རྒྱལ་ཡུམ་རྗེས་དྲན་བུམ་པའི་རྐང་སྤོལ་རྩེད་འགྲན་དབུ་འཛུགས་གནང་སོང་།

གཟའ་སྤེན་པའི་ཉིན་རྒྱལ་ཡུམ་རྗེས་དྲན་བུམ་པའི་རྐང་སྤོལ་རྩེད་འགྲན་མཛད་སྒོ་དྷ་སྟེང་བོད་ཁྱིམ་རྩེད་ཐང་དུ་དབུ་འབྱེད་ཀྱིས། ཐོག་མའི་འགྲན་ཐེངས་གཉིས་ལས་ཀ་ལི་མན་ཊོན་དང་སྦོག་ར་རུ་ཁག་གཉིས་འདྲ་མཉམ་ཆགས་ཡོད་པ་དང་། མོན་གྷོ་དང་སྦེལ་ཀོབ་རུ་ཁག་གཉིས་བར་མོན་གྷོ་རུ་ཁག་རྒྱལ་ཡོད་པ་རེད།

ཟླ་འདིའི་ཕྱི་ཚེས་ ༢༦ ཉིན་རྒྱབ་ཆུ་ཚོད་ ༡ པོའི་སྟེང་དྷ་སྟེང་བོད་ཁྱིམ་རྩེད་ཐང་དུ། རྒྱལ་ཡུམ་རྗེས་དྲན་བུམ་པའི་རྐང་སྤོལ་རྩེད་འགྲན་ཐེངས་ ༡༨ པ་དངོས་སུ་དབུ་འཛུགས་གནང་ཡོད་ལ། དབུ་འབྱེད་མཛད་སྒོའི་སྐུ་མགྲོན་གཙོ་བོར་རྒྱ་གར་རྒྱལ་ཡོངས་རྐང་སྤོལ་རུ་ཁག་གི་རུ་གཙོ་ཟུར་པ་བུ་ཆུང་བྷོ་ཊའི་ཡ་ལགས་དང་། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག ནེའུ་ཛི་ལན་ཌའི་རྐང་སྤོལ་རྩེད་འགྲན་པ་ཌེམ་བྷི་རོན་ལགས་གསུམ་གཙོས། བོད་མི་མང་སྤྱི་འཐུས་ཁག་ཅིག་དང་། གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ། ལྟད་མོར་གཟིགས་མཁན་སེར་སྐྱ་མང་ཚོགས་བཅས་མི་གྲངས་སྟོང་ཕྲག་མང་པོ་འཛོམས་འདུག མཛད་སྒོའི་ཐོག་མར་དྷ་སྟེང་བོད་ཁྱིམ་རིག་རྩེད་རུ་ཁག་གིས་རྔ་རོལ་སྒྲ་དབྱངས་ཀྱིས་རུ་སྣེ་དྲངས་ཏེ། འགྲན་ཞུགས་རུ་ཁག་རྣམས་རྩེད་ཐང་དུ་འཛུལ་ཏེ་རུ་སྒྲིག་གནང་རྗེས། མི་མང་ཡོངས་རྫོགས་སྐུ་བཞེངས་ཐོག་བོད་རྒྱལ་ཁབ་ཆེན་མོའི་རྒྱལ་གླུ་དང་རྒྱ་གར་གྱི་རྒྱལ་གླུ་བླངས་ཏེ་རྒྱལ་དར་གཉིས་སྔ་རྗེས་བསྒྲེངས་འཛུགས་དང་། བོད་ཀྱི་རང་དབང་བདེན་པའི་འཐབ་རྩོད་ཆེད་བོད་ནང་རང་ལུས་མེར་བསྲེགས་གཏོང་མཁན་རྣམས་ཀྱིས་གཙོས་རྒྱལ་གཅེས་དཔའ་བོ་དཔའ་མོ་རྣམས་ལ་རྗེས་དྲན་མཚོན་ཆེད་དུས་ཡུན་སྐར་མ་གཅིག་རིང་ངག་བཅད་མྱ་ངན་དང་བདེན་ཚིག་སྨོན་ལམ་དབྱངས་ལ་གྱེར་རྗེས། བོད་རྒྱལ་ཡོངས་རྩེད་རིགས་ཚོགས་པའི་ཚོགས་གཙོ་སྐལ་བཟང་དོན་གྲུབ་ལགས་ཀྱིས་ཐེངས་འདིའི་རྐང་སྤོལ་རྩེད་འགྲན་དབུ་འཛུགས་ཀྱི་གསུང་བཤད་དང་། སྐུ་མགྲོན་གཙོ་བོ་བུ་ཆུང་བྷོ་ཊི་ཡ་དང་ཌེམ་བྷི་རོན་ལགས་གཉིས་ཀྱིས་ཀྱང་གཏམ་བཤད་གནང་སོང་།

ཐེངས་འདིའི་རྒྱལ་ཡུམ་རྗེས་དྲན་བུམ་པའི་རྐང་སྤོལ་རྩེད་འགྲན་གྱི་མཛད་སྒོའི་ཐོག བུ་ཆུང་བྷོ་ཊའི་ཡ་ལགས་ཀྱིས་དུས་རྒྱུན་བོད་དོན་ཐད་རྒྱབ་སྐྱོར་གནང་བཞིན་པར་ཐུགས་རྗེ་ལེགས་གསོལ་མཚོན་ཆེད། བཙན་བྱོལ་བོད་མིའི་གཞུང་འབྲེལ་མ་ཡིན་པའི་ཚོགས་པ་ཁག་ལྔས་བོད་མི་ས་ཡ་དྲུག་གི་ཚབ་བྱས་ཏེ་ཁོང་ལ་སྟོན་པའི་ཞལ་ཐང་ཞིག་ལེགས་སྐྱེས་སུ་ཕུལ་ཡོད་པ་དང་། བུ་ཆུང་བྷོ་ཊའི་ཡ་ལགས་ཀྱིས་བོད་རྒྱལ་ཡོངས་རྐང་སྤོལ་རུ་ཁག་གི་རུ་དར་དང་སྒྲིག་ཆས་དབུ་འབྱེད་དང་།  ཁོང་གིས་མཛད་སྒོའི་གཏམ་བཤད་སྐབས་ཐེངས་འདིར་བོད་རྒྱལ་ཡོངས་རྐང་སྤོལ་རྩེད་འགྲན་ཐོག་བཅར་ཐུབ་པར་དགའ་ཚོར་ཆེན་པོ་བྱུང་ལ།  དྷ་རམ་ས་ལ་ནི་༸གོང་ས་མཆོག་གི་བཞུགས་གནས་དང་ནང་པའི་བསྟི་གནས་རྩ་ཆེན་ཞིག་ཆགས་ཡོད་སྟབས། སྔ་མོ་ནས་ཁོང་དང་ཁོང་གི་ནང་མི་རྣམས་དྷ་སར་༸གོང་ས་མཆོག་ལ་མཇལ་ཁ་ཞུ་བར་བཅར་འདུན་ཡོད་སྐོར་བརྗོད་སོང་།   

ཉིན་རྒྱབ་ཆུ་ཚོད་ ༣ པའི་སྟེང་བུ་ཆུང་བྷོ་ཊའི་ཡ་ལགས་ཀྱིས་གསར་འགོད་ལྷན་ཚོགས་ཤིག་གནང་ཡོད་ལ།  སྐབས་དེར་གསར་འགོད་པས་ཁོང་ཉིད་བོད་པར་དམིགས་བསལ་འབྲེལ་འདྲིས་ཆེ་བའི་རྒྱུ་མཚན་དྲིས་པར། ཁོང་གིས་ “གལ་སྲིད་ཁྱེད་རང་འབྲས་ལྗོངས་ནང་འཚར་ལོངས་བྱུང་མཁན་ཞིག་ཡིན་ཚེ། རྒྱུ་མཚན་དེ་མི་གཞན་ཞིག་གིས་འགྲེལ་བཤད་རྒྱག་མ་དགོས་པར་སོ་སོའི་ངོས་ནས་རང་བཞིན་གྱིས་ཚོར་ཐུབ་པ་ཞིག་རེད།” ཅེས་བརྗོད་དེ། འབྲས་ལྗོངས་དང་བོད་གཉིས་ནི་སྐད་ཡིག་དང་རིག་གཞུང་། ཆོས་ལུགས་ཀྱིས་མཚོན་པའི་ཕྱོགས་ཡོངས་ནས་འབྲེལ་བ་ཟབ་མོ་ཡོད་པ་དང་། ཁོང་རང་གི་སྤུན་མཆེད་དག་གི་གཉེན་ཉེ་མང་པོ་ཞིག་ཀྱང་བོད་པ་ཡིན་སྟབས། སོ་སོའི་ནང་མིའི་ངོས་ཐད་ནས་ཀྱང་བོད་པ་དང་འབྲེལ་བ་ཤུགས་ཆེན་པོ་ཆགས་ཀྱི་ཡོད་པ་བརྗོད་ཡོད་ལ། དེ་བཞིན། བོད་ནང་གི་ད་ལྟའི་གནས་སྟངས་དང་འབྲེལ་བའི་དྲི་བར་ལན་འདེབས་སྐབས། ཁོང་གིས་བོད་ནང་དུ་འགྲོ་བ་མིའི་ཐོབ་ཐང་དང་རང་དབང་མེད་པའི་དཀའ་ངལ་ཞིག་གི་འོག་སོ་སོའི་ངོས་ནས་འཐབ་རྩོད་བྱས་ཏེ། མི་མང་པོ་ཞིག་གིས་རང་ལུས་མེར་བསྲེགས་གཏོང་བཞིན་པ་དེ་ནི། ཧ་ཅང་གི་སེམས་པ་སྐྱོ་དགོས་པའི་གནས་སྟངས་ཤིག་ཆགས་ཡོད་ལ། གནས་ཚུལ་དེ་ཡིས་བོད་པའི་སྤྱི་ཚོགས་དང་རྒྱལ་སྤྱིའི་སྒང་ཤུགས་རྐྱེན་ཏན་ཏན་སླེབས་ཀྱི་ཡོད་མོད། མུ་མཐུད་འགྲོ་བཞིན་པའི་མེར་བསྲེགས་ལས་འགུལ་ཐད་ཁོ་རང་ངོས་ནས་སེམས་ཤུགས་སྤར་ཐབས་སོགས་གང་ཡང་ཞུ་ཡི་མེད་སྐོར་བརྗོད་ཡོད་པ་རེད།

