ཁ་སང་༧གོང་ས་མཆོག་དབྱིན་ཡུལ་ནུབ་ཕྱོགས་གྲོང་ཁྱེར་གྱི་རྒྱལ་སྤྱིའི་ཚོང་ལས་ལྷན་ཚོགས་སྟེང་ཕེབས་ཏེ། ཚོང་ལས་ཀུན་སྤྱོད་སྐོར་གྱི་བཀའ་སློབ་བསྩལ་ཡོད་ཅིང་། རྒྱ་ནག་གཞུང་གིས་༧གོང་ས་མཆོག་གྲོང་ཁྱེར་དེར་ཕེབས་པར་འགོག་རྐྱེན་བཟོས་ཡོད་པ་རེད།
ཁ་སང་ཕྱི་ཚེས་ ༡༥ ཉིན་༧གོང་ས་མཆོག་དབྱིན་ཡུལ་གྱི་ལེ་ཌི་སི་(Leeds) གྲོང་ཁྱེར་ནང་འཚོགས་བཞིན་པའི་རྒྱལ་སྤྱིའི་ཚོང་ལས་ལྷན་ཚོགས་(The Yorkshire International Business Convention) སྟེང་གདན་འདྲེན་ཞུས་པ་ལྟར་༧གོང་ས་མཆོག་ཆིབས་སྒྱུར་བསྐྱངས་ཏེ། ཁོང་གིས་ལྷན་ཚོགས་དེའི་སྟེང་དུ་ལོ་རབས་དྲུག་བཅུ་བདུན་བཅུའི་ནང་ཚོང་ལས་ཐད་མིའི་ཀུན་སྤྱོད་ཀྱི་སྐད་ཆ་བཤད་ས་མེད་ཀྱང་རྗེས་སུ་འགྱུར་བ་ཕྱིན་ཏེ། ལོ་རབས་བརྒྱད་བཅུ་དང་དགུ་བཅུའི་ནང་ནས་ཚོང་ལས་ཐད་མིའི་ཀུན་སྤྱོད་དང་འབྲེལ་བའི་སྐད་ཆ་བཤད་སའི་གནས་བབ་བྱུང་ཡོད་ཚུལ་དང་། འཛམ་གླིང་གི་དཔལ་འབྱོར་ཉམ་ཉེས་དང་དབུལ་ཕྱུག་གི་ཧེ་བག་བྱུང་པའི་རྒྱུ་རྐྱེན་སྐོར་ལ་བཀའ་སློབ་གནང་འདུག་ལ། ཚོང་ལས་སྡེ་ཚན་གང་འདྲ་ཞིག་ཡིན་ཡང་དེའི་ནང་གི་ལས་མི་རྣམས་འགྲོ་བ་མི་ཡིན་སྟབས། ཚོང་ལས་ཁྲོད་བཟང་སྤྱོད་དང་དྲང་བདེན་གལ་ཆེན་པོ་ཡིན་པ། གཞན་ལ་མགོ་སྐོར་དང་བསླུ་བྲིད་སོགས་བཏང་སྟེ་དངུལ་ཕྲན་བུ་གསོག་ཐུབ་ཀྱང་སེམས་ནང་ཞེད་སྣང་དང་དངངས་འཚབ་འབྱུང་གི་ཡོད་པ། སོ་སོའི་ལས་དོན་དྲང་བདེན་དང་ཁ་ཞེ་གཉིས་མེད་ཐོག་གཉེར་ཚེ་རང་ཉིད་ལ་གདེང་སྤོབས་དང་འདོད་བློ་འཚིམ་པ་ཡོང་སྐོར་སོགས་གསུངས་འདུག
