གྷོ་བ་དང་ཤི་ལོང་གཉིས་རྒྱལ་འདུག

དེ་རིང་གཟའ་ཉི་མའི་ཕྱི་དྲོའི་འགྲན་ཐེངས་གསུམ་གྱི་ཁྲོད་ནས། གྷོ་བ་དང་གངས་ལྗོངས་ཤི་ལོང་རུ་ཁག་གཉིས་སོ་སོའི་འགྲན་ཡ་ལས་རྒྱལ་ཡོད་པ་དང་། པུ་ནེ་དང་ཝར་ཎ་མཐོ་སློབ་གཉིས་འདྲ་མཚུངས་ཆགས་འདུག  

དེ་རིང་ཕྱི་ཚེས་ ༢༧ ཉིན་གྱི་འགྲན་ཐེངས་གསུམ་གྱི་ཁྲོད་ནས། སྡེ་ཚན་༼ཁ༽ནང་རུ་བགོས་པུ་ནེ་དང་ཝ་ར་ཎ་སི་མཐོ་སློབ་གཉིས་བར་རྩེད་འགྲན་མཇུག་འབྲས་ནི། རུ་ཁག་གཉིས་ཀྱིས་ཕར་ཚུར་ལ་སྤོ་ལོ་ ༢ རེ་བླུགས་ཏེ་འདྲ་མཚུངས་ཆགས་ཡོད་པ་དང་།  སྡེ་ཚན་༼ག༽ནང་རུ་བགོས་ནོར་གླིང་བྷན་དྷི་ར་དང་གྷོ་བ་གཉིས་བར་གྱི་རྩེད་འགྲན་མཇུག་འབྲས་ནི། གྷོ་བ་རུ་ཁག་གིས་སྤོ་ལོ་ ༢ བླུགས་ཤིང་། ནོར་གླིང་བྷན་དྷི་ར་རུ་ཁག་གིས་གཅིག་ཀྱང་བླུགས་མ་ཐུབ་པར་གྷོ་བ་རུ་ཁག་རྒྱལ་ཡོད་པ་དང་།  སྡེ་ཚན་༼ང༽ནང་རུ་བགོས་གངས་ལྗོངས་ཤི་ལོང་དང་ཅོན་དྷ་ར་གཉིས་བར་རྩེད་འགྲན་མཇུག་འབྲས་ནི། གངས་ལྗོངས་ཤི་ལོང་གིས་སྤོ་ལོ་ ༢ བླུགས་ཤིང་།  ཅོན་དྷ་ར་རུ་ཁག་གིས་གཅིག་ཀྱང་བླུགས་མ་ཐུབ་ར་གངས་ལྗོངས་ཤི་ལོང་རྒྱལ་འདུག 

སང་ཉིན་ཕྱི་ཚེས་ ༢༨ ཉིན་གྱི་འགྲན་ཐེངས་གསུམ་ནི་དྷ་སྟེང་བོད་ཁྱིམ་རྩེད་ཐང་དུ་རྩེད་འགྲན་བྱ་རྒྱུ་དང་། སྡེ་ཚན་༼ཅ༽ནང་རུ་བགོས་དྷ་ས་ཆིག་སྒྲིལ་དང་འཕགས་ཤིང་ཀ་ལི་མན་ཊོན་རུ་ཁག་གཉིས་བར། ཉིན་རྒྱབ་ཆུ་ཚོད་ ༡: ༣༠ སྟེང་རྩེད་འགྲན་དང་།  སྡེ་ཚན་༼ཆ༽ནང་རུ་བགོས་མོན་གྷོ་ཊི་འདོད་དགུ་གླིང་དང་ཕུན་ཚོགས་གླིང་གྷ་ལ་ཧོ་སི་གཉིས་བར། ཉིན་རྒྱབ་ཆུ་ཚོད་ ༣: ༡༥ སྟེང་རྩེད་འགྲན། སྡེ་ཚན་༼ཀ༽ནང་རུ་བགོས་བཀྲ་ཤིས་དཔའ་འཁྱིལ་སྦོག་ར་དང་མེའོ་ཆོས་འཕེལ་གླིང་གཉིས་བར། ཕྱི་དྲོ་ཆུ་ཚོད་ ༥ སྟེང་རྩེད་འགྲན་བཅས་བྱ་རྒྱུ་རེད།