ཨ་རྒྱ་བར་གྱི་དམངས་ཁྲོད་ཁྲིམས་རྩོད་པ་ཁྲིན་ཀུང་ཁྲིན།

ཉེ་ཆར་ཁྲིན་ཀུང་ཁྲིན་ཨ་རའི་གཞུང་ཚབ་ཁང་ནང་ཉེན་ཡོལ་དུ་འཛུལ་རྗེས། རྒྱ་གཞུང་གིས་ཁོའི་རང་དབང་ཐད་ཁག་ལེན་བྱས་པ་ལྟར་ཕྱིར་བུད་ཡོད་ཀྱང་། ཁོའི་རང་དབང་ལ་བསྐྱར་དུ་བཀག་སྡོམ་ཐེབས་པར་བརྟེན་ནང་མི་ཟླ་སྒྲིལ་ཐོག་ཨ་རིར་བསྐྱོད་རྒྱུའི་རེ་སྐུལ་ཞུས་ཡོད་པ་རེད།

ཕྱི་ཟླ་ ༤ ཚེས་ ༢༢ ཉིན་དམངས་ཁྲོད་ཁྲིམས་རྩོད་པ་ཁྲིན་ཀུང་ཁྲིན་ས་གནས་རྒྱ་གཞུང་གི་བཀག་ཉར་གཅར་རྡུང་འོག་བྲོས་སྟེ། པེ་ཅིན་གྱི་ཨ་རིའི་གཞུང་ཚབ་ཁང་ནང་ཉེན་ཡོལ་དུ་འཛུལ་རྗེས། གནད་དོན་དེའི་ཐད་ཨ་རྒྱ་གཉིས་ཀྱིས་གྲོས་མོལ་ཐེངས་མང་བྱས་མཐར། ཕྱི་ཟླ་ ༥ ཚེས་ ༢ ཉིན་ཁྲིན་ཨ་རིའི་གཞུང་ཚབ་ཁང་ནས་ཕྱིར་བུད་ཡོད་ལ། ཨ་རྒྱ་ཕྱོགས་གཉིས་ཀྱིས་ཁོང་རང་འགུལ་གྱིས་ཕྱིར་བུད་པ་ཞིག་ཡིན་སྐོར་བརྗོད་ཡོད་། ཕྱི་ཚེས་ ༣ ཉིན་ཁྲིན་གྱི་དེ་སྔའི་ལངས་ཕྱོགས་ལ་འགྱུར་བ་ཐེབས་ཏེ་ནང་མི་ཟླ་སྒྲིལ་ཐོག་ཨ་རིར་ཉེན་གཡོལ་དུ་བསྐྱོད་འདུན་ཡོད་པ་བསྒྲགས་ཏེ། ཨ་རིའི་སྲིད་འཛིན་ཨོ་བྷ་མ་དང་རྒྱལ་དོན་དྲུང་ཆེ་ཧེ་ལི་རེ་གཉིས་ལ་འབོད་སྐུལ་ཞུས་རྗེས། ཁྲིན་གྱི་གནད་དོན་ཐད་རྒྱལ་སྤྱིའི་སྤྱི་ཚོགས་ནང་འབར་གས་རང་བཞིན་གྱི་གླེང་སློང་ཤུགས་ཆེན་བྱུང་བ་དང་། གསར་ལམ་བརྒྱུད་ལམ་ཁག་གིས་ཨ་རྒྱ་གཉིས་ལ་ཚ་འདྲི་གནོན་ཤུགས་བསྟུད་མར་སྤྲད་པར་བརྟེན། ཨ་རིའི་ཚབ་ཆེན་མོ་ལོའུ་ཡིས་གནས་ཚུལ་དེའི་བྱུང་རིམ་ཡོངས་བསྒྲགས་གསལ་བཤད་བྱེད་དགོས་བྱུང་ཤིང་། ཁྲིན་གྱི་གནད་དོན་དེ་བསྐྱར་དུ་ཨ་རྒྱ་གཉིས་བར་རྩོད་རྙོག་ཅན་གྱི་གླེང་གཞི་ཞིག་ཏུ་འགྱུར་མགོ་བརྩམས་ཡོད།

