ཉེ་ཆར་རྒྱ་གར་ལྷོ་ཕྱོགས་བྷང་ལོར་གྲོང་ཁྱེར་དུ་རྒྱ་གར་རྒྱལ་ཡོངས་ཡེ་ཤུའི་ལྷན་ཚོགས་ཀྱི་ཚོགས་ཆེན་ཚོགས་ཡོད་པ་ལྟར། སྔོན་འགྲོའི་བགྲོ་གླེང་ཚོགས་འདུའི་ཐོག་བོད་དོན་དང་འབྲེལ་བའི་ཐད་གྲོས་ཆོད་ཁག་ཅིག་བཞག་ཡོད་འདུག
ལོ་བཞི་རེའི་མཚམས་སུ་རྒྱ་གར་རྒྱལ་ཡོངས་ཡེ་ཤུའི་ལྷན་ཚོགས་ཀྱི་ཚོགས་ཆེན་འཚོགས་བཞིན་ཡོད་པ་དང་། ཚོགས་ཆེན་གྱི་སྔོན་ལ་འཛམ་གླིང་གི་དཀའ་རྙོག་སེལ་ཐབས་སྐོར་གྱི་བརྗོད་གཞི་འདྲ་མིན་ཐོག་སྔོན་འགྲོའི་བགྲོ་གླེང་ཁག་ཅིག་ཚོགས་སྲོལ་ཡོད་པ་ལྟར། ཟླ་འདིའི་ཕྱི་ཚེས་ ༢༠ ནས་ ༢༣ བར་རྒྱ་གར་ལྷོ་ཕྱོགས་ཀར་ན་ཌ་ཀ་(Karnataka)མངའ་སྡེ་རྒྱལ་ས་བྷང་ལོར་དུ། ༼འཛམ་གླིང་གི་དཀའ་རྙོག་སེལ་སླད་ཆོས་ལུགས་སྒྲིག་འཛུགས་ཁག་ནས་གདོང་ལེན་བྱ་ཕྱོགས༽ཞེས་པའི་བརྗོད་གཞིའི་ཐོག་སྔོན་འགྲོའི་བགྲོ་གླེང་ཚོགས་འདུ་བསྐངས་པ་དང་། རྒྱ་གར་རྒྱལ་ཡོངས་ཡེ་ཤུའི་ལྷན་ཚོགས་ཀྱི་ཚོགས་གཞོན་སྐུ་ཞབས་བྷ་སའུ་མོ་ཐཱ་ལགས་ཀྱིས་མགྲོན་འབོད་གནང་བ་ལྟར། རྒྱ་གར་བྱང་ཤར་ས་ཁུལ་ཁག་གི་ས་བགོས་སྤྱི་འཐུས་ཀརྨ་ཡེ་ཤེས་དང་དབྱངས་ཅན་སྒྲོལ་དཀར་གཉིས་ཚོགས་འདུར་མཉམ་ཞུགས་བྱས་ཏེ། བོད་ནང་གི་འགྲོ་བ་མིའི་ཐོབ་ཐང་དང་ཆོས་དད་རང་དབང་། བོད་ཀྱི་ཁོར་ཡུག་གི་གནད་དོན། བོད་ནང་རྒྱ་མི་མང་པོ་གནས་སྤོ་བྱས་ཏེ་བོད་ཡུལ་རྒྱ་ཡུལ་དུ་བསྒྱུར་བཞིན་པའི་ཉེན་ཁ་སོགས་བོད་ཀྱི་ཛ་དྲག་གནས་སྟངས་སྐོར་སྙན་སྒྲོན་ཞུས་ཡོད་འདུག
སྔོན་འགྲོའི་བགྲོ་གླེང་ཚོགས་འདུ་དེའི་སྟེང་འཛམ་གླིང་ཞི་བདེ་དང་། ཁོར་ཡུག་སྲུང་སྐྱོབ། འགྲོ་བ་མིའི་ཐོབ་ཐང་། སྤྱི་ཚོགས་ཁྲིམས་ལྡན་འགན་གཙང་། དབུལ་ཕོངས་དཀའ་སེལ། འཛམ་གླིང་གི་དཀའ་རྙོག་སྣ་ཚོགས་ལ་གདོང་ལེན་བྱ་ཕྱོགས། བོད་མིའི་དཀའ་སྡུག་གནས་སྟངས་བཅས་བརྗོད་གཞི་ཁག་བདུན་གྱི་ཐོག འཛམ་གླིང་གི་ལྟ་གྲུབ་འདྲ་མིན་གྱི་ཆོས་ལུགས་མི་སྣས་ཁུར་མཉམ་ལེན་བྱ་ཕྱོགས་ཐད་བགྲོ་གླེང་གོ་བསྡུར་གནང་མཐར། གྲོས་ཆོད་དོན་ཚན་ཁག་ ༣༠ ལྷག་སྤྱི་མོས་གཏན་འབེབས་བྱུང་ཡོད་པའི་ཁྲོད། བོད་མིའི་སྐུ་ཚབ་དང་མཉམ་དུ་གྲོས་མོལ་ལམ་ནས་བོད་ཀྱི་གནད་དོན་སེལ་ཐབས་ཐད་རྒྱ་གཞུང་ལ་གནོན་ཤུགས་སྤྲོད་རྒྱུ་དང་། བོད་ཀྱི་ཁོར་ཡུག་ཉམས་ཉེས་ཀྱི་གནས་སྟངས། བོད་དང་ཤྲི་ལངྒ། སྤེ་ལེས་ཌ་ཡན་བཅས་ཀྱི་སྐྱབས་བཅོལ་བའི་རང་དབང་དང་། འགྲོ་བ་མིའི་ཐོབ་ཐང་རྩོད་ལེན་ཐད་རྒྱབ་སྐྱོར་གནང་དགོས་པའི་སྐོར་གྱི་གྲོས་ཆོད་ཁག་ཅིག་ཀྱང་ཚུད་ཡོད་འདུག
