སེ་རི་ཡའི་འདམ་ག

གཟའ་ཉི་མའི་ཉིན་རྒྱལ་ཚོགས་དམིགས་བསལ་སྐུ་ཚབ་ཀཱོ་ཧྥེ་ཨན་ནན་དང་། སེ་རི་ཡའི་སྲིད་འཛིན་བྷ་ཤར་གཉིས་ཐུག་འཕྲད་བྱས་ཏེ། བྷ་ཤར་གྱིས་ཨན་ནན་གྱི་ཞི་བའི་དོན་ཚན་ ༦ ལ་ཁས་ལེན་བྱས་ཡོད་པ་དང་། ད་སྔ་ལེགས་འགྲུབ་མ་བྱུང་པའི་རྒྱུ་རྐྱེན་ནི་ཨ་རི་སོགས་དོན་ཚན་དེ་དག་ལ་ལོག་འགྲེལ་བརྒྱབ་པས་ཡིན་ཚུལ་བརྗོད་འདུག

ཕྱི་ཚེས་ ༨ ཉིན་ཨ་རབ་མཐུན་ཚོགས་དང་རྒྱལ་ཚོགས་ཀྱི་དམིགས་བསལ་འཐུས་མི་རྒྱལ་ཚོགས་དྲུང་ཆེ་ཟུར་པ་ཀཱོ་ཧྥེ་ཨན་ནན་(Kofi Annan) སེ་རི་ཡའི་རྒྱལ་ས་ཌ་མཱ་སི་ཁཱུ་སིར་(Damascus)བསྐྱོད་དེ། སྲིད་འཛིན་བྷ་ཤར་དང་ལྷན་དུ་སེ་རི་ཡའི་ཟིང་འཁྲུག་ཞི་འཇགས་ཡོང་རྒྱུའི་སྐོར་ལ་གྲོས་མོལ་བྱས་ཡོད། ཨན་ནན་གྱིས་འདི་ལོའི་ཕྱི་ཟླ་ ༣ པ་ནས་སེ་རི་ཡའི་ཟིང་འཁྲུག་མཚམས་འཇོག་རྒྱུ་དང་། རྒྱལ་སྤྱིའི་རྟོག་ཞིབ་མི་སྣ་སེ་རི་ཡའི་ནང་གཏོང་རྒྱུ། ད་ལྟའི་སེ་རི་ཡའི་ཆབ་སྲིད་ཀྱི་གནད་དོན་སྐོར་ལ་ནང་ཁུལ་གྱི་ཤོག་ཁག་དག་དང་ཞི་འགྲིག་གྲོས་མོལ་བྱ་དགོས་པ་སོགས་དོན་ཚན་ ༦ བཏོན་ཏེ། བྷ་ཤར་དང་ཐེངས་འགར་གྲོས་བསྡུར་བྱས་ཀྱང་གྲུབ་འབྲས་ཐོན་མེད་ཀྱང་། ཐེངས་འདིར་བར་ཆད་མང་པོ་ཡོད་སྲིད་ཀྱང་བྷ་ཤར་གྱིས་གྲོས་དོན་ཁག་སྟོང་ཟད་དུ་མ་འགྲོ་བ་བྱ་དགོས་པའི་སྐུལ་མ་བཏང་འདུག བྷ་ཤར་གྱིས་ཨན་ནན་ལ་སེ་རི་ཡའི་ཟིང་འཁྲུག་མཇུག་བསྒྲིལ་རྒྱུར་སྲིད་ཇུས་གཉིས་འཛིན་རྒྱུ་ཡིན་ཚུལ་བརྗོད་པ་ལས་གཅིག་ནི། སེ་རི་ཡའི་ནང་གི་དྲག་སྤྱོད་པ་ཚར་གཅོད་བྱ་རྒྱུ་དང་། དེ་ནས་ཆབ་སྲིད་ཀྱི་ལྟ་གྲུབ་མ་འདྲ་བའི་ཁ་གཏད་ཕྱོགས་ཁག་ཚོ་དང་གྲོས་མོལ་བརྒྱུད་གཞུང་གི་སྲིད་ཇུས་ལ་བཅོས་སྒྱུར་བྱ་རྒྱུ་གཉིས་རེད།  