ལེ་ཌི་སི་གྲོང་ཁྱེར་ནང་ ༢༠༡༢ ལོའི་དབྱིན་ཇིའི་ཨོ་ལམ་ཕིག་ལུས་རྩེད་འགྲན་ཚོགས་ཀྱི་རྩེད་མོ་བ་དང་སློབ་སྟོན་པ། ལས་བྱེད་བཅས་མི་ ༢༢༠ ལྷག་གིས་སྦྱོང་བརྡར་བྱེད་ཀྱི་ཡོད་སྟབས། རྒྱ་ནག་གཞུང་གིས་ལེ་ཌི་སི་གྲོང་ཁྱེར་སྲིད་གཞུང་ལ་༧གོང་ས་མཆོག་ཡུལ་དེའི་རྒྱལ་སྤྱིའི་ཚོང་ལས་ལྷན་ཚོགས་སྟེང་ཕེབས་མི་འཇུག་རྒྱུར་གནོན་ཤུགས་སྤྲད་ཡོད་ཀྱང་། གྲོང་ཁྱེར་སྲིད་གཞུང་གིས་ལྷན་ཚོགས་དེ་ནི་གྲོང་ཁྱེར་སྲིད་གཞུང་གིས་གོ་སྒྲིག་མིན་སྟབས་ཁོང་ཚོའི་གནད་དོན་ལ་ཐེ་ཇུས་བྱ་རྒྱུའི་འོས་བབ་མེད་སྐོར་བརྗོད་འདུག་ལ། ལྷན་ཚོགས་གསར་འཛུགས་བྱེད་མཁན་མཱའེ་ཁཱེ་(Mike Firth) ཡིས་ཀྱང་“༧གོང་ས་ཏཱ་ལའི་བླ་མ་མཆོག་ནམ་རྒྱུན་འཛམ་གླིང་གང་སར་ཕེབས་ཀྱི་ཡོད་ཅིང་། ཁོང་གིས་རྒྱལ་སྤྱིའི་དབུ་ཁྲིད་ཁག་དང་ཐུག་འཕྲད་ཀྱིས་མི་ཚང་མས་དགའ་མོས་བྱེད་ཡུལ་ཞིག་ཆགས་ཡོད་པས། ཁོང་ཐེངས་འདིར་ལྷན་ཚོགས་སྟེང་ཕེབས་པ་དེ་ནི་ང་ཚོའི་ད་ལྟའི་བར་གྱི་སྐུ་མགྲོན་རླབས་ཆེ་ཤོས་དེ་ཆགས་ཡོད” ཅེས་བརྗོད་འདུག
དབྱིན་ཇིའི་ཕྱི་སྲིད་ལས་ཁུངས་ཀྱི་མགྲིན་ཚབ་པས་ཉེ་སྔོན་ཕྱི་ཟླ་ ༥ པའི་ནང་དབྱིན་ཇིའི་སྲིད་བློན་རྣམ་གཉིས་ཀྱིས་༧གོང་ས་མཆོག་དང་ཐུག་འཕྲད་གནང་རྗེས་དབྱིན་ཇིའི་ཕྱི་འབྲེལ་གནས་བབ་ཇེ་སྡུག་ཏུ་ཕྱིན་པ་མ་ཟད། དབྱིན་ཇི་དང་རྒྱ་ནག་གི་མཐོ་རིམ་དཔོན་རིགས་ཁག་ཅིག་གི་འགྲོ་འོང་ཡང་རྒྱ་ནག་གིས་ཕྱིར་འཐེན་བྱས་ཚུལ་བརྗོད་འདུག དེ་སྔ་ལྷན་ཚོགས་སྐབས་སོ་སོར། ཟླ་བའི་གོ་ལའི་སྟེང་ཐོག་མར་སྐྱོད་མཁན་ཨམ་སི་ཊོང་(Neil Armstrong) དང་། དེ་སྔའི་ཨུ་རུ་སུའི་སྲིད་འཛིན་མཱེ་ཁཱ་ཧེལ་ (Mikhail Gorbachev)། ཡེ་ཤུ་ཆོས་དཔོན་ཌེ་སི་མོན་ཊུ་ཊུ་(Archibishop Desmond Tutu)། ཨ་རིའི་སྲིད་འཛིན་ཟུར་པ་བྷེལ་ཁི་ལེན་ཊོན་ (Bill Clinton) སོགས་སྐུ་མགྲོན་དུ་ཕེབས་ཡོད་འདུག
