ཁ་སང་གཟའ་སྤེན་པའི་རང་བྱུང་ཁོར་ཡུག་སྲུང་སྐྱོབ་ཚོགས་ཐེངས་བཞི་པའི་ཉིན་མཐའ་མར་༸རྒྱལ་བ་ཀརྨ་པ་མཆོག་ཆེད་ཕེབས་ཀྱིས་ཚོགས་ཞུགས་པ་རྣམས་ལ་མ་འོངས་པར་ང་ཚོའི་ངོས་ནས་ནང་པ་སངས་རྒྱས་པའི་ཆོས་ཁོ་ནར་ཡིད་འཕྲོག་ཏེ་མི་འདུག་པར། ཆོས་ཀྱི་ཉམས་ལེན་དེ་ཁོར་ཡུག་སྲུང་སྐྱོབ་ཐོག་བསྒྱུར་ཐུབ་པར་བྱ་དགོས་པའི་ལམ་སྟོན་བཀའ་སློབ་གནང་ཡོད།
ཟླ་འདིའི་ཕྱི་ཚེས་ ༥ ནས་ཉིན་བཞིའི་རང་བྱུང་ཁོར་ཡུག་སྲུང་སྐྱོབ་ཚོགས་པའི་གོ་སྒྲིག་འོག་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་རྒྱ་བལ་འབྲུག་གསུམ་དུ་ཡོད་པའི་ཀརྨ་བཀའ་རྒྱུད་ཀྱི་དགོན་སྡེ་ཁག་གཙོས། བོད་མིའི་སྒྲིག་འཛུགས་ཕྱི་དྲིལ་ཁོར་ཡུག་སྡེ་ཚན། ས་གནས་ཁག་གི་ཁོར་ཡུག་སྲུང་སྐྱོབ་ཚོགས་པ་ཁག་ ༣༥ ལྷག་གི་སྐུ་ཚབ་ ༨༠ ལྷག་འདུ་འཛོམས་ཐོག་རང་བྱུང་ཁོར་ཡུག་སྲུང་སྐྱོབ་ཚོགས་ཐེངས་བཞི་པ་ཚོགས་ཡོད་ཅིང་། ཉིན་བཞིའི་རིང་གི་ཚོགས་འདུའི་ཐོག རྒྱལ་སྤྱིའི་རི་དྭགས་སྲུང་སྐྱོབ་ཚོགས་པའི་ལས་བྱེད་བདེ་སྐྱིད་ལགས་དང་། རྒྱ་གར་གྱི་ཁོར་ཡུག་སྲུང་སྐྱོབ་ཚོགས་པའི་ཚོགས་མི་གྷ་པུར་ལགས། བོད་མིའི་སྒྲིག་འཛུགས་ཕྱི་དྲིལ་ཁོར་ཡུག་སྡེ་ཚན་གྱི་ལས་བྱེད་ཚེ་རིང་དོན་འགྲུབ་ལགས་དང་འཇིགས་མེད་ནོར་བུ་ལགས་བཅས་གདན་ཞུས་ཐོག རྣམ་མང་སྐྱེ་དངོས་ཚན་རིག་དང་གནམ་གཤིས་འགྱུར་ལྡོག རང་བྱུང་རྐྱེན་ངན་ལ་གདོང་ལེན་བྱ་ཚུལ་བཅས་བརྗོད་གཞི་གསུམ་གྱི་ཐོག་ཚོགས་ཞུགས་པ་རྣམས་ལ་འཛམ་གླིང་ནང་སྐྱེ་ལྡན་གྱི་དངོས་པོ་ག་ཚོད་ཡོད་མེད་དང་དེ་དག་ཕན་ཚུན་བར་ལྟོས་གྲུབ་གང་འདྲ་ཡོད་མེད། རྒྱུ་རྐྱེན་ཞིག་ལ་བརྟེན་ནས་གནམ་གཤིས་འགྱུར་ལྡོག་བྱུང་མིན་དང་དེ་དག་གི་ཉེན་ཁ་བཅས་ཀྱི་ཐོག་གཏམ་བཤད་བགྲོ་གླེང་དང་དྲི་བ་དྲིས་ལན་བཅས་གནང་ཡོད་པ་རེད།
