བྱང་ཨ་རིའི་སྤྱི་འཐུས་ཀྱི་ཕྱོགས་སྐྱོད་ཐོག་མ།

ཚོགས་དྲུང་ལས་ཁུངས་ཀྱིས་འདི་གར་གནས་ཚུལ་བཏང་འབྱོར་བྱུང་བ་ལྟར་ན། སྐབས་བཅོ་ལྔ་བའི་བོད་མི་མང་སྤྱི་འཐུས་ལྷན་ཚོགས་ཀྱིས་གཞུང་འབྲེལ་མཚམས་གཟིགས་གནང་རྒྱུའི་ལས་རིམ་གོ་སྒྲིག་གནང་སྟེ། སྤྱི་འཐུས་རྣམ་པ་སོ་སོའི་ས་བགོས་ལྟར་ས་གནས་ཁག་འདྲ་མིན་དུ་ཕྱོགས་སྐྱོད་དུ་ཕེབས་དང་ཕེབས་བཞིན་པ་ལྟར། ཟླ་འདིའི་ཕྱི་ཚེས་ ༢ ཉིན་ནས་བཟུང་བྱང་ཨ་རིའི་སྤྱི་འཐུས་བཀྲ་ཤིས་རྣམ་རྒྱལ་ལགས་ཀྱིས་ཕྱོགས་སྐྱོད་ཐོག་མ་གནང་ཡོད་པ་དང་། ཕྱོགས་སྐྱོད་སྐབས་ཨ་རིའི་མི་ནོ་སི་ཀྲ་དང་སྤོར་ཀྲི་ལེན་ཌ། ཨ་སྤུ་ཀར་ཀི། སན་ཏ་ཕེ་བཅས་སུ་བོད་མི་རྣམས་ཀྱི་གནས་སྟངས་ལ་ལྟ་ཞིབ་དང་བོད་རིགས་སྤྱི་མཐུན་ཚོགས་པ་ཁག་མཚམས་གཟིགས། གཞོན་སྐྱེས་རྣམས་ཀྱི་སློབ་སྦྱོང་དང་བོད་དོན་རྒྱབ་སྐྱོར་ཚོགས་པ་ཁག་དང་ལྷན་དུ་བོད་དོན་ལས་འགུལ་ཤུགས་ཆེར་གཏོང་ཐབས་ཀྱི་བགྲོ་གླེང་། ས་གནས་བོད་མི་ཚོར་བོད་མིའི་སྒྲིག་འཛུགས་ཀྱི་ཆབ་སྲིད་ཀྱི་འཛིན་སྐྱོང་གི་གནས་སྟངས་སྤྱི་དང་། ཉེ་བའི་སྤྱི་འཐུས་གྲོས་ཚོགས་ནང་གི་གནད་དོན་གལ་ཆེན་ཁག་འགྲེལ་བཤད། གཞོན་སྐྱེས་རྣམས་ལ་དྲ་ལམ་བརྒྱུད་དེ་ས་གནས་སོ་སོའི་གྲོས་ཚོགས་འཐུས་མི་དང་མཉམ་དུ་འབྲེལ་ལམ་འཛུགས་དགོས་པའི་འབོད་སྐུལ་སོགས་གནང་འདུག

ཐེངས་འདིའི་མཚམས་གཟིགས་སྐབས་ས་གནས་མི་མང་གིས། ཕྱི་རྒྱལ་དུ་ཡོད་པའི་སློབ་མ་ཚོར་བོད་ཡིག་ཁྲིད་ཆེད་དམིགས་བསལ་སློབ་དེབ་བཟོ་རྒྱུ་དང་། མཐོ་སློབ་ཁག་ཏུ་བསྐྱོད་བཞིན་པའི་སློབ་མ་དང་གཞི་རིམ་བར་མའི་སློབ་མའི་དབར་དམིགས་བསལ་གྱི་ལྷན་ཚོགས་གོ་སྒྲིག་གནང་རྒྱུ།  ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་རིགས་ཚོགས་པ་ཁག་གིས་བོད་མིའི་སྒྲིག་འཛུགས་ཀྱི་ཆེད་དུ་ལོ་རེར་དུས་ཚོད་ངེས་ཅན་ལ་དཔལ་འབྱོར་འདུ་འགོད་བྱ་རྒྱུ། ༸གོང་ས་མཆོག་གི་སྐུ་ཕྱཱར་བོད་མིའི་སྒྲིག་འཛུགས་ཀྱིས་ཉེན་སྲུང་ལྷོད་མེད་ཐོག་དུས་ནས་དུས་སུ་ལྷ་བླར་མོ་ལུང་ཐུགས་དམ་ཞུས་ཏེ་ཞབས་རིམ་བསྒྲུབ་དགོས་པ་སོགས་བསམ་ཚུལ་ཁག་ཅིག་བཏོན་ཡོད་འདུག