ཁ་སང་ཉི་ཧོང་གྲོས་ཚོགས་ནང་ད་ལྟའི་བོིད་ནང་གི་ཛ་དྲག་གནས་སྟངས་ལ་དམིགས་ཏེ་གྲོས་ཆོད་དོན་ཚན་ ༥ ཅན་ཞིག་བཞག་འདུག་པ་དང་། བཀའ་ཁྲི་མཆོག་གིས་རྒྱལ་སྤྱིའི་སྟེང་བོད་དོན་ལ་རྒྱབ་སྐྱོར་གནང་བའི་འབོད་སྐུལ་ཞུས་ཡོད་པ་རེད།
ཉིན་འདིར་འགར་དབུས་བོད་མིའི་སྒྲིག་འཛུགས་བཀའ་བློན་ཁྲི་པ་བློ་བཟང་སེང་གེ་མཆོག་གིས་ཉི་ཧོང་དུ་གཟིགས་སྐོར་གནང་བཞིན་ཡོད་པ་ལྟར། ཁ་སང་ཕྱི་ཚེས་ ༤ ཉིན་བཀའ་ཁྲི་མཆོག་གིས་ཉི་ཧོང་གྲོས་ཚོགས་ནང་། ཉི་ཧོང་ཆབ་སྲིད་ཚོཊ་པ་ཁག་ ༥ ནས་ཕེབས་པའི་གྲོས་ཚོགས་འཐུས་མི་ ༦༠ དང༌སྐུ་ཚབ་ ༣༥ ཙམ་ལ། ད་ལྟའི་བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་གནང་འདུག སྐབས་དེར་ཉི་ཧོང་གྲོས་གྲོས་ཚོགས་འཐུས་མི་ཚོས་བོད་ནང་རང་ལུས་མེར་བསྲེགས་བཏང་བའི་རྒྱུ་རྐྱེན་གཙོ་བོ། རྒྱ་གཞུང་གིས་བོད་མིའི་ཐོག་དམ་བསྒྲགས་སྲིད་བྱུས་ལག་བསྟར་བྱས་པའི་རྐྱེན་གྱིས་ཡིན་སྟབས། ད་ཆར་རྒྱ་གཞུང་གིས་བོད་མིའི་ཐོག་འཛིན་པའི་དམ་བསྒྲགས་སྲིད་བྱུས་ལ་བསྐྱར་ཞིབ་བྱ་རྒྱུའི་དུས་ལ་བབས་ཡོད་སྐོར་དང་། བོད་མིའི་འགྲོ་བ་མིའི་ཐོབ་ཐང་ལ་བརྩི་བཀུར་ཐོག་འཆམ་མཐུན་སྤྱི་ཚོགས་བསྐྲུན་དགོས་སྐོར་གྲོས་བསྡུར་གནང་སྟེ། མཐར་བོད་དོན་ཐད་གྲོས་ཆོད་དོན་ཚན་ ༥ ཅན་ཞིག་བཞག་ཡོད་འདུག
གྲོས་ཆོད་ནང་འཁོད་དོན། གཅིག བོད་ནང་ ༢༠༡༡ ལོའི་ཟླ་ ༣ པ་ནས་རང་ལུས་མེར་བསྲེགས་གཏོང་མཁན་མང་དུ་འགྲོ་བཞིན་པའི་གནད་དོན་དེར་ང་ཚོས་སེམས་འཚབ་ཆེན་པོ་བྱེད་ཀྱི་ཡོད། བོད་མི་ཚོས་རང་ལུས་མེར་བསྲེགས་གཏོང་དགོས་པའི་རྒྱུ་རྐྱེན་གཙོ་བོ་ནི། བོད་མིའི་འགྲོ་བ་མིའི་ཐོབ་ཐང་ལ་རྒྱ་གཞུང་གིས་དམ་བསྒྲགས་བྱས་པའི་རྐྱེན་གྱིས་ཡིན་པ་དང་། རྒྱ་གཞུང་གིས་དམ་དྲན་ཅན་གྱི་སྲིད་བྱུས་དེར་བསྐྱར་ཞིབ་བྱ་རྒྱུར་ནན་སྐུལ་ཞུ་རྒྱུ་ཡིན།བོད་མིའི་གཞི་རྩའི་རང་དབང་དང༌།དགོན་སྡེ་ཁག་གི་ནང་དམག་དཔུང་འབོར་ཆེན་འགྲེམས་འཇོག་གིས་རྒྱལ་གཅེས་ཆོས་གཅེས་ལས་འགུལ་སྤེལ་བཞིན་པ་དེར་བསྐྱར་ཞིབ་དགོས་རྒྱུ།
གཉིས། རྒྱ་གཞུང་གིས་ད་བར་བོད་མི་རང་ལུས་མེར་བསྲེགས་གཏོང་མཁན་དགེ་འདུན་པ་དང༌མི་སྐྱ་འཛིན་བཟུང་བྱས་པ་རྣམས་ཀྱི་དངོས་ཡོད་གནས་སྟངས་གང་འདྲ་ཆགས་ཡོད་མེད་གསལ་པོ་བཟོ་དགོས། གསུམ། རྒྱ་གཞུང་གིས་ ༢༠༠༨ ལོར་བོད་ནང་ཞི་རྒོལ་བྱུང་རྗེས་གསར་འགོད་པ་དང༌།ཕྱི་རྒྱལ་མི་སྣ་བོད་ནང་བསྐྱོད་རྒྱུར་བཀག་འགོག་བྱེད་བཞིན་པ་དེར་ངོ་རྒོལ་བྱེད་ཀྱི་ཡོད་ལ། ད་དུང་ཡང་བོད་ནང་དུ་གསར་འགོད་པ་རྣམས་རང་དབང་ཐོག་བསྐྱོད་ཆོག་རྒྱུའི་ནན་སྐུལ་ཞུ་རྒྱུ་ཡིན།
བཞི། རྒྱ་གཞུང་གིས་བཙན་བྱོལ་བོད་གཞུང་དང་ཐད་ཀར་འབྲེལ་ལམ་སྐྱར་གསོ་གནང་སྟེ། དོན་ཕན་ལྡན་པའི་འབྲེལ་མོལ་གང་མགྱོགས་མགོ་འཛུགས་གནང་རྒྱུར་འབད་བརྩོན་བྱ་དགོས། ལྔ། རྒྱ་གཞུང་གིས་བོད་ནང་རྒྱལ་སྤྱིའི་ཆོས་དད་རང་དབང་དང་འགྲོ་བ་མིའི་ཐོབ་ཐང་དམིགས་བསལ་རྟོག་ཞིབ་མི་སྣ་གཟིགས་སྐོར་དུ་ཡོང་འཇུག་དགོས་པ་དང་། བོད་མིའི་འགྲོ་བ་མིའི་ཐོབ་ཐང་ཐོག་དམ་བསྒྲགས་བྱ་རྒྱུ་འཕྲལ་དུ་མཚམ་འཇོག་བྱ་དགོས་ཞེས་འཁོད་འདུག
ཕྱི་ཚེས་༣ཉིན་ཉི་ཧོང་( Japan Institute for National Fundamentals ) ཞེས་པའི་གོ་སྒྲིག་འོག བཀའ་ཁྲི་མཆོག་གིས་༼ཨེ་ཤ་ཡའི་རང་དབང་དང་མང་གཙོ་ཐོག་ཉི་ཧོང་གིས་གང་བྱེད་ཐུབ་བམ༽ཅེས་པའི་བརྗོད་གཞིའི་ཐོག་བགྲོ་གླེང་ཚོགས་འདུ་ཞིག་ཚོགས་ཡོད་ལ། བགྲོ་གླེང་ཚོགས་འདུ་དེར་ཉི་ཧོང་སྲིད་བློན་ཟུར་པ་དང༌མཁས་དབང་། རྩོམ་པ་པོ།ཤེས་ཡོན་ཅན་སོགས་ཁྱོིན་མི་ ༥༠༠ ལྷག་མཉམ་ཞུགས་གནང་འདུག