དེ་རིང་དབྱིན་ཡུལ་གྱི་མན་ཅཱེ་སི་ཊར་(Manchester Arena) ནང་གཞོན་སྐྱེས་སྟོང་ཕྲག་མང་པོར་ཚོར་འཛམ་གླིང་གི་འབྱུང་འགྱུར་ལ་བཅོས་སྒྱུར་བྱ་རྒྱུར་འགན་འཁུར་དགོས་པ་དང་། དུས་རབས་ཉེར་གཅིག་པ་དེ་གྲོས་མོལ་གྱི་དུས་རབས་ཤིག་བསྐྲུན་དགོས་པ་སོགས་ཀྱི་བཀའ་སློབ་གནང་ཡོད་ཅིང་། གསུང་བཤད་དང་དྲི་བ་དྲིས་ལན་གྱི་ལས་རིམ་གཙོ་སྐྱོང་བར་དབྱིན་ཇིའི་སྐད་གྲགས་ཆེ་བའི་གཏམ་རྗོད་པ་དང་གློག་བརྙན་འཁྲབ་སྟོན་པ། གཞེས་པ་རཱུ་སེལ་བྷི་རན་ཌི་(Russell Brand)ལགས་ཡིན་འདུག་ལ། ཁོས་“ང་ལ་༧གོང་ས་ཏཱ་ལའི་བླ་མ་མཆོག་གི་མཛད་སྒོའི་གཙོ་སྐྱོང་བར་སྐད་བཏང་སྐབས་ལམ་སང་དང་ལེན་བྱས་པ་ཡིན། ཏཱ་ལའི་བླ་མ་མཆོག་གིས་ཁོང་གི་མི་ཚེ་ཧྲིལ་བོར་དཀོན་མཆོག་གི་མགྲིན་ཚབ་པ་བྱས་ཏེ་འཛམ་གླིང་ཞི་བདེ་དང་འགྲོ་བ་མིའི་ཕན་བདེ་ཆེད་བཏང་ཡོད། ཁོང་གིས་ང་ཚོར་ཅིག་བྱོས་གསུང་སྐབས་ཐ་ན་ཁོང་གི་རླངས་འཁོར་གཙང་མ་བཟོ་བའི་ལས་ཀ་ཞིག་ཡིན་ཡང་བྱ་དགོས་”ཞེས་བརྗོད་འདུག
བྷི་བྷི་སི་གསར་ཁང་གིས་རཱུ་སེལ་བྷི་རན་ཌི་ལགས་སུ། ཁོ་རང་ནང་པ་ཡིན་མིན་དྲིས་པར་རང་ཉིད་ཆོས་ལུགས་གང་ལའང་མི་གཏོགས་ཚུལ་དང་། ཆོས་ལུགས་ཁག་ཚང་མར་སློབ་སྦྱོང་བྱེད་ཀྱི་ཡོད་སྐོར་བརྗོད་འདུག ཡང་ཁོང་ལ་དེང་སྐབས་ཁོང་གི་གློག་བརྙན་དང་གླུ་གཞས་དབྱིན་ཇི་དང་ཨ་རི་སོགས་སུ་དར་ཁྱབ་ཆེན་པོ་འགྲོ་བཞིན་ཡོད་པ་ལྟར། རྒྱ་ནག་ནང་དར་ཁྱབ་འགྲོ་བར་ཐེངས་འདིར་༧གོང་ས་མཆོག་དང་འབྲེལ་བ་བྱུང་བ་དེས་དོ་ཕོག་འགྲོ་མིན་དྲིས་པར། ཁོང་གིས་ “ད་སྔ་བསམ་བློ་དེ་འདྲ་ཞིག་ཁྱེར་ཏེ་བསྡད་པ་རེད། དོན་དངོས་ཐོག་རྒྱལ་ཁབ་ཅིག་གི་རང་དབང་དང་མི་སྒེར་གཅིག་གི་ལས་དོན་གཉིས་ཀྱི་གང་གལ་ཆེན་པོ་ཡིན་པར་བསམ་བློ་གཏོང་དགོས། ངས་ད་སྔ་འཁྲབ་སྟོན་བྱེད་ཡུལ་གློག་བརྙན་ཁང་དག་གི་མི་སྣ་ཚོ་ཡང་མི་ཞིག་ཡིན་པའི་ཆ་ནས་བསམ་བློ་ཏན་ཏན་འཁོར་ངེས་རེད། གལ་སྲིད་མིའི་བསམ་བློའི་དཔལ་ཡོན་གྱིས་ཕོངས་པའི་སྤྱི་ཚོགས་ཞིག་གྲུབ་ཚེ་འགྲོ་བ་མིའི་སྤྱི་ཚོགས་འདི་གང་འདྲ་ཞིག་ཏུ་འགྱུར་ངེས་རེད་” ཅེས་བརྗོད་འདུག
