བོད་ཆུ་འབྲུག་ལོའི་ལོ་སར་ཚེས་ ༡ ཉིན་བོད་ཀྱི་གཞོན་ནུ་ལྷན་ཚོགས་ཀྱི་སྣེ་ཁྲིད་འོག ཨ་རིའི་ནེའུ་ཡོག་ཏུ་རྟེན་གཞི་བྱས་ཡོད་པའི་མཉམ་འབྲེལ་རྒྱལ་ཚོགས་ཀྱི་སྒོ་ཁར་བོད་མི་གསུམ་གྱིས་དུས་ཚོད་ངེས་མེད་ཀྱི་ཟས་བཅད་ལས་འགུལ་སྤེལ་འདུག ལས་འགུལ་ཁྲོད་ཞུགས་མཁན་བོད་མི་གསུམ་ནི་རྒྱ་གར་ལྷོ་ཕྱོགས་སེ་ར་དགོན་གྱི་རང་ལོ་ ༣༢ ཡིན་པའི་སྐྱབས་རྗེ་ཤིང་བཟའ་རིན་པོ་ཆེ་མཆོག་དང་། ཨ་རིའི་གཏན་སྡོད་རང་ལོ་ ༥༩ ཡིན་པའི་རྡོ་རྗེ་རྒྱལ་པོ་ལགས། རྒྱ་གར་ཧ་བྷ་པོ་ས་གནས་གཞོན་ནུའི་ཚོགས་ཟུར་རང་ལོ་ ༣༩ ཡིན་པའི་ཡེ་ཤེས་བསྟན་འཛིན་ལགས་བཅས་ཡིན་འདུག
བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་དབང་རིག་འཛིན་ལགས་ཀྱིས། ལས་འགུལ་དབུ་འཛུགས་སྐབས་གསར་ལམ་ཁག་ཏུ་རྒྱལ་ཚོགས་སྒོ་ཁར་དུས་ཚོད་ངེས་མེད་ཀྱི་ཟས་བཅད་ལས་འགུལ་སྤེལ་དགོས་དོན་སྐོར་བརྗོད་དོན། “དུས་ཚོད་ངེས་མེད་ཀྱི་ཟས་བཅད་ལས་འགུལ་སྤེལ་དགོས་པའི་དམིགས་ཡུལ་གཙོ་བོ་ནི། བོད་ནང་དུ་རྒྱལ་གཅེས་དཔའ་བོ་དཔའ་མོ་རྣམས་ཀྱིས་གཅིག་རྗེས་གཉིས་མཐུད་ཀྱིས་བོད་རྒྱལ་ཁབ་དང་བོད་མི་རིགས་ཀྱི་ཆེད་དུ་སྐུ་ལས་མེར་བསྲེགས་བཏང་བར་གདུང་སེམས་མཉམ་སྐྱེད་དང་། བོད་ནང་དུ་བོད་མི་ཞི་བའི་ངོ་རྒོལ་བ་རྣམས་དམར་གསོད་གཏོང་བཞིན་པའི་ཛ་དྲག་གི་གནས་སྟངས་དེར་རྒྱལ་སྤྱིའི་སྤྱི་ཚོགས་ཀྱིས་དོ་སྣང་དང་། མཉམ་འབྲེལ་རྒྱལ་ཚོགས་ཀྱིས་ཐེ་གཏོགས་དང་འབོད་སྐུལ་གནང་དགོས་པའི་དགོས་འདུན་འདོན་གྱིན་ཡོད།” ཅེས་བརྗོད་འདུག
དུས་ཚོད་ངེས་མེད་ཀྱི་ཟས་བཅད་ངོ་རྒོལ་སྐབས་མཉམ་འབྲེལ་རྒྱལ་ཚོགས་ལ་ཛ་དྲག་གི་དགོས་འདུན་དོན་ཚན་ལྔ་བཏོན་ཡོད་པ་ནི། གཅིག