མིག་གཉིས་ལོང་བ་ཡིན་པའི་ཁྲིན་རྒྱ་གཞུང་ཉེན་རྟོག་པས་བཀག་སྡོམ་ལྟ་རྟོག་འོག་བྲོས་ཐར་བྱུང་དེ་ནི། མི་ཚང་མར་དོགས་གཞི་ཆེན་པོ་ཞིག་ཆགས་ཡོད། གསར་ལམ་ཁག་ཏུ་ཡོངས་གྲགས་ཆགས་པའི་གནས་ཚུལ་ལྟར་ན། ཁྲིན་གྱིས་ཟླ་གཉིས་ལྷག་རིང་གྲ་སྒྲིག་བྱས་ཏེ་ལྟ་སྲུང་བའི་ཉམས་ཚོད་བླངས་རྗེས། སྐར་ཆ་ ༡༠ དུས་ཡུན་གྱི་གོ་སྐབས་བཟུང་སྟེ་རང་ཉིད་ཀྱི་སྡོད་ཁང་ནས་ཁང་མིག་གཞན་ཞིག་ནང་འཛུལ་ཐབས་བྱས་ཤིང་། མཚན་གུང་སྒོ་རའི་རྩིག་གྱང་ལས་བརྒལ་ཏེ་རང་ཉིད་གཅིག་པུ་ས་ལ་འགྱེལ་ཞོར་རྐ་ཆུ་དང་གྱང་ཐུང་མང་པོ་བརྒལ་ཏེ་ཆུ་ཚོད་འགར་བསྐྱོད་མཐར། མི་གཞན་གྱི་རོགས་རམ་འོག་ཁ་པར་བརྒྱུད་ཧི་ཕའེ་རོང་ལ་འབྲེལ་བ་བྱས་ཤིང་། ཧི་ཕའེ་རོང་དང་གྲོགས་པོ་འགའི་རོགས་འདེགས་ལ་བརྟེན་ནས། ཨ་རིའི་གཞུང་ཚབ་མི་སྣ་ཆེད་ཕེབས་ཀྱིས་ཁྲིན་ཨ་རིའི་གཞུང་ཚབ་ཁང་དུ་ཁྲིད་ཡོད་འདུག

ཟླ་འདིའི་ཕྱི་ཚེས་ ༢ ཉིན་རྒྱ་ནག་ཕྱི་དྲིལ་མགྲིན་ཚབ་པ་ལིག་ཝེ་མཱེན་གྱིས། “ཨ་རིའི་གཞུང་ཚབ་ཁང་གིས་རྒྱུན་ལྡན་མ་ཡིན་པའི་བྱ་ཐབས་སྤྱད་དེ། རྒྱ་ནག་གི་མི་སེར་ཁྲིན་ཀུང་ཁྲིན་ཨ་རིའི་གཞུང་ཚབ་ཁང་དུ་ཁྲིད་ཡོད། རྒྱ་གཞུང་གི་ཕྱོགས་ནས་དེའི་ཐད་བློ་ཕམ་ཆེན་པོ་ཡོད་ལ། ཨ་རིའི་བྱ་སྤྱོད་དེ་ནི་རྒྱ་ནག་ནང་སྲིད་ལ་ཐེ་ཇུས་བྱས་པ་ཞིག་ཡིན་སྟབས་མཐའ་གཅིག་ཏུ་ངོ་རྒོལ་ཡོད།” ཅེས་བརྗོད་ཡོད།

