བོད་ལྗོངས་སྐྱིད་པོ་བདེ་མོ་ཡིན།

ཉེ་ལམ་བོད་རང་སྐྱོང་ལྗོངས་ཀྱི་མགོ་ཁྲིད་སྐོར་ཞིག་ཡུ་རོབ་ཁག་ཏུ་སྐོར་སྐྱོད་བྱས་ཏེ། བོད་ནང་གི་འཛུགས་སྐྲུན་ཡར་རྒྱས་ཁྱབ་བསྒྲགས་བྱས་ཡོད་ཅིང་། ཕྱི་ཚེས་ ༡༥ ཉིན་ཡུ་རོབ་གྲོས་ཚོགས་ཀྱི་ཀྲུང་གོའི་མཐུན་ཕྱོགས་རྒྱལ་ཁབ་ཁག་ཅིག་གི་སྐུ་ཚབ་དང་བཞུགས་མོལ་ཚོགས་འདུ་བསྐོངས་ཏེ། བོད་རང་སྐྱོང་ལྗོངས་མི་དམངས་འཐུས་ཚོགས་ཀྱི་རྒྱུན་ལས་ཚོགས་གཙོ་བྱམས་པ་ཕུན་ཚོགས་ལགས་ཀྱིས་བོད་ཞི་བའི་བཅིངས་གྲོལ་བཏང་ཚུན་ལ། བོད་པའི་སྲིད་འབྱོར་རིག་གསུམ་ཡར་རྒྱས་ཆེན་པོ་ཕྱིན་ཡོད་པ་མ་ཟད། བོད་ནང་འགྲོ་བ་མིའི་ཐོབ་ཐང་དང་ཆོས་དད་རང་དབང་། ཁོར་ཡུག་སྲུང་སྐྱོབ་སོགས་ཧ་ཅང་ཡག་པོ་ཡོད་སྐོར། ཏཱ་ལའི་རུ་ཚོགས་ཀྱི་རྫུན་གཏམ་འོག་ཕྱི་རྒྱལ་ཁག་གི་མི་རེ་ཟུང་བོད་ལྗོངས་ལ་ལྟ་སྟངས་ནོར་གྱི་ཚུལ་སོགས་བརྗོད་འདུག་ལ། གསར་འགོད་པའི་དྲི་བའི་ལན་དུ་ཁོས་བོད་ནང་གྲྭ་བཙུན་སྐོར་ཞིག་གིས་རང་བསྲེགས་བྱས་པ་དེ་ཆོས་ཁྲིམས་དང་འགལ་ཡོད་ལ། དེ་དྲང་བདེན་དུ་འདོད་མཁན་རྣམས་ནི་ནང་པ་ཞིག་མིན་ཚུལ་སོགས་བརྗོད་འདུག

བོད་ལྗོངས་དྲ་བས་བྱམས་པ་ཕུན་ཚོགས་ཀྱི་སྐད་ཆ་ལུང་འདྲེན་བྱས་དོན། “ བོད་ཞི་བས་བཅིངས་གྲོལ་བཏང་ནས་ལོ་ ༦༡ ཕྱིན་པའི་རིང་། བོད་ལྗོངས་ཀྱི་རིགས་སོ་སོའི་མི་དམངས་ཀྱིས་མཐུན་སྒྲིལ་འབད་འཐབ་བྱས་པར་བརྟེན། བོད་ལྗོངས་ཀྱི་དཔལ་འབྱོར་དང་སྤྱི་ཚོགས་ལ་གྲུབ་འབྲས་ཆེན་པོ་ཐོབ་ཡོད། འོན་ཀྱང་། ཡུ་རོབ་ཀྱི་མི་ཁག་ཅིག་གིས་ད་དུང་བོད་ལྗོངས་ཀྱི་དངོས་ཡོད་གནས་ཚུལ་ཤེས་ཀྱི་མེད་པའི་ཁར། ཏཱ་ལའི་ཚོགས་ཁག་གིས་མངོན་སུམ་འཛེམ་མེད་ངང་དོན་དངོས་འཁྱོག་བརྗོད་བྱས་རྐྱེན། ཡུ་རོབ་ཀྱི་སྲིད་དོན་པ་དང་། གྲོས་ཚོགས་འཐུས་མི། མི་མང་ཁག་ཅིག་བཅས་ཀྱིས་བོད་ལྗོངས་ཀྱི་ད་ཡོད་གནས་ཚུལ་ཐད་གོ་ནོར་ཐེབས་ཀྱི་ཡོད། ཐེངས་འདིར་ང་ཚོ་འཐུས་ཚབ་ཚོས་ཡུ་རོབ་གྲོས་ཚོགས་ཀྱི་འཐུས་མི་དང་ལས་རིགས་ཁག་གི་མི་མང་ཚོར་སྦ་གསང་མེད་པར་བསམ་བློ་བརྗེ་རེས་བྱས་ཏེ་དོགས་པ་རྣམ་རྟོག་སངས་ཐུབ་བྱ་རྒྱུ་ཡིན” ཞེས་སོགས་བརྗོད་འདུག

ཉིན་དེར་བྷེལ་ཇམ་བོད་རིགས་ཚོགས་པའི་གོ་སྒྲིག་འོག་ཡུ་རོབ་གྲོས་ཚོགས་མདུན་ཐང་དུ། བོད་མི་དང་བོད་དོན་རྒྱབ་སྐྱོར་བ་མི་གྲངས་བརྒྱ་སྐོར་ཞིག་བོད་ལྗོངས་ནས་ཕེབས་པའི་སྐུ་ཚབ་ཚོས་རྒྱ་ནག་དམར་པོའི་གཡོ་འོག་ཏུ་མ་ཚུད་པར་སྐད་ཆ་དྲང་བཤད་བྱ་དགོས་པའི་སྐད་འབོད་་ཁྲོམ་སྐོར་གནང་ཡོད་འདུག

གསར་འགོད་པ། དོན་འགྲུབ་བཀྲ་ཤིས།