དེ་རིང་གཟའ་ཕུར་བའི་ཉིན་དྷ་ས་ཐེག་ཆེན་ཆོས་གླིང་གཙུག་ལག་ཁང་གི་སྒོ་འགྲམ་དུ་ས་གནས་བུད་མེད་ལྷན་ཚོགས་ཀྱིས་༼ ཨ་མས་བུ་བཙལ་བ ༽ཞེས་པའི་མཚན་རྟགས་བསྡུ་རུབ་ཀྱི་ལས་འགུལ་ཞིག་སྤེལ་ཏེ། ༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་གསལ་འདོན་བྱ་དགོས་པའི་འབོད་སྐུལ་གནང་སོང་།
དེ་རིང་ཕྱི་ཚེས་ ༡༧ ཉིན་གྱི་སྔ་དྲོ་དྷ་ས་ཐེག་ཆེན་གཙུག་ལག་ཁང་གི་སྒོ་འགྲམ་དུ། དབུས་བོད་ཀྱི་བུད་མེད་ལྷན་ཚོགས་ཀྱི་བཀོད་ཁྱབ་གཞིར་བཟུང་། དྷ་ས་ས་གནས་བོད་ཀྱི་བུད་མེད་ལྷན་ཚོགས་ཀྱིས་༼ ཨ་མས་བུ་བཙལ་བ ༽ཞེས་པའི་མཚན་རྟགས་བསྡུ་རུབ་ཀྱི་ལས་འགུལ་ཞིག་སྤེལ་ཏེ། རྒྱ་གཞུང་གིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་ཡང་སྙིང་གང་དུ་བཞུགས་ཡོད་མེད་དང་། ཁོང་གི་སྐུ་གཟུགས་དང་སློབ་སྦྱོང་གི་གནས་བབ་ག་འདྲ་ཡིན་མིན་གསལ་བོ་བཟོ་དགོས་པའི་འབོད་སྐུལ་གྱི་གསར་འགོད་གསལ་བསྒྲགས་ཤིག་སྤེལ་སོང་། དེ་བཞིན། ས་གནས་ཁག་གཞན་དག་ཏུའང་གཅིག་མཚུངས་ཀྱི་སྒོ་ནས་ལས་འགུལ་སྤེལ་བཞིན་ཡོད་འདུག
ཕྱི་ལོ་ ༢༠༡༢ ཟླ་ ༥ ཚེས་ ༡༧ ཉིན་ནི་རྒྱ་གཞུང་གིས་༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་འཛིན་བཟུང་བཙོན་འཇུག་བྱས་ཏེ་ལོ་ངོ་ཧྲིལ་པོ་ ༡༧ འཁོར་བའི་ཉིན་མོ་ཡིན་སྟབས། བོད་ཀྱི་བུད་མེད་ལྷན་ཚོགས་ཀྱིས་ས་གནས་ཁག་སོ་སོའི་ནང་མཚན་རྟགས་བསྡུ་རུབ་བྱས་རྗེས། རྒྱ་དམར་འཐབ་ཕྱོགས་གཅིག་གྱུར་ཁང་གི་མགོ་གཙོ་ཀྲུའུ་ཝེ་ཆོན་ལ་སྦྲགས་ཁང་བརྒྱུད་བཏང་སྟེ། ༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་མགྱོགས་མྱུར་གློད་ཀྲོལ་དགོས་པ་ནན་སྐུལ་བྱ་རྒྱུ་ཡིན་འདུག