ཕྱི་ཚེས་ ༣ ཉིན་ཨ་རིའི་རྒྱ་ནག་གཞུང་ཚབ་ཆེན་མོ་ལོའུ་ཡིས། “ཧ་ཅང་ཛ་དྲག་གི་གནས་བབ་ཅིག་གི་འོག་ཁོང་གིས་ང་ཚོར་འབྲེལ་བ་གནང་བར་བརྟེན། ང་ཚོ་ཕར་ཁོང་ལ་ཐུག་འཕྲད་དུ་བསྐྱོད་དེ་ཉེན་ཁ་ཆེ་བའི་གནས་སྟངས་ཤིག་གི་ཐོག་ནས། རྒྱུན་ལྡན་མ་ཡིན་པའི་དམིགས་བསལ་བྱ་ཐབས་སྤྱད་དེ་ཁོང་གཞུང་ཚབ་ཁང་ནང་ཁྲིད་ཡོང་བ་ཡིན” ཞེས་བརྗོད་ཡོད་ལ། དེ་བཞིན། ཧི་ཕའེ་རོང་གིས་ཀྱང་མཚན་མོ་དེར་ཁྲིན་ཐེངས་ས་ལ་འགྱེལ་ཏེ་ལུས་ཡོངས་སུ་བརླན་ཡོད་པ་མ་ཟད། ཁོང་གི་རྐང་པར་ཆག་སྐྱོན་བཟོས་ཡོད་ལ། བྲོས་བྱོལ་གྱི་བརྒྱུད་རིམ་ཁྲོད་ཉུང་མཐར་མི་སྣ་ ༦ གིས་ཁོང་ལ་རོགས་རམ་བྱས་ཡོད་པ་བརྗོད་འདུག 

ཁྲིན་རྒྱ་གཞུང་གི་བཀག་སྡོམ་འོག་བྲོས་ཐར་བྱུང་རྗེས། དྲ་ལམ་ཁག་ཏུ་དུས་ཡུན་སྐར་མ་ ༡༥ ཅན་གྱི་བརྙན་ཐུང་ཞིག་སྤེལ་ཏེ། “དེ་སྔོན་རྒྱལ་སྤྱིའི་དྲ་ལམ་ཁག་ཏུ་རྒྱ་གཞུང་གིས་ང་ལ་དྲག་སྤྱོད་དམ་དྲག་བྱས་པའི་གནས་ཚུལ་ཐོན་པ་མཐའ་དག་དངོས་བདེན་ཡིན་ལ། ང་རང་དངོས་ཡོད་གནས་ཚུལ་དེའི་དཔང་མི་ཆགས་ཡོད་པའི་ཆ་ནས་རྒྱལ་སྤྱིའི་སྤྱི་ཚོགས་ལ་བདེན་དཔང་བྱས་པ་ཡིན། ང་ལ་གཅར་རྡུང་མནར་གཅོད་བཏང་བའི་དངོས་ཡོད་གནས་སྟངས་རྣམས་ནི་དྲ་ལམ་ཁག་ཏུ་ཐོན་པའི་གནས་ཚུལ་ལས་ཀྱང་ཧ་ཅང་བློ་ཡུལ་ལས་འདས་པ་ཞིག་ཡིན” ཞེས་བརྗོད་དེ། ཁྲིམས་མེད་ལུགས་མེད་ཀྱི་རྒྱ་གཞུང་གི་དྲག་སྤྱོད་དག་ཐེར་འདོན་བྱས་པ་མ་ཟད། རྒྱ་ནག་སྲིད་བློན་ཝུན་ཇ་པའོ་ལ་ “ཁྲིམས་ལྟར་ཉེས་ཅན་ལ་ཁྲིམས་གཅོད་ནན་པོ་བྱེད་དགོས་པ། ཁྲིམས་ལྟར་ནང་མིའི་བདེ་འཇགས་སྲུང་སྐྱོབ་བྱ་དགོས་པ། ཁྲིམས་ལྟར་རུལ་སུངས་བྱ་སྤྱོད་ལ་ཉེས་ཆད་གཅོད་དགོས་པ། ” བཅས་རེ་སྐུལ་དོན་ཚན་གསུམ་ཕུལ་ཡོད།  