དངོས་གཞིའི་རྐང་སྤོལ་རྩེད་འགྲན་དབུ་འཛུགས་མ་བྱས་པའི་སྔོན་ལ། རྩེད་ཐང་དབུ་འབྱེད་དུ་ས་གནས་ཀང་ར་རྫོང་གི་རྒྱ་གར་བུ་མོའི་རུ་ཁག་དང་། བོད་ཁྱིམ་མཉམ་འབྲེལ་བུ་མོའི་རུ་ཁག་གཉིས་ཀྱི་བར་དུས་ཡུན་སྐར་མ་ ༣༠ རིང་མཛའ་འབྲེལ་རྐང་སྤོལ་རྩེད་འགྲན་ཞིག་བྱས་ཏེ། བོད་ཁྱིམ་མཉམ་སྦྲེལ་བུ་མོའི་རུ་ཁག་གིས་ཕར་སྤོ་ལོ་ ༢ བླུགས་པ་དང་། ཀང་ར་བུ་མོའི་རུ་ཁག་ཚུར་སྤོ་ལོ་གཅིག་ཀྱང་བླུགས་མ་ཐུབ་པར་བོད་ཁྱིམ་མཉམ་སྦྲེལ་བུ་མོའི་རུ་ཁག་རྒྱལ་ཡོད་པ་རེད། ཕྱི་དྲོ་ཆུ་ཚོད་ ༢ དང་ཕྱེད་ཀའི་སྟེང་རྒྱལ་ཡུམ་ཆེན་མོ་རྗེས་དྲན་བུམ་པའི་རྐང་སྤོལ་རྩེད་འགྲན་ཐེངས་ ༡༨ ཐོག་མའི་རྩེད་འགྲན་དེ། ཀ་ལི་མན་ཊོན་དོན་འགྲུབ་གླིང་དང་སྦོག་ར་བཀྲ་ཤིས་འཕེལ་རྒྱས་གླིང་རུ་ཁག་གཉིས་པར་རྩེད་འགྲན་གནང་སྟེ། ཕྱོགས་གཉིས་ཀྱིས་ཕར་ཚུར་ལ་སྤོ་ལོ་ ༡ རེ་བླུགས་ཏེ་འདྲ་མཉམ་ཆགས་ཡོད། ཕྱི་དྲོ་ཆུ་ཚོད་ ༤ དང་ཕྱེད་ཀའི་སྟེང་། མོན་གྷོ་འདོད་དགུ་གླིང་དང་སྦེལ་ཀོབ་བདེ་སླར་རུ་ཁག་གཉིས་བར་རྩེད་འགྲན་གནང་སྟེ། མོན་གྷོ་འདོད་དགུ་གླིང་རུ་ཁག་གིས་སྤོ་ལོ་ ༡ བླུགས་ཤིང་།  བྷེལ་ཀོབ་བདེ་སླར་རུ་ཁག་གིས་སྤོ་ལོ་གཅིག་ཀྱང་བླུགས་མ་ཐུབ་པར་མོན་གྷོ་འདོད་དགུ་གླིང་རུ་ཁག་རྒྱལ་ཡོད་པ་རེད།

