བརྡ་དེབ་ནང་གི་བོད་གནས།

བསྟན་འཛིན་ཤེས་རབ།

བརྡ་དེབ་ནང་གི་ཁ་བརྡ་དག་ཀློག་གིན་ཀློག་གིན་ང་ལ་སྐྱོ་གདུང་དང་རེ་ཐག་ཆད་པའི་ཚོར་བ་ཤིན་ཏུ་གཟན་མོ་ཞིག་སྐྱེས། མཛངས་མ་འོད་ཟེར་ལགས་ཀྱི་བརྡ་དེབ་ནང་སྤེལ་དོན། ཉུང་ཁྲིའི་པོ་ལོང་གསོལ་མགྲོན་ཆེན་མོའི་ནང་སྤྱིར་བོད་མིར་ངེས་ལེན་མི་བྱེད། དེ་རིང་བོད་མི་བཅུ་ཡོད་པ་དེ་ཡང་ཚང་མ་ཕྱིར་འཕུད་བཏང་བྱུང་ཟེར། ཡང་ཁོ་མོས། རང་ཉིད་ཀྱི་ས་ཐོག་ཏུ་རང་ཉིད་སྡོད་འཇུག་གི་མེད་པ་དང་། ཐོབ་ཐང་འཛིན་བྱང་སྟེང་བོད་རིགས་བྲིས་པ་ཙམ་གྱིས་འགྲོ་འདུག་གི་གནས་མི་སྟེར་བ་ནི་ཅིའི་ཕྱིར་རེད། ཅེས་བཀོད་འདུག ད་དུང་ཨ་ཅག་འོད་ཟེར་གྱི་གཙོས་པའི་བརྡ་དེབ་དག་གི་ནང་ཐོན་གསལ། གོ་ཐོས་ལ། དམག་མི་ཚོ་གང་བྱུང་དུ་བོད་མིའི་ཁྱིམ་ཚང་ནང་འཛུལ་ཏེ། ལས་བྱ་འབྲི་བཞིན་པའི་སློབ་ཕྲུག་བྱིས་པ་ཡང་དམར་གསོད་གཏོང་གི་འདུག་ཟེར།

  གཞན་ཞིག་གིས། པེ་ཅིན་མི་རིགས་སློབ་གླིང་གི་དགེ་རྒན་ཞིག་གིས་བཤད་དོན། བོད་རིགས་སློབ་མ་ཞིག་གིས་ངོ་སྤྲོད་བྱས་པར། དྲུག་བཞིའི་དམར་གསོད་སྐབས་ཀྱི་པེ་ཅིན་དང་ད་ལྟའི་ལྷ་སའི་བར་ཁྱད་ནི། པེ་ཅིན་ན་དམག་མི་ཁྱིམ་ཚང་ནང་འཛུལ་ཏེ་གང་བྱུང་དུ་མི་བསོད་ཀྱི་མེད་པ་དེ་རེད་ཟེར། ད་དུང་གཅིག་གིས། ང་ཚོ་རང་ཡུལ་དུ་ཕྱི་མི་ཆགས་ཀྱི་འདུག་ཟེར། འོད་ཟེར་ལགས་ཀྱིས་བརྡ་དེབ་ནང་། བོད་ཀྱི་ཚོང་ལས་ཚགས་པར་ནང་དེ་རིང་ལྷ་སར་རྒྱུན་སྡོད་ཀྱི་མི་གྲངས་ཁྲི་ལྔ་ཅུ་ང་དགུ་ཡོད་པར་བསྒྲགས་འདུག འོན་ཀྱང་དེའི་གྲས་སུ་ལྷ་ས་རང་གི་མི་ག་ཚོད་ཡོད་དམ། ཁྲི་བཅུ་ཡོད་དམ། ལྷ་སའི་གདོད་མའི་མི་གྲངས་སུ་མ་གཏོགས་པའི་བོད་མི་ད་ལྟ་ལྷག་ཡོད་པ་ག་ཚོད་ཡོད། ཁྲི་གཅིག་ཟིན་ནམ། མི་གྲངས་ཁྲི་ང་དགུའི་ནང་དམག་དཔུང་གི་གྲངས་ཀ་མི་ཐེ། ད་ལྟ་བོད་ཡུལ་མི་སེར་སྤེལ་ཡུལ་དུ་གྱུར་ཏེ་བོད་ཡུལ་གྱི་གཏེ་གནས་ལྷ་སའི་ནང་བོད་མི་གྲངས་ཉུང་མི་རིགས་ཆགས་ཟིན། ཞེས་བཀོད་འདུག