ཁྲིན་བྲོས་ཤུལ་དུ་ས་གནས་རྒྱ་གཞུང་གིས་ཁོང་གི་ཆུང་མ་དང་ཕུ་བོའི་གཙོས་པའི་ནང་མི་ཉེ་འབྲེལ་ཚང་མར་གཅར་རྡུང་འདྲི་གཅོད་བྱས་པ་མ་ཟད། ཁོ་ཚང་གི་སྒོ་རའི་ནང་བརྙན་ལེན་འཕྲུལ་ཆས་བདུན་བཙུགས་ཡོད་པ་དང་། ཉེན་རྟོག་པ་བཅུ་གྲངས་ཤིག་ཁོང་ཚང་ནང་རྒྱུན་སྡོད་བྱེད་བཅུག་སྟེ། མི་ཚང་སྒེར་ཁང་ཁྱིམ་ཁེ་དབང་ཡང་བཙན་འཕྲོག་བྱས་ཡོད་འདུག དེ་བཞིན། ཁོའི་ཕ་ཡུལ་ཏུང་ཁྲི་ཀུའུ་སྡེ་བར་ཕྱོགས་ཡོངས་ནས་བཀག་སྡོམ་དང་། སྡེ་མི་རེ་རེར་འདྲི་གཅོད་བྱེད་མགོ་བརྩམས་ཡོད་ལ། ཁྲིན་དང་འབྲེལ་ཡོད་ཀྱི་མི་སྣ་རྣམས་གང་བྱུང་བཙན་ཁྲིད་བྱས་ཡོད་འདུག 

ཁྲིན་དང་ཐོག་ཨ་རིའི་གཞུང་ཚབ་ཁང་ནང་ཉེན་གཡོལ་དུ་འཛུལ་རྗེས། ཨ་རིའི་གཞུང་ལ་ཆབ་སྲིད་སྐྱབས་བཅོལ་ཞུས་མེད་པར། ཨ་རིས་ལྟ་རྟོག་འོག་རང་ཉིད་མུ་མཐུད་རྒྱ་ནག་ནང་བསྡད་དེ། རྒྱ་ནག་མི་མང་གི་རང་དབང་དང་དམངས་གཙོ་རྩོད་ལེན་གནང་འདུན་ཡོད་པ་བརྗོད་འདུག   ཨ་རིའི་གཞུང་ཚབ་མི་སྣས་ཁོང་ཨ་རིར་བསྐྱོད་འདོད་ཡོད་མེད་དྲིས་སྐབས་ཀྱང་། ཁོང་གིས་ “ང་འགྲོ་འདོད་མེད། ཉིན་ཞིག་ཟབ་སྦྱོང་དུ་ཡོང་སྲིད་པ་རེད།” ཅེས་ལན་འདེབས་བྱས་འདུག

ཕྱི་ཚེས་ ༣ ཉིན་ཨ་རིའི་གཞུང་ཚབ་ཆེན་མོ་ལོའུ་ཡིས་ཁྲིན་གཞུང་ཚབ་ཁང་ནས་ཕྱིར་བུད་པའི་བྱུང་རིམ་ངོ་སྤྲོད་གནང་སྐབས། ཁྲིན་རང་ཉིད་ཀྱི་རེ་འདུན་དང་དམིགས་ཡུལ་གཞིར་བཟུང་། རྒྱ་གཞུང་འབྲེལ་ཡོད་མི་སྣར་གྲོས་མོལ་རིམ་པར་བྱས་མཐར། རྒྱ་གཞུང་འབྲེལ་ཡོད་སྡེ་ཁག་གིས་ཁྲིན་གྱི་དགོས་འདུན་རྣམས་ཁས་ལེན་བྱས་པ་ལྟར། ཕྱི་ཚེས་ ༢ ཉིན་ཁྲིན་རང་འགུལ་ཐོག་ཨ་རིའི་གཞུང་ཚབ་ཁང་ནས་ཕྱིར་བུད་དེ། ཨ་རིའི་འབྲེལ་ཡོད་མི་སྣས་ཁོང་པེ་ཅིན་ཁྲའོ་ཡཱང་སྨན་ནང་བསྐྱལ་བར་མ་ཟད། ཁོའི་རེ་འདུན་ལྟར་བྱིས་པ་གཉིས་དང་ཁོང་གི་བཟའ་ཟླ་བཅས་ནང་མི་ལྷན་འཛོམས་བྱུང་བཅུག་སྐོར་བརྗོད་ཡོད།