ཚོགས་འདུའི་སྟེང་བཀའ་ཁྲི་བློ་བཟང་སེང་གེ་མཆོག་གིས་བཙན་བྱོལ་བོད་མིའི་མང་གཙོའི་འཕེལ་རིམ་དང་། ད་ལྟའི་བོད་ནང་གི་ཛ་དྲག་གནས་སྟངས་སོགས་ངོ་སྤྲོད་གནང་རྗེས། བོད་ནང་རང་ལུས་མེར་བསྲེགས་གཏོང་བཞིན་པའི་གནད་དོན་ཐོག་གསུངས་དོན། “ རྒྱ་གཞུང་གིས་བོད་ནང་ཧ་ལས་པའི་དྲག་གནོན་བྱེད་ཀྱི་ཡོད་སྟབས། བོད་མི་ཚོས་དྲག་གནོན་ལ་མ་བཟོད་པར་ངོ་རྒོལ་མུ་མཐུད་ནས་བྱེད་ཀྱི་ཡོད། ད་བར་བོད་མི་ ༣༣གྱིས་རང་ལུས་མེར་བསྲེཊ་བཏང་སྟེ་རྒྱ་གཞུང་གི་དམ་བསྒྲགས་སྲིད་བྱུས་ལ་ངོ་རྒོལ་བྱས་ཡོད། ང་ཚོ་ཚང་མ་འགྲོ་བ་མི་ཞིག་ཡིན་པའི་ཆ་ནས་མི་ཚང་མས་རང་གི་ཚེ་སྲོག་ལ་གཅེས་འཛིན་བྱེད་ཀྱི་རེད། མི་སུ་འདྲ་ཞིག་ཡིན་རུང་ཤི་ན་འདོད་མཁན་གཅིག་ཀྱང་ཡོད་པ་མ་རེད། བོད་ནང་གནས་ཚུལ་དེ་དག་ག་རེ་བྱས་ཏེ་ཡོང་གི་ཡོད་པ་རེད་ཟེར་ན། རྒྱ་གཞུང་གི་གདུག་རྩུབ་ཀྱི་སྲིད་བྱུས་དེའི་འོག་བོད་མི་ཚོས་འུ་ཐུག་ཐབས་ཟད་ཀྱིས་བོད་ནང་གི་དངོས་ཡོད་གནས་ཚུལ་རྣམས། འཛམ་གླིང་མི་དམངས་ལ་ཤེས་རྟོགས་ཡོང་ཆེད་བྱ་སྤྱོད་འདིའི་རིགས་སྤེལ་གྱི་ཡོད ” ཅེས་གསུངས་འདུག
བཀའ་ཁྲི་མཆོག་གིས་མུ་མཐུད་དུ་སྔོན་མ་དཀྱིལ་ཤར་ཡུལ་གྲུ་ཊོ་ནེ་ཤི་ཡའི་ནང་གཞོན་སྐྱེས་ཤིག་གིས་རང་ལུས་མེར་བསྲེགས་གཏོང་སྐབས། རྒྱལ་སྤྱིའི་སྟེང་ཁོང་གི་ལས་འགུལ་དེར་གདུང་སེམས་མཉམ་སྐྱེད་ཀྱིས་རྒྱབ་སྐྱོར་ཆེན་པོ་གནང་ཡོད་ཀྱང་། བོད་མིའི་རང་ལུས་མེར་བསྲེགས་ཀྱི་ལས་འགུལ་ལ་རྒྱལ་སྤྱིའི་སྟེང་དོ་སྣང་དེ་ཙམ་བྱེད་ཀྱི་མེད་སྐོར་དང་། བོད་མི་ ༣༣ ཙམ་གྱིས་རང་ལུས་མེར་བསྲེགས་གཏོང་དགོས་དོན་ནི། ༸གོང་ས་མཆོག་བོད་ལ་གདན་འདྲེན་ཞུ་རྒྱུ་དང་བོད་ལ་རང་དབང་འཐོབ་ཆེད་དུ་ཡིན་པ། ཁོང་ཐེངས་འདིར་ཉི་ཧོང་དུ་ཡོང་དོན་ནི་ཁོང་ཚོའི་རེ་འདུན་དེ་ཉི་ཧོང་མང་ཚོགས་དང་། རྒྱལ་སྤྱིའི་སྤྱི་ཚོགས་ཐོག་འབོད་སྐུལ་ཞུ་རུ་ཡོང་བ་ཡིན་སྐོར་གསུངས་འདུག