 ངའི་གཡག་༼དྲ་མིང་༽གིས་བོད་ཡིག་ནང་འདི་ལྟར་བྲིས་ཡོད་དེ། ང་ལྷ་སར་འགྲོ་བར་ཧ་ཅང་སྐྲག ང་བར་སྐོར་དུ་བསྐྱོད་པར་ཤིན་ཏུ་འཇིགས།  དངོས་འབྲེལ་ཡིན། འོན་ཀྱང་ང་དགའ་ས་ལྷ་ས་ལས་ལྷག་ཅིག་མེད། ཁོང་གིས་མུ་མཐུད་དུ། བོད་ནང་གི་བོད་མིས་འདི་ལྟར་བྲིས་ཡོད་དེ།  ཁ་ཡོད་ཀྱང་བདེན་གཏམ་ཤོད་དབང་མེད་པ་དང་། རང་ཡུལ་ཡོད་ཀྱང་རང་ཡུལ་ལ་སྡོད་དབང་མེད་པའི་ང་ཚོ་བོད་པ། ཞེས་དང་། ལྷ་སར་མངོན་གསལ་དོད་པོས་མི་རིགས་དབྱེ་འབྱེད་བྱེད་ཀྱི་འདུག བོད་མི་གཅིག་བུར་ཞིབ་བཤེར་དང་། བཀག་སྡོམ།  ཟུར་བཀག  བཙན་ཁྲིད་བྱེད་ཀྱི་འདུག་ཟེར། ཡང་ཁོང་གིས།  བོད་ནང་གི་བོད་མི་ཚོས།  རང་ཡུལ་དུ་སྡོད་འདོད་མེད་པ་མ་ཡིན་ཡང་། བཙོན་རར་གྱུར་པའི་ཕ་ཡུལ་འཇིགས་སུ་རུང་།  ཞེས་དང་། མི་རིང་བར་ལྷ་ས་རྒྱ་སར་འགྱུར་ཐག་ཆོད་རེད།  ད་ལྟ་ལྷ་ས་བོད་ཀྱིས་སྟོང་ལ་ཉེ་ཟེར། གནས་ཚུལ་གཞན་ཞིག་ནི།  དེ་རིང་རྒྱ་ནག་གིས། ལྷ་བྱ་རྟགས་ཅན་གྱི་འཇིག་རྟེན་འཕུར་གྲུ་དགུ་བར་སྣང་དུ་བཏང་སྟེ། སྐར་མ་བརྒྱད་ཀྱི་ནང་འཁོར་སྐར་རྒྱུ་ལམ་ནང་ཞུགས་སོང་།