ཕྱི་ཚེས་ ༢༥ ནས་ ༢༨ བར་ཉིན་བཞིའི་རིང་རྒྱ་གར་རྒྱལ་ཡོངས་ཡེ་ཤུའི་ལྷན་ཚོགས་ཀྱི་དངོས་གཞིའི་ཚོགས་ཆེན་ཚོགས་ཡོད་པ་དང་། སྔོན་འགྲོའི་བགྲོ་གླེང་ཚོགས་འདུ་ཁག་གི་རྒྱབ་གཉེར་སྙན་ཐོ་རྣམས་སྤྱི་མོས་ངོས་ལེན་གནང་ཡོད་འདུག དེ་བཞིན། དངོས་གཞིའི་ཚོགས་ཆེན་ཐོག་སྤྱི་འཐུས་དབྱངས་ཅན་སྒྲོལ་དཀར་ལགས་ཟུར་ཉན་གྱི་ངོ་བོའི་ཐོག་ནས་མཉམ་ཞུགས་བྱས་ཡོད་པ་མ་ཟད། ཕྱི་ཚེས་ ༢༦ ནས་ ༢༧ ཉིན་ཚོགས་ཆུང་ཁག་བགོས་ཀྱིས་སྙན་ཐོ་སོ་སོའི་ཐོག་གྲོས་བསྡུར་སྐབས། ད་ལྟའི་བོད་ཀྱི་གནས་སྟངས་སྐོར་སླར་ཡང་ཚོགས་ཆུང་ནང་སྙན་སྒྲོན་ཞུས་ཡོད་འདུག
ཕྱི་ཚེས་ ༢༨ ཉིན་རྒྱ་གར་རྒྱལ་ཡོངས་ཡེ་ཤུའི་ལྷན་ཚོགས་ཀྱི་ཚོགས་ཆེན་མཇུག་སྒྲིལ་ཡོད་པ་དང་། ཐེངས་འདིའི་ཚོགས་ཆེན་ཐོག་རྒྱ་གར་རྒྱལ་ཡོངས་མངའ་སྡེ་ཁག་ནས་ཡེ་ཤུའི་ཆོས་ཚོགས་འདྲ་མིན་གྱི་སྐུ་ཚབ་མི་སྣ་ ༥༠༠ ལྷག་མཉམ་ཞུགས་བྱས་ཡོད་འདུག
འབག་ཕར་ལ་གཡོག་ཞེད་སྣང་ཚུར་ལ་བསྐུར་ཟེར་བའི་དཔེ་ལས་མ་འདས་སོ།བོད་ཕྲུག་སྣབས་ལུག་མང་བོ་ཞིག་སློབ་སྦྱོང་གི་ཁོར་ཡུག་ཙམ་ཡང་མཐོང་མ་མྱོང་བར་ལུས་འདུག་པར་བསམ་བློ་ཙམ་ཡང་མི་འཁོར་བའི་ཚོགས་སྡེ་ཚོས་དོན་ངོ་མས་ཅི་ཞིག་ལ་དམིགས་ཀྱིན་ཡོད་དམ།དྲ་གྲོགས་འཇམ་དབྱངས་ཀྱིས་སྐད་ཆ་དེ་ནི་སེམས་གཏམ་དམར་རྗེན་ཞིག་ཡིན་པས་བོད་མི་ཚང་མས་བསམ་གཞིག་བྱེད་ས་ངོ་མ་ཞིག་ཀྱང་ཡིན་པར་འདོད་དོ།
དེང་སྐབས་འཛམ་གླིང་གི་གཞུང་སྒེར་མང་པོ་ཞིག་གིས་བོད་ཀྱི་གནས་སྟངས་ཐད་ལས་འགུལ་སྣ་ཚོགས་དང་གཅིག་གྱུར་གྱི་གྲོས་ཆོད་སོགས་བཞག་སྟེ་བོད་ཀྱི་ཡ་ང་བའི་གནས་སྟངས་ལ་རྒྱབ་སྐྱོར་ཚད་མེད་གནང་བཞིན་པ་རེད། ཡིན་ན་ཡང་ད་ལོར་ལོ་ཉེས་ཅི་ཞིག་བྱུང་མིན་མི་ཤེས་མོད། ཧི་མ་ལ་ཡའི་རི་རྒྱུད་ཀྱི་ནང་པ་རྣམས་ཀྱིས་བོད་པའི་སྤྱི་ཚོགས་ནང་གང་ཅིའི་ཐོབ་ཐང་ལེན་རྐྱང་བྱས་དང་བྱེད་བཞིན་ཡང་། བོད་དོན་ཐད་གྲགས་འགུལ་ཅི་ཡང་མེད་པ་འདི་ལ་བལྟས་ན། བོད་པའི་དགོན་སྡེ་ཁག་དང་སློབ་གྲྭ་ཁག་ཏུ་ཧི་མ་ལ་ཡའི་རི་རྒྱུད་ཀྱི་མི་ཆེས་མང་པོ་ཞིག་གསོ་སྐྱོང་བྱས་དང་བྱེད་བཞིན་པ་འདི་ནི་ཁུ་བྱུག་གིས་ཁྲ་ཕྲུག་གསོས་པའི་དཔེ་ལས་འདས་མི་འདུག་གོ།