རྒྱ་གཞུང་གི་ཁས་ལེན་དོན་ཚན་བཞི་ནི། དང་པོ། རྒྱ་ནག་ནང་ཁུལ་གྱི་ས་གནས་གཞན་ཞིག་ཏུ་གནས་སྤོར་དང་། རྒྱ་ནག་གཞུང་གིས་ས་ཁུལ་འདྲ་མིན་ནང་སློབ་ཆེན་ཁག་ ༧ མིང་འདོན་གྱིས་ཁོང་ལ་གདམ་གསེས་བྱ་འཇུག་རྒྱུ། གཉིས། སློབ་ཆེན་ནང་ཁོང་ལ་སློབ་སྦྱོང་གི་གོ་སྐབས་སྤྲོད་དགོས་པར་མ་ཟད། ཁོང་དང་ཁོའི་ནང་མིས་བདམས་པའི་སློབ་ཆེན་དེའི་ནང་སློབ་ཡོན་དང་། སྡོད་ཁྱིམ་བཀོད་སྒྲིག འཚོ་བའི་རོགས་དངུལ་ཡོངས་རྫོགས་རྒྱ་གཞུང་གིས་མཁོ་སྒྲུབ་བྱ་དགོས་པ། གསུམ། སྨན་ཁང་དུ་ཁོང་ལ་སྨན་བཅོས་སྐབས་ཀྱི་འགྲོ་གྲོན་མཐུན་སྦྱོར་གནང་དགོས་པ་དང་། དེ་སྔོན་ཁོང་ལ་མནར་གཅོད་དང་བཀག་སྡོམ་བྱས་པའི་གནས་སྟངས་ལ་ཉན་ཞིབ་བྱས་ཏེ། རྒྱ་གཞུང་གིས་ཕྱོགས་ཡོངས་ནས་གནད་དོན་དེའི་ཐད་ཞིབ་བཤེར་ནན་མོ་བྱ་རྒྱུ། བཞི། སློབ་ཆེན་གང་རུང་ནང་གི་སློབ་མ་སྤྱི་མཚུངས་ལྟར་ཁོང་ལ་དགོས་ངེས་ཀྱི་མཐུན་འགྱུར་དང་ཁེ་དབང་སྤྲོད་དགོས་ལ། སློབ་སྦྱོང་གི་གོ་རིམ་ཁྲོད་སློབ་གྲྭ་གཞན་དུ་སློབ་སྒྱུར་བྱ་ཆོག་པའི་གོ་སྐབས་སྤྲོད་དགོས་པ་བཅས་ཡིན་འདུག

ཁྲིན་ཨ་རིའི་གཞུང་ཚབ་ཁང་ནས་ཕྱིར་བུད་རྗེས། རྒྱ་གཞུང་གིས་སྔར་གྱི་ཁས་ལེན་དག་སྣང་མེད་དུ་བཏང་སྟེ། སྨན་ཁང་མཐའ་འཁོར་དུ་ཉེན་རྟོག་པ་མང་པོ་འགྲེམས་འཇོག་དང་། ཁྲིན་ལ་ཐུག་འཕྲད་དུ་ཡོང་མཁན་ཁྲིམས་རྩོད་པ་ཅཱང་ཐེན་ཡུང་གཙོས་གནད་ཡོད་མི་སྣ་མང་པོ་འཇུ་བཟུང་བཙན་ཁྲིད་བྱས་ཤིང་། ཁྲིན་རང་ཉིད་ཀྱི་འགྲོ་བསྐྱོད་རང་དབང་ལ་བཀག་སྡོམ། ཁོང་གི་ནང་མིའི་བདེ་འཇགས་ལ་ཉེན་ཁའི་སྣང་ཚུལ་བྱུང་པར་བརྟེན། ཕྱི་ཚེས་ ༣ ཉིན་ཁྲིན་གྱིས་རང་གི་དེ་སྔའི་བསམ་ཚུལ་ལ་འགྱུར་བ་བཏང་སྟེ། ནང་མི་ཟླ་སྒྲིལ་ཐོག་ཨ་རིར་བསྐྱོད་འདུན་ཡོད་པ་བསྒྲགས་ཤིང་། སྲིད་འཛིན་ཨོ་བྷ་མ་དང་རྒྱལ་དོན་དྲུང་ཆེ་ཧེ་ལི་རའེ་གཉིས་ཀྱིས་རོགས་སྐྱོར་ཡོང་བའི་འབོད་སྐུལ་ཞུས་འདུག 

ཕྱི་ཚེས་ ༤ ཉིན་པེ་ཅིན་དུ་ཨ་རྒྱ་གཉིས་ཀྱི་འཐབ་ཇུས་དང་ཚོང་དོན་གྲོས་མོལ་འཇུག་བསྒྲིལ་མ་ཐག ཨ་རིའི་རྒྱལ་དོན་དྲུང་ཆེ་ལྕམ་ཧེ་ལེ་རའེ་ཡིས་གསར་འགོད་པའི་དྲི་བར་ལན་འདེབས་སྐབས། ཨ་རིའི་གཞུང་ཚབ་ཀྱིས་སྐུ་ཞབས་ཁྲིན་ལ་ཁ་པར་གྱི་ལམ་ནས་བསྐྱར་དུ་འབྲེལ་བ་གནང་སྟེ། འབྲེལ་ཡོད་མི་སྣ་དང་སྨན་པ་བཅས་ཁོང་ལ་ཐུག་འཕྲད་བྱས་ཡོད་ལ། ད་ལྟའི་ཆར་ཁོང་གིས་ནང་མི་ཟླ་སྒྲིལ་ཐོག་ཨ་རིར་སློབ་སྦྱོང་དུ་བསྐྱོད་རྒྱུའི་སེམས་ཐག་བཅད་ཡོད་པ་གསལ་བཤད་དང་སྦྲགས། ཁོ་མོས་ “གནད་དོན་དེ་ནི་གྲགས་ཅན་གྱི་འགྲོ་བ་མིའི་ཐོབ་ཐང་དོན་གཉེར་བ་ཅིག་གི་གནད་དོན་ཙམ་མ་ཡིན་པར། རྒྱ་ནག་མི་མང་དུང་ཕྱུར་བཅུ་ལྷག་དང་འཛམ་གླིང་མི་མང་དུང་ཕྱུར་བཅུ་གྲངས་འགའི་འགྲོ་བ་མིའི་ཐོབ་ཐང་དང་རེ་སྙེག་ལ་འབྲེལ་བ་ཡོད་ལ། རླབས་ཆེ་བའི་རྒྱལ་ཁབ་འདི་དང་འཛམ་གླིང་རྒྱལ་ཁབ་ཡོངས་ཀྱི་མ་འོངས་པ་དང་འབྲེལ་བ་ཆགས་ཡོད། དོ་གལ་ཅན་གྱི་གནད་དོན་འདིའི་རིགས་ནི་ང་ཚོའི་ཕྱི་འབྲེལ་ལས་དོན་གྱི་གཞི་རྩའི་ནང་དོན་གལ་ཆེན་ཞིག་ཆགས་ཡོད་སྟབས། དེའི་ཐད་ང་ཚོས་མུ་མཐུད་དུ་རྒྱ་ནག་གཞུང་དང་ཚད་མཐོའི་གྲོས་མོལ་གནང་གི་ཡིན། ” ཞེས་བརྗོད་ཡོད་པ་རེད།

