ཁ་སང་གཟའ་ཟླ་བའི་ཉིན་ཨ་རིའི་བྱང་ཁཱ་ལི་ཧྥོར་ཎི་ཡའི་མཐོ་སློབ་ཅིག་ཏུ་ཀོ་རི་ཡའི་མི་ཞིག་གིས་བོད་ཀྱི་བུ་མོ་གཅིག་གཙོས་པའི་སློབ་མ་ ༧ དམར་གསོད་བཏང་འདུག
ཁ་སང་ཕྱི་ཚེས་ ༢ ཉིན་གྱི་སྔ་དྲོའི་ཆུ་ཚོད་ ༡༠ དང་ཕྱེད་ཀའི་སྟེང་། ཨ་རིའི་བྱང་ཁཱ་ལི་ཧྥོར་ཎི་ཡའི་ཨོག་ཡེ་ཨཱ་ཌམ་ཁོ་སུ་མཐོ་སློབ་ནང་། ཐུང་མདའ་ཐོགས་པའི་སྐྱེས་པ་ཞིག་གིས་འཛིན་གྲྭའི་ནང་མེ་མདའ་གང་བྱུང་བརྒྱབ་སྟེ། ཉུང་མཐར་སློབ་མ་ ༧ དམར་གསོད་བཏང་ཡོད་འདུག་ལ། སྐབས་དེའི་དམར་གསོད་དོན་རྐྱེན་ཁྲོད་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ལས་བྱེད་རང་ལོ་ ༣༣ ཡིན་པའི་བུ་མོ་བསོད་ནམས་ཆོས་སྒྲོན་ལགས་ཀྱང་འདས་གྲོངས་སུ་ཕྱིན་འདུག
སྐབས་དེར་སྐྱེས་པ་དེས་ལག་ཏུ་ཐུང་མདའ་བཟུང་སྟེ་འཛིན་གྲྭ་ཁག་ཏུ་མེ་མདའ་གང་བྱུང་རྒྱག་སྐབས། མཐོ་སློབ་དེར་སློབ་སྦྱོང་བྱེད་བཞིན་པའི་བོད་རིགས་སློབ་མ་བདེ་ཆེན་གཡང་འཛོམས་ལགས་ཀྱིས་མེ་མདའི་སྐད་སྒྲ་ཐོས་མ་ཐག ལམ་སེང་ཡར་ལངས་བ་དང་མོ་རང་སྡོད་སའི་འཛིན་གྲྭའི་གློག་བསད་དེ་སྒོ་བརྒྱབ་ཡོད་སྟབས། ལག་དམར་དེས་འཛིན་གྲྭ་དེའི་ནང་གི་སློབ་ཕྲུག་གཅིག་ཀྱང་བསད་མི་འདུག་ལ། གནད་དོན་དེའི་ཐོག་ས་གནས་ཉེན་རྟོག་པས་ཁོ་མོར་བོད་པའི་དཔའ་མོ་ཞེས་པའི་བསྟོད་བསྔགས་ཀྱང་གནང་འདུག
ས་གནས་ཉེན་རྟོག་པས་བརྗོད་དོན་ལྟར་ན། ཉེ་ལམ་ནས་མཐོ་སློབ་དེའི་ཀོ་རི་ཡའི་སློབ་ཕྲུག་ཅིག་ལ་རྒྱུན་ལྡན་མིན་པའི་རྣམ་པ་བྱུང་འདུག་ལ། ཁོང་འཛིན་གྲྭར་ཡང་དུས་ཐོག་ཏུ་ཡོང་གི་མེད་པ་མ་ཟད། མཚམས་རེར་ཐུང་མདའ་ལག་ཏུ་ཉར་ཡོད་པ་སློབ་གྲོགས་ཁ་ཤས་ཀྱིས་མཐོང་ཡོད་པ་དང་། ཉེན་རྟོག་པས་དོགས་གཞི་དེའི་འོག་སློབ་མ་དེ་འཛིན་བཟུང་བཀག་ཉར་བྱས་འདུག
