེར་མི་ལོ་ས་ཡ་བཞི་ཙམ་གྱིས་གོང་ནས་འགྲོ་བ་མིའི་མཚུངས་ཟླ་མ་མཆིས་པའི་ཤེས་རབ་ལས། ལག་ཆ་བཀོལ་སྤྱོད་བྱེད་པའི་ནུས་རྩལ་དང་རིམ་བཞིན་སྐད་ཡིག་ཀྱང་འཕེལ་རྒྱས་ཕྱིན་ཡོད། ང་ཚོས་སྐད་ཡིག་ནི་མི་རིགས་ཀྱི་སྲོག་རྩ་ཡིན་ཞེས་མགྲིན་དབྱངས་གཅིག་ཏུ་འདོད་པར་ལྟར། འགྲོ་བ་མིའི་འཚོ་གནས་ཀྱི་དགོས་མཁོ་དང་བརྒྱུད་རིམ་ཁྲོད་དུ་མེད་ཐབས་མེད་པའི་མ་ལག་གལ་ཆེར་ཞིག་ཆགས་ཡོད། སྔོན་ཆད་ང་ཚོས་སྐད་ཡིག་ནི་མི་རྣམས་ཀྱིས་ཕན་ཚུན་གོ་བརྡའ་སྤྲོད་བྱེད་ཀྱི་དགོས་མཁོ་ཙམ་ལ་ངོས་འཛིན་བགྱིས་ཡོད། དངོས་དོན་བདེན་འཛིན་ཐོག་ང་ཚོས་སྐད་ཡིག་ལ་འཛིན་པའི་བསམ་བློ་དེ་ཙམ་གྱིས་ནི་ཁུངས་འཁྱོལ་ཐུབ་ཐབས་མེད་དེ། དུས་རབས་ཉེར་གཅིག་པའི་འཛམ་གླིང་གི་འགྱུར་འགྲོས་དང་སྔོན་ཐོན་སྟོབས་ལྡན་རྒྱལ་ཁབ་དག་གི་སྲིད་འབྱོར་རིག་གསུམ་གྱི་འཕེལ་རྒྱས་ཀྱིས་མུ་དང་མཐའ་མེད་པའི་སྟོང་གསུམ་གྱི་སྟོང་ཆེན་པོ་བརྡོལ་བའི་དུས་མཚམས་འདི་ལས། མིའི་སེམས་ཁམས་སུ་སྐད་ཡིག་གི་ནུས་པ་དང་། རིན་ཐང་། བྱས་རྗེས་སོགས་ཀྱི་བག་ཆགས་ཀྱིས་འོད་སྟོང་གསལ་ལྷམ་མེར་འཕྲོས་བཞིན་ཡོད་པར་འདི་ཡིན།