ཐོག་མའི་རྩེད་འགྲན་སྐབས་སྡེ་ཚན་ ༦ དུ་ཁག་བགོས་ཀྱིས་ནང་ཁུལ་རེས་མོས་རྩེད་འགྲན་གནང་སྟེ། སྡེ་ཚན་སོ་སོའི་རྩེ་ཕུད་ ༦ དང་ལྷག་འཕྲོས་བརྒྱ་ཆ་མཐོ་ཤོས་ ༢ བཅས་རུ་ཁག་བརྒྱད་བདམས་རྒྱུ་ཡིན་པ་ལྟར། སྡེ་ཚན་ ༦ སོ་སོར་ཁག་བགོས་རུ་ཁག་དག་ནི། སྡེ་ཚན་༼ཀ༽ནང་། དོན་འགྲུབ་གླིང་ཀ་ལི་མན་ཊོན། སྦོག་ར་བཀྲ་ཤིས་འཕེལ་རྒྱས་གླིང་། མེའོ་ཆོས་འཕེལ་གླིང་རུ་ཁག་གསུམ་དང་། སྡེ་ཚན་༼ཁ༽ནང་།  ཝ་ར་ན་མཐོ་སློབ་རུ་ཁག  པུ་ནེ། བོད་ཁྱིམ་རུ་ཁག་གསུམ། སྡེ་ཚན་༼ག༽ནང་། ནོར་གླིང་། གྷོ་བ། ལྡི་ལི་མཉམ་འབྲེལ། སྡེ་ཚན་༼ང༽ནང་། ཤི་ལོང་གངས་ལྗོངས། ཅོན་དྷི་ར་མཉམ་འབྲེལ། ཅེ་ནེ་རུ་ཁག་གསུམ། སྡེ་ཚན་༼ཅ༽ནང་།  དྷ་ས། བལ་ཡུལ་འཕགས་ཞིང་། གྷོ་བ་ལེ་བྷར་ཌི་རུ་ཁག་གསུམ། སྡེ་ཚན་༼ཆ༽ ནང་། བདེ་སྐྱིད་གླིང་མོན་གྷོ་ཌི། བྷེལ་ཀོབ། ཨོ་རི་ས་ཕུན་ཚོགས་གླིང་། དྷ་ལ་ཧོ་སི་ཕུན་ཚོགས་གླིང་རུ་ཁག་བཞི་བཅས་ཡིན་པ་རེད།

འདི་ལོའི་རྩེད་འགྲན་གྱི་རྟིང་རྩོད་རྒྱལ་ཁ་ཐོག་མཁན་ལ་བོད་རྒྱལ་ཡོངས་རྩེད་རིགས་ཚོགས་པའི་ངོས་ནས་ཧིན་སྒོར ༢༥༠༠༠ དང་། ཅེ་ནའེ་བོད་དོན་རྒྱབ་སྐྱོར་བ་ལྕམ་ཨ་ཞཱ་རེའ་ལགས་ཀྱིས་ཧིན་སྒོར་ ༥༠༠༠༠ བཅས་ཁྱོན་བསྡོམས་བྱ་དགའ་ཧིན་སྒོར་ ༧༥༠༠༠ འབུལ་རྒྱུ་ཡིན་པ་དང་།  ཨ་ཞཱ་རེའ་ལགས་ཀྱིས་ ༢༠༡༠ དང་ ༢༠༡༡ ལོ་གཉིས་ཀྱི་རྟིང་རྩོད་རྒྱལ་ཁ་ལེན་མཁན་ལའང་ཧིན་སྒོར་ ༥༠༠༠༠ རེ་བྱ་དགའི་སྦྱིན་བདག་གནང་ཡོད་པ་རེད། འདི་ལོའི་རྩེད་འགྲན་སྤྱིའི་འགྲོ་གྲོན་ཧིན་སྒོར་ ༡༡༠༠༠༠༠ དང་ཡོང་འབབ་ཧིན་སྒོར་ ༥༠༠༠༠༠ ལས་མེད་སྟབས། དགའ་ལྡན་ཕོ་བྲང་གིས་ཧིན་སྒོར་ ༥ ༣༢༨༩༢ གསོལ་རས་བསྩལ་ཡོད་འདུག   ཐེངས་འདིའི་རྩེད་འགྲན་ལྟད་མོ་བའི་འཛིན་བྱང་ལ་ཚད་གཞི་མི་འདྲ་བ་རིགས་གསུམ་ཡོད་པ་དང་། དམིགས་བསལ་རྐུབ་སྟེགས་ཡོད་པའི་འཛིན་བྱང་ལ་ཧིན་སྒོར་ ༢༠༠༠ དང་། འགྲན་ཐེངས་ཡོངས་རྫོགས་སྡེབས་འཚོང་འཛིན་བྱང་ལ་ཧིན་སྒོར་ ༣༠༠ ། ཉིན་རེའི་འགྲན་ཐེངས་འཛིན་བྱང་ལ་ཧིན་སྒོར་ ༥༠ བཅས་ཡིན་འདུག 

གསར་འགོད་པ། ཚེ་རིང་རྒྱལ།