ད་ལྟའི་བོད་ནང་གི་གནས་སྟངས་ནི། མིག་གིས་ལྟ་མི་ཆོག རྣ་བས་ཉན་མི་ཆོག ཁ་ནས་བཤད་མི་ཆོག ལག་གིས་ལས་མི་ཆོག གང་ལ་འགྲོ་མི་ཆོག་པ་སྟེ། མི་ཆོག་པ་ལྔ་ཡི་ཁྲིམས་ཀྱི་ཡོངས་སུ་བསྡམ་པ་དང་། བོད་མིའི་ཞིང་ཕྱུགས་དང་ཚོང་ལས། འགྲོ་འོང་སོགས་འཚོ་ཐབས་ཀྱི་ལམ་ཁ་ཡོངས་བཀག་སྡོམ་བྱེད་ཅི་ཐུབ་བྱེད་ཀྱི་ཡོད། དེ་དང་ཆབས་ཅིག དམག་མི་དང་ལས་བཟོ་བའི་རྣམ་པའི་སྟེང་ནས་རྒྱ་མི་མང་པོ་བོད་དུ་གནས་སྤར་ཞིང་། ཚོང་ལས་སོགས་འཚོ་ལམ་ཡོངས་ལ་བདག་དབང་བསྒྱུར་པ་དང་། འཇིགས་སྣང་སྣ་ཚོགས་ཀྱི་གནོན་ཤུགས་སྤྲད་དེ་ཕྱིན་ཆད་ཐོབ་ཐང་འཛིན་ཡིག་སྟེང་བོད་ཅེས་པའི་མིང་ཙམ་ཡང་འབྲི་མི་ཕོད་པ་ཞིག་ཏུ་བསྒྱུར་གྱིན་ཡོད། གནས་སྟངས་འདི་དག་ནི་དོན་རྐྱེན་གཞན་ལ་ཁ་གཡར་ཏེ་བོད་མི་རིགས་འཆི་ལམ་དུ་འདེད་པའི་རྣམ་གྲངས་གཅིག་ཡིན་ལ། མི་རིགས་རྩ་མེད་དུ་གཏོང་བའི་རྒྱུན་རིང་གི་འཐབ་ཇུས་ལས། གློ་བུར་བའི་དོན་རྐྱེན་ལ་འཇུས་ཏེ་ཐབས་ལམ་ལག་བསྟར་གྱི་གོ་སྐབས་དམ་འཛིན་བྱས་པ་ཞིག་རེད།

འདི་ལྟ་བུའི་འཐབ་ཇུས་དང་གཡོ་སྒྱུ་ནི་རྒྱ་ནག་ལ་ཧ་ཅང་མང་ཞིང་གཏིང་ཟབ་པ་དང་རིག་གཞུང་དང་ཡང་འབྲེལ་ཡོད། ཉེ་སྔོན་༸གོང་ས་མཆོག་དང་དབྱིན་ཇིའི་སྲིད་བློན་གཙོ་གཞོན་གཉིས་མཇལ་འཕྲད་སྐབས། རྒྱ་ནག་གིས་དབྱིན་གཞུང་ལ་རྒོལ་གཏམ་བཏང་ཞིང་ཕྱི་འབྲེལ་མང་དག་ཅིག་དུམ་སེ་བཅད་ཡོད། དེ་ལྟར་བྱེད་དོན་ནི། གལ་སྲིད་ཐབས་ལམ་དེ་འདྲ་ཞིག་མ་སྤྱད་ཚེ། ཕན་ཚུན་གྱི་དཔོན་རིགས་ཐུག་འཕྲད་སྐབས་དབྱིན་ཇིས་ཚོང་དོན་དང་ལྷན་དུ་བོད་དོན་དང་འགྲོ་བ་མིའི་ཐོབ་ཐང་གི་གནད་དོན་གླེང་ངེས་ལ། ཚུར་དེ་འདྲ་མ་གླེང་སྔོན་ལ་ཕར་དགག་སྟེ་ཁ་ཁུ་སིམ་པོར་གཏོང་བ་ནི་བྱ་ཐབས་ཡག་ཤོས་དེ་རེད། ཕྱོགས་གཞན་ཞིག་ནས། དབྱིན་ཇིའི་སྟེང་དེ་ལྟར་ལག་ལེན་བསྟར་ཚེ། ར་བསད་ན་ལུག་འདར་བའི་དཔེ་ལྟར། རྒྱལ་ཁབ་གཞན་དག་ཀྱང་རང་བཞིན་གྱིས་ཁུམས་འགྲོ་ངེས་རེད།

བདག་གིས་ཁེ་སྔོན་རྡ་སའི་ཚོགས་པ་ཞིག་གི་དྲུང་ཆེ་དང་ཁ་བརྡ་བྱས་པ་ཡིན། ད་ལྟ་ཅི་ཞིག་བྱེད་ཀྱི་ཡོད་ཅེས་དྲིས་པར། ལྷ་སའི་རང་བསྲེགས་ལས་འགུལ་ལ་རྒྱབ་སྐྱོར་དུ་མར་མེ་ཁྲོམ་སྐོར་ཞིག་གོ་སྒྲིག་བྱེད་ཀྱི་ཡོད་ཟེར། ང་གློ་བུར་དུ་ཅི་མ་ཡིན་ལ་གད་མོ་ཞིག་ཤོར་སོང་། ཀུ་རེའི་ཚུལ་དུ། ཁྱོད་ཚོས་ཁ་བཏོན་སྐྱོར་གྱི་ཡོད་དམ་ཞེས་ཐལ་སོང་། ཁོང་ཅུང་མ་བདེ་བ་འདྲ། ཁོང་གིས་འདི་ལས་ལྷག་ཅིག་བྱེད་རྒྱུ་མི་འདུག གལ་སྲིད་ལས་འགུལ་རྒྱ་ཆེན་པོ་ཞིག་སྤེལ་ཚེ་མ་མཐར་ཡང་སྒོར་འབུམ་ཁ་ཤས་ཀྱི་འགྲོ་གྲོན་དགོས། དེ་དཀའ་ལས་ཁག་པོ་རེད་ཟེར། ངས་ཁོང་ལ་རྩེད་མོ་དང་སྦྲགས་ནས་ཁ་རྒྱགས་བཤད་པ་ཡིན། ཁྱོད་ཚོས་སྐད་ཡིག་སྣ་ཚོགས་ཤེས་པ་རེད། ཤེས་ཡོན་ཡོད་པ་རེད། འབྱོན་ཐང་ཡོད་པ་རེད། ད་ནི་མཉམ་འབྲེལ་རྒྱལ་ཚོགས་ལ་རེ་འབོད་དང་སྙན་ཞུ་ཐོངས། རྒྱལ་སྤྱིའི་སྤྱི་ཚོགས་ནང་ཁྱབ་བསྒྲགས་དང་སྐུལ་སློང་བྱོས། འགྲོ་བ་མིའི་ཐོབ་ཐང་ལས་ཁུངས་རྣམས་དང་འཛམ་གླིང་གི་རྒྱལ་ཁབ་སོ་སོ་ལ་ཨུ་ཚུགས་རྒྱོབས། རྒྱ་ནག་མི་མང་ལ་གནས་ཚུལ་ངོ་སྤྲོད་དང་རེ་འབོད་བྱོས།  འདི་ནི་ལས་འགུལ་ངོ་མ་རེད། འགྲོ་གྲོན་ཡང་ཉུང་གི་རེད། དེ་མིན་རི་མགོ་དང་ནགས་ཁྲོད་ནས་ལྭ་སྒྲོན་སྦར་ཏེ་སྐོར་བ་བྱེད་པ་ནི། རྒྱུས་མེད་ཅིག་གིས་མཐོང་ཚེ། སུ་ཞིག་གི་སྐྱེས་སྐར་སྲུང་བརྩི་བྱེད་པ་འདྲ་ལ་དུས་ཆེན་གང་ཞིག་གི་སྤྲོ་སྐྱིད་གཏོང་བ་དང་འདྲ་བའི་ཚོར་སྣང་སྐྱེས་སྲིད་ཅེས་བཤད་པ་ཡིན།

