ལི་ཐང་དུ་བོད་མི་འཛིན་བཟུང་དང་ཉག་ཆུ་ས་གནས་སུ་དམ་དྲག

རྒྱ་གཞུང་གིས་ཁམས་ལི་ཐང་རྫོང་དང་ཉག་ཆུ་རྫོང་གི་དགོན་པ་དང་གྲོང་སྡེ་ཁག་ཏུ་དམག་མི་དང་ལས་བྱེད་མི་སྣ་ཆེད་གཏོང་བྱས་ཏེ། རྒྱལ་གཅེས་ཆོས་གཅེས་ཀྱི་སློབ་གསོ་དང་འབྲེལ་བའི་མཛུབ་ཐེལ་དང་མིང་རྟགས་བསྡུ་རུབ་ཀྱི་ལས་འགུལ་སྤེལ་གྱིན་པ་མ་ཟད། གནས་ཚུལ་དེར་རྐྱེན་བྱས་ཏེ་བོད་མི་མང་པོ་འཇུ་བཟུང་བྱས་ཡོད་འདུག

ལྷོ་ཕྱོགས་སྤེལ་ཀོལ་ས་གནས་བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་སེར་སྨད་བློ་དགའ་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་དོན།  ཟླ་འདིའི་ཕྱི་ཚེས་ ༢༠ ཉིན་གྱི་དགོང་མོར་ལི་ཐང་རྫོང་གི་གྲོང་ཆེན་མཐིལ་དུ་བོད་དོན་སྐོར་གྱི་ཡིག་ཆ་བཀྲམ་པའི་གནས་ཚུལ་བྱུང་བར་བརྟེན། ཉེན་རྟོག་པ་དང་དམག་མིས་ས་ཁུལ་དེར་དམ་དྲག་ཤུགས་ཆེན་བྱེད་ཀྱིན་པ་མ་ཟད། ཉེ་ཆར་ལི་ཐང་གྲོང་ཤོག་ ༨ དང་དགོན་པ་བཅས་སུ་རྒྱལ་གཅེས་ཆོས་གཅེས་ཀྱི་སློབ་གསོའི་འོག མཛུབ་ཐེལ་དང་མིང་རྟགས་བསྡུ་རུབ་ཀྱི་ལས་འགུལ་ཞིག་སྤེལ་ཏེ། ལས་འགུལ་དེ་ངོས་ལེན་མི་བྱེད་པའི་བོད་མི་ ༧༠ ལྷག་འཇུ་བཟུང་གིས་ས་གནས་རྫོང་ཐོག་ཏུ་བཀག་ཉར་བྱས་ཡོད་འདུག

གནས་ཚུལ་མཁོ་སྤྲོད་པས་བརྗོད་པ་ལྟར་ན། རྒྱ་ནག་གཞུང་གི་མཛུབ་ཐེལ་དང་མིང་རྟགས་བསྡུ་རུབ་བྱེད་བཞིན་པའི་ཤོག་ལྷེ་དེའི་སྟེང་ཏཱ་ལའི་ཁ་བྲལ་ལ་རྒྱབ་སྐྱོར་མི་བྱེད་པ་ཞེས་བྲིས་ཡོད་ཅིང་། མང་ཚོགས་ལ་མགོ་སྐོར་བསླུ་བྲིད་གཏོང་ཆེད་མི་མང་ལ་ཤོག་ལྷེ་གཅིག་མ་གཏོགས་སྟོན་གྱིན་མེད་པ་རེད། ཡིན་ནའང་། ཤོག་གྲངས་གསུམ་ཡོད་པ་མཚོན་བྱེད་དུ་མི་མང་ལ་བཀྲམ་པའི་ཤོག་ལྷེ་དེའི་སྟེང་ཨང་གྲངས་ ༣ པ་ཞེས་བཀོད་ཡོད་པ་དང་། མི་མང་ལ་བཀྲམ་མེད་པའི་ཤོག་གྲངས་དང་པོ་དང་གཉིས་པའི་སྟེང་ཏཱ་ལར་རྒྱབ་སྐྱོར་མི་བྱེད་པ་དང་། ཁ་བྲལ་བའི་མགོ་གཙོ་བློ་བཟང་སེང་གེ་ལ་རྒྱབ་སྐྱོར་མི་བྱེད་པ་སོགས་བྲིས་ཡོད་འདུག ལི་ཐང་ར་རུ་ཁ་སོགས་སུ་བཀྲམ་པའི་ཤོག་ལྷེའི་ཐོག་རེའུ་མིག་དང་ཤོག་གྲངས་མཚོན་བྱེད་གྱི་ཨང་གྲངས་ཙམ་ལས་ཅི་ཡང་བཀོད་མེད་པ་རེད།   

