སྦིར་གཞིས་ཆགས་སུ་གནས་སྡོད་གྲྭ་དཀོན་མཆོག་དོན་འགྲུབ་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། རྒྱ་ནག་གཞུང་གིས། འདི་ལོ་ཕྱི་ཟླ་ ༣ པའི་ཚེས་༨ ཉིན་གྱི་མཚན་མོར་རྒྱ་གཞུང་གིས་ཡུལ་ཤུལ་དགེ་རྒྱལ་རྫ་སྟོད་རྫོང་དགེ་རྒྱལ་རྫོགས་ཆེན་དགོན་པའི་མཁན་པོ་དགེ་བ་ལགས་གློ་བུར་འཛིན་བཟུང་བཙན་འཁྲིད་དང་། ཁོང་གི་གསར་འཛུགས་བྱས་པའི་རྨོངས་སེལ་འཛིན་གྲྭའི་དགེ་རྒན་གྲྭ་ཨ་བྷོ་དང་ཀརྨ་སྐྱབས། ཚེ་རིང་དོན་འགྲུབ། ཧྲག་པ་བཅས་མི་ ༡༣ བཙོན་འཇུག་བཀག་ཉར་བྱས་ཡོད་པ་ལྟར། ཟླ་སྔོན་མའི་ཕྱི་ཚེས་ ༢༥ ཉིན་གྱི་དགོང་དྲོའི་ཆུ་ཚོད་ ༡༠ ཡས་མས་སུ་དགེ་རྒན་རྣམས་ཀློད་གྲོལ་བཏང་ཡོད་ཀྱང་། མཁན་པོ་དགེ་བ་ལགས་ལ་རྒྱ་ནག་ནང་ཁུལ་གྱི་ཁྲིམས་ཁང་ཞིག་གིས་ནང་མི་དང་ཁྲིམས་རྩོད་པ་སོགས་ཅི་ཡང་མེད་པའི་ཐོག་ལོ་ ༢ ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། ཟླ་སྔོན་མའི་ནང་རྒྱ་གཞུང་གིས་གློ་བུར་དུ་མཁན་པོ་འཛིན་བཟུང་བཀག་ཉར་བྱས་ཡོད་ཀྱང་། ཉེ་ལམ་རྫ་སྟོད་རྫོང་ཉེན་རྟོག་པས་མཁན་པོའི་སྤུན་མཆེད་ཅིག་ཉེན་རྟོག་ལས་ཁུངས་སུ་སྐད་བཏང་སྟེ། སྐར་མ་ ༣ རིང་མཁན་པོ་དང་མཉམ་དུ་སྐད་ཆ་བཤད་པའི་གོ་སྐབས་སྤྲད་ཡོད་འདུག་ལ། སྐབས་དེར་མཁན་པོ་ལགས་ཀྱིས་ཁོང་ལ་རྒྱ་གཞུང་གིས་ལོ་ ༢ གྱི་བཙོན་འཇུག་ཁྲིམས་ཐག་བཅད་ཡོད་སྐོར་བརྗོད་ཡོད་པ་མ་ཟད། ཉེ་ལམ་འཛིན་བཟུང་བྱས་རྗེས་ཁོང་ལ་དཀའ་ངལ་ཆེན་པོ་འཕྲད་ཡོད་ཀྱང་། ད་ལྟ་ཁྲིམས་ཐག་བཅད་ཟིན་སྟབས་དམིགས་བསལ་དཀའ་ངལ་འཕྲད་ཀྱི་མེད་ཅེས་བརྗོད་ཡོད་པ་མ་ཟད། མ་འོངས་པར་ཁྱེད་ཅག་གིས་ ༼རྨོངས་སེལ་འཛིན་གྲྭ༽ བདག་པོ་བརྒྱབ་སྟེ། སློབ་མའི་སློབ་སྦྱོང་འཐུས་ཤོར་མི་འགྲོ་བར་བྱ་དགོས་པའི་སྐོར་སོགས་བརྗོད་ཡོད་འདུག ད་ལྟའི་ཆར་ཁྲིམས་ཐག་བཅད་པའི་གནས་ཚུལ་ཙམ་ལས་གང་དུ་བཙོན་འཇུག་བྱས་ཡོད་མེད་ཀྱི་གནས་ཚུལ་ཤེས་མེད་ཀྱང་། ནང་མི་ཚོས་ཁོང་རྒྱ་ནག་ནང་ཁུལ་དུ་བཙོན་འཇུག་བྱས་ཡོད་པའི་ཚོད་དཔག་བྱེད་ཀྱི་ཡོད་འདུག