ཁྲིན་གྱི་མ་འོངས་པ་ཨ་རིར་ཡོད།

ཕྱི་ཚེས་ ༣ ཉིན་ཁྲིན་གྱིས་ཨ་རིར་བསྐྱོད་འདོད་ཡོད་པ་བསྒྲགས་རྗེས། ཨ་རྒྱ་གཉིས་ཀྱི་འབྲེལ་ཡོད་སྡེ་ཁག་གིས་གནད་དོན་དེའི་ཐད་བསྐྱར་དུ་འབྲེལ་མོལ་བྱས་ཡོད་ལ། ཉིན་དེར་རྒྱ་ནག་ཕྱི་དྲིལ་མགྲིན་ཚབ་པ་ལིག་ཝེ་མཱེན་གྱིས། “ཁྲིན་ཀུང་ཁྲིན་ཉེ་ཆར་སྨན་ཁང་ནང་སྨན་བཅོས་བྱེད་བཞིན་ཡོད་ལ། ཁོ་རང་ཕྱི་རྒྱལ་དུ་སློབ་སྦྱོང་ལ་བསྐྱོད་འདུན་ཡོད་པའི་ཐད། རྒྱ་ནག་གི་སྤྱི་དམངས་ཤིག་ཡིན་པའི་ངོས་ནས་སྤྱི་དམངས་གཞན་དང་སྤྱི་མཚུངས་ལྟར། ཁྲིམས་ལུགས་གཞིར་བཟུང་འབྲེལ་ཡོད་སྡེ་ཁག་ནས་ཡིག་ཆ་བླངས་ཏེ་རྒྱུན་ལྡན་འགྲོ་ལུགས་གཉེར་དགོས། ” ཅེས་བརྗོད་ཡོད་ལ། དེའི་ཐད་ཨ་རིའི་རྒྱལ་དོན་དྲུང་ཆེ་ཧེ་ལེ་རའེ་ཡིས་ཧ་ཅང་དགའ་སྤོབས་ཡོད་པའི་རྣམ་འགྱུར་བསྟན་ཡོད་པ་རེད།

ཕྱི་ཚེས་ ༤ ཉིན་ཨ་རིའི་སྤྱི་མཐུན་ཚོགས་པའི་འཐུས་མི་དང་ཕྱི་འབྲེལ་ལྷན་ཁང་གི་ཚོགས་གཙོ་ལྕམ་ལའེ་ན་རའོ་སི་ (Ileana Ros-Lehtinen) ལགས་ཀྱིས། རྒྱ་གཞུང་གིས་ཁྲིན་གྱི་ཕྱི་བསྐྱོད་ཐད་མོས་མཐུན་གྱི་རྣམ་འགྱུར་བསྟན་ཡོད་ཀྱང་། དོན་དངོས་ཐོག་ཁོང་ཕྱི་བསྐྱོད་བྱེད་འཇུག་མིན་གྱི་གནད་དོན་དེ་ཨ་རིའི་དཔོན་རིགས་རྣམས་ལ་དོགས་གཞི་ཆེན་པོ་ཞིག་ཆགས་ཡོད་ལ། ཁྲིན་ཨ་རིའི་ས་ཐོག་ཏུ་སླེབས་ཏེ་ཆབ་སྲིད་སྐྱབས་བཅོལ་སྤྲད་རྗེས། ད་གཟོད་ཁོང་སྒེར་གྱི་རང་དབང་དང་བདེ་འཇགས་ལ་ང་ཚོས་ཁག་ལེན་བྱས་ཐུབ་པར་ངོས་འཛིན་བྱེད་ཆོག་ཚུལ་བརྗོད་འདུག 

ཕྱི་ཚེས་ ༦ ཉིན་ཨ་རིའི་སྲིད་འཛིན་གཞོན་པ་པའེ་ཊེན་གྱིས་ཀྱང་གསར་འགོད་པའི་བཅར་འདྲིའི་སྐབས། “ཁྲིན་ཀུང་ཁྲིན་གྱི་མ་འོངས་པ་ཨ་རི་ན་ཡོད། ཨ་རིའི་གཞུང་གིས་ཁོང་ལ་ཐོངས་མཆད་སྤྲོད་རྒྱུ་གྲ་སྒྲིག་བྱ་འཆར་ཡོད།” ཅེས་བརྗོད་དེ། རྒྱ་གཞུང་གིས་སོ་སོའི་བརྗོད་ཟིན་པའི་ཁས་ལེན་སྐད་ཆར་གཙི་སྲུང་བྱས་ཏེ། ཁྲིན་ལ་ཨ་རིའི་ནེག་ཡོག་སློབ་ཆེན་གྱི་སློབ་ཡོན་རོགས་སྐྱོར་ཐོབ་ཡོད་པ་ལྟར། ཨ་རིར་སློབ་སྦྱོང་དུ་གཏོང་དགོས་པ་བསྐྱར་དུ་ནན་བརྗོད་བྱས་ཡོད་པ་རེད། 

