བོད་དང་ཝེ་ཐི་ནམ་གྱི་གནད་དོན་རྒྱལ་སྤྱིའི་ཐོག་བསྐྱལ་ཐུབ་པར་བྱ་རྒྱུ་ཡིན།

ཉེ་ཆར་བཞུགས་སྒར་ངྷ་རམ་ས་ལར་ཝེ་ཐི་ནམ་དང་བོད་ཀྱི་མཐུན་འབྲེལ་ཚོགས་པ་ (VIET NAM_ TIBET ALLIANCE FIGHTING FOR FREEDOM ) ཞེས་པ་གསར་འཛུགས་གནང་ཡོད་པ་ལྟར། འདི་གའི་གསར་ཁང་གིས་ཚོགས་གཙོ་ཐུབ་བསྟན་བསྟན་འཛིན་ལགས་སུ་ཚོགས་པའི་དམིགས་ཡུལ་དང་མ་འོངས་ལས་འཆར་སོགས་ཀྱི་ཐད་ནས་བཅར་འདྲི་ཞུས་ཡོད། 

    ལན། ང་རང་ལ་མཚོན་ན་སྔོན་མ་ནས་བཞུགས་སྒར་གཡས་གཡོན་དུ་ཉི་ཧོང་གི་སྐད་བསྒྱུར་བའི་ལས་ཀ་བྱས་པ་ཡིན། འདི་ལོའི་ཕྱི་ཟླ་ ༣ པའི་ནང་བོད་ཀྱི་མཛངས་མ་འགྲན་བསྡུར་གོ་སྒྲིག་པ་བློ་བཟང་དབང་རྒྱལ་བརྒྱུད་དེ། ངས་ཝེ་ཐི་ནམ་གྱི་དམངས་གཙོ་དོན་གཉེར་བ་ལྕམ་ཝེན་ (Miss Ven) ལགས་ངོ་ཤེས་སོང་། ཁོ་མོས་ད་ལྟའི་བོད་པའི་ཛ་དྲག་གི་གནས་སྟངས་འདིའི་སྐབས་བོད་པ་ཚོས་རང་ངོས་ནས་འབད་པ་བྱ་རྒྱུ་གལ་ཆེན་པོ་ཡིན་པ་དང་། ཝེ་ཐི་ནམ་དང་བོད་ཀྱི་ཛ་དྲག་གི་གནས་སྟངས་གཉིས་ངོ་བོ་གཅིག་པ་ལྟ་བུ་ཆགས་ཡོད་སྟབས། ཕན་ཚུན་མཉམ་རུབ་ཐོག་ཚོགས་པ་ཞིག་གསར་འཛུགས་བྱས་ཏེ་ཕྱོགས་གཉིས་ཀྱི་འབྲེལ་ལམ་དང་མཉམ་རུབ་ཐོག་འབད་པ་བྱ་རྒྱུའི་སྐད་ཆ་བྱུང་པ་ལྟར། ཟླ་འདིའི་ཕྱི་ཚེས་ ༡ ཉིན་ལྕམ་ཝེན་དང་སྐུ་མགྲོན་ཁག་ཅིག གསར་འགོད་པ་བཅས་ལྷན་འཛོམས་ཐོག་དགུ་བཅུ་གསུམ་ལས་འགུལ་ཚོགས་པའི་ཉེ་འགྲམ་དུ་༼ཝེ་ཐི་ནམ་དང་བོད་ཀྱི་མཐུན་འབྲེལ་ཚོགས་པ༽་གསར་འཛུགས་ཀྱི་མཛད་སྒོ་ཚོགས་ཏེ་དངོས་སུ་གསར་འཛུགས་གནང་པ་རེད། ལྕམ་ཝེན་ལགས་ལ་མཚོན་ན་དམངས་གཙོ་དོན་གཉེར་བ་ཞིག་དང་ལོ་ ༡༤ ལྷག་གི་རིང་བཙོན་ཁང་དུ་བསྡད་པའི་ཆབ་སྲིད་བཙོན་པ་ཞིག་རེད་ལ། ༢༠༠༨ ལོར་ཧྥ་རན་སི་རྒྱལ་ས་ཕ་རེ་སིར་བོད་རང་བཙན་དང་ཝེ་ཐི་ནམ་རང་བཙན་བཅས་ཀྱི་སྐད་འབོད་བྱས་རྗེས་ཉེན་རྟོག་པས་འཛིན་བཟུང་བཙོན་འཇུག་བྱས་འདུག  འདིི་ལོའི་ཕྱི་ཟླ་ ༣ པའི་ཚེས་ ༡༠ ཉིན་ཁོ་མོ་ཆེད་དུ་བཞུགས་སྒར་དུ་བོད་མིའི་སྒེར་ལངས་ཐེངས་ ༥༣ པའི་ཐོག་མཉམ་ཞུགས་བྱས་པའི་སྐབས་དང་སྟབས་བསྟུན་ཏེ་ཚོགས་པ་འདི་གསར་འཛུགས་གནང་ཡོད་ཀྱང་། ཚོགས་པའི་མཐུན་འགྱུར་ཆ་ཚང་ཐད་ཁོ་མོས་རོགས་རམ་གནང་གཏན་ཁེལ་ཡོད་ལ། གནས་སྐབས་རིང་ངས་ཚོགས་གཙོའི་ལས་འགན་འཁུར་ཏེ་ལས་ཀ་བྱེད་བཞིན་པ་ལས།  ཚོགས་གཞོན་དང་དྲུང་ཆེ། རྩིས་པ། ལས་བྱེད་བཅས་དམིགས་བསལ་གང་ཡང་བསྐོ་བཞག་བྱས་མེད། ད་ལྟའི་ཆར་ཚོགས་མི་ལྕམ་ཝིན་ལགས་དང་ང་རང་། ངྷ་སར་གནས་སྡོད་ལྷག་པ། དགུ་བཅུ་གསུམ་ལས་འགུལ་ཚོགས་པའི་དཔལ་འབྱོར་འགན་འཛིན་བཟོད་པ། བོད་ཀྱི་མཛངས་མའི་འགྲན་བསྡུར་གོ་སྒྲིག་པ་བློ་བཟང་དབང་རྒྱལ་བཅས་ཚོགས་མི་ཁག་ཅིག་ལས་ཡོད་པ་མ་རེད།

    དྲི་བ། ཝེ་ཐི་ནམ་དང་བོད་ཀྱི་མཐུན་འབྲེལ་ཚོགས་པ་ཞེས་པ་འདི་འཛུགས་དགོས་པའི་རྒྱུ་མཚན་དང་ཚོགས་པའི་དམིགས་ཡུལ་གཙོ་བོ་ཅི་ཞིག་ཡིན།

    ལན། ང་ཚོས་ཚོགས་པ་འདི་གསར་འཛུགས་ཀྱི་དམིགས་ཡུལ་གཙོ་བོ་ཝེ་ཐི་ནམ་དང་བོད་གཉིས་རྒྱལ་ཁབ་ཐ་དད་ཡིན་ཡང་། ཆོས་ལུགས་ཀྱི་ཐད་ནས་ཝེ་ཐི་ནམ་དང་བོད་པ་གཉིས་ཀ་ནང་པ་ཡིན་པ་གཅིག་མཚུངས་ཆགས་ཡོད། ཝེ་ཐི་ནམ་ལ་མཚོན་ན་ད་ལྟའི་ཆར་ཕྱི་ནང་གཉིས་སུ་གྱེས་ཏེ། ནང་ལོགས་སུ་ཡོད་མཁན་ཚོ་དམར་ཕྱོགས་ཀྱི་ལྟ་བ་འཛིན་མཁན་དང་ཕྱི་ཕྱོགས་སུ་ཡོད་མཁན་ཚོ་དམངས་གཙོ་དོན་གཉེར་བ་ཆགས་བསྡད་ཡོད་ཀྱང་། འཛམ་གླིང་ཡུལ་གྲུ་གཞན་དུ་ཝེ་ཐི་ནམ་གྱི་མཐུན་འབྲེལ་ཚོགས་པ་མང་པོ་གསར་འཛུགས་བྱས་ཡོད་པ་རེད། བཞུགས་སྒར་ལ་མཚོན་ན་ཝེ་ཐི་ནམ་དང་འབྲེལ་བའི་ཚོགས་པ་མེད་སྟབས། ང་རང་གི་ངོས་ནས་ཕྱོགས་གཉིས་ཀྱི་བར་འབྲེལ་ལམ་གསར་འཛུགས་བྱ་ཆེད་ཚོགས་པ་འདི་གསར་འཛུགས་བྱ་རྒྱུའི་དམིགས་ཡུལ་བཅངས་ཡོད་ལ། ཚོགས་པ་འདིས་ངྷ་རམ་ས་ལར་ཡོད་པའི་གཞུང་འབྲེལ་མིན་པའི་ཚོགས་པ་ལྔའི་ལས་འགུལ་ཆེ་ཆུང་གང་ཡིན་ལ་མ་ལྟོས་པར་མཉམ་ཞུགས་བྱས་ཏེ་བོད་དོན་དྲིལ་བསྒྲགས་ལ་རམ་འདེགས་བྱ་རྒྱུ་དང་། ༡༩༧༤ ལོ་ནས་ད་ལྟའི་བར་ཝེ་ཐི་ནམ་དམར་ཤོག་གིས་བཙན་བཟུང་བྱས་ཏེ། དམར་གསོད་དང་དྲག་གནོན་བྱེད་བཞིན་པའི་གནས་ཚུལ་དང་བོད་ནང་རྒྱ་ནག་གིས་དམར་གསོད་དང་འཛིན་བཟུང་གི་གནས་ཚུལ་ཡོང་བཞིན་པ་རྣམས་ཚོགས་པ་འདི་བརྒྱུད་དེ་རྒྱལ་སྤྱིའི་སྤྱི་ཚོགས་ལ་ཁྱབ་བསྒྲགས་བྱ་རྒྱུ་བཅས་ལ་དམིགས་པ་ཡིན།

    དྲི་བ། ཝེ་ཐི་ནམ་དང་བོད་ཀྱི་མཐུན་འབྲེལ་ཚོགས་པར་མ་འོངས་པར་བོད་དོན་དང་འབྲེལ་བའི་ལས་འཆར་གང་དང་གང་ཡོད་དམ།

    ལན། ང་ཚོའི་ཚོགས་པར་མཚོན་ན་ཟླ་འདིའི་ཕྱི་ཚེས་ ༡ ཉིན་དབུ་འབྱེད་བྱས་ཏེ། དུས་ཡུན་རིང་པོ་ཞིག་ཕྱིན་མེད་ཀྱང་། ང་ཚོའི་ངོས་ནས་ཟླ་འདིའི་ཕྱི་ཚེས་ ༣༠ ཉིན་ཝེ་ཐི་ནམ་དམར་ཤོག་གིས་དབང་བསྒྱུར་བྱས་པའི་ཉིན་མོ་ཁེལ་ཡོད་སྟབས། ཉིན་དེར་བཞུགས་སྒར་དུ་ཡོད་པའི་ལས་ཁུངས་ནང་གྲྭ་བ་ཁག་ཅིག་གདན་ཞུ་གནང་སྟེ་སྨོན་ལམ་ཚོགས་རྒྱུའི་ལས་རིམ་བསྒྲིགས་ཡོད། ཕྱི་ཟླ་ ༩ བའི་ནང་༸གོང་ས་མཆོག་གིས་ཝེ་ཐི་ནམ་གྱི་དད་ལྡན་པ་ཚོར་དམིགས་བསལ་གསུང་ཆོས་གསུང་རྒྱུའི་མཛད་རིམ་འདུག སྐབས་དེར་ཝེ་ཐི་ནམ་ནས་དད་ལྡན་ཆོས་ཞུ་བ་མང་པོ་ཞིག་འདིར་ཡོང་འཆར་ཡོད་པ་རེད། ང་ཚོའི་ངོས་ནས་ཁོང་རྣམ་པ་འདིར་ཡོང་བའི་གོ་སྐབས་དང་སྟབས་བསྟུན་ཏེ་དད་ལྡན་ཆོས་ཞུ་བ་རྣམས་ལ་ཚོགས་པའི་དམིགས་ཡུལ་དང་ལས་དོན་ངོ་སྤྲོད་གནང་རྒྱུ་དང་། བོད་ནང་རང་ལུས་མེར་བསྲེགས་ཀྱིས་རྒྱ་ནག་གཞུང་ལ་ངོ་རྒོལ་སྐད་འབོད་བྱས་པའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་ལོ་རྒྱུས་དང་པར་རིས་འགྲེམས་སྟོན། བོད་དོན་དང་ཝེ་ཐི་ནམ་གྱི་གནད་དོན་ཐད་བགྲོ་གླེང་གོ་བསྔུར་བཅས་གནང་རྒྱུ་ཡིན་ལ། ད་དུང་སྐབས་དེར་ཝེ་ཐི་ནམ་གྱི་ཆོས་ཞུ་བ་དང་བཞུགས་སྒར་ས་གནས་མང་ཚོགས་ལྷན་འཛོམས་ཐོག་བོད་ནང་གི་བོད་མི་ཚོར་གདུང་སེམས་མཉམ་སྐྱེད་ཆེད་མར་མེ་ཁྲོམ་སྐོར་གྱི་ལས་འགུལ་ཞིག་གོ་སྒྲིག་གནང་རྒྱུའི་འཆར་གཞི་སྒྲིག་ཡོད། 

    དྲི་བ། ད་ལྟའི་ཆར་ཝེ་ཐི་ནམ་ནང་བོད་དོན་ལ་དོ་སྣང་གནང་སྟངས་གང་འདྲ་འདུག་གམ། མ་འོངས་པར་ཚོགས་པ་འདིའི་ངོས་ནས་ཝེ་ཐི་ནམ་ནང་བོད་དོན་གོ་རྟོགས་ཇི་ལྟར་སྤེལ་འཆར་ཡོད་དམ།

    ལན། ང་རང་ལ་མཚོན་ན་ཝེ་ཐི་ནམ་ནང་ཁུལ་གྱི་གནད་དོན་དང་འདས་པའི་ལོ་རྒྱུས་སོགས་ལ་བལྟས་མྱོང་བ་ལས་དངོས་སུ་འགྲོ་མྱོང་མེད། ཡིན་ནའང་། ཉེ་སྔོན་ལྕམ་ཝེན་ལགས་དང་ཐུག་འཕྲད་སྐབས། ཁོ་མོས་ཝེ་ཐི་ནམ་རྒྱལ་ཁབ་ཕྱི་ནང་གཉིས་སུ་གྱེས་སྟངས་དང་ད་ལྟའི་གནས་སྟངས་བཅས་ངོ་སྤྲོད་བྱས་བྱུང་། ཁོ་མོ་བརྒྱུད་གནས་ཚུལ་ཤེས་རྟོགས་བྱུང་པ་ལྟར་ན། ད་ལྟའི་ཆར་ཝེ་ཐི་ནམ་ནང་ལོགས་སུ་ཡོད་པའི་དམར་ཤོག་མ་གཏོགས། ཕྱི་ལོགས་སུ་ཡོད་པའི་དམངས་གཙོ་དོན་གཉེར་བ་ཚོ་ང་ཚོ་ལྟར་དམར་ཤོག་གི་གནོན་ཤུགས་འོག་བསྡད་ཡོད་པ་གཅིག་མཚུངས་ཆགས་ཡོད་སྟབས། ཁོང་ཚོས་བོད་དོན་ལ་དོ་སྣང་ཤུགས་ཆེར་སྤྲོད་ཀྱི་ཡོད་འདུག   དེ་བཞིན། ཕྱི་རྒྱལ་ཡུལ་གྲུ་ཧྥ་རན་སི་དང་ཁེ་ན་ཊ། ཡུ་རོབ་རྒྱལ་ཁབ་ཁག་ཏུ་ཡོད་པའི་ཝེ་ཐི་ནམ་གྱི་སྐྱབས་བཅོལ་བ་མང་པོ་ཞིག་གིས་བོད་ཀྱི་གནད་དོན་དང་། ལྷག་པར་དུ་ ༢༠༠༨ ལོ་ནས་བཟུང་བོད་ནང་ཛ་དྲག་གནས་སྟངས་ཆགས་ཡོད་པའི་ཐད་ལ་དོ་སྣང་ཆེན་པོ་སྤྲོད་ཀྱི་ཡོད་འདུག ད་ལྟའི་ཆར་བོད་ཀྱི་གནད་དོན་དེ་ཕྱི་ཕྱོགས་སུ་ཡོད་པའི་ཝེ་ཐི་ནམ་མི་མང་ཚོས་གང་འཚམ་ཤེས་ཀྱི་ཡོད་ཀྱང་། ནང་ཁུལ་དུ་ཡོད་པའི་མི་མང་གིས་དམར་ཤོག་གི་དྲག་གནོན་འོག་གནས་ཚུལ་མང་པོ་ཞིག་གོ་ཐུབ་ཀྱི་མེད་སྟབས། ང་ཚོའི་ངོས་ནས་ཝེ་ཐི་ནམ་ནང་ལོགས་སུ་ཕྱིན་ཏེ་སྡིངས་ཆ་འདྲ་མིན་ཐོག་བོད་དོན་གོ་རྟོགས་སྤེལ་རྒྱུ་དེ་གལ་ཆེན་པོ་ཞིག་ཏུ་བརྩིས་ནས། མ་འོངས་པར་ཝེ་ཐི་ནམ་ནང་ལོགས་ལ་ཕྱིན་ཏེ་བོད་དོན་གོ་རྟོགས་སྤེལ་བའི་ཐད་ལ་འབད་བརྩོན་བྱ་འཆར་ཡོད།   

    དྲི་བ། མ་འོངས་པར་བཙན་བྱོལ་བོད་མིའི་སྤྱི་ཚོགས་ཁྲོད་ཝེ་ཐི་ནམ་གྱི་གནས་སྟངས་གོ་རྟོགས་ཀྱི་ལས་འགུལ་སྤེལ་འཆར་ཡོད་དམ།

    ལན། བཙན་བྱོལ་སྤྱི་ཚོགས་ནང་ཝེ་ཐི་ནམ་གྱི་གནས་སྟངས་ངོ་སྤྲོད་བྱ་རྒྱུ་ཧ་ཅང་གལ་ཆེན་པོ་རེད་བསམ་གྱི་ཡོད། གང་ཡིན་ཞེ་ན། ཉེ་སྔོན་ཚོགས་པ་འདི་མ་བཙུགས་པའི་སྔོན་ངས་ལྡི་ལི་དང་ངྷ་རམ་ས་ལའི་ལས་འགུལ་སྐབས་བོད་ཀྱི་རྒྱལ་དར་དང་མཉམ་དུ་ཝེ་ཐི་ནམ་གྱི་རྒྱལ་དར་འཁྱེར་ཏེ་ལས་འགུལ་དུ་ཞུགས་པ་ཡིན། སྐབས་དེར་མི་མང་པོ་ཞིག་གིས་ཝེ་ཐི་ནམ་གྱི་དར་ཆ་མཐོང་སྟེ་ང་ལ་སྐད་ཆ་དྲིས་ཡོང་གི་འདུག   སྐབས་དེར་ངས་མི་མང་པོ་ཞིག་ལ་རྒྱལ་དར་དང་འབྲེལ་ཏེ་ཝེ་ཐི་ནམ་ནང་དམར་ཤོག་དང་དམངས་གཙོ་དོན་གཉེར་བ་བཅས་ཤོག་ཁག་གཉིས་ཆགས་ཡོད་སྐོར་དང་། ད་ལྟའི་ཆར་མི་མང་པོ་ཞིག་གིས་ཝེ་ཐི་ནམ་ནང་དམངས་གཙོའི་ལམ་ལུགས་ལག་བསྟར་བྱ་བར་འབད་པ་བྱེད་ཀྱིན་པའི་སྐོར་སོགས་འགྲེལ་བཤད་བྱས་པ་ཡིན། གནས་སྟངས་དེ་དག་ལ་གཞིགས་ན་ང་ཚོའི་སྤྱི་ཚོགས་ནང་ཝེ་ཐི་ནམ་གྱི་གནས་སྟངས་མི་ཤེས་མཁན་མང་པོ་ཞིག་འདུག་སྟབས། ང་ཚོའི་སྤྱི་ཚོགས་ནང་ཝེ་ཐི་ནམ་གྱི་སྐོར་ངོ་སྤྲོད་དང་གོ་རྟོགས་སྤེལ་རྒྱུ་དེ་ཧ་ཅང་གལ་ཆེན་པོ་མཐོང་སོང་། མ་འོངས་པར་ང་ཚོའི་ངོས་ནས་ཝེ་ཐི་ནམ་གྱི་མི་འབོར་དང་རྒྱལ་ཁབ་ཀྱི་ལོ་རྒྱུས། རྒྱལ་དར། ཕྱི་ནང་གཉིས་སུ་གྱེས་དགོས་པའི་རྒྱུ་རྐྱེན་དང་ཕྱི་ནང་གཉིས་ཀྱིས་ལངས་ཕྱོགས་ག་རེ་འཛིན་གྱི་ཡོད་མེད་བཅས་ཀྱི་ཐད་ནས་མི་མང་ནང་གང་ཐུབ་ཀྱིས་ངོ་སྤྲོད་དང་གོ་རྟོགས་སྤེལ་རྒྱུ་ཡིན། ད་ལྟའི་ཆར་དམིགས་བསལ་གཞིས་ཆགས་ཁུལ་དང་དགོན་སྡེ། སློབ་གྲྭ་བཅས་ཀྱི་ནང་ལས་འགུལ་ཇི་ལྟར་སྤེལ་མིན་གྱི་འཆར་གཞི་བསྒྲིགས་མེད་ཀྱང་། མ་འོངས་པར་མུ་མཐུད་ཡིག་ཆ་འགྲེམས་སྤེལ་དང་སྐོར་སྐྱོད་ཀྱི་ལམ་ནས་སྤེལ་དགོས་པ་ཞིག་མཐོང་གི་འདུག    

    དྲི་བ། ད་ལྟའི་བར་བཙན་བྱོལ་ནང་ཚོགས་པ་མང་པོ་བཙུགས་ཡོད་ཀྱང་། ཚོགས་པ་ཁག་ཅིག་ལོ་ཤས་རྗེས་སུ་མེད་བརླག་ཏུ་འགྲོ་བཞིན་ཡོད་པ་རེད། ཁྱེད་ཀྱི་ངོས་ནས་གནས་སྟངས་འདིའི་ཐད་ལ་བསམ་བློ་བཏང་ཡོད་དམ།

    ལན། གནས་ཚུལ་དེ་དངོས་ནས་རེད། ད་ལྟའི་བར་བཙན་བྱོལ་ནང་ཚོགས་པ་འདྲ་མིན་མང་པོ་ཞིག་ཟླ་བ་ཁ་ཤས་དང་ལོ་གཅིག་གཉིས་ཀྱི་རྗེས་སུ་གནས་མ་ཐུབ་པའི་སྣང་ཚུལ་མང་པོ་བྱུང་ཡོད་པ་རེད། ང་རང་གི་ངོས་ནས་ཐོག་མར་ཚོགས་པ་གསར་འཛུགས་ཀྱི་འཆར་གཞི་གཏོང་སྐབས་ནས་ཁུངས་འཁྱོལ་བ་ཞིག་བྱ་རྒྱུའི་བསམ་བློ་བཏང་ཡོད། ང་རང་སྒེར་ལ་མཚོན་ན་དམིགས་བསལ་ཤེས་ཡོན་ཡོད་མཁན་དང་མི་མང་ཁྲོད་མངོན་གསལ་དོད་པོའི་ལས་ཀ་བྱས་མྱོང་མཁན་ཞིག་མིན་ཡང་། ད་ལྟ་སོ་སོ་རང་གིས་ལས་ཀ་འདི་འདྲ་ཞིག་དམ་གསེས་བྱས་ཏེ་རང་སྟེང་དུ་བབས་ཡོད་སྟབས། ནུས་པ་གང་ཡོད་ཀྱིས་ལས་ཀ་བྱ་རྒྱུའི་འདུན་པ་དང་སེམས་ཤུགས་ཡོད་ལ། མ་འོངས་པར་ཟླ་བ་ཁ་ཤས་དང་ལོ་གཅིག་གཉིས་ཙམ་མིན་པར། དཔལ་འབྱོར་གྱི་དཀའ་ངལ་འཕྲད་མིན་ལ་མ་ལྟོས་པར་མུ་མཐུད་རྒྱུན་འཁྱོངས་ཀྱི་ཐད་ལ་འབད་པ་བྱ་རྒྱུ་ཡིན། ཚོགས་པ་གང་འདྲ་ཞིག་ཡིན་ཡང་། ཚོགས་པ་བཙུགས་ཚར་བའི་རྗེས་སུ་ཚོགས་གཙོ་དང་ཚོགས་གཞོན། དྲུང་ཆེ་དང་རྩིས་པ། ལས་ཀ་བྱེད་མཁན་བཅས་མང་པོ་ཞིག་ཡོད་སྟབས། ཚང་མ་མཉམ་རུབ་ཀྱིས་ལས་ཀ་ཏག་ཏག་ཅིག་བསྒྲུབ་ཐུབ་པ་ཡིན་ན། ཚོགས་པ་བརྟན་པོ་ཆགས་ཀྱི་རེད་བསམ་གྱི་འདུག དེ་མ་ཡིན་པར་ང་ཡིན་ཁོ་ཡིན་ཞེས་བསྡད་པ་ཡིན་ན་ཚོགས་པ་འཐོར་འགྲོ་བཞིན་ཡོད་པ་རེད། ང་རང་གི་ངོས་ནས་གནད་དོན་འདི་དག་ཉེན་ཁ་ཆེན་པོ་ཞིག་ཏུ་མཐོང་གི་ཡོད་ལ། དེ་དང་འབྲེལ་ཏེ་གཞུང་འབྲེལ་མིན་པའི་ཚོགས་པ་མང་པོ་ཞིག་རྩིས་ཁྲའི་སྟེང་དཀའ་ངལ་དང་རྙོག་དྲ་ཡོང་སྟེ་རིམ་གྱིས་རྙོག་དྲ་ཆེན་པོ་ཆགས་ཀྱི་ཡོད་སྟབས། ང་རང་གི་ངོས་ནས་མ་འོངས་པར་གནད་དོན་དེ་དག་གཙོ་བྱས་ཏེ་ལས་ཁུངས་ནང་ཚང་མས་མཉམ་རུབ་དང་ཧུར་ཐག་བྱས་ཏེ་སྤྱི་ཚོགས་ལ་ཕན་པའི་ལས་ཀ་ཞིག་སྒྲུབ་རྒྱུར་འབད་བརྩོན་བྱ་འཆར་ཡོད། ད་ལྟའི་ཆར་རྒྱ་གར་གཞུང་ལ་ཁྲིམས་མཐུན་དེབ་སྐྱེལ་བྱས་ཏེ་ཚོགས་པ་བརྟན་པོ་བཟོ་བའི་ཐད་ལ་འབད་བརྩོན་བྱེད་བཞིན་ཡོད།

    དྲི་བ། ཚོགས་གཙོ་ལགས་ཀྱིས་རང་ཉིད་ཀྱི་འདས་པའི་སློབ་སྦྱོང་གི་བརྒྱུད་རིམ་དང་ཕྱག་ལས་ཀྱི་སྐོར་ནས་ངོ་སྤྲོད་ཅིག་གནང་རོགས།

    ལན། ང་རང་གཞིས་ཀ་རྩེ་མངའ་ཁོངས་སྐྱིད་རོང་རྫོང་གི་ཉེ་ཁུལ་རྫོང་ཁ་ཞེས་པའི་གྲོང་སྡེ་རུ་སྐྱེས་པ་ཡིན། ༡༩༩༤ ལོར་རྒྱ་གར་དུ་བཙན་བྱོལ་ལ་འབྱོར་རྗེས་རྒྱ་གར་ལྷོ་ཕྱོགས་འབྲས་སྤུངས་བློ་གསལ་གླིང་གྲྭ་ཚང་གཙང་པ་ཁམས་ཚན་གྱི་ཆོས་སྒོར་ཞུགས་ཏེ། ལོ་ ༧ ལྷག་གི་རིང་ཕར་ཕྱིན་དང་གཞུང་། བསྡུས་གྲྭ བློ་རིག རྟགས་རིག གྲངས་ངེས། སེམས་སྐྱེད་བར་སློབ་གཉེར་བྱས་པ་ཡིན། ཕྱིས་སུ་གཟུགས་པོའི་གནས་སྟངས་སྐྱོ་བོ་ཆགས་སྟབས། དགོན་པ་ནས་ཕྱིར་བུད་དེ་བལ་ཡུལ་དུ་སོང་ནས་དུས་ཡུན་གང་འཚམ་བསྡད་རྗེས། ༡༩༩༧ ལོར་ཉི་ཧོང་དུ་ཕྱིན་ཏེ་ལོ་ ༣ རིང་ལས་ཀ་བྱེད་ཞོར་དུ་ཉི་ཧོང་གི་སྐད་ལ་སློབ་སྦྱོང་བྱས་པ་ཡིན། ༢༠༠༠ ཕྱིར་རྒྱ་གར་དུ་ལོག་པ་དང་དེ་ནས་བོད་ནང་ཕྱིན་སྟེ་ལོ་གཅིག་རིང་བསྡད་རྗེས། ཡང་བསྐྱར་རྒྱ་གར་དུ་ཡོང་སྟེ་ངྷ་རམ་ས་ལའི་རྣམ་རྒྱལ་གྲྭ་ཚང་དུ་ལས་ཀ་བྱས་པ་ཡིན། ༢༠༠༣ ལོར་རྣམ་རྒྱལ་གྲྭ་ཚང་ལ་ཉི་ཧོང་གི་སྐད་ཡིག་སྦྱོང་བའི་ཐད་མཐུན་འགྱུར་རོགས་རམ་གནང་རྒྱུའི་སྙན་ཞུ་ཕུལ་བ་ལྟར། རྣམ་རྒྱལ་གྲྭ་ཚང་དང་སྐུ་སྒེར་ཡིག་ཚང་གི་རོགས་རམ་འོག་ཡང་བསྐྱར་ཉི་ཧོང་དུ་འགྲོ་བའི་གོ་སྐབས་བྱུང་སྟེ། ལོ་ ༣ རིང་ཉི་ཧོང་ལ་ཕྱིན་ཏེ་སྐད་ཁོ་ནའི་སྟེང་སློབ་སྦྱོང་བྱས་པ་ཡིན། ༢༠༠༦ ལོར་ཕྱིར་རྒྱ་གར་དུ་ལོག་སྟེ་ཉི་ཧོང་བོད་ཁྱིམ་རོགས་སྐྱོར་ཚོགས་པ་ (Kiku japan ) ཞེས་པའི་ཚོགས་པའི་མི་སྣ་བཞུགས་སྒར་དུ་ཡོང་སྐབས་སྐད་བསྒྱུར་དང་སྣེ་ལེན་བཅས་ཀྱི་ལས་ཀ་བྱས་པ་དང་། དེ་བཞིན། ངྷ་རམ་ས་ལའི་གཡས་གཡོན་ཉི་ཧོང་གི་གསར་འགོད་པ་དང་ཚོགས་པ་ཁག སློབ་གྲྭ སྨན་ཁང་བཅས་ཀྱི་མི་སྣར་སྐད་བསྒྱུར་གྱི་ལས་ཀ་བྱས་པ་ཡིན། འདི་ལོ་ཉི་ཧོང་གི་གསར་འགོད་པ་ཡོང་སྟེ་བཀའ་བློན་ཁྲི་པ་བློ་བཟང་སེང་གེ་མཆོག་ལ་བཅར་འདྲིའི་སྐབས་སྐད་བསྒྱུར་ཀྱང་བྱས་མྱོང་།   ད་ལྟའི་ཆར་ང་རང་གི་ངོས་ནས་ཉི་ཧོང་དང་བལ་ཡུལ། རྒྱ་གར། དབྱིན་ཇི་བཅས་སྐད་ཡིག་བཞིའི་ཐོག་བཞུགས་སྒར་དུ་ཡོང་བའི་ཕྱིའི་མི་རིགས་ལ་མཐུན་འགྱུར་རོགས་རམ་གང་ཐུབ་གནང་བ་ཡིན།