གནས་ཚུལ་གོ་ཐོས་བྱུང་འཕྲལ་གསར་འགོད་པས་གཞུང་ཞབས་འདེམས་བསྐོ་ལྷན་ཁང་གི་འགན་འཛིན་འཇམ་དཔལ་ཆོས་བཟང་ལགས་སུ་གནད་དོན་དེའི་སྐོར་བཀའ་འདྲི་ཞུས་པར་ཁོང་གིས་བརྗོད་དོན། “ ང་ཚོས་གནས་ཚུལ་དེ་ད་ལྟ་རང་གོ་ཐོས་བྱུང་བ་ཡིན། རྩ་བའི་བསོད་ནམས་ཆོས་སྒྲོན་ལགས་ ༢༠༡༠ ཟླ་ ༩ ཚེས་ ༦ ཉིན་ནས་ ༢༠༡༢ ཟླ་ ༩ ཚེས་ ༥ ཉིན་བར་ཕོགས་མེད་གུང་གསེང་ལ་ཕྱིན་ཡོད་སྟབས། གཞུང་དང་འབྲེལ་བ་ཆགས་ཡོད་པ་མ་རེད། གཞུང་འབྲེལ་ཕྱོགས་སྐྱོད་དང་གཞུང་འབྲེལ་ཐོག་ཕྱི་རྒྱལ་དུ་སློབ་གཉེར་གནང་མཁན་ཡིན་ན། ཕྱི་རྒྱལ་སྐུ་ཚབ་དོན་གཅོད་དང་དབུས་བོད་མིའི་སྒྲིག་འཛུགས་ཀྱིས་ཐོག་མཐའ་བར་གསུམ་དུ་འགན་འཁུར་དགོས་པ་རེད་ ” ཅེས་བརྗོད་བྱུང་།
བསོད་ནམས་ཆོས་སྒྲོན་ལགས་ནི། ༢༠༠༥ ལོའི་ཟླ་ ༩ ཚེས་ ༥ ཉིན་གཞུང་ཞབས་ཁོངས་སུ་འཛུལ་ཞུགས་གནང་ཡོད་པ་དང་།འདས་པའི་དུས་ཡུན་ལོ་ ༥ རིང་ཁོ་མོས་ནང་སྲིད་དང་ཤེས་རིག་ལས་ཁུངས་བཅས་སུ་ཕྱག་ལས་གནང་མྱོང་ཡོད་འདུག
གསར་འགོད་པ། དཔལ་ལྡན།
གསར་འགོད་པའི་གསལ་བཤད། གནས་ཚུལ་དེ་བྱུང་འཕྲལ་འདི་གའི་གསར་འགོད་པ་ཤེས་རིག་དྲུང་ཆེ་དང་བཀའ་དྲུང་གཉིས་ལ་བཀའ་འདྲི་བྱེད་དུ་སོང་ཡོད་ནའང་། ཁ་སང་བཀའ་དྲུང་གཡུ་ཐོག་ཀརྨ་དགེ་ལེགས་གིས་ཤེས་རིག་དྲུང་ཆེ་དང་རྩིས་ཁྲ་རྩིས་ལེན་གནང་གི་ཡོད་སྟབས། བཅར་འདྲི་དང་ལེན་གནང་ཡོད་པ་མ་རེད། དེ་ནས་གསར་འགོད་པ་གཞུང་ཞབས་འདེམས་བསྐོ་ལས་ཁུངས་ལ་འགྲོ་དགོས་བྱུང་བ་ཡིན།
སྙིང་རྗེ། སྤྱན་རས་གཟིགས་ལ་གསོལ་བ་འདེབས།
རྐྱེན་ངན་དག་ལ་འགྱོད་གདུང་དང་། རྗེས་སུ་དེའི་རིགས་ལ་དོ་སྣང་བྱེད་རྒྱུ་གལ་ཆེན་པོ་རེད།
མི་ནག་ལགས། ཁྱེད་ནས་ནོར་སོང་། སྐབས་འདིར་འགན་འཁུར་ནི་གཞུང་འབྲེལ་ཕྱོགས་སྐྱོད་དང་གཞུང་འབྲེལ་ཐོག་ཕྱི་རྒྱལ་དུ་སློབ་གཉེར་གནང་མཁན་ཚོར་དབུས་བོད་མིའི་སྒྲིག་འཛུགས་ལ་དམིགས་བསལ་་འགན་འཁུར་ཡོད་དེ་རེད། ཁྱེད་ཀྱིས་བཤད་པའི་འགན་འཁུར་དེ་ནི་གཞུང་དམངས་དབར་གྱི་འབྲེལ་བའི་འགན་འཁུར་རེད། གནས་ཚུལ་གང་དང་ཅི་འདྲ་ཡིན་ཡང་དབྱེ་གཞིགས་བྱས་ནས་འབྲི་དགོས། ཆེད་བཟོས་བྲིས་པ་ཡིན་ན་ནི་ང་ལ་བཤད་རྟྱུ་ཅང་མེད།།