ཉིན་དེའི་གྲོས་བསྡུར་སྐབས་སྲིད་འཛིན་བྷ་ཤར་གྱིས་ཨན་ནན་གྱི་ཞི་འགྲིག་དོན་ཚན་ ༦ དེ་ཧ་ཅང་ཡག་པོ་ཡོད་ཀྱང་། ད་སྔ་ལག་བསྟར་འཁྱོལ་མ་ཐུབ་པའི་རྒྱུ་རྐྱེན་ནི། ཨ་རི་གཙོས་པའི་རྒྱལ་ཁབ་ཁག་ཅིག་གིས་དོན་ཚན་ ༦ ལ་འགྲེལ་ལོག་བརྒྱབ་སྟེ། སེ་རི་ཡའི་ནང་ཁོང་ཚོའི་ཆབ་སྲིད་ཀྱི་ཐེ་ཇུས་བསླེབ་ཐབས་བྱས་པ་ལས་བྱུང་ཡོད་ཚུལ་དང་། སྲིད་དབང་འཕོ་འགྱུར་ཐད་ཁོང་གིས་སེ་རི་ཡར་སྔར་ནས་གཞུང་གཅིག་ཡོད་པས་གཞུང་གཞན་པ་ཞིག་ཡོང་ཐབས་མེད་པ། ས་གནས་སྲིད་གཞུང་ཐད་ནས་སྔ་ལོའི་ཕྱི་ཟླ་ ༡༢ ནང་རྒྱལ་ཡོངས་འོས་བསྡུ་བྱས་སྐབས་ཁ་གཏད་ཚོགས་པ་དག་ལ་འོས་ཤོག་གང་འཚམ་ཐོབ་ཡོད་པ་དང་། ཁོང་ཚོར་འོས་ཤོག་མང་པོ་ཐོབ་མ་ཐུབ་པ་དེ་འོས་འཕེན་མཁན་གྱི་རྒྱབ་སྐྱོར་ལ་རག་ལས་ཡོད་པ་ལས་གཞུང་ལ་སྐྱོན་བརྗོད་བྱ་གཞི་གང་ཡང་ལྷག་མེད་ཚུལ། ཨ་རིས་སེ་རི་ཡའི་གྱེན་ལངས་པར་དངུལ་དང་མཚོན་ཆ་མཁོ་སྤྲོད་བྱེད་ཀྱི་ཡོད་པ་མ་ཟད། ཕྱི་ཕྱོགས་དྲག་སྤྱོད་པ་སེ་རི་ཡའི་ནང་བཏང་སྟེ་ཆེད་དུ་ཟིང་འཁྲུག་རྒྱ་སྐྱེད་ཀྱིས་སེ་རི་ཡའི་རྒྱལ་ཁོངས་བརྟན་བརླིང་ལ་གཏོར་བཤིག་གཏོང་གི་ཡོད་པ། སེ་རི་ཡའི་ནང་གི་དྲག་སྤྱོད་པ་འཛིན་བཟུང་བྱས་པའི་ཁྲོད་ཊའུ་ནེ་ཤི་ཡ་(Tunisia) དང་། ལཱེ་བྷེ་ཡ་(Lybia) སོགས་ནས་ཆེད་དུ་ཡོང་པ་དེ་དག་ཨ་རིའི་རྒྱུད་སྐུལ་འོག་ཡོང་པ་རྐྱང་ཡིན་ཚུལ་སོགས་བརྗོད་འདུག

གཟའ་ཉི་མའི་ཉིན་བྷ་ཤར་གྱིས་ཨ་རིས་སེ་རི་ཡའི་ཟིང་འཁྲུག་ལ་རྒྱུད་སྐུལ་བྱེད་ཀྱི་ཡོད་པའི་ཐེར་འདེན་བྱས་འཕྲལ། ཨ་རིའི་རྒྱལ་དོན་དྲུང་ཆེ་ཧེ་ལཱ་རི་ཡིས་སེ་རི་ཡའི་སྲིད་དབང་མཇུག་སྒྲིལ་རྒྱུར་ཉི་མ་གྲངས་ཀ་རྒྱག་བཞིན་པ་དང་། དེ་ནི་ཚགས་སྣོད་ནང་གི་བྱེ་མ་ལྟ་བུ་ཞིག་ཏུ་གྱུར་ཡོད་ཚུལ་གྱི་ལན་འདེབས་བྱས་འདུག གཞན་རྒྱལ་ཚོགས་དྲུང་ཆེ་བྷན་ཀེ་མོན་གྱིས་ཀྱང་ད་ཆར་སེ་རི་ཡའི་ནང་དྲག་གནོན་ཤུགས་ཆེ་རུ་གྱུར་ཏེ་གནས་བབ་ཛ་དྲག་ཆགས་ཡོད་པ་དང་། མི་གསོད་ཁྲག་སྦྱོར་མུ་མཐུད་འབྱུང་བཞིན་པ་བཅས་ཀྱིས་སེ་རི་ཡའི་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཆེས་སྡུག་ཤོས་སུ་གྱུར་ཡོད་པ། ད་ལྟའི་སེ་རི་ཡའི་གནས་བབ་དེ་མུ་མཐུད་འགྲོ་ཐབས་མེད་པ་དང་གཞི་རིམ་གྱི་བཅོས་སྒྱུར་ལ་གཡོལ་ཐབས་མེད་པ་ཞིག་ཆགས་ཡོད་པ་ནི་སྲིད་འཛིན་བྷ་ཤར་གྱིས་ངེས་པར་དུ་ཤེས་རྟོགས་ཐུབ་དགོས་པར་བརྗོད་འདུག