བོད་ནང་གི་ད་ལྟའི་ཛ་དྲག་གནས་སྟངས་ཤེས་རྟོགས་སླད་ཞིབ་འཇུག་ཚོགས་ཆུང་འཕྲལ་དུ་བོད་ནང་གཏོང་དགོས། གཉིས། རྒྱ་གཞུང་ནས་བོད་ནང་དྲག་གནོན་བྱེད་བཞིན་པ་འཕྲལ་དུ་མཚམས་འཇོག་དགོས་པའི་གནོན་ཤུགས་སྤྲོད་དགོས། གསུམ། བོད་ནང་གི་ཛ་དྲག་གནས་སྟངས་གསལ་རྟོགས་སླད་རྒྱལ་སྤྱིའི་གསར་འགོད་པ་གཏོང་དགོས་པར་རྒྱ་གཞུང་ལ་གནོན་ཤུགས་སྤྲོད་དགོས། བཞི། ༸ཀུན་གཟིགས་པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་དང་། སྤྲུལ་སྐུ་བསྟན་འཛིན་བདེ་ལེགས་རྣམ་གཉིས་གཙོས་ཆབ་སྲིད་བཙོན་པ་རྣམས་འཕྲལ་དུ་གློད་གྲོལ་དགོས་པའི་གནོན་ཤུགས་སྤྲོད་དགོས། ལྔ། བོད་ནང་རྒྱལ་གཅེས་ཆོས་གཅེས་ཟེར་བའི་ལས་འགུལ་འཕྲལ་དུ་མཚམས་འཇོག་དགོས་པ་བཅས་ཡིན་འདུག
དེ་བཞིན། ཐེངས་འདིའི་དུས་ཚོད་ངེས་མེད་ཀྱི་ཟས་བཅད་ལས་འགུལ་བརྒྱུད། རྒྱ་གཞུང་གིས་བོད་ནང་མི་རིགས་རྩ་མེད་བཟོ་བཞིན་པའི་ལས་འགུལ་མཚམས་འཇོག་ཆེད། རྒྱལ་སྤྱིའི་དབུ་ཁྲིད་དང་གཞུང་ཁག་གིས་ཐད་ཀར་རྒྱ་གཞུང་གི་མགོ་ཁྲིད་ཚོར་བཀའ་མོལ་གནང་དགོས་པའི་འབོད་སྐུལ་ཀྱང་ཞུས་འདུག
ཁ་བརྡར།
༡༽ མགོན་པོ་ཕྱག་གཉིས་པ་ནས།
སྤྱི་ལོ་ ༢༠༡༢ ཟླ་ ༢ ཚེས་ ༢༧ གི་ཆུ་ཚོད་ ༡༠ སྐར་མ་ ༥༢
༡༩༥༩།༡༩༦༡།༡༩༦༥ ལོ་སོ་སོར་གྲོས་ཆོད་ཐེངས་གསུམ་བཞག་པའི་ནང༌། བོད་མི་མང་གི་རང་ཐག་རང་གཅོད་ཀྱི་ཐོབ་ཐང་གིས་མཚོན་ཁོང་ཚོའི་གཞི་རྩའི་འགྲོ་བ་མིའི་ཐོབ་ཐང་དང༌། རང་དབང་བཙན་འཕྲོག་བྱེད་པའི་བྱ་སྤྱོད་མཐའ་དག་མཚམས་འཇོག་བྱེད་དགོས་ཞེས་པའི་ནང་གི
རང་ཐག་རང་གཅོད་ཟེར་བ་དེ། མཉམ་འབྲེལ་རྒྱལ་ཚོགས་ཀྱི་གྲོས་ཆོད་ནང་དངོས་སུ་བཀོད་ཡོད་པའི་ཚིག་ཅིག་རེད། ང་ཚོས་ཁྲིམས་ཐོག་ནས་རང་གི་ཐོབ་ཐང་རྩོད་དགོས་ན་རང་ཐག་རང་གཅོད་ཟེར་བའི་ཡིག་འབྲུ་འདི་བཞི་རྩ་ཆེན་ཡིན་པ་ཤེས་དགོས་པ་རེད།
རྒྱལ་ཚོགས་དང་དོམ་ཚང་གཅིག་པ་རེད། དགུན་ཁར་གཉིད་ནས་འདུག་གི་རེད།