རང་ལོ་ ༤༠ སོན་པའི་ཁྲིན་ནི་རྒྱ་ནག་ཧྲན་ཏུང་ལན་ཡུས་རྫོང་ཏུང་ཁྲི་ཀུའུ་སྡེ་བའི་མི་ཡིན་ལ། ཆུང་དུས་ནས་མིག་གཉིས་ལོང་པར་གྱུར་སྟབས་ཁྲིམས་ལུགས་ཆེད་སྦྱོང་གི་བགོ་སྐལ་ཐོབ་མེད་ཀྱང་། ཁོང་གིས་དུས་རྒྱུན་ཁྲིམས་ལུགས་ཤེས་བྱར་ཉན་འཇོག་དང་རང་སྦྱོང་བྱས་ཏེ། གཞི་རིམ་མང་ཚོགས་དང་དབང་པོ་སྐྱོན་ཅན་དག་གི་ཁེ་དབང་སྲུང་སྐྱོབ་ཐད་ཁྲིམས་གཏུགས་རོགས་མང་པོ་བྱས་མཐར་སྙན་གྲགས་ཅན་གྱི་དམངས་ཁྲོད་ཁྲིམས་རྩོད་པ་ཞིག་ཏུ་གྱུར་ཡོད། ༢༠༠༠ ལོར་ཁོང་གིས་འབད་བརྩོན་ལ་བརྟེན་ནས་རྒྱ་ནག་ཁྲིམས་ལུགས་རིག་པའི་མཐུན་ཚོགས་ནང་དབང་པོ་སྐྱོན་ཅན་ཁེ་དབང་སྲུང་སྐྱོབ་ཀྱི་རྣམ་གྲངས་གསར་འཛུགས་བྱུང་བ་དང་། ༢༠༠༢ ཁོང་གིས་པེ་ཅིན་དུ་དབང་བོ་སྐྱོན་ཅན་གྱི་གཞི་རིམ་ཐོབ་ཐང་སྲུང་སྐྱོབ་རྩ་འཛུགས་ཚོགས་པ་གསར་འཛུགས་བྱ་འཆར་བྱས་ཡོད་ཀྱང་། རྒྱ་གཞུང་གི་རུལ་སུངས་དཔོན་རིགས་ཚོའི་སོ་སོའི་རྐུབ་བརྡོལ་རྒྱུ་འཇིགས་ཏེ་འགོག་རྐྱེན་སྤྲད་པར་བརྟེན་ལེགས་འགྲུབ་བྱུང་ཐུབ་མེད་པ་རེད། ཁོང་གིས་རྒྱ་གཞུང་གིས་བུད་མེད་སྦྲུམ་མའི་མངལ་ནས་ཕྲུ་གུ་བཙན་འདེད་བྱེད་བཞིན་པའི་ཉེས་དོན་ཁྲིམས་གཏུགས་བྱས་པར་བརྟེན་ནས། ༢༠༠༦ ལོར་ཁོང་ལ་རྒྱ་གཞུང་གིས་བཙོན་འཇུག་ཁྲིམས་ཐག་ལོ་ ༤ བཅད་པ་དང་། བཙོན་གྲོལ་ཐོབ་རྗེས་ཀྱང་གཅར་རྡུང་མནར་གཅོད་འོག་བཀག་སྡོམ་བྱས་ཡོད་པ་རེད། འདས་པའི་ལོ་ ༡༥ ལྷག་གི་རིང་ཁོང་གིས་ཉམ་ཐག་མི་མང་གི་ཁེ་དབང་དང་ཐོབ་ཐང་སྲུང་སྐྱོབ་ཐད་རང་ཉིད་ཀྱི་ཡོད་ཚད་ཕུལ་ཡོད།