ཁ་སང་ཕྱི་ཚེས་ ༩ ཉིན་སྟེ། ཚོགས་འདུའི་ཉིན་མཐའ་མའི་ཕྱི་དྲོ་༸རྒྱལ་བ་ཀརྨ་པ་མཆོག་ཆེད་ཕེབས་ཀྱིས་ཚོགས་ཞུགས་པ་རྣམས་ལ། ཁོང་ཉིད་ཆུང་དུས་བོད་ནང་གི་ཡར་རྒྱས་མེད་པའི་ལུང་པ་ཁུག་ཀྱོག་ཅིག་ཏུ་སྐྱེས་ཏེ། འབྲོག་པའི་རང་བྱུང་ཁོར་ཡུག་གི་མཛེས་སྡུག་དང་འཚོ་བ་སྐྱེལ་སྟངས་ལ་ཉམས་སུ་མྱོང་བའི་གོ་སྐབས་བྱུང་བའི་བག་ཆགས་དང་ཤུགས་རྐྱེན་ལ་བརྟེན་ནས། ཁོར་ཡུག་ཐོག་ལས་ཀ་བྱེད་པའི་འདུན་པ་བསླེབས་ཡོད་པ་དང་། གནས་སྟངས་དེའི་དབང་གིས་ད་ལྟ་རང་བྱུང་ཁོར་ཡུག་ཉམས་ཆག་དང་འབྲེལ་བའི་སྐད་ཆ་བཤད་སྐབས། དམིགས་བསལ་གྱི་ཚོར་སྣང་ཡོང་བཞིན་པའི་སྐོར་སོགས་ཁོང་སྒེར་ངོས་ནས་ཁོར་ཡུག་ལ་དོ་སྣང་བྱུང་སྟངས་ངོ་སྤྲོད་དང་འབྲེལ་ཏེ། སྤྱི་ཡོངས་ཀྱི་ཁོར་ཡུག་གནས་སྟངས་ཐོག་ཁོང་གིས། “ སྤྱི་ཡོངས་ཀྱི་ཁོར་ཡུག་གནས་སྟངས་ཀྱི་ཐད་ནས། དུས་རབས་༢༠དང་ ༢༡ བར་མིའི་རིགས་ཀྱིས་གཏེར་ཁ་སྔོག་འདོན་མཚོན་པའི་རང་བྱུང་ཐོན་ཁུངས་མང་པོ་ཞིག་བེད་སྤྱོད་བཏང་བ་དང་། ཁོར་ཡུག་ལ་འདོད་རྔམ་ཤུགས་ཆེ་རུ་ཕྱིན་སྟེ། དེང་སང་དགོས་མཁོ་ཡོད་མེད་ཀྱི་དབྱེ་བ་མེད་པར་འཕྲུལ་ཆས་རིགས་མང་པོ་བེད་སྤྱོད་བྱེད་བཞིན་ཡོད་ཀྱང་། བེད་སྤྱོད་གཏོང་རྐྱང་བྱས་པ་ལས་ཁོར་ཡུག་ལ་དོ་ཕོག་དང་ཤུགས་རྐྱེན་གང་འདྲ་ཐེབས་མིན་ལ་བསམ་བློ་མ་བཏང་བ་དང་། འཛམ་གླིང་གི་རང་བྱུང་ཐོན་ཁུངས་དེ་རྫོགས་མཐའ་ཡོད་པ་ཅིག་དང་ཚད་གཞི་ཡོད་པ་ཞིག་ཡིན་སྟབས། གཞི་རྩའི་དཀའ་ངལ་དེ་ལ་ཐུག་བསྡད་ཡོད་པ་རེད། འཛམ་བུ་གླིང་ལ་ལོ་དུང་ཕྱུར་༤༠༠ལྷག་ཆས་ཡོད་ཀྱང་། འགྲོ་བ་མིའི་རིགས་ལོ་འབུམ་ ༢ལྷག་ལས་འགྲོ་གྱི་ཡོད་པ་མ་རེད། འགྲོ་བ་མིིའི་རིགས་བྱུང་བའི་དུས་ནས་རང་བྱུང་ཁོར་ཡུག་ལ་བརྟེན་པ་དང་ཐོན་ཁུངས་མང་པོ་ཞིག་བེད་སྤྱོད་བཏང་ཡོད་ཀྱང་། སྔོན་མ་རྒྱས་སྤྲོས་མེད་པའི་འཚོ་བ་སྐྱེལ་ཏེ་བསྡད་སྟབས། རང་བྱུང་ཁོར་ཡུག་ལ་དོ་ཕོག་ཆེན་པོ་བྱུང་མེད། ཚན་རིག་པས་འཛམ་གླིང་གི་གནམ་གཤིས་ཏེ། ༡༩༥༩ སྔོན་ལ་གང་འཚམ་བརྟན་པོ་ཡོད་ཀྱང་། དེའི་རྗེས་སུ་གནམ་གཤིས་ལ་གློ་བུར་འགྱུར་བ་ཕྱིན་སྟེ་འདས་པའི་ལོ་འབུམ་ཕྲག་ལ་འགྱུར་བ་འགྲོ་མ་མྱོང་བའི་འགྱུར་བ་ཕྱིན་ཡོད་པའི་སྐོར་བཤད་ཀྱི་ཡོད། དེ་དག་ཡོད་ཚད་མིའི་རིགས་ཀྱི་བྱ་སྤྱོད་ལ་བརྟེན་ནས་བྱུང་བ་དང་།ལྷག་པར་དུ་བཟོ་ལས་ཀྱི་དུས་རབས་མགོ་ཚུགས་པ་ནས་བྱུང་བ་རེད། ང་ཚོའི་ཕ་མེས་ཡང་མེས་ཚོས་རང་བྱུང་ཐོན་ཁུངས་བེད་སྤྱོད་བྱས་ཡོད་ཀྱང་། ཁོང་ཚོའི་འཚོ་བ་སྐྱེལ་སྟངས་དེ་སྟབས་བདེ་བོ་དང་། ཁོར་ཡུག་དང་མཐུན་པའི་འཚོ་བ་སྐྱེལ་སྟངས་ཡིན་པའི་ཆ་ནས་རང་བྱུང་ཁོར་ཡུག་ལ་དོ་ཕོག་དེ་འདྲ་ཆས་མེད། ད་ལྟའི་དུས་འདིར་མིའི་རིགས་ཀྱིས་རང་བྱུང་ཁོར་ཡུག་ལ་གུས་བརྩི་མེད་པའི་རྐྱེན་གྱིས་གནས་སྟངས་འདི་འདྲ་བྱུང་བ་རེད། ” ཅེས་གསུངས་བྱུང་།
ཡང་༸རྒྱལ་བ་ཀརྨ་པ་མཆོག་གིས་རང་བྱུང་ཁོར་ཡུག་གི་ཉེན་ཚབས་དང་མི་མང་གི་ངོས་ནས་གང་འདྲ་བྱ་དགོས་མིན་ཐད་ནས་ཁོང་གིས། “ སྔོན་མ་བོད་ལ་མཚོན་ན་རང་བྱུང་ཐོན་ཁུངས་གང་མང་ཞིག་བེད་སྤྱོད་བྱེད་ཆོག་མིན་གྱི་བཤད་སྟངས་འདྲ་མིན་ཡོད་ཀྱང་། དེང་སང་མི་རྣམས་ཀྱི་ཕ་མེས་ནས་བྱུང་བའི་ལམ་ལུགས་སྲོལ་དེ་དག་རྗེས་ལུས་དང་རྨོངས་དད་དུ་ངོས་འཛིན་བྱས་ཏེ། རང་བྱུང་ཁོར་ཡུག་གི་པགས་པ་བཤུས་རྐྱང་བྱེད་ཀྱི་ཡོད་པ་རེད། གལ་སྲིད། མུ་མཐུད་བྱ་སྤྱོད་ལ་འགྱུར་བ་མ་བཏང་བར་བེད་སྤྱོད་བྱས་པ་ཡིན་ན། འཛམ་གླིང་གི་ཚན་རིག་པ་ཚོས་ ལོ་ ༥༢ སྔོན་དུ་འཛམ་གླིང་དུ་ཚ་བ་ཆེན་པོ་བྱུང་སྟེ་སྲོག་ལྡན་ཙམ་མིན་པར་སྲོག་མེད་ཀྱི་བརྒྱ་ཆའི་ ༩༩ མེད་བརླགས་དུ་ཕྱིན་ཡོད་ཚུལ་དང་། གལ་སྲིད་མུ་མཐུད་འདི་ལྟར་ཆས་པ་ཡིན་ན་ ༢༠༥༠ ལོར་འཛམ་གླིང་སྐྱེ་དངོས་ཀྱི་བརྒྱ་ཆའི་ ༥༠ བརླགས་འགྲོ་བའི་ཚོད་དཔག་བྱེད་ཀྱིན་ཡོད་སྟབས། ང་ཚོའི་ངོས་ནས་ནང་པ་སངས་རྒྱས་པའི་ཆོས་ནང་གསུང་ཡོད་པའི་བདེན་པ་བཞི་དང་འབྲེལ་བའི་གནས་ལུགས་དེ་ཁོར་ཡུག་སྟེང་བཀོལ་ཏེ་ཁོར་ཡུག་སྲུང་སྐྱོབ་བྱ་རྒྱུ་ཧ་ཅང་གལ་ཆེན་པོ་རེད། ཁོར་ཡུག་སྲུང་སྐྱོབ་བྱེད་པ་དེ་གད་སྙིགས་རེ་གཉིས་གཙང་བཟོ་བྱེད་རྒྱུ་ཙམ་གྱིས་ཕན་གྱི་མེད་པར། ཉིན་རེའི་སྤྱོད་ལམ་ནང་ཁོར་ཡུག་ལ་ཤུགས་རྐྱེན་གང་འདྲ་ཐེབས་མིན་མིའི་བསམ་སྤྱོད་ལ་ཐུག་ཡོད་སྟབས། མིའི་བསམ་སྤྱོད་ལ་འགྱུར་བ་གཏོང་རྒྱུ་གལ་ཆེན་པོ་རེད། སེམས་ཅན་ཐམས་ཅད་ལ་ཕན་ཐོགས་པའི་ལས་ཀ་ཞིག་བྱ་འདོད་ཡོད་ན་ཁོར་ཡུག་སྲུང་སྐྱོབ་ལས་ལྷག་པ་ཞིག་ཡོད་པ་མ་རེད་བསམ་གྱི་འདུག ཆོས་ལུགས་ཀྱི་ཐད་ནས་འཛམ་གླིང་ནང་ཆོས་ལུགས་འདྲ་མིན་མང་པོ་ཡོད་པ་རེད། ཆོས་མེད་མཁན་ཡང་ཡོད་པ་རེད། ཆོས་ལུགས་ཁག་ཀྱི་ནང་ནས་ཡི་ཤུ་བས་ཁོར་ཡུག་དང་འཕྲོད་བསྟེན་སོགས་ཀྱི་ཐོག་ལས་ཀ་མང་པོ་ཞིག་བྱེད་ཀྱི་འདུག