དེ་བཞིན། བོད་རང་སྐྱོང་ལྗོངས་ཀྱི་མགོ་ཁྲིད་པད་མ་འཕྲིན་ལས་བརྒྱུད་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་ལ་འཚམས་འདྲིའི་ཤོག་བྱང་ཞིག་ཀྱང་བསྐུར་རྒྱུ་ཡིན་པ་དང་། ཤོག་བྱང་དེའི་སྟེང་༸གོང་ས་མཆོག་གིས་བོད་རང་གི་སྔར་སྲོལ་སྤྲུལ་སྐུ་ངོས་འཛིན་ཞུ་སྟངས་ཀྱི་ལམ་ནས། ༸པཎ་ཆེན་སྐུ་ཕྲེང་ ༡༡ པ་མཆོག་ངོས་འཛིན་གནང་པའི་རྗེས། ད་ལྟའི་བར་གར་སོང་ཆ་མེད་དུ་གྱུར་ཏེ་མི་ལོ་ ༡༧ འགོར་ཡོད་པ་དང་། དུས་ཡུན་དེའི་རིང་བོད་ཀྱི་ཨ་མ་ཚོས་རང་གི་བརྩེ་བའི་བུ་ཆུང་དྲན་པའི་གདུང་བའི་མིག་ཆུ་མཚམས་ཆད་མ་མྱོང་ལ། བུ་ཆུང་ཁྱེད་ད་སྐབས་ས་གནས་གང་དུ་ཇི་ལྟར་བཞུགས་ཡོད་མེད་དང་། བོད་ཀྱི་ཨ་མ་ཚོས་ཉིན་མཚན་དུས་དྲུག་ལ་ཁྱེད་ཉིད་དྲན་པའི་གདུང་བས་མནར་བཞིན་ཡོད་པས། བརྩེ་བའི་བུ་ཆུང་ཁྱེད་དང་མགྱོགས་པོར་མཇལ་བའི་སྨོན་ལམ་གསོལ་འདེབས་གནང་གི་ཡོད་ཅེས་འཁོད་དེ། ཤོག་བྱང་དེ་ཁོང་གི་ཕྱག་ཏུ་སོན་ཐུབ་པའི་རེ་བ་རྒྱག་གི་ཡོད་འདུག
གསར་འགོད་གསལ་བསྒྲགས་དེའི་ནང་། དེ་སྔོན་བོད་རང་སྐྱོང་ལྗོངས་ཟེར་པའི་དམར་ཤོག་དྲུང་ཆེ་གཞོན་པ་པད་མ་འཕྲིན་ལས་སོགས་ནས། ༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་ནང་མི་རྣམས་བདེ་འཇགས་ངང་འཚོ་བ་རོལ་བཞིན་ཡོད་ཚུལ་བརྗོད་ཡོད་ཀྱང་། ད་ལྟའི་བར་ཁོང་གི་གྲིབ་མ་ཙམ་ཡང་བོད་མིའི་མདུན་དུ་གསལ་སྟོན་བྱས་མེད་པར་བརྟེན། བོད་ཀྱི་བུད་མེད་ལྷན་ཚོགས་ཀྱི་ངོས་ནས་༸པཎ་ཆེན་རིན་པོ་ཆེ་མཆོག་གི་དངོས་ཡོད་གནས་སྟངས་ག་འདྲ་ཡོད་མེད་ངེས་པར་གསལ་འདོན་དགོས་པ་ནན་བརྗོད་བྱས་འདུག
གསར་འགོད་པ། ཚེ་རིང་རྒྱལ།
བུད་མེད་ལྷན་ཚོགས་ཀྱིས་ཨ་མས་བུ་བཙལ་བའི་ལས་འགུལ་ལས། ཨ་མས་བུ་བཙའ་བའི་ལས་འགུལ་ཞིག་སྤེལ་ཐུབ་ན་བཟང་།
བེུད་ཚོགས་པའི་ད་ཐེངས་ཀྱི་ལས་འགུལ་འདི་བཞིན་སྔོན་མ་བཀའ་ཁྲིའི་ཚོད་ལྟའི་འོས་ཤོག་བསྡུ་བ་བཞིན་མ་ཡིན་པའི་རེ་སྐུལ་ཞུ་བཞིན་ཡོད། ཁོ་བོས་ནང་རྒྱུན་བེུད་ཚོགས་པའི་ལས་འགུལ་ལ་མཉམ་བཞུགས་དང་ཡིད་ཆས་ཆེན་པོ་བྱེད་ཀྱི་ཡོད། འོན་ཀྱང་ཁོང་ཚོས་བཀའ་ཁྲིའི་ཚོད་ལྟར་འོས་ཤོག་དེས་ང་སེམས་གཏིང་ནས་ཞེན་པ་ལོག་བཅུག་སོང།