སོ་ངྷི་ཨ་རབ་(Saudi Arabia) དང་། ཁཱ་ཐར་(Qatar)། ཊུར་ཀེ་(Turkey) བཅས་ཀྱིས་སེ་རི་ཡའི་གྱེན་ལངས་པ་ཚོར་མུ་མཐུད་རྒྱབ་སྐྱོར་བྱེད་ཀྱི་ཡོད་པ་དང་། རཱ་ཤི་ཡ་དང་རྒྱ་ནག ཨེ་རན་སོགས་ཀྱིས་མུ་མཐུད་བྷ་ཤར་གཞུང་ལ་རྒྱབ་སྐྱོར་བྱེད་ཀྱི་ཡོད་ལ། སེ་རི་ཡའི་གཞུང་ལ་ཨེ་རན་གཞུང་གིས་རོགས་དམག་བཏང་ཡོད་པའི་སྐོར་ལ་གླེང་སློང་ཤུགས་ཆེན་ཡོང་གི་ཡོད།

ཨ་རབ་གླིང་ཊུ་ནེ་ཤི་ཡ་དང་ཨི་ཇིབ། ལཱེ་བྷེ་ཡ་སོགས་ཀྱི་གསར་བརྗེ་ལམ་ལྷོངས་ཆེན་པོ་བྱུང་ཡོད་ཀྱང་། སེ་རི་ཡ་ད་དུང་རྒྱུན་གནས་ཐུབ་པའི་ཐད་ཆབ་སྲིད་དཔྱད་བརྗོད་པ་ཚོས། རཱ་ཤི་ཡ་དང་རྒྱ་ནག་གིས་སེ་རི་ཡའི་ནང་ཎ་ཊོ་དང་རྒྱལ་ཚོགས་ཀྱི་དམག་དཔུང་གཏོང་རྒྱུར་ངོ་རྒོལ་བྱས་སྟབས། ཨ་རི་དང་ནུབ་ཕྱོགས་རྒྱལ་ཁབ་དག་གིས་ཐད་ཀར་སེ་རི་ཡའི་ནང་དྲག་ཤུགས་བེད་སྤྱོད་མ་ཐུབ་པས་ཡིན་ལན་ཚུལ་གླེང་། ཨ་རབ་མཐུན་ཚོགས་དང་ཨ་རི་སོགས་ནུབ་ཕྱོགས་རྒྱལ་ཁབ་ཁག་ཕལ་ཆེ་བས་སེ་རི་ཡའི་གནད་དོན་སྐོར་གླེང་སྐབས། ཨང་དང་པོ་སྲིད་དབང་སྒེར་སྤྱོད་པ་བྷ་ཤར་སྲིད་སྟེགས་ལས་ཕྱིར་འཕུད་གཏོང་རྒྱུ་དེ་ཡིན་པ་དང་། རཱ་ཤི་ཡ་དང་རྒྱ་ནག་སོགས་བྷ་ཤར་གྱི་ཤོག་གཏོགས་དག་གིས་བྷ་ཤར་ཕྱིར་འཕུད་གཏོང་རྒྱུའི་ལངས་ཕྱོགས་ལ་མཐའ་གཅིག་ཏུ་ངོ་རྒོལ་བྱེད་ཀྱི་ཡོད།  

ཆབ་སྲིད་དཔྱད་བརྗོད་པ་ཁག་ཅིག་གིས་སེ་རི་ཡའི་གནད་དོན་ཐག་གཅོད་རྒྱུར་གདམ་ཀ་གཉིས་ལས་མེད་པ་དང་། གཅིག་ནི་རྒྱལ་ཚོགས་བདེ་འཇགས་ལྷན་ཁང་ནང་སེ་རི་ཡའི་ཟིང་འཁྲུག་ཞི་འཇགས་གཏོང་ཕྱིར་རྒྱལ་སྤྱིའི་དམག་དཔུང་སེ་རི་ཡའི་ནང་གཏོང་རྒྱུའི་གྲོས་གཞིར་རཱ་ཤི་ཡ་དང་རྒྱ་ནག་གི་རྒྱབ་སྐྱོར་འཐོབ་ཐབས་བྱ་དགོས་པ་དང་། དེ་མ་འཐོབ་ཚེ་བྷ་ཤར་སྲིད་སྟེགས་ལས་འཕུད་མ་དགོས་པའི་གནས་བབ་འོག་གཞུང་གི་ཆབ་སྲིད་ལ་བཅོས་སྒྱུར་ཡོང་ཐབས་བྱ་རྒྱུ་གཉིས་ལས་ལམ་ཁ་གཞན་མེད་ཚུལ་བཤད།

གསར་འགོད་པ། བནྡེ་སྐྱབས།