ང་ཚོའི་ངོས་ནས་ད་ལྟའི་བར་ནང་པ་སངས་རྒྱས་པའི་ཆོས་ཁོ་ནར་ཡིད་འཕྲོག་སྟེ་བསྡད་ན་འགྲིག་གི་ཡོད་པ་མ་རེད། ཁོར་ཡུག་སྲུང་སྐྱོབ་དེ་མི་སྒེར་དང་མི་རིགས། རྒྱལ་ཁབ་གཅིག་གི་གནད་དོན་མིན་པར་འཛམ་བུ་གླིང་གི་གནད་དོན་ཞིག་ཡིན་སྟབས། ནང་པ་སངས་རྒྱས་པའི་ཆོས་ཀྱི་ཉམས་ལེན་དེ་ཁོར་ཡུག་སྲུང་སྐྱོབ་ཐོག་བསྒྱུར་ཐུབ་པ་ཡིན་ན། ཕན་ཐོགས་ཆེན་པོ་ཡོད་པ་རེད། ” ཅེས་ལམ་སྟོན་བཀའ་སློབ་གནང་སོང་།
རང་བྱུང་ཁོར་ཡུག་སྲུང་སྐྱོབ་ཚོགས་པ་ནི། ཕྱི་ལོ་ ༢༠༠༩ ལོར་༸རྒྱལ་བ་ཀརྨ་པ་རིིན་པོ་ཆེ་མཆོག་གིས་བཀའ་དགོངས་གཞི་ལྟར་གསར་འཛུགས་གནང་བའི་ཚོགས་པ་ཞིག་ཡིན་པ་དང་། ཚོགས་པ་འདིའི་དམིགས་ཡུལ་གཙོ་བོ། ཧི་མ་ལ་ཡའི་རི་རྒྱུད་དུ་ཡོད་པའི་དགོན་སྡེ་ཁག་ཏུ་ཡོད་པའི་གྲྭ་བ་ཚོར་ཁོར་ཡུག་སྲུང་སྐྱོབ་ཀྱི་སློབ་སྦྱོང་སྤྲད་དེ། དེར་ཡོད་ས་གནས་མི་མང་ལ་རང་བྱུང་ཁོར་ཡུག་ལ་གཏོར་བཅོམ་མ་བཏང་བར་སྲུང་སྐྱོབ་བྱ་ཕྱོགས་བརྒྱུད་སྒྲོག་དང་། མ་འོངས་པར་རང་བྱུང་ཁོར་ཡུག་སྲུང་སྐྱོབ་ཚོགས་པས་ཧི་མ་ལ་ཡའི་རི་རྒྱུད་དང་བཙན་བྱོལ་སྤྱི་ཚོགས། རྒྱ་གར་གྱི་ཚོགས་སྡེ་ཁག་བཅས་རིམ་བརྒྱུད་ཀྱིས་འཛམ་གླིང་གི་ཁོར་ཡུག་སྲུང་སྐྱོབ་ཚོགས་པ་ཁག་དང་མཉམ་རུབ་ཐོག་ལས་འགུལ་སྤེལ་རྒྱུའི་དམིགས་ཡུལ་ཡོད་པ་དང་། ད་ལྟའི་ཆར་ཚོགས་པ་འདིར་ཚོགས་མི་རྒྱལ་བལ་འབྲུག་གསུམ་དུ་ཡོད་པའི་ཀརྨ་ཀམ་ཚང་གི་དགོན་སྡེ་ཁག་དང་། ༸རྒྱལ་བ་ཀརྨ་པར་དགའ་ཞེན་དང་དད་མོས་ཡོད་མཁན་གྱི་མི་མང་བཅས་ཡོད་འདུག ༢༠༠༩ ལོ་ནས་སྔ་ཕྱི་ཝ་ར་ནཱ་སི་དང་བཞུགས་སྒར་རྒྱུད་སྟོད་གྲྭ་ཚང་། རྒྱ་གར་ལྷོ་ཕྱོགས་བཀའ་རྒྱུད་ནཱ་ལེནྡྲ་དགོན་པ་བཅས་སུ་ཚོགས་ཡོད་ལ། ཐེངས་འདི་ནི་ཁོར་ཡུག་སྲུང་སྐྱོབ་ཀྱི་ཚོགས་འདུ་ཐེངས་བཞི་པ་ཆགས་ཡོད་འདུག