རྗེས་སུ་ངས་རང་གི་ཀུ་རེའི་སྐད་ཆ་དག་ལ་ཕྱིར་འདང་རེ་རྒྱག་སྐབས། ཀུ་རེ་དེ་དག་ཀྱང་གཏན་ནས་གནས་ལུགས་མེད་པ་ཏག་ཏག་རེད་མི་འདུག་ལ། ང་གཅིག་བུའི་ཚོར་སྣང་ཡང་མ་རེད་ཨང་། སྔོན་ཆད་བདག་གིས། བོད་ནང་གི་རང་ལུས་མེར་བསྲེགས་དང་ཚེ་བརྟན་རྡོ་རྗེ་བལ་དམག་གིས་བཟུང་སྐབས་དག་ཏུ། བོད་ཀྱི་གཞུང་དང་ཚོགས་པ་དག་གིས་ལས་དོན་ནུས་ལྡན་རེ་སྤེལ་བའི་རེ་བ་འཆང་བ་ཡིན། འོན་ཀྱང་རེ་བ་དག་རེ་རེ་བཞིན་ཤི་སོང་། ད་ལྟ་བོད་ནང་ན་མུ་མཐུད་དུ་རང་བསྲེགས་ངོ་རྒོལ་གྱི་རྒྱུན་མཐུད་བཞིན་འདུག་ལ། དེ་ལ་བརྟེན་ནས་བོད་མི་རྣམས་ཀྱིས་ཡ་ང་བའི་བཙན་དྲག་དང་དཀའ་སྡུག་གི་འཚོ་བ་མྱོང་བཞིན་འདུག བོད་ནང་གི་བོད་མི་ཚོས་བོད་དོན་རང་རང་གི་ལུས་སྲོག་གིས་སྒྲུབ་བཞིན་འདུག་ལ། བཙན་བྱོལ་ནང་གི་ཚོགས་པ་དག་གིས་བོད་དོན་སོ་སོའི་ཁེ་གྲགས་ཀྱི་ཕྱིར་དུ་སྒྲུབ་ཀྱི་འདུག འདི་ལྟ་བུའི་ཧེ་བག་ཅིག་ཤོར་བར་ངོ་མ་ཧ་ལས་བྱུང་།

བོད་ནང་གི་བོད་མི་ཚོས་ཅིའི་ཕྱིར་རང་རང་གི་འཚོ་གནས་དང་འབྲེལ་བའི་ཤེས་ཡོན་རེ་སྦྱང་ཞིང་། བག་ལྷོད་ཀྱི་འཚོ་བ་རེ་རོལ་བསྡད་ན་མ་ཆོག་པ་རེད་དམ། ཆབ་སྲིད་ཀྱི་གྲི་ཁ་ལ་ལག་པ་འཆང་དགོས་དོན་ཅི་ཡོད་དམ། མི་རིགས་དང་ལ་རྒྱ་ཞེས་པ་ཞིག་ལ་ཨུ་ཚུགས་ཀྱིས་ཤི་འཐམ་བྱེད་དོན་ཅི་ཞིག་ཡོད། གལ་སྲིད་དོན་དག་དེ་ཚོ་དང་འབྲེལ་བ་མེད་ཚེ་མི་རིགས་གཞན་དག་བཞིན་བག་ལྷོད་ཀྱི་འཚོ་བ་ཞིག་རོལ་བཞིན་ཡོད་ངེས་ལ། ད་ལྟའི་དཀའ་སྡུག་གི་དུས་ཚོད་འདི་འདྲ་མྱོང་དགོས་ཀྱི་ཡོད་པ་མ་རེད་འདོད། གལ་སྲིད་བོད་མི་རིགས་ཀྱི་ངོ་བོ་བརླག་ན་ཡང་དམིགས་བསལ་གྱིས་ཁོང་ཚོར་གྱོང་རེག་འགྲོ་བ་ཅི་ཞིག་ཡོད། བདག་གིས་ཁོང་ཚོ་ལ་རེ་སྐུལ་གྱི་སྐད་ཅིག་བསྐུར་རྒྱུར། བོད་མི་ཚོ། ད་ནས་ཁྱོད་ཚོས་རང་རང་ལ་དབང་བའི་བག་ལྷོད་ཀྱི་འཚོ་སྟངས་ཤིག་འཚོལ་རོགས། ཅི་ཞིག་ལ་ཡང་འདང་རྒྱག་དགོས་པ་མ་རེད། ལྷག་པར་འདི་ཕྱོགས་ལ་རེ་བ་མ་རྒྱག་ཅེས་ཟེར་འདོད།