རྒྱ་གར་ལྷོ་ཕྱོགས་སེར་བྱེས་གྲྭ་ཚང་གི་གྲྭ་འགྱུར་མེད་དབང་རྒྱལ་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཟླ་འདིའི་ཕྱི་ཚེས་ ༢ ཉིན་རྒྱ་གཞུང་གིས་ཁམས་དཀར་མཛེས་བོད་རིགས་རང་སྐྱོང་ཁུལ་དཀར་མཛེས་རྫོང་རོང་པ་ཚ་གྲོང་རྡལ་དུ་ཡོད་པའི་ ༼མཁའ་འབྲོག་བྱམས་བརྩེ་རོགས་བརྟེན་སློབ་གྲྭ ༽ ཞེས་པའི་སྒེར་གཉེར་སློབ་གྲྭ་ཞིག་བཙན་གྱིས་སྒོ་རྒྱག་ཏུ་བཅུག་ཡོད་པ་མ་ཟད། རང་ལོ་ ༥༡ ཡིན་པའི་སློབ་གྲྭ་དེའི་འགན་འཛིན་དང་དགེ་རྒན་གཅིག་ལྕོགས་སྙན་གྲགས་ལགས་དང་། རང་ལོ་ ༣༦ ཡིན་པའི་དགེ་རྒན་ཡ་མ་ཚེ་རིང་ལགས་གཉིས་འཛིན་བཟུང་བཀག་ཉར་བྱས་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། ཐེངས་འདིར་རྒྱ་གཞུང་གིས་འཛིན་བཟུང་བྱས་པའི་དགེ་རྒན་ཡ་མ་ཚེ་རིང་ལགས་ནི། ༡༩༩༢ ལོར་རྒྱ་གར་ལ་ཡོང་སྟེ་ལྷོ་ཕྱོགས་སེར་བྱེས་མཁས་སྙན་གྲྭ་ཚང་དུ་ལོ་ ༥རིང་སློབ་གཉེར་གནང་རྗེས། སུ་ཇཱ་བོད་ཁྱིམ་དུ་འཛུལ་ཏེ་སྐད་ཡིག་འཛིན་གྲྭའི་གནང་སློབ་སྦྱོང་བྱས་ཡོད་འདུག་ལ། ༢༠༠༢ ལོ་ཡས་མས་སུ་ཕྱིར་བོད་ནང་ལོག་ཏེ་དང་བླངས་ཐོག་ ༼མཁའ་འབྲོག་བྱམས་བརྩེ་རོགས་བརྟེན་སློབ་གྲྭ ༽ སློབ་གྲྭའི་དབྱིན་ཡིག་དགེ་རྒན་གྱི་འགན་བཞེས་ཡོད་པ་མ་ཟད། ཕྱི་རྒྱལ་གྱི་གྲོགས་པོ་དང་འབྲེལ་བ་བྱས་ཏེ་སློབ་གྲྭའི་འཛིན་ཁང་དང་ཉལ་ཁང་། ལས་ཤག སློབ་ཕྲུག་ཚོར་ཟས་གོས་དང་སློབ་སྦྱོང་ཡོ་བྱད་སོགས་ཀྱི་མཐུན་རྐྱེན་བསྐྲུན་ཐབས་བྱས་ཏེ་སློབ་གྲྭ་རྒྱ་བསྐྱེད་བཏང་ཡོད་འདུག
ཉེ་ཆར་ཁོང་གཉིས་འཛིན་བཟུང་བྱས་རྗེས་ནང་མི་རྣམས་དཀར་མཛེས་རྫོང་གི་བཙོན་ཞིག་ཏུ་བཅར་ཏེ་བརྩད་གཅོད་