ལྷ་དར་སར་བདུད་དར། ཞེས་པ་དེ་ཅི་མི་བདེན། ༧གོང་ས་སྐྱབས་མགོན་ཆེན་པོ་མཆོག་དང་། དཔལ་རྒྱལ་བ་ཀརྨ་པས་གཙོས་རང་རེ་བོད་ཀྱི་བླ་ཆེན་ཚོས་འཛམ་གླིང་འདིའི་ནང་གནས་པའི་ནང་བཅུད་ཀྱི་སེམས་ཅན་དང་། དེ་ཡི་རྟེན་གཞིར་གྱུར་པ་ཕྱི་སྣོད་ཀྱི་འཇིག་རྟེན་གཉིས་ཆར་སྲུང་སྐྱོབ་ཀྱི་སྐྱེ་འགྲོ་མཐའ་དག་ལ་དངོས་ཤུག་རྒྱུད་གསུམ་ནས་ཕན་པའི་རླབས་ཆེན་གྱི་བཀའ་བཟང་ལེགས་ཕེབས་ལ། རུ་ང་ཕྲག་དོག་གི་མེ་ལྕེ་འབར་བའི་ཀླད་མེད་ཀྱི་དྲྭ་འབུ་གནས་ཚང་ཁྱོད་ལྟ་བུས་ཉི་ཟེར་སྦར་མོས་འགེབས་སེམས་ཀྱང་། དེ་ནི་རྨི་ལམ་གྱི་འདོད་ཡོན་ལ་བདེན་པར་བཟུང་སྟེ་ཡིད་རྟོན་བྱས་པ་དང་ཅི་མི་མཚུངས། ཡིད་རེ་སྐྱོ།
ད་རེས་པ་ལེ་བ་དངོས་གནས་ཁོང་ཁྲོ་ལངས་བྱུང་། ཆོས་ཀྱི་ཉམས་ལེན་ཁོར་ཡུག་སྲུང་སྐྱོབ་སྒང་སྔར་ནས་བསྒྱུར་ཡོད་པར་མ་ཟད། ལོ་ངོ་སྟོང་ཕྲག་ལྷག་བརྒལ་ཡོད་པ་རེད། ད་ལྟ་ག་རེ་བྱེད་དགོས་པ་རེད་དམ། ཚང་མ་ལོས་ཁོར་ཡུག་གལ་ཆེན་ཡིན་པ་ཤེས་དགོས་ཀྱི་ཡོད་པ་རེད་ལ། སྒོས་སུ་བོད་ཀྱི་ཁོར་ཡུག་རྒྱ་གར་ནག་གཙོས་པའི་མཐའ་འཁོར་རྒྱལ་ཁབ་ཚང་མ་ལོར་འབྲེལ་བ་ཡོད་པར་མ་ཟད། ཤི་གསོན་ཐག་གཅོད་ཀྱི་ནུས་པ་ཐོན་གྱི་ཡོད་པ་རེད། གསུང་དགོས་ཡ་དེ་མི་གསུང་། སྒམ་པོ་གནང་དྲགས་ན་རྒྱ་གར་གྱིས་ནག་ཉེས་ད་དུང་འགེལ་སྲིད་པ་རེད་དྲ། བསམ་ཤེས་ཡ་གཅིག་ཀྱང་མི་འདུག མི་ངན་ཚོེའི་ཁ་ལ་ཉན་ཡ་ཡོད་པ་མ་རེད། སེམས་བསམ་པའི་སྐད་ཆ་ཡིན། ཉན་ཤེས་མིན་སོ་སོར་རག་ལས་ཡོད་པ་རེད།