ཚོགས་འདུའི་མཇུག་ཏུ་བཀའ་ཁྲི་མཆོག་གིས་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་ཀྱི་ངོ་བོ་དང་། བོད་རྒྱ་འབྲེལ་མོལ་གྱི་གྲུབ་འབྲས་དང་ད་ལྟའི་གནས་སྟངས། ༸རྒྱལ་བའི་ཡང་སྲིད་ཕེབས་ཕྱོགས་བཅས་ཀྱི་ཐད་རྒྱལ་སྤྱིའི་གསར་འགོད་པའི་དྲི་བར་ལན་འདེབས་ཀྱང་གནང་ཡོད་པ་རེད།
གཟའ་ཟླ་བའི་ཉིན་རྒྱ་ནག་ཕྱི་འབྲེལ་མགྲིན་ཚབ་པས་ཉི་ཧོང་གཞུང་གིས་བཀའ་ཁྲི་མཆོག་ཉི་ཧོང་ནང་ཕེབས་བཅུག་པར་ངོ་རྒོལ་ཡོད་སྐོར་དང་། བཀའ་ཁྲི་མཆོག་ལ་ཉི་ཧོང་ནང་ཆབ་སྲིད་ཀྱི་བྱེད་སྒོ་སྤེལ་མི་འཇུག་པར། ཁ་ཡོད་ལག་ཡོད་ཀྱི་ཐོག་ནས་རྒྱལ་ཁབ་གཉིས་ཀྱི་འབྲེལ་བ་སྲུང་སྐྱོབ་བྱ་དགོས་པའི་རེ་སྐུལ་བཏོན་ཡོད་འདུག
གསར་འགོད་པ། དཔལ་ལྡན།
ཧ་ཧ་་ཧ་་། ཀླུ་སྨྱོན་གྱིས་ཚིག་འདི་ངོ་མ་གོ་བ་ཞིག་ཡོད་ལེ་ད།།།
གྲོས་ཆོད་ལག་ལེན་འཁེལ་ན་ཕན་ཡོད་ཡིན། །གྲོས་ཆོད་ལག་ལེན་མེད་ན་ཕན་མེད། །ལོ་ངོ་ལྔ་བཅུའི་རིང་གི་གྲོས་ཆོད་ལ། །ཕན་ཐོག་ཡོད་མེད་ཅི་རིགས་བྱུང་བ་གསལ། ཀླུ་སྨྱོན་སྨྱོ་བའི་གཏམ་གྱི་ཟློས་གར་ལའང་། །ཕན་དང་གནོད་པའི་ཁ་ཕྱོགས་གཉིས་ཀ་ཡོད།། །།
སྲིད་སྐྱོང་མཆོག་གི་མཛད་རྗེས་ལ་མངོན་པར་བསྟོད་དོ།
བཀའ་ཁྲི་མཆོག་གི་མཛད་རྗེས་ལ་བརྟེན་འབྲེལ་ཞུ། རྒྱལ་ཁའི་འོད་སྣང་དེ་རྟག་ཏུ་འབར་བའི་རེ་སྨོན་ཡོད།
བཀའ་དྲིན་ཆེའོ། ཉི་ཧོང་གྲོས་ཚོགས་ལགས། བཀྲ་ཤིས་པའི་སྨོན་འདུན་བཅས།
གཟི་བརྗིད་ཀྱི་འཚམས་གཟིགས། ཕྱི་འབྲེལ་གྱི་རྒྱལ་ཁ། གངས་རྗེ་བློ་སེང་སྐུ་ཚེ་བརྟན་པར་ཤོག གངས་རིའི་ལྗོངས་སུ་རང་དབང་འདྲེན་པར་ཤོག ད་ལྟའི་བར་ཉི་ཧོང་ནང་འདི་འདྲའི་གྲུབ་འབྲས་ལྡན་པའི་བོད་དོན་གྲོས་ཆོད་ཅིག་བྱུང་མྱོང་ངམ།