གསར་འགོད་པ། བནྡེ་སྐྱབས།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
![Hungary's Laszlo Krasznahorkai poses for photographers in London [File: Matt Dunham/AP]](https://tibettimes.net/wp-content/uploads/2025/10/Screenshot-2025-10-10-at-2.23.17-PM-360x180.png)
གསར་འགོད་པ་ལགས།
སུམ་ཅུ་དྲུག་ཅུ་བདུན་ཅུ་དང་།།
བརྒྱད་ཅུ་བཅས་ལ་བས་འཕུལ་མེད།། ཅེས་པའི་གྲངས་ཀྱི་རྣམ་གྲངས་ཨེ་ཤེས། ང་ཚོས་བོད་དོན་དྲིལ་བསྒྲགས་བྱེད་དགོས་ལ་བོད་ཡིག་སྲུང་སྐྱོབ་ཀྱང་བྱེད་དགོས་པ་མ་ཡིན་ནམ།།
སྙན་གྲགས་ཅན་གྱི་ཁྲབ་སྟོན་པ་རོ་སེལ་བླཧོ་རན་ཌ་མཆོག་གིས་ཏྰ་ལའི་བླ་མས་དཀོན་མཆོག་གི་ཚབ་བྱས་ཏེ་ཁོང་གིས་རླངས་འཁོར་གཙང་མ་བཟོ་དགོས་གསུངས་ནའང་ང་ཚོས་ངེས་པར་བྱེད་དགོས་ཟེར་བ་མདོར་ན་ཅི་གསུང་བཀའ་བཞིན་བསྒྲུབ་དགོས་པའི་བཀའ་སློབ་ཞིག་རེད།
ཐེངས་འདིར་གལ་ཆེའི་སྙན་གྲགས་ཅན་གྱི་སྐུ་མགྲོན་མང་དག་གཅིག་ལྷན་འཛོམས་གནང་བ་ཐུབ་པ་དེ་ནི་བཀྲ་ཤིས་པའི་གཏམ་བཟང་དང་དོན་སྙིང་གལ་ཆེ་ལྡན་ཡོད།
སྙན་གྲགས་ཅན་གྱི་རླབས་ཆེན་སྐྱེས་མཆོག་དམ་རྣམས་སྐུ་ཚེ་རིང་བའི་སྨོན་ལམ་ཞུའོ།།
འཚམས་འདྲི་ཞུ།
རཱུ་སེལ་བྷི་རན་ཌི་(Russell Brand)ལགས་ཀྱིས་“ད་སྔ་བསམ་བློ་དེ་འདྲ་ཞིག་ཁྱེར་ཏེ་བསྡད་པ་རེད། དོན་དངོས་ཐོག་རྒྱལ་ཁབ་ཅིག་གི་རང་དབང་དང་མི་སྒེར་གཅིག་གི་ལས་དོན་གཉིས་ཀྱི་གང་གལ་ཆེན་པོ་ཡིན་པར་བསམ་བློ་གཏོང་དགོས། ངས་ད་སྔ་འཁྲབ་སྟོན་བྱེད་ཡུལ་གློག་བརྙན་ཁང་དག་གི་མི་སྣ་ཚོ་ཡང་མི་ཞིག་ཡིན་པའི་ཆ་ནས་བསམ་བློ་ཏན་ཏན་འཁོར་ངེས་རེད། གལ་སྲིད་མིའི་བསམ་བློའི་དཔལ་ཡོན་གྱིས་ཕོངས་པའི་སྤྱི་ཚོགས་ཞིག་གྲུབ་ཚེ་འགྲོ་བ་མིའི་སྤྱི་ཚོགས་འདི་གང་འདྲ་ཞིག་ཏུ་འགྱུར་ངེས་རེད་”ཅེས་བསྒྲགས་འདུག་པ་དེས། ཁོང་གི་མི་གཞི་དང་། སེམས་ཁམས་ཀྱི་སྤུས་ཚད་བཅས་མཚོན་ཡོད།
