ཕྱི་ཟླ་ ༥ ཟླ་དཀྱིལ་ནས་དུས་ཡུན་ཟླ་ཕྱེད་རིང་༸གོང་ས་མཆོག་གིས་ཡུ་རོབ་རྒྱལ་ཁབ་ཁག་གསུམ་ནང་ཆོས་ཕྱོགས་ཀྱི་མཛད་འཕྲིན་བསྐྱང་འཆར་ཡོད་འདུག
ཡུ་རོབ་བོད་རིཊ་ཆོས་ཚོགས་དང་ཤེས་ཡོན་བསྟི་གནས་ཁང་ཁག་ཅིག་གིས་གདན་ཞུས་གནང་བ་ལྟར། ཟླ་རྗེས་མའི་ཟླ་དཀྱིལ་ཙམ་ནས་༸གོང་ས་མཆོག་གིས་ཡུ་རོབ་རྒྱལ་ཁབ་ཨོ་སོ་ཊི་རི་ཡཱ་དང་བྷེལ་ཇམ། སོ་ལཱ་ཝེ་ནི་ཡཱ་བཅས་ཀྱི་ནང་ཆོས་ཕྱོགས་ཀྱི་མཛད་འཕྲིན་ཁག་བསྐྱང་རྒྱུ་ཡིན་འདུག
ཕྱི་ཟླ་ ༥ ཚེས་ ༡༦ ཉིན་༸གོང་ས་མཆོག་གིས་སོ་ལཱ་ཝེ་ནི་ཡ་སྤྱི་མཐུན་རྒྱལ་ཁབ་ཀྱི་མ་རི་བོར་ས་ཁུལ་དུ་མི་མང་སྟོང་ཕྲག་བརྒལ་བར་བཟང་སྤྱོད་སྐོར་ལ་བཀའ་སློབ་བསྩལ་རྒྱུ་དང་། ཨོ་སོ་ཊི་རི་ཡཱ་སྤྱི་མཐུན་རྒྱལ་ཁབ་ནང་ཡོད་པའི་བོད་ཀྱི་ལྟེ་གནས་ཁང་གི་གོ་སྒྲིག་འོག ཕྱི་ཚེས་ ༡༨ ནས་ ༡༩ ཉིན་བར་ཀེ་ལ་ཇན་ཕོག་ས་གནས་ནང་ཤེས་རབ་སྙིང་པོ་དང་། ཇོ་བོ་རྗེ་ཨ་ཏི་ཤས་མཛད་པའི་བྱང་ཆུབ་ལམ་གྱི་སྒྲོན་མ། རྒྱལ་མཆོག་སྐལ་བཟང་རྒྱ་མཚོས་མཛད་པའི་ལྟ་ཁྲིད་དྲན་པ་བཞི་ལྡན་བཅས་བཀའ་ཁྲིད་དང་། མང་ཚོགས་ལ་སངས་རྒྱས་སྨན་ལྷའི་བཀའ་དབང་བཅས་བསྩལ་རྒྱུ། ཕྱི་ཚེས་ ༢༠ ཉིན་ཨོ་སོ་ཊི་རི་ཡཱའི་ཀེ་ལ་ཇན་ཕོག་ནང་མང་ཚོགས་ལ་བདེ་སྐྱིད་འབྱུང་བའི་ཐབས་ལམ་ཞེས་པའི་བརྗོད་གཞི་ཐོག་བཀའ་སློབ་བསྩལ་རྒྱུ་ཡིན་འདུག
ཨོ་སོ་ཊི་རི་ཡཱ་བོད་ཀྱི་ལྟེ་གནས་ཁང་དང་སེལ་ཛ་སྦག་གཙུག་ལག་སློབ་གྲྭ ཨེལ་པཱ་ཡུན་ཞི་བདེ་ཚོགས་པ་བཅས་ཐུན་མོང་གོ་སྒྲིག་འོག ཕྱི་ཚེས་ ༢༡ ཉིན་གྱི་སྔ་དྲོ་༸གོང་ས་མཆོག་གིས་ཡུལ་དེར་འཛམ་གླིང་ཞི་བདེ་དང་ཀུན་ཁྱབ་སེམས་ཁུར་ཞེས་པའི་བརྗོད་གཞི་ཐོག་བཀའ་སློབ་བསྩལ་རྒྱུ་དང་། ཉིན་རྒྱབ་ཁུལ་དེའི་འཛམ་གླིང་ཆོས་ལུགས་མཐུན་སྒྲིལ་གྱི་ཚོགས་ཆེན་ཞིག་ཏུ་ཆིབས་བསྒྱུར་བསྐྱང་རྒྱུ།