གྲོས་ཆོད་ཟེར་བ་ཤོག་སྐྱ་རླུང་ཁུར་རེད། །
ཕན་མེད་གནོད་མེད་ཉི་མ་འཁྱོལ་ཐབས་རེད། །
ལོ་ངོ་ལྔ་བཅུའི་རིང་གི་གྲོས་ཆོད་དག །
བསྡོམས་ན་སྟོང་ཁར་ལོངས་ཀྱང་སྟོང་པ་རེད། །
བཀའ་ཁྲིས་འཇོན་གྱི་ཡོད་རུང་།།
རྒྱ་ནག་མཁྲེགས་པོ་ལྕགས་རེད།།
ལྕགས་ནག་གཅོད་བྱེད་རྣོ་རེད།།
རྣོ་དེ་གྲོས་ཆོད་ཡིན་ནམ།།
རྒྱ་ནག་གི་གནོན་ཤུགས་ལ་མ་ལྟོས་པརཉི་ཧོང་གི་གྲོས་ཚོགས་ནང་བོད་དོན་གྱི་གྲོས་ཆོད་ལྔ་བཞག་པར་ཐུགས་རྗེ་ཆེ་ཞུ། ཡིན་ཡང་ཆབ་སྲིད་ཀྱི་གཟུགས་བརྙན་ཙམ་ཞིག་དང་ཤོག་ཐོག་ལ་བཀོད་པ་ཙམ་མ་ཡིན་པ་ཁ་ཞེ་གཉིས་མེད་ཀྱིས་བདེན་པའི་རྒྱབ་ལངས་ཡོང་བར་ངེད་བོད་མི་ས་ཡ་དྲུག་གིས་མིག་འབུར་གྱིན་ལྟ། རྣ་བ་བླགས་ཏེ་ཉན་ནས་བསྡད་ཡོད་པས་གྲོས་ཆོད་དོན་འཁྱོང་ཡོང་བའི་རེ་སྐུལ་ནན་གྱི་ཕུལ་ལོ།།
བཀུར་འོས་བཀའ་ཁྲི་མཆོག་ལ་འཚམས་འདྲི་དང་བཅས་སྐུ་ཉིད་བོད་ཀྱི་བདེན་མཐའ་གསལ་སླད་ཡུལ་གྲུ་གང་སར་སྐོར་བསྐྱོད་ལ་ཕེབས་གནང་བར་དགའ་བསུ་ཞུ། ཡིན་ནའང་འདི་ལྟ་བུའི་རྒྱལ་ཁབ་སོ་སོའི་ནང་གཞུང་འབྲེལ་དང་དེ་མིནགྱི་གནས་ཡོད་མི་སྣ་མཇལ་འཕྲད་ཀྱི་གོ་སྐབས་དང་དོ་སྣང་རྟག་པར་ཡོང་དཀའ་བས་སྐུ་ངལ་དང་ལེན་གྱིས་དང་པོ་ཉིད་ནས་འཆར་གཞི་དང་ལྡན་པའི་རང་གི་ཚོར་དང་འབྲེལ་ནས་བོད་དོན་ངོ་སྤྲོད་དང་དེ་ལ་རྒྱབ་སྐྱོར་འཚོལ་ཐབས་གནང་རྒྱུ་ཤིན་ཏུ་གལ་ཆེ་བ་དང་། འདྲ་ཆགས་པོ་ཞིག་གི་སྐོར་བསྐྱོད་བར་གྱུར་ན་ཉེན་ཁའི་རང་བཞིན་ཞིག་གི་དུས་ལ་སླེབས་པ་མཁྱེན་དགོས། མདོར་ན་བོད་རྒྱ་ཆེའི་མི་མང་གི་ད་ལྟའི་བདེ་སྡུག་དང་མ་འོངས་པའི་མདུན་ལམ་སྲོག་དང་བཅས་པ་སྐུ་ཉིད་དང་ཐད་ཀར་འབྲེལ་བ་ཡོད་པས་ཐུགས་གཟབ་གནང་རོགས་ཞེས་གསོལ་བ་ཕུར་ཚུགས་སུ་འདེབ་བཞིན་ཡོད།།།།
གྲོས་ཆོད་ཁག་ལྔ་བཞག་པ་མ་རེད། དོན་ཚན་ལྔ་ཅན་གྱི་གྲོས་ཆོད་གཅིག་བཞག་པ་རེད།