སྨར་ཁམས་སྒང་གི་ས་ཁུལ་ལྕག་སོ་སྟེང་ཞེས་པར་ཟླ་འདིའི་ཕྱི་ཚེས་ ༡༠ ཡས་མས་ནས་མེ་སྐྱོན་བྱུང་སྟེ་ཉིན་བཅུ་ལྷག་ཕྱིན་འདུག
དུས་བབ་ཟིན་བྲིས་པ་སྤང་མདའ་སྟོབས་རྒྱས་ལགས་ཀྱིས་ཟིན་ཐོ་སྤེལ་བ་ལྟར་ན། ཟླ་འདིའི་ཕྱི་ཚེས་ ༡༠ ཙམ་ནས་བོད་ཤར་ཕྱོགས་སྨར་ཁམས་ས་ཁུལ་གྱི་ནོར་ནག་དོམ་ལྷས་ཟེར་བའི་ཤིང་ནགས་ཆེན་པོ་ཞིག་ལ་མེ་ཤོར་ཏེ། རིམ་བཞིན་དེ་དང་འདབས་འབྲེལ་གྱི་ས་རྒྱ་གར་རྗེས་མཛོ་དང་ཤ་འགྱུར་ཆེ་ཆུང་ཟེར་བའི་ས་གནས་མང་པོ་ཞིག་ལ་མེ་ཤུགས་ཆེན་འབར་ཏེ་ནགས་ཚལ་མང་ཆེ་བ་ཞིག་འཚིག་ཡོད་འདུག
སྐབས་དེར་ཐོག་མ་ས་གནས་མི་མང་གིས་མེ་གསོད་ཐབས་བྱས་ཡོད་ཀྱང་། མེ་ཤུགས་ཧ་ཅང་ཆེན་པོ་མཆེད་དེ་གསོད་ཐབས་མི་འདུག་ལ། མཐར་ལྷོ་ར་ཞང་དང་ཙོང་ཤོད་ཞང་། སྤང་མདའ་ཞང་ལ་སོགས་པའི་སྨར་ཁམས་ཁུལ་གྱི་ཞང་ཁག་མང་པོ་ཞིག་མཉམ་འབྲེལ་གྱིས་མེ་བསད་ཡོད་ཀྱང་། ས་གནས་དེ་ཁུལ་གྱི་མི་ཕྱུགས་ལ་གནོད་འཚེ་མ་ཐེབས་ཙམ་བྱུང་ཡོད་ཀྱང་། རྒྱ་གཞུང་ཕྱོགས་ནས་མེ་གསོད་ཐབས་སུ་ལས་སོན་དམིགས་བསལ་གང་ཡང་སྤེལ་མེད་སྟབས། ས་གནས་མི་མང་ཚོས་བསམ་ཚུལ་འདྲ་མིན་ཤོད་ཀྱི་ཡོད་འདུག
མེ་སྐྱོན་ཤོར་བའི་རྒྱུ་རྐྱེན་སྐོར་ལ་ས་གནས་མི་མང་གིས་ཚོད་དཔག་སྣ་ཚོགས་བྱེད་ཀྱི་ཡོད་ཅིང་། ཁག་གཅིག་གིས་རྒྱ་མི་རི་དྭགས་གསོད་མཁན་ཚོས་ཤིང་ནགས་ནང་མེ་བཏང་སྟེ་གནས་ཚུལ་དེ་བྱུང་བ་དང་། ཡང་ཁག་ཅིག་གིས་ད་ལྟ་མེ་འབར་སའི་ས་གནས་དེ་ཚོ་བོད་ནང་གི་ཤིང་ནགས་རྒྱ་ཆེ་ཤོས་གྲས་ཡིན་སྟབས། རྒྱ་ནག་གཞུང་གིས་ཉེས་ཆད་ཕོག་པའི་བོད་མི་མང་པོ་ཞིག་ད་ལྟ་ནགས་ཚལ་དེ་ཚོའི་ནང་གབ་ཡོད་པའི་དོགས་གཞིིའི་འོག་རྒྱ་མིའི་ཉེན་རྟོག་པས་མེ་རྒྱབ་བ་ཡིན་པའི་ཚོད་དཔག་ཀྱང་བྱེད་ཀྱི་ཡོད་འདུག
འདི་ལོ་ནི་བོད་མི་རིགས་འདིར་སྔ་བྱུང་མ་མྱོང་བའི་ཆགས་སྒོ་ཆེ་ཤོས་ཀྱི་ལོ་ཚིགས་ཤིག་རེད་འདུག གཅིག་བྱེད་ན་མེ་འབར་སྟངས་འདིར་ལྟོས་ན་རྟེན་འབྲེལ་བཟང་པོ་ཞིག་ཏུ་བརྩིས་ཆོག
མི་ཚིགས་ནགས་ཚིགས་ས་ཆ་ཚིགས་སོང་ན།།
དཀའ་ངལ་བོད་དང་རྒྱ་ནག་གཉིས་ལ་ཡོད།།
ཆབ་སྲིད་བསམ་བློ་ཀྱོག་པའི་བུ་ག་ལས།།
མ་ལྟ་རྒྱང་རིང་འཚོ་བ་རིང་མོར་ལྟོས།།