ཤིག་གི་སྟེང་ལ་སྟ་རེ།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༥༥༦ སྟེང་གི་རྩོམ་སྒྲིག་པའི་གཏམ།

གླིངཚ་མ་བུ་གསུམ་གྱིས་བོད་དོན་ཞི་བའི་གོམ་བགྲོད་སྐབས་རྒྱ་ནག་གི་རྒྱལ་དར་འཕྱར་བ་དེར་བཙན་བྱོལ་སྤྱི་ཚོགས་ཁྲོད་གླེང་ཕྱོགས་སྣ་ཚོགས་ཤིག་བྱུང་ཡོད་ཅིང་། ཁག་ཅིག་གིས་རྒྱ་ནག་གི་དར་དམར་འོག་བོད་མི་བགྲང་ལས་འདས་པ་ཞིག་གི་ཚེ་སྲོག་ཤོར་ཡོད་པ་མ་ཟད། དེང་སྐབས་བོད་ནང་མེ་མདའ་དང་ལྕགས་སྒྲོག་འོག་ན་རྒྱ་ནག་གི་རྒྱལ་དར་མར་ཕབ་སྟེ་འཐབ་རྩོད་བྱེད་བཞིན་ཡོད་དུས། ཕྱི་ལོགས་ནས་རྒྱ་ནག་གི་དར་དམར་ཡར་འཕྱར་ཏེ་ལས་འགུལ་སྤེལ་བ་ནི་ནོར་འཁྲུལ་དང་ནག་ཉེས་ཚབས་ཆེན་ཡིན་རབས་བཤད་ཅིང་། དབུས་བོད་ཀྱི་གཞོན་ནུ་ལྷན་ཚོགས་ཀྱིས་ཀྱང་ “བཙན་བྱོལ་བོད་མིའི་ལོ་རྒྱུས་ནང་ནག་ཐིག་ཆེན་པོ་ཞིག་བཟོས་ཡོད”ཅེས་ངོ་རྒོལ་གྱི་གསར་འགོད་བསྒྲགས་གཏམ་སྤེལ་ཡོད།

    ཡང་ཁག་ཅིག་གིས་རྒྱ་ནག་གི་རྒྱལ་དར་དེ་རྒྱ་ནག་དམར་པོའི་གཞུང་གི་དར་ཆ་ཙམ་མིན་པར། བོད་དང་སོག་པོ། ཡུ་གུར་གཙོས་པའི་མི་རིགས་ང་དྲུག་དང་མི་དམངས་དུང་ཕྱུར་བཅུ་གསུམ་ལས་གྲུབ་པའི་རྒྱ་ནག་མི་དམངས་སྤྱི་འཐུན་རྒྱལ་ཁབ་ཀྱི་མཚོན་དོན་དང་སྤོབས་པ་ཡིན་སྟབས། རྒྱ་ནག་གི་རྒྱལ་དར་འཕྱར་ཏེ་ལས་འགུལ་སྤེལ་བ་ནི་ད་ལྟའི་བོད་དོན་འཐབ་རྩོད་ཀྱི་ལངས་ཕྱོགས་དང་མཐུན་ཞིང་། གཉིས་སྨན་དབུ་མའི་ལམ་གྱི་ངོ་བོ་མངོན་སུམ་དུ་མཚོན་པར་བྱས་པའི་ལས་འགུལ་ཕུལ་བྱུང་ཞིག་ཡིན་རབས་གླེང་། དབུ་མའི་ལམ་མི་མང་ལས་འགུལ་ཁང་གིས་དེ་ལ་ “ཁོང་མ་བུ་གསུམ་གྱིས་རྒྱ་ནག་གི་རྒྱལ་དར་གཅིག་པུ་འཕྱར་བ་མིན་པར། བོད་དང་རྒྱ་གར། བལ་ཡུལ་བཅས་ཀྱི་རྒྱལ་དར་མཉམ་འཕྱར་གྱིས་བོད་ཀྱི་བདེན་དོན་འཐབ་རྩོད་གནང་བ་ནི་དངོས་ཡོད་དང་མཐུན་ལ། རྣམ་དཔྱོད་ལྡན་པ། དབུ་མའི་ལམ་གྱི་ནང་དོན་སྒྲུབ་པའི་འཐབ་རྩོད་བྱ་ཕྱོགས་བཅས་ཡིན” ཞེས་རྒྱབ་སྐྱོར་གྱི་གསར་འགོད་བསྒྲགས་གཏམ་སྤེལ།

    རྟག་མཐའ་དང་ཆད་མཐའ་གང་ལའང་མ་ལྷུང་བའི་དབུས་སྨྲ་བ་སྐོར་ཞིག་གིས་མི་སྒེར་བ་ཞིག་གིས་རྒྱ་ནག་གི་རྒྱལ་དར་འཕྱར་ཏེ་ལས་འགུལ་སྤེལ་བ་དེར་ནོར་འཁྲུལ་དང་ནག་ཉེས་གང་ཡང་མེད་ཀྱང་། དུས་ཚོད་ཀྱི་ཆ་ནས་ཅུང་སྔ་དྲགས་པ་དང་། ཕྱི་ཚུལ་གྱི་ཐོག་ནས་མི་མང་གི་བློ་ངོར་འཇུག་མ་བདེ་བ་ཡོང་སྲིད་ཀྱང་། དོན་གྱིས་དབུས་བོད་མིའི་སྒྲིག་འཛུགས་ཀྱི་ད་ལྟའི་བོད་དོན་འཐབ་རྩོད་ཀྱི་ལངས་ཕྱོགས་“རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་ནང་ཁྲིམས་མཐུན་གྱི་ཐོབ་ཐང་ཡོད་པའི་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་གནས་བབ་ཚད་ལྡན་མིང་དོན་མཚུངས་པ་ཞིག་དགོས”ཟེར་བ་དེར་ངོས་ལེན་ཡོད་ན། དམིགས་ཡུལ་དེའི་ཐོག་ལས་འགུལ་སྤེལ་ཕྱོགས་འདི་ཁོ་ན་ཉིད་ཡིན་ཚུལ་བརྗོད།

            སྤྱིར་བོད་དོན་འཐབ་རྩོད་ཀྱི་ཁ་ཕྱོགས་དང་རྣམ་པ། ངོ་བོ་ཚང་མ་མི་སྒེར་དང་ཚོགས་པ་བྱེ་བྲག་པར་དབང་བ་ཞིག་མིན་ལ། ཐེངས་འདིའི་གླིང་ཚ་མ་བུ་གསུམ་གྱི་ལས་འགུལ་སྤེལ་ཕྱོགས་ཐད་དུ་ཡང་། འགྲིག་དང་ནོར་གྱི་ཁ་ཚོན་བཅད་དེ་བཤད་པའི་འོས་བབ་སུ་དང་གང་ལ་ཡང་མེད། རྒྱ་ནག་གི་རྒྱལ་དར་འཕྱར་བ་དེ་ལོ་རྒྱུས་ཀྱི་ནག་ཐིག་ཅིག་ཡིན་ནམ། ཡང་ན་ལོ་རྒྱུས་ཀྱི་དོན་སྙིང་ཞིག་ཡིན། དེ་ནི་འདས་པའི་ལོ་རྒྱུས་ཀྱིས་འཇོག་རྒྱུ་ཞིག་མིན་པར་མ་འོངས་པའི་ལོ་རྒྱུས་ཀྱིས་ཁ་གྲགས་རྒྱུ་ཞིག་ཡིན་མོད། གང་ཟག་སྒེར་བ་ཞིག་གི་ལས་འགུལ་གྱི་རྣམ་པའི་ཐོག་ལ་ཚོགས་པ་སྒྲིག་འཛུགས་ཤིག་གིས་ངོ་རྒོལ་དང་རྒྱབ་སྐྱོར་གྱི་བསྒྲགས་གཏམ་སྤེལ་བ་དེ་ནི་“ཤིག་གི་སྟེང་ལ་སྟ་རེ”ཞེས་པའི་དཔེ་ལྟར་ད་ལྟའི་ཛ་དྲག་གི་གནས་སྟངས་འདིའི་འོག ནང་དོན་དང་རྣམ་པ་གཉིས་ཐད་ནས་ཧོལ་རྒྱུག་དང་ཐལ་ཆ་ཆེ་བའི་བྱེད་སྤྱོད་ཅིག་ཆགས་ཡོད་ལ། བོད་པ་ནང་ཁུལ་དུ་འཚིག་པ་གཡག་ལ་ཟོས་ཏེ་མགོ་ལྕག་རྟ་ལ་གཞུས་པའི་རྗེས་འབྲེལ་གྱི་གླེང་རྙོག་དག་གི་འགན་ཡོངས་རྫོགས་ཀྱང་ཚོགས་པ་དེ་དང་དེའི་ལས་ཀྱི་སྣེ་མོ་བས་འཁྱེར་དགོས།།