མཁན་པོ་དགེ་བ་ལགས་ནི་ ༡༩༧༠ ལོར་མདོ་ཁམས་རྫ་སྟོད་གྲོང་སྡེ་རུ་ཕ་མཁོར་རྩའི་མཁས་རྒྱམ་དང་མ་པད་དཀར་གཉིས་ཀྱི་སྲས་སུ་འཁྲུངས་ཤིང་། ད་ལྟ་དགུང་གྲངས་ ༤༤ ཡིན་འདུག ཁོང་ལ་ནང་མི་གཞན་ག་ཚོད་ཡོད་གསལ་ཁ་མ་བྱུང་ཡང་། ཁོང་ནི་ཆུང་དུས་ནས་རྫ་སྟོད་དགེ་རྒྱལ་རྫོགས་ཆེན་དགོན་པར་རབ་ཏུ་བྱུང་ཞིང་། ཕྱིས་སུ་རྫོགས་ཆེན་ཤྲི་སེང་ཧའི་བཤད་གྲྭ་དང་། གསེར་རྟ་བླ་རུང་སྒར་སོགས་ཀྱི་ཆོས་གྲྭ་ཁག་ཏུ་ལོ་མང་རིང་བོད་ཀྱི་བཅུ་ཕྲག་རིག་གནས་སྤྱི་དང་། བྱེ་བྲག་ནང་དོན་རིག་པ་ལ་ཐོས་བསམ་སློབ་གཉེར་འཐིལ་ཕྱིན་གནང་ཡོད་པ་མ་ཟད། ༢༠༠༡ ལོར་རྒྱ་གར་ནང་ཕེབས་ཏེ་༧གོང་ས་མཆོག་གཙོས་པའི་བོད་པའི་བླ་ཆེན་རྣམ་པར་མཇལ་ཁ་ཞུས་ཡོད། ཕྱིར་བོད་ནང་ལོག་རྗེས་དགེ་རྒྱལ་རྫོགས་ཆེན་དགོན་གྱི་བཤད་གྲྭའི་མཁན་པོའི་ཕྱག་ལས་གནང་ཞོར་དུ་ས་གནས་ཞིང་འབྲོག་མང་ཚོགས་ཀྱི་ཡིག་རྨོངས་སེལ་ཆེད་དང་། ཕྱོགས་མཐའ་ཁག་ནས་སྤོས་པའི་བོད་རིགས་ལས་མེད་དང་གཞོན་སྐྱེས་མང་པོ་ཞིག་གིས་བག་མེད་ཀྱིས་མི་ཚེ་སྐྱེལ་སྟངས་བཅས་ལ་དམིགས་ཏེ། ༼ རྨོངས་སེལ་འཛིན་གྲྭ ༽ཞེས་པ་ཞིག་བཙུགས་ཏེ། བོད་ཀྱི་བརྡ་སྤྲོད་དང་ནང་ཆོས་ངོ་སྤྲོད། སྤྱི་ཚོགས་སློབ་གསོ། ཡ་རབས་སྤྱོད་བཟང་སོགས་ཀྱི་ཐད་སློབ་སྦྱོང་སྤྲད་ཡོད་ཀྱང་། འདི་ལོའི་ཕྱི་ཟླ་ ༢ པའི་ནང་རྒྱ་གཞུང་གིས་ཁོང་གི་ཟབ་སྦྱོང་འཛིན་གྲྭ་ཚོགས་མི་ཆོག་པའི་བཀའ་རྒྱ་བཏང་བ་དང་། སློབ་མ་དང་ས་གནས་བོད་མི་ཚོས་སྔ་ཕྱི་ཐེངས་གཉིས་ལ་ངོ་རྒོལ་སྐད་འབོད་བྱས་སྟབས། རྒྱ་གཞུང་གིས་མཁན་པོ་ཁོང་དང་དགེ་རྒན་བཅས་མི་ ༡༣ ལྷག་འཛིན་བཟུང་བྱས་ཡོད་པ་མ་ཟད། སློབ་གྲྭ་སྒོ་བརྒྱབས་པ་དང་ས་གནས་མི་མང་ལ་དམ་དྲག་ཤུགས་ཆེར་བྱས་ཡོད་ལ། འཛིན་བཟུང་གི་གནས་ཚུལ་དེར་རྐྱེན་བྱས་ཏེ་ཁོང་གི་སྲིང་མོ་འདས་གྲོངས་སུ་ཕྱིན་ཡོད་འདུག
མཁན་པོ་ཁོང་མྱི་ཡག་པོ་ཡོད། མཁས་པ་ཡིན། ཡིན་ན་ཡང་ཆོས་ཆོས་བཞིད་དུ་མ་བསྒྲུབ་ན་དེ་འདྲ་ཡོང་གི་རེད་དོ།
རྒྱ་ནག་གིས་དངོས་གནས་ཀྱི་ཁྲིམས་ཆད་མི་འབབ་ནའང་། མཁན་པོ་མཆོག་ལ་འོ་བརྒྱལ་བཟོས་སོང་། འོན་ཀྱང་དྲང་བདེན་གྱིས་སྐུ་ཉིད་ལ་ནམ་ཡང་བསླུ་བྲིད་གཏོང་གི་མ་རེད།
མཁན་པོ་ཁོང་གིས་ཕྱག་ལས་གནང་སྟངས་ནི་ངོ་མ་ཡི་རང་བྱ་འོས་པ་ཞིག་སྟེ་བོད་མི་རིགས་ཀྱི་བླ་སྲོག་སྐད་དང་ཡི་གེ་འདི་ཇི་སྲིད་གནས་པ་དེ་སྲིད་དུ་བོད་མི་རིགས་གསོན་པོར་ཡོད་ལ་གལ་སྲི་འདི་ཉིད་ཉམས་ཚེ་མེད་པ་ཆགས་རྒྱུ་ཉག་གཅིག་གི་གནས་ལུགས་དེ་གསལ་བོར་མཁྱེན་འདུག