བྱས་སྐབས་ཉེན་རྟོག་པས་ཆབ་སྲིད་ནག་ཉེས་ཡོད་ཚུལ་བཤད་ཡོད་པ་ལས། གང་དུ་བཀག་ཉར་བྱས་ཡོད་མེད་དང་འཛིན་བཟུང་བྱེད་དགོས་དོན་ཅི་ཡིན་གསལ་བཤད་བྱས་མེད་ཀྱང་། ས་གནས་བོད་མི་ཚོས་ཉེ་ཆར་ས་གནས་ཉེན་རྟོག་པས་ཁོང་གཉིས་ཀྱི་ནང་མིར་འདྲི་གཅོད་དང་། ས་གནས་མི་མང་ལ་སློབ་གྲྭ་སྒོ་རྒྱག་དགོས་པ། མ་འོངས་པར་ལོ་བདུན་ཡན་གྱི་ཕྲུ་གུ་སློབ་གྲྭ་གཏོང་དགོས་བྱུང་ཚེ་ཤང་གི་སློབ་གྲྭར་གཏོང་དགོས་པའི་བཀའ་རྒྱ་རིམ་པ་བཏང་བ་སོགས་ལས། འགན་འཛིན་སྙན་གྲགས་ལགས་དང་དགེ་རྒན་ཡ་མ་ཚེ་རིང་གཉིས་འཛིན་བཟུང་བྱེད་དོན་གཙོ་བོ། ཁོང་གཉིས་ཀྱིས་ད་བར་ས་གནས་སློབ་མ་ཚོར་བོད་སྐད་དང་བོད་ཡིག་སློབ་ཁྲིད་བྱས་ཏེ། བོད་མི་རིགས་ཀྱི་རིག་གཞུང་མི་ཉམས་རྒྱུན་འཛིན་ཐད་ཕྱག་ལས་གནང་ཡོད་བའི་དབང་གིས་འཛིན་བཟུང་བྱས་ཡོད་པར་ངོས་འཛིན་བྱེད་ཀྱི་ཡོད་འདུག
མཁའ་འབྲོག་བྱམས་བརྩེ་རོགས་བརྟེན་སློབ་གྲྭ་ནི། ༡༩༨༩ ལོར་དཀར་མཛེས་རྫོང་ས་གནས་སྲིད་གཞུང་གི་ཆོག་མཆན་འོག་གསར་འཛུགས་གནང་བའི་སྒེར་གཉེར་སློབ་གྲྭ་ཞིག་ཡིན་པ་དང་། ད་བར་ས་གནས་སློབ་མ་ཚོར་བོད་ཡིག་དང་དབྱིན་ཡིག རྒྱ་ཡིག ཕ་སྐད་གཙང་མ་བཅས་གཙོར་བཟུང་གིས་སློབ་ཁྲིད་བྱས་ཡོད་འདུག་ལ། ཉེ་ཆར་སློབ་མ་ ༣༠ དང་དགེ་རྒན་ ༧ བཅས་དགེ་སློབ་ ༤༠ ཙམ་ཡོད་འདུག
ད་ཡིན་ན་ང་རང་ཚོ་ལ་དངོས་གནས་འདུག་བཅུགས་ས་མ་རེད།རྒྱ་འདྲེ་ཁོ་ཚང་ ང་ཚོ་ལ་གྱོང་ཁ་ཆེན་པོ་ཧ་ལས་པ་རེད་། འགྱོགས་མྱུར་དུ་དགེ་ལ་ཁོང་རྣམས་པ་གཉིས་ཀྱིས་བསམ་དོན་མྱུར་འགྲུབ་ཡོང་བའི་སྨོན་འདུན་ཞུ། །
ཨ་ཁ། ང་ཚོར་གྱོང་རྒུད་ཆེན་པོ་བཏང་བ་རེད། བདེན་པ་ཉིད་རྒྱལ་འགྱུར་ཅིག །
གང་མགྱོགས་ངང་སླར་ཡང་སློབ་གྲྭ་སྔར་བཞིན་ཡོང་བའི་སྨོན་འདུན་ཡོད།-