ཡང་ཁོང་གིས། རང་ཉིད་ཆོས་ལུགས་གང་ལའང་མི་གཏོགས་ཚུལ་དང་། ཆོས་ལུགས་ཁག་ཚང་མར་སློབ་སྦྱོང་བྱེད་ཀྱི་ཡོད་སྐོར་བརྗོད་འདུག་པ་དེས་ང་ཚོ་རང་ཉིད་ཆོས་པ་ཡིན་ཟེར་མཁན་ཚོས་ཆོས་ག་རེ་བྱེད་ཀྱིན་ཡོད་མེད་དང་། ཁོང་དང་ང་ཚོའི་སེམས་ཀྱི་སྤུས་ཚད་དང་། མི་གཞི། དྲང་བདེན་སོགས་ལ་ཧེ་བག་ག་རེ་འདུག་མིན་རང་སོ་སོས་བསམ་བློ་གཏང་དགོས་པ་ཞིག་ཆགས་ཡོད།
གང་ལྟར་ཁོང་ལྟ་བུའི་མི་བུ་གང་མང་ཞིག་མ་འོངས་པར་བྱུང་ན་འཛམ་གླིང་མང་ཚོགས་ཀྱིས་རེ་བ་བཟང་སར་བརྒྱབ་ཀྱང་རེ་འབྲས་སྨིན་ངེས་རེད།
སངས་རྒྱས་མཛད་པ་ལ་ཡང་ཁྱི་རྒན་ཚང་གི་བར་ཆད་གཏོང་ན་འདོད་གི་ཡོད་ཀྱང་། སྙིང་རྗེ་བ་ཞིག་ལ་ད་རྫུན་སྐྱ་ཚང་གི་རྔ་མ་བཏོན་ནེ་ཡོང་གི་འདུག་་་་་་་ངའི་བླ་མ་སྐུ་ཚེ་བརྟན་པར་ཤོག་་་་་་་་་ཕ་ཡུལ་གངས་ཅན་པའི་བསམ་དོན་གང་མགྱོགས་ངང་འགྲུབ་པར་ཤོག
ཏཱ་ལའི་བླ་མས་རྐྱེན་བྱས་ཏེ་ཀྲུང་གོས་གནས་སྐབས་རིང་དབྱིན་ཇིའི་མགོ་ཁྲིད་ལ་མཇལ་འཕྲད་བྱེད་མཚམས་བཞག་པ།
སྤེལ་དུས། 2012-06-15 ཡོང་ཁུངས། ཞིན་ཧྭའི་དྲ་བ། རྩོམ་སྒྲིག་པ། པད་མས་བསྒྱུར།
དབྱིན་ཇིའི་ཉིན་རེའི་གློག་འཕྲིན་ཚགས་པར་སྟེང་ཟླ་༦ཚེས་༡༢ཉིན་སྤེལ་བའི་གནས་ཚུལ་ལྟར་ན། དབྱིན་ཇིའི་སྲིད་བློན་ཁ་མེ་ལུང་གིས་ཟླ་༥བའི་ནང་ཏཱ་ལའི་བླ་མར་ཐུག་འཕྲད་བྱས་པར་བརྟེན། ཀྲུང་གོའི་ཕྱོགས་ཀྱིས་རྒྱལ་ཁབ་གཉིས་ཀྱི་མགོ་ཁྲིད་ཕན་ཚུན་མཇལ་འཕྲད་གནང་མཚམས་གནས་སྐབས་ཙམ་རིང་མཚམས་བཞག་ཡོད་པ་དང་། ཟླ་༥བའི་ནང་དབྱིན་ཇིའི་སྲིད་གཞུང་གི་འབྲེལ་ཡོད་བློན་ཆེན་གཉིས་ཀྱིས་ཀྲུང་གོར་འཚམས་འདྲི་བྱེད་རིང་སྣེ་ལེན་ཡག་པོ་བྱས་མེད་པ་རེད།
