ཕྱི་ཚེས་ ༦ ཉིན་རྒྱ་གཞུང་འབྲེལ་ཡོད་སྡེ་ཁག་གི་བཀོད་མངག་འོག རྒྱ་ནང་གི་དམར་ཤོག་དྲ་རྒྱ་གཉིས་སྒོ་རྒྱག་བཅུགས་འདུག
ཟླ་འདིའི་ཕྱི་ཚེས་ ༦ ཉིན་རྒྱ་གཞུང་གསར་འགྱུར་གཞུང་ལས་ཁུངས་དང་། པེ་ཅིན་གྲོང་ཁྱེར་དྲ་རྒྱ་དོ་དམ་ཁང་། པེ་ཅིན་ཉེན་རྟོག་ཁང་དྲ་རྒྱ་བདེ་འཇགས་སྡེ་ཁག་གསུམ་གྱིས་མཉམ་འབྲེལ་བཀོད་མངག་འོག རྒྱ་ནང་གི་དམར་ཤོག་མཁྲེགས་འཛིན་པའི་དྲ་རྒྱ་༼ཝུ་ཡུག་ཌི་ཞཱང་༽དང་༼མའོ་ཡི་དར་ཆ༽ཞེས་པ་གཉིས་སྒོ་རྒྱག་བཅུགས་ཡོད་པ་དང་། དྲ་རྒྱ་སྒོ་རྒྱག་དགོས་དོན་ནི་རྒྱལ་ཁབ་ཀྱི་བཅའ་ཁྲིམས་ལ་རྒྱབ་འགལ་དང་། རྒྱལ་ཁབ་ཀྱི་མགོ་ཁྲིད་མི་སྣར་གནོད་འཚེ་བཟོས་པ་ཡིན་སྐོར་བརྗོད་ཡོད་འདུག
དམར་ཤོག་དྲ་རྒྱ་ཝུ་ཡུག་ཌི་ཞཱང་གིས་སྤྱི་བསྒྲགས་ཤིག་སྤེལ་བའི་ནང་། གོང་གསལ་རྒྱ་གཞུང་སྡེ་ཁག་གསུམ་གྱིས་མཉམ་འབྲེལ་ཐོག་ཁོ་ཚོའི་དྲ་རྒྱའི་འགན་ལེན་པ་འབོད་འགུགས་ཀྱིས་གླེང་མོལ་བྱས་ཏེ། ཝུ་ཡུག་ཌི་ཞཱང་དྲ་རྒྱས་རྒྱལ་ཁབ་ཀྱི་རྩ་ཁྲིམས་ལ་རྒྱབ་འགལ་དང་། རྒྱལ་ཁབ་ཀྱི་མགོ་ཁྲིད་མི་སྣར་མ་རུངས་ཁོག་བཅུག་གི་གནོད་འཚེ་བཟོས་པ། སྐབས་བརྒྱད་པའི་ཚོགས་ཆེན་དང་འབྲེལ་བའི་ཧམ་བཤད་སྣ་ཚོགས་ཁྱབ་སྤེལ་བྱས་ཡོད་པར་བརྗོད་དེ། གོང་གསལ་སྡེ་ཁག་གསུམ་གྱིས་མཉམ་འབྲེལ་ལག་བསྟར་བྱས་དོན་ལྟར། ༢༠༡༢ ཟླ་ ༤ ཚེས་ ༦ ཆུ་ཚོད་ ༡༢ ནས་བཟུང་སྟེ་འབྱུང་འགྱུར་ཟླ་གཅིག་རིང་དྲ་རྒྱ་སྒོ་རྒྱག་དགོས་པའི་བཀའ་བཏང་སྟེ། དུས་ཡུན་དེའི་རིང་དྲ་རྒྱར་ཞིབ་བཤེར་དག་ཐེར་བྱས་རྗེས། ལྟ་རྟོག་ནན་མོ་བརྒྱུད་བསྐྱར་དུ་སྒོ་ཕྱེ་ཆོག་པ་བརྗོད་ཡོད་པ་དང་། སྐབས་དེར་ཁོ་ཚོའི་དྲ་རྒྱའི་འགན་ལེན་པས་བཅའ་ཁྲིམས་དང་རྒྱབ་འགལ་གྱི་བརྗོད་གཞི་ཁག་མིང་འདོན་གནང་རྒྱུའི་རེ་སྐུལ་བྱས་པར། བརྗོད་གཞི་བྱེ་བྲག་པ་གང་ཡང་འདོན་རྒྱུ་མེད་པར་གྱུར་ཡོད་ཀྱང་། མཇུག་མཐར་བཙན་དབང་གི་སྒོ་ནས་གླེང་མོལ་གྱི་མཚམས་འཇོག་བྱེད་བཅུག་པའི་སྐོར་བཀོད་འདུག
རྒྱ་ནག་ཁྲུང་ཆིན་གྲོང་ཁྱེར་དམར་ཤོག་དྲུང་ཆེ་པའོ་ཞིས་ལའེ་ཡི་གོ་གནས་ཕབ་རྗེས། རྒྱ་ནག་ནང་འདས་པའི་ལོ་ ༢༠ ནང་ཆེས་ཉེན་ཚབ་ཆེ་བའི་ཆབ་སྲིད་རྙོག་ཟིང་བྱུང་ཡོད་པ་རེད། དེ་སྔོན་པའོ་ཞིས་ལའེ་ཡིས་དམར་ཤོག་དྲིལ་སྒྲོག་བྱ་འགུལ་སྤེལ་བའི་སྐབས་སུ། ཝུ་ཡུག་ཌི་ཞཱང་སོགས་དམར་ཤོག་གཡོན་ལྷུང་པའི་དྲ་རྒྱ་དག་གིས་རྒྱབ་སྐྱོར་རོགས་འདེགས་བྱས་ཡོད་པ་རེད། ཕྱི་ཟླ་ ༣ པའི་ནང་པའོ་ཞིས་ལའེ་ལས་གནས་ནས་ཕབ་མ་ཐག ཝུ་ཡུག་ཌི་ཞཱང་དྲ་རྒྱ་ཡང་ཉིན་འགའི་རིང་སྒོ་འབྱེད་མི་ཐུབ་པ་ཆགས་ཡོད་པ་དང་། རྗེས་སུ་ཁྲུང་ཆིན་དང་འབྲེལ་བའི་གནས་ཚུལ་ཁག་ཅིག་བསུབ་རྗེས་བསྐྱར་དུ་སྒོ་ཕྱེ་ཡོད་པ་རེད།
ཉེ་བའི་ཟླ་འགའི་ནང་དམར་ཤོག་དཔོན་རིགས་ནང་ཁུལ་གྱི་རང་དབང་ཤོག་ཁག་གིས། རྒྱ་ནག་གི་དཔལ་འབྱོར་ལམ་ལུགས་བཅོས་སྒྱུར་བྱེད་དགོས་པའི་ཐད་སྔར་ལས་ལྷག་པར་ཤུགས་སྣོན་རྒྱག་བཞིན་པ་དེར། ཝུ་ཡུག་ཌི་ཞཱང་གཙོས་དམར་ཤོག་མཁྲེགས་འཛིན་པའི་དྲ་རྒྱ་དག་གིས་ཆེད་དུ་ཁ་གཏད་ངོ་རྒོལ་གྱི་གླེང་གཞི་སྐྲུན་ཡོད་པ་རེད། ཨུ་ཡུག་ཌི་ཞཱང་དྲ་རྒྱའི་སྤྱི་ཁྱབ་པ་ཧྥན་ཅིན་ཀཱང་གིས་གསར་ལམ་ཁག་ཏུ། “ཁོ་པས་བསམ་ན། འདི་ནི་གནས་འཕྲིན་དྲ་རྒྱར་བཀག་སྡོམ་ནན་མོ་བྱེད་བཞིན་པ་དང་། ཝུ་ཡུག་ཌི་ཞཱང་དྲ་རྒྱ་ནི་དམར་ཤོག་པའི་དྲ་རྒྱ་ཡིན་པའི་ངོ་བོའི་ཐོག་ནས་རེད།” ཅེས་བརྗོད་འདུག