༧སྐྱབས་རྗེ་དམ་པ་ཤིང་བཟའ་རིན་པོ་ཆེ་ཚང་གི་སྐུ་ཕྲེང་ན་རིམ་གྱི་ལོ་རྒྱུས་ནང་ཆོས་ཕྱོགས་ལ་མཛད་རྗེས་བླ་མེད་བཞག་ཡོད་པ་མ་ཟད། སྐུ་ཕྲེང་འདི་བ་ཚང་ལ་མཚོན་ན་འང་དམིགས་བསལ་བོད་སྤྱི་བའི་བདེ་སྡུག་དང་ཆབ་སྲིད་ལ་ཐུགས་སྣང་ཆེར་བཞེས་མཛད་པ་ནི་གུས་བཀུར་དང་ཡི་རང་ཞུ་འོས་པ་ཞིག་རེད། ཁོང་ཚང་དང་ལྷན་བཞུགས་སྐུ་ཞབས་རྡོ་རྗེ་རྒྱལ་བོ་དང་ཡེ་ཤེས་བསྟན་འཛིན་རྣམ་པ་གསུམ་ལ་སྙིང་ཐག་པ་ནས་ཐུགས་རྗེ་ཞུ་བ་དང་།ལོ་རྒྱུས་ཀྱིས་ཁྱེད་ཚོ་ཟིན་ཐོར་བཀོད་་ཡོང་བའི་ཡིད་ཆེས་བརྟན་པོ་ཡོད།
ཕྱི་རྒྱལ་ཁག་ཏུ་ཕེབས་ནས་འདི་ལྟར་གནང་ན། ཁོང་ཚོས་ང་ཚོ་བོད་མི་ཚོ་ཅི་ཞིག་གི་ཆེད་དུ་གང་ས་གང་དུ་ཁ་འཐོར་ནས་འགྲོ་བཞིན་པ་ཤེས་ལ། དེ་ནས་ཁོང་ཚོར་གོ་རྟོགས་ཡོད་པས་མུ་འཐུད་ནས་རྒྱབ་སྐྱོར་གནང་གི་རེད། སོང་ཙང་ལས་འགུལ་བ་ཚོར་ཐུགས་རྗེ་ཆེ། སྤྱི་ཚོགས་རྙིང་བའི་སྐབས་བླ་མ་ཚོ་ཟས་བཅད་ལ་བཞུགས་ཟེར་ན། ཐུགས་བརྒྱལ་བཞེངས་ནས་གྲོངས་ཀྱི་རེད་ལ། རང་རང་གི་ཐུགས་ལའང་ཤི་དགོས་ན་སྔོན་ལ་མང་ཚོགས་ཤི་དགོས་ཟེར་གྱི་རེད། དེང་སང་གི་བླ་མ་༸ཤིང་བཟའ་རིན་པོ་ཆེ་ལྟ་བུ་དངོས་གནས་བོད་དོན་སླད་སྐུ་ངལ་མང་བོ་གནང་མཁན་ཚོར་དེ་ལས་ཀྱང་རྗེས་སུ་ཡི་རང་དང་བསྔགས་བརྗོད་ཞུ། དངོས་གནས་བོད་འདི་ལ་ཡག་པོ་ཞིག་མ་བྱུང་ན་བླ་མ་ཚོས་དཀོར་ནག་བཞེས་འདུག་ས་མེད་པ་མཁྱེན་ན་ཡག་པོ་རེད་པཱ།
ལས་འགུལ་བ་རྣམས་ལ་བསྔགས་བརྗོད་དང་། གཞིས་བཞུགས་བོད་མི་རྣམས་དང་ཁྱེད་ཚོ་སེམས་ཤུགས་མ་ཆགས་དང་ང་ཚོ་དུས་རྟག་ཏུ་ཁྱེད་ཚོ་དང་མཉམ་དུ་ཡོད།
དུས་ངེས་མེད་ཟས་བཅད་གནང་མཁན་ཚོར་སྙིང་ཐག་པ་ནས་བཀའ་དྲིན་ཞུ།
ཕྱི་སྡོད་བོད་མི་ཚོས་སེམས་ཤུགས་དང་འབད་བརྩོན་ལ་ཡིད་རངས་བྱེད་བཞིན་ཡོད།
རྗེས་སུ་ཡི་རངས་ཡོད། རྒྱལ་ཚོགས་ཀྱི་སྒོ་ཁར་དེ་འདྲ་ཞིག་མ་བྱས་ན་རྒྱལ་ཚོགས་ཀྱིས་བོད་མི་མཐོང་ཁོ་ཐག་རེད། རྒྱལ་ཚོགས་ཀྱང་རྒྱ་གཞུང་གིས་བསླུས་ཡོད་ཚོད་རེད་ལ། དེ་བཞིན་དྲུང་ཆེ་སྦན་ཁི་མོན་ཡང་རྒྱ་ནག་འཐབ་ཕྱོགས་གཅིག་གྱུར་པུའུ་ཡི་བློ་མཐུན་ཆགས་ཡོད་པ་རེད།
ལེགས་སོའི་བསྔགས་བརྗོད་དང་མོས་གུས་ཡོད་ལགས།