ཚགས་པར་དེའི་སྟེང་བཀོད་པ་ལྟར་ན། དབྱིན་ཇིའི་ཉོ་ཚོང་དང་མ་དངུལ་གཏོང་འཇོག་ཕྱོགས་ཀྱི་རྒྱལ་སྲིད་བློན་ཆེན་གེ་ལིན་ཤོན་ཅེ་ཞེས་པ་དང་། ཕྱི་འབྲེལ་དང་མཉམ་འབྲེལ་ལས་དོན་ཁང་གི་རྒྱལ་སྲིད་བློན་ཆེན་ཅེ་ལི་མེ་•པུའུ་ལའང་གཉིས་ཟླ་༥བའི་ནང་ཀྲུང་གོར་འཚམས་འདྲིར་ཕེབས་སྐབས། དེ་སྔོན་གཏན་འཁེལ་ཟིན་པའི་ཀྲུང་གོའི་པུའུ་ཀྲང་རིམ་པའི་མཇལ་འཕྲད་ཀྱི་འཆར་གཞི་ལ་འགྱུར་བ་བྱུང་ཞིང་། རྒྱལ་སྲིད་བློན་ཆེན་གེ་ལིན་ཤོན་ཅེ་དང་ཀྲུང་གོའི་རྒྱལ་ཁབ་བསྒྱུར་བཅོས་གོང་སྤེལ་ཨུ་ཡོན་ལྷན་ཁང་ངམ་ཚོང་དོན་པུའུ་ཡི་འབྲེལ་ཡོད་མི་སྣ་དང་མཇལ་འཕྲད་བྱེད་པའི་འཆར་གཞི་དེ་འགྲུབ་མ་ཐུབ་པ་དང་། སྲིད་བློན་གཞན་པ་དེ་ཡང་རིམ་པ་དམའ་བའི་མགོ་ཁྲིད་ཀྱིས་མཇལ་འཕྲད་བྱས་པ་ལས་འཆར་གཞི་ལྟར་མཇལ་འཕྲད་བྱས་མེད་པ་རེད།
དབྱིན་ཇིའི་ཕྱི་འབྲེལ་པུའུ་ཡི་འབྲེལ་ཡོད་མི་སྣས་བརྗོད་པར། དེའི་སྐོར་ལ་ཀྲུང་གོས་སྐབས་སྐབས་སུ་དབྱིན་ཇིའི་སྲིད་བློན་གྱིས་ཏཱ་ལའི་བླ་མར་ཐུག་འཕྲད་བྱས་པས་ཡིན་ཞེས་བརྗོད་ཀྱི་འདུག་ལ། ཡང་མཚམས་མཚམས་སུ་གནས་སྐབས་རིང་དོན་གཞན་བྱུང་བས་མཇལ་འཕྲད་གནང་མ་ཐུབ་པར་དགོངས་དག་ཞུ་གི་འདུག
གསར་འགྱུར་དེའི་ནང་ད་དུང་། ཀྲུང་གོའི་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ཝུའུ་པང་གོ་ཡིས་ཟླ་༥བར་དབྱིན་ཇིར་འཚམས་འདྲི་བྱེད་པའི་འཆར་གཞི་དེ་ཡང་མཚམས་བཞག་པ་མ་ཟད། དབྱིན་ཇིའི་སྲིད་བློན་ཁ་མེ་ལུང་གིས་ད་ལོའི་ལོ་མཇུག་ཏུ་ཀྲུང་གོར་འཚམས་འདྲི་བྱེད་པའི་འཆར་གཞི་དེའང་འགྲུབ་ཐུབ་མིན་གསལ་བོ་མི་ཤེས་ཞེས་བཀོད་འདུག
མིང་བརྗོད་འདོད་མེད་པའི་དབྱིན་ཇིའི་ཚོང་བ་ཞིག་གིས་བརྗོད་པ་ལྟར་ན། དབྱིན་ཇིར་ཡོད་པའི་ཚོང་ལས་ཚོགས་པར་ཡང་དེའི་ཤུགས་རྐྱེན་ཐེབས་སྲིད་པ་རེད།