༡༽ སྤྱིར་ནས་ཐེངས་འདིར་གསར་འགོད་པས་སྐད་ཆ་འདྲི་ས་དེ་འཇམ་དཔལ་ཆོས་བཟང་ཆགས་ཡོད་མེད་གནད་དོན་གཞན་ཞིག་རེད། དེའི་ཁར་འཇམ་དཔལ་ཆོས་བཟང་ལགས་ཀྱིས་གཞུང་འབྲེལ་ཡིན་མིན་གྱི་ཐོག་ནས་འགན་འཁུར་མིན་གྱི་སྐད་ཆ་བཤད་པ་དེ་ཅུང་ཁྱད་མཚར་རེད། གལ་སྲིད་འགན་འཁུར་དགོས་པ་ཆགས་ནའང་ག་ཚོད་ཅིག་འཁུར་ཐུབ་མིན་སུས་ཀྱང་ཚོད་དཔག་ཐུབ་པ་ཞིག་རེད་འདོད། མདོ་དོན། བཙན་བྱོལ་བོད་མིའི་སྒྲིག་འཛུགས་དང་སྐུ་ཚབ་དོན་གཅོད་ཀྱི་འགན་ནི་བཙན་བྱོལ་བོད་མིའི་སྒྲིག་འཛུགས་ཀྱི་སྒྲིག་ཁོངས་སུ་ཕྱག་ལས་གནང་མཁན་ཁོ་ན་ག་ལ་ཡིན། བཙན་བྱོལ་བོད་མི་སྤྱི་དང་གཞིས་ལུས་བོད་མི་ཐམས་ཅད་ཡིན་དགོས་པ་རེད། གཞུང་འབྲེལ་མི་སྣ་ཡིན་མིན་ལ་མ་ལྟོས་པར་བཙན་བྱོལ་བོད་མི་ཚང་མས་གཞུང་འདི་རང་གི་གཞུང་དང་། དེ་ལ་ལོ་ལྟར་རང་རང་གི་ལས་གླ་དང་ཚོང་ཁེ། ཕོགས་ཐོབ་སོགས་ཀྱི་ཐད་ནས་དང་བླངས་དཔྱ་དངུལ་འབུལ་བཞིན་པ་རེད། གཞུང་གི་བཀའ་བཀོད་གང་ཡིན་ཡང་གཙུག་ཏུ་བཀུར་བཞིན་དེའི་འོག་ཤར་སྐ྄ོད་བ྄ེད་བཞིན་པ་རེད། དེ་བས་ན། བཀའ་མོལ་གསུང་དུས་བོད་མི་སྤྱིའི་སྐྱིད་སྡུག་གི་ཐད་སྙོབ་ཐུབ་པ་ཞིག་བྱུང་ན་ཡག་པོ་ཡོད་རེད་འདོད། བུ་མོ་དེ་དང་དེའི་ནང་མི་ལ་སེམས་གསོ་དང་། བོད་རིགས་གང་ན་ཇི་སྡོད་ཚང་མས་སླད་མར་རང་རང་ས་ནས་བདེ་འཇགས་ལ་གང་གཟབ་བྱ་དགོས་པའི་ལམ་སྟོན་རེ་གནང་ན་དགེ་ཕན་ཆེ་བ་མ་ཡིན་ནམ།
ཀོ་རི་ཡའི་གཞོན་སྐྱེས་ཚོས་ཨ་རིའི་སློབ་གྲྭ་ཁག་ནང་མེ་མདའ་སྐོར་བ་ཐེངས་དང་པོ་མ་རེད། ལོ་ཤས་གོང་ན་ཡང་བྱུང་བ་རེད། ཀོ་རི་ཡ་ནི་མ་གཞི་ནས་རང་སྲོག་གཅོད་མཁན་མང་ཤོས་ཀྱི་རྒྱལ་ཁབ་དེ་ཆགས་ཡོད་རབས་འདུག ལོ་ཤས་གོང་གཞོན་སྐྱེས་ལྔ་དྲུག་ཅིག་གིས་མཉམ་དུ་རང་སྲོག་བཅད་པའི་སྒྲུང་འཇིགས་ཡེར་བ་རེ་ཡང་བྱུང་ཡོད་པ་རེད།
ཡུལ་འདིར་དངོས་གནས་བཀའ་ཆོས་ཟབ་མོ་རེ་གསུང་རན་རེད།