ཉེ་ཆར་ནུབ་བྱང་མི་རིགས་སློབ་ཆེན་གྱི་རྒན་དཔལ་མོ་ལགས་གཙོས། སྲིན་མོ་བུད་མེད་དང་བྱིས་པའི་ཞབས་འདེགས་ཚོགས་པའི་ཚོགས་མི་བརྒྱད་ཀྱིས། ཉིན་གསུམ་ལྷག་གི་རིང་མདོ་སྨད་བསང་ཆུ་རྫོང་བསང་ཁོག་དང་རྒན་གྱ་ཡུལ་ཚོ་བཅས་ཀྱི་བུད་མེད་ ༡༠༠ ལྷག་ལ་མ་བུའི་བདེ་སྲུང་དང་། མངལ་ལྡན་མའི་སྤྱོད་ལམ་དང་ཟས་གོས་བསྟེན་ཚུལ་ཐད་ཀྱི་འཛེམ་བྱ། དུས་རྒྱུན་འཚོ་བའི་ཁྲོད་འབྱུང་སླ་བའི་མོ་ནད་ལ་ཇི་ལྟར་མཉམ་འཇོག་དང་གཙང་སྤྲ་བྱེད་ཚུལ། ཨེ་ཙི་སོགས་ཉེན་ཁ་ཆེ་བའི་མཚན་མའི་འགོས་ནད་སྣ་ཚོགས་ཀྱི་འབྱུང་རྐྱེན་དང་། འགོས་ནད་དེའི་རིགས་སྔོན་འགོག་བྱེད་ཐབས་བཅས་ཀྱི་འཕྲོད་བསྟེན་ཤེས་བྱའི་ཟབ་སྦྱོང་སྤྲད་ཡོད་པ་མ་ཟད། རྒྱ་སྒོར་ ༢༥༠༠ ལྷག་གི་སྨན་དང་གྱོན་གོས་སོགས་མཁོ་སྤྲོད་གནང་ཡོད་འདུག
ཐེངས་འདིའི་ཟབ་སྦྱོང་དང་སྨན་སྦྱིན་གྱི་འགྲོ་སོང་མཐའ་དག མཚོ་སྔོན་གངས་ཅན་ཡུལ་སྐོར་ཀུང་ཟི་གཙོས་ལྷག་བསམ་ཅན་གྱི་བོད་མི་ཁག་ཅིག་གིས་ནར་གཏོར་བྱས་པ་ཡིན་འདུག་ལ། ཟབ་སྦྱོང་འདིའི་མགོ་འཇུག་བར་གསུམ་དུ་བསང་ཆུ་རྫོང་བུད་མེད་ལྷན་ཚོགས་ཀྱི་ཚོགས་གཙོ་དང་ས་གནས་དཔོན་རིགས། ལས་བྱེད་བཅས་ཀྱི་མཐུན་འགྱུར་རོགས་རམ་གནང་ཡོད་འདུག
སྲིན་མོ་བུད་མེད་དང་བྱིས་པའི་ཞབས་འདེགས་ཚོགས་པ་འདི་ནི། བོད་ཆོལ་ཁ་གསུམ་གྱི་བུད་མེད་ཁོ་ནས་གྲུབ་པའི་ཚོགས་པ་ཞིག་ཡིན་ཞིང་། ཚོགས་པ་འདིས་འདས་པའི་ལོ་ ༣ རིང་བོད་ཁུལ་གྱི་ས་གནས་མང་པོའི་ནང་གཞི་རིམ་རོང་འབྲོག་བུད་མེད་ཚོར་འཕྲོད་བསྟེན་རྒྱུན་ཤེས་སྐོར་གྱི་ཟབ་སྦྱོང་ཐེངས་མང་སྤྲད་དེ། བོད་པའི་བུད་མེད་ཚོར་རང་ལུས་བདེ་སྲུང་གི་འདུ་ཤེས་ཆགས་ཐབས་ལ་འབད་པ་བྱས་ཡོད་པ་མ་ཟད། སློབ་གྲྭར་འགྲོ་བཞིན་པའི་བྱིས་པ་༢༧ ལ་རོགས་སྐྱོར་སྦྱིན་བདག་ཐབས་འཚོལ་བྱས་ཏེ་སློབ་ཡོན་རོགས་རམ་བྱེད་བཞིན་ཡོད་འདུག
ལས་འགུལ་དེ་རིགས་རྒྱབ་སྐྱོར་དང་རྒྱུན་སྐྱོང་ཡག་པོ་ཡོང་བའི་སྨོན་འདུན་ཡོད་ལྷག་པར་དུ་བོད་ནང་སྲིན་བུ་འཁྲུག་པའི་ནད་གཞི་སྐོར་ལ་གོ་རྟོགས་ངེས་པར་དུ་སྤེལ་དགོས།