དབྱིན་ཇིའི་སྲིད་བློན་ཁ་མེ་ལུང་གིས་ཀྲུང་གོའི་ཐེངས་མང་རིང་སྐད་ཆ་བཙན་པོ་བཤད་པར་མ་ཉན་པར། ཟླ་༥ཚེས་༡༤ཉིན་དབྱིན་ཇིའི་སྲིད་བློན་གཞོན་པ་ཁེ་ལི་གེ་དང་མཉམ་དུ་ལོན་ཏོན་ནས་ཏཱ་ལའི་བླ་མར་ཐུག་འཕྲད་བྱས་ཤིང་། ཀྲུང་གོའི་ཕྱི་འབྲེལ་པུའུ་ཡི་མགྲིན་ཚབ་པ་ཧུང་ལེ་ཡིས་དེའི་སྐོར་གྱི་གསར་འགོད་པའི་དྲི་བར་ལན་བསྐྱོན་སྐབས། དབྱིན་ཇི་ཡིས་ཀྲུང་གོའི་ཐེངས་དུ་མར་སྐད་ཆ་བཤད་པ་སྣང་མེད་དུ་གཡུག་ནས་ཨུ་ཚུགས་ངང་ཏཱ་ལའི་དང་སྲིད་བློན་ཐུག་འཕྲད་བྱས་པ་དེ་ནི། ཀྲུང་གོའི་ནང་སྲིད་ལ་ཐེ་གཏོགས་ཚབས་ཆེན་བྱས་པ་ཡིན་ཞིང་། ཀྲུང་གོའི་མི་དམངས་ཀྱི་སེམས་ལ་གནོད་པ་བཟོས་པ་མ་ཟད། ད་དུང་བོད་རང་བཙན་པར་ནོར་འཁྲུལ་གྱི་རྟགས་མཚན་བསྟན་པས། དོན་དེ་རྩ་བ་ནས་ཀྲུང་གོའི་བློར་འབབ་ཀྱི་མེད་ལ་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན་ཞེས་དང་། བོད་དོན་ནི་ཀྲུང་གོའི་ནང་སྲིད་ཁོ་ནར་གཏོགས་ཤིང་། ཏཱ་ལའི་ནི་དུས་རྒྱུན་ཆོས་ཀྱི་དར་ཆ་ཕྱར་ནས་ཀྲུང་གོ་ཁ་བྲལ་གཏོང་བའི་ཆབ་སྲིད་བྱ་འགུལ་སྤེལ་མཁན་གྱི་ཡུལ་གྱར་བ་ཞིག་ཡིན་པས། རྒྱལ་ཁབ་གང་རུང་གི་མགོ་ཁྲིད་པས་རྣམ་པ་ཅི་ཞིག་ལ་བརྟེན་ནས་ཏཱ་ལའི་ལ་ཐུག་འཕྲད་བྱས་ཀྱང་དེར་ཀྲུང་གོས་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན་ཞེས་དང་། ཡང་ཀྲུང་ཕྱོགས་ཀྱིས་རྒྱལ་ཁབ་གང་རུང་དང་མི་སྒེར་གང་རུང་གིས་བོད་དོན་བེད་སྤྱད་ནས་ཀྲུང་གོའི་ནང་སྲིད་ལ་ཐེ་གཏོགས་བྱེད་པར་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན། དབྱིན་ཇི་ཡིས་ཀྲུང་གོའི་ལངས་ཕྱོགས་ལ་བསམ་བློ་ཞིབ་མོ་བཏང་ནས། བོད་རང་བཙན་གྱི་ཀྲུང་གོར་རྒོལ་བའི་སྟོབས་ཤུགས་ལ་ངན་སྐུལ་དང་རྒྱབ་སྐྱོར་བྱེད་མཚམས་བཞག་ནས། མགྱོགས་མྱུར་ངང་བྱེད་ཐབས་ནུས་ལྡན་སྤྱད་དེ་ཤུགས་རྐྱེན་ངན་པ་སེལ་དགོས་པ་དང་། དོན་དངོས་ལ་བརྟེན་ནས་ཀྲུང་དབྱིན་འབྲེལ་བ་གོང་དུ་འཕེལ་བར་སྲུང་སྐྱོབ་བྱེད་དགོས་ཞེས་བསྟན་འདུག