ཝུ་ཡུག་ཌི་ཞཱང་དྲ་རྒྱ་ནི་རྒྱ་ནག་དམར་ཤོག་གཡོན་ལྷུང་པའི་ཆབ་སྲིད་ལྟ་བ་དང་མའོ་ཡི་བསམ་བློ་ལངས་ཕྱོགས་བཟུང་སྟེ། རྒྱ་ནག་གི་ཆབ་སྲིད་དཔལ་འབྱོར་ཐད་གླེང་ཕྱོགས་སྤེལ་མཁན་གྱི་དྲ་རྒྱ་ཞིག་ཡིན་ལ། ༢༠༠༣ ལོར་པེ་ཅིན་ཝུ་ཡུག་ཌི་ཞཱང་རིག་གནས་བརྒྱུད་སྒྲོག་ལས་ཁུངས་ཀྱི་སྟངས་འཛིན་འོག ཧྥན་ཡུན་ཀཱང་དང་ཁྲའོ་ཏིག་ཆཱང་སོགས་ཀྱིས་གསར་འཛུགས་བྱས་ཡོད་པ་རེད།
ཝུ་ཡུག་ཌི་ཞཱང་དྲ་རྒྱས་རྒྱ་ནང་གི་གནས་འཕྲིན་དྲ་རྒྱ་ཆེ་ཤོས་ཞིན་ལིང་ཝེ་པའོ་ཐོག་ཟིན་བྲིས་ཤིག་བཟོས་ཏེ། ཁོ་ཚོའི་དྲ་རྒྱར་དོ་སྣང་ཅན་ཚོས་དེར་ལྟ་དགོས་པའི་འབོད་སྐུལ་བྱས་འདུག
གསར་འགོད་པ། ཚེ་རིང་རྒྱལ།
༢༧༽ ཀརྡོ་གཉེར་ཕྱག་པ་ནས།
སྤྱི་ལོ་ ༢༠༡༢ ཟླ་ ༤ ཚེས་ ༨ གི་ཆུ་ཚོད་ ༧ སྐར་མ་ ༣༡
ཆེས་གཟབ་དགོས། ཞིས་ཅི་ཕིན།
ཆེས་ཡར་རྒྱས། རྒྱ་ནག་མི་རིགས།
ཆེས་དྭངས་གཙང་། བོད་རིགས་ཆོལ་གསུམ།
ཆེས་དགོས་ཡ། རྒྱ་བོད་མཐུན་སྒྲིལ། །
ད་ཡིན་ན་དམར་ཤོག་གིས་དམར་ཤོག་བརླག་བཞིན་འདུག ད་དུང་ལྟད་མོ་ཡོད
ད་འདིའི་རིགས་གཅིག་རྗེས་གཉིས་མཐུད་རེད ཨ་གནམ་རྒན་མ། ཅིག་ལ་ཉི་མ་ཤར་གོ་ནི་མིན་ན་ནནནནནནནན
༼རྡོ་ཡི་རྟ་ཡིས་རྟ་རྣམས་གསོད་བྱེད་ཅིང་།།གསེར་གྱི་ཤིང་རྟས་ཤིང་རྟ་འཇོམས་པར་བྱེད།།༽དམར་པོ་རྣམས་ཀྱིས་དམར་པོ་རླག་པར་བྱེད།།
དགོས་པའི་གཏམ་དེ་གོ་ནས་བྱུང་། །ང་ཚོ་སྐྱིད་འགོ་ཚུགས་ནས་བདའ། །གངས་ལྗོངས་དབུ་འཕངས་ཇི་མཐོ་རེད། །དམར་ཤོག་ལས་དབང་མར་འགྲིབ་རེད། །དུས་ད་རིང་དགའ་བའི་གླུ་ཆུང་ལེན། །དུས་ད་རིང་སྐྱིད་པའི་ཞབས་བྲོ་འཁྲབ། །ང་གངས་ཕྲུག་སེམས་པ་ཡར་སྐྱིད་རེད། །རྒྱ་དམར་པོའི་སེམས་པ་ཇི་སྡུག་རེད། །