བཙན་དབང་གིས་མིང་རྟགས་དང་མཛུབ་ཐེལ་བསྡུ་རུབ་ཀྱི་ལས་འགུལ་དེ། ལི་ཐང་རྫོང་གི་མོ་ལྷ་ཤང་དང་བཞག་པ། ལི་ཐང་མཐིལ། བཟང་སྤྱོད་དགོན་པ་དང་དེའི་ཡུལ་སྡེ་ར་རུ་ཁའི་མི་མང་བཅས་སུ་སྤེལ་ཡོད་པ་དང་། ཉེ་ཆར་ར་རུ་ཁའི་སྡེ་བའི་ནང་མིང་རྟགས་དང་མཛུབ་ཐེལ་མ་བརྒྱབ་པའི་ཕོ་སར་ ༢༠ ལྷག་ས་གནས་ཤང་གི་ལས་ཁུངས་སུ་སྐད་བཏང་སྟེ་བཀག་འགོག་བྱས་ཡོད་ཀྱང་། ལས་བྱེད་པས་མིང་རྟགས་ཀྱི་ནང་དོན་གསལ་བཤད་དང་ཡིག་ཆ་ངོ་མ་མ་བསྟན་ཚེ་མིང་རྟགས་བཀོད་ཀྱི་མིན་ཞེས་བཤད་ཡོད་འདུག  ད་ལྟའི་བར་མི་མང་གིས་མིང་རྟགས་རྒྱག་རྒྱུའི་ཁས་ལེན་བྱས་མེད་སྟབས།ཉེན་རྟོག་པ་དང་དམག་མི་ཡོང་སྟེ་མི་མང་ལ་གཅར་རྡུང་བྱས་ཡོད་པ་མ་ཟད།  གོང་རིམ་ནས་མགོ་ཁྲིད་ཡོང་སྟེ་ལི་ཐང་ར་རུ་ཁ་དང་ལིང་ཁ་མདོ། ལི་ཐང་གཡོན་རུའི་སྡེ་བ་ཁག་མང་པོའི་ནང་དུ་བཙན་གྱིས་མིང་རྟགས་བསྡུ་རུབ་དང་། སྲམ་གཟིག་གི་པགས་རིགས་ཉར་ཚགས་ཡག་པོ་བྱེད་དགོས་ཚུལ་གྱི་སློབ་གསོ་བཏང་ཡོད་ཀྱང་། མི་མང་གི་ངོས་ནས་མཐའ་གཅིག་ཏུ་ངོ་རྒོལ་བྱས་ཡོད་འདུག

གཞན་ཡང་། ཉག་ཆུ་རྫོང་གི་ཨོ་ཐོག་དགོན་པའི་མཐའ་ཉིན་མཚན་མེད་པར་དམག་མིས་བསྐོར་ཏེ། བཙན་དབང་གི་སྒོ་ནས་མིང་རྟགས་བསྡུ་རུབ་ཀྱི་ལས་འགུལ་སྤེལ་ཏེ་དགོན་གྲོང་གཉིས་ཀ་དམ་དྲག་ཁྲོད་ལྷག་ཡོད་པ་དང་། ཉེ་སྔོན་རྒྱ་གཞུང་ལས་བྱེད་པས་ས་གནས་མི་མང་ཚོར་དཀའ་ངལ་ག་རེ་ཡོད་མེད་དྲིས་སྐབས། རྒན་མོ་ཞིག་གིས་ཁོང་གི་དཀའ་ངལ་ཆེ་ཤོས་དེ་༸གོང་ས་མཆོག་མཇལ་མ་ཐུབ་པ་དེ་ཡིན་ལ། ད་ལྟའི་བར་༸གོང་ས་མཆོག་ལ་མཇལ་ཁ་ཞུ་བ་དང་གསུང་ཐོས་ཆེད་འགྲོ་གྲོན་ཕོན་ཆེན་བཏང་སྟེ་ལམ་ཡིག་ཐེངས་མང་ཞུས་ཀྱང་རེ་དོན་འགྲུབ་མ་སོང་ཞེས་བརྗོད་ཡོད་པ་དང་།   ཡང་བུད་མེད་གཞན་ཞིག་གིས་ཁོ་མོའི་དཀའ་སྡུག་ཆེ་ཤོས་ནི། ༡༩༦༡ ལོར་སྤུན་མཆེད་རྒན་པ་རྒྱ་དམག་གིས་སྐེ་བཅད་དེ་དམར་གསོད་བཏང་བ་དེ་ཡིན་པ་དང་། གནས་ཚུལ་དེ་ཁོ་མོའི་ཉེ་འབྲེལ་ཚང་མའི་སེམས་ཁོང་གི་སྡུག་བསྔལ་ཆེ་ཤོས་ཡིན་ཞེས་བརྗོད་ཡོད་འདུག

ཉེ་ལམ་ས་ཁུལ་དེ་དག་ནང་རྒྱ་ནག་གཞུང་གིས་དྲག་ཆས་དམག་མི་ ༢༠༠ ལྷག་དང་ཉེན་རྟོག་པ། ལས་བྱེད་བཅས་ཆེད་གཏོང་གིས་དྲག་གནོན་བྱས་ཏེ།   བོད་མི་ ༢༠༠ ལྷག་འཛིན་བཟུང་དང་བོད་མི་ཁག་ཅིག་ལ་རྨས་སྐྱོན་བཟོས་ཡོད་པ་མ་ཟད། ལི་ཐང་རྫོང་གི་རྫོང་དཔོན་གྱིས་འདི་ལོའི་བརྒྱད་གཅིག་དམག་བཙུགས་དུས་ཆེན་སྲུང་གཙི་དང་འབྲེལ། ལི་ཐང་དུ་རྟ་རྒྱུག་དུས་ཆེན་བསྐྱར་གསོ་བྱ་རྒྱུ་ཡིན་པ་དང་། སྐབས་དེར་བོད་མི་སུ་ཞིག་གིས་གནས་ཚུལ་བཟོས་ཚེ་ས་ཆ་དེ་རང་དུ་རྩ་མེད་གཏོང་རྒྱུའི་འཇིགས་སྐུལ་དང་། དེ་ནི་རྒྱ་ནག་དབུས་གཞུང་གི་བཀའ་ཡིན་པའི་ཁྱབ་བསྒྲགས་བྱས་ཡོད་འདུག