ཕྱི་ཟླ་ ༥ ཚེས་ ༢༤ ཉིན་༸གོང་ས་མཆོག་གིས་བྷེལ་ཇམ་དུ་བོད་རིཊ་གཙོས་ས་གནས་མང་ཚོགས་སྟོང་ཕྲག་མང་པོར་སྤྱི་ཚོགས་བཟང་པོ་ཞིག་བསྐྲུན་ཐབས་ཀྱི་འཆར་སྣང་དང་ལམ་སྟོན་ཞེས་པའི་བརྗོད་གཞི་ཐོག་བཀའ་སློབ་དང་། ཕྱི་ཚེས་ ༢༥ ནས་ ༢༦ ཉིན་བར་ཨོ་སོ་ཀྲི་རི་ཝེ་ནར་བོད་ཀྱི་ལྟེ་གནས་ཁང་དང་ཝེ་ན་གཙུག་ལག་སློབ་ཆེན་གཉིས་ཀྱི་གོ་སྒྲིག་ལྟར། ཁུལ་དེའི་ས་གནས་མང་ཚོགས་སྟོང་ཕྲག་དུ་མར་ཆོས་དང་མ་འདྲེས་པའི་དེང་དུས་སྤྱི་ཚོགས་ཀྱི་བཟང་སྤྱོད་དང་འགྲོ་བ་མིའི་རིན་ཐང་ཞེས་པའི་བརྗོད་གཞི་ཐོག་བཀའ་སློབ། ཕྱི་ཚེས་ ༢༦ ཉིན་ནང་ཆོས་དང་ཚན་རིག་བགྲོ་གླེང་ཞིག་ཏུ་ཆིབས་བསྒྱུར་བསྐྱང་རྒྱུ་ཡིན་འདུག
གསར་འགོད་པ། དཔལ་ལྡན།
གཞོན་ནུའི་སྐུ་ལུས་འཆང་བ་པོ།།
ཤེས་རབ་དྲི་མེད་འོད་གསལ་བ།།
འཇིག་རྟེན་གསུམ་ན་མུན་སེལ་བ།།
འཇམ་དཔལ་དབྱངས་ཀྱི་རྣམ་སྤྲུལ་ཡིན།།
སྐྱིན་གྱི་མ་འགོས་སྐུ་མདོག་དཀར།།
རྫོགས་སངས་རྒྱས་ཀྱི་དབུ་ལ་བརྒྱན།།
ཐུགས་རྗེ་སྤྱན་གྱིས་འགྲོ་ལ་གཟིགས།།
སྤྱན་རས་གཟིགས་ཀྱི་རྣམ་སྤྲུལ་ཡིན།།
ལྕང་ལོ་ཅན་གྱི་གནས་མཆོག་ཅན།།
སངས་བསྔགས་རིགས་བསྔགས་ཟབ་མོ་སྟེ།།
ལོག་འདྲེན་གེགས་རིགས་ཚར་གཅོད་པའི།།
ཕྱག་ན་རྡོ་རྗེའི་རྣམ་སྤྲུལ་ཡིན།།
གངས་ལྗོངས་བོད་ཀྱི་ལྷ་བསྐལ་ཡིན།།
ཡོངས་རྫོགས་པའི་མངའ་བདག་ཡིན།།
འཛམ་གླིང་ཞི་བདེའི་དེད་དཔོན་ཡིན།།
རིགས་གསུམ་མགོན་པོའི་རྣམ་སྤྲུལ་ཡིན།།
ཚེ་འདིའི་སྐྱབས་མཆོག་དམ་པ་ཡིན།།
ཕྱི་མ་བར་བདོའི་ཡར་འདྲེན་ཡིན།།
ཚེ་རབས་གཏན་གྱི་བསླུ་མེད་པ།།
གངས་ཅན་ཏྰ་ལའི་བླ་མ་ཡིན།། བོད་རྒྱལ་ལོ།།
སྐྱབས་གཅིག་ཕྱག་ན་པད་མོའི།།
བཀའ་བཞིན་བསྒྲུབ་ལ་བརྩོན་དང་།།
གདོང་དམར་བོད་ཀྱི་མི་རིགས།།
ལག་མཐུད་གཅིག་ཏུ་གཏོང་དང་།།
ང་ཚོ་ལྷན་དུ་འཛོམས་ཤོག།
ང་ཚོ་མཉམ་དུ་སྤུངས་ཤོག།།
ང་ཚོ་ཕུ་ནུ་ཚང་མ།།
ལྡུམ་རྭ་གཅིག་གི་མེ་ཏོག།
བསྟན་འཛིན་རྒྱ་མཚོའི་མཛད་འཕྲིན།།
ས་སྟེང་རྒྱ་རུ་ཁྱབ་སོང་།།
༸རྒྱལ་བ་འདི་ཡི་སྐུ་དྲིན།།
ཚེ་རབས་རྟག་དུ་དྲན་ཡོད།།
སྐུ་ཚེ་རྟག་ཏུ་བསྲིངས་ཤིང་མཛད་འཕྲིན་དབྱར་མཚོ་བཞིན་རྒྱས་འགྱུར་ཅིག
སྒོ་གསུམ་གུས་ཕྱག་གྲངས་མེད་འབུལ་ལོ།།