བུད་མེད་ཅིག་གིས་རང་ལུས་མེར་བསྲེཊ།

ད་ལྟ་རང་ཨ་མདོ་ཀན་ལྷོ་གཙོད་དགོན་པའི་མཆོད་རྟེན་མཐའ་རུ་བོད་རིགས་བུད་མེད་ཅིག་གིས་རང་ལུས་མེར་བསྲེགས་བཏང་ཡོད་འདུག

ད་ལྟ་རང་བོད་ནས་ ( ་་་་་་ ) བརྒྱུད་སྐད་བསྐུར་གནང་བ་ལྟར་ན། དེ་རིང་ཉིན་རྒྱབ་བོད་ནང་གི་ཆུ་ཚོད་ ༢།༣༠ ཙམ་ལ་ཨ་མདོ་ཀན་ལྷོ་ཁུལ་གཙོད་གྲོང་ཁྱེར་གྱི་ཉེ་འདབས་སུ་ཡོད་པའི་གཙོད་དགོན་པའི་གཡས་ངོས་ཀྱི་གླིང་སྐོར་ལམ་གྱི་མཆོད་རྟེན་མདུན་དུ། བོད་རིགས་བུ་མོ་རང་ལོ་ ༢༦ ཡས་མས་ཅན་ཞིག་གིས་རང་ལུས་མེར་བསྲེགས་བཏང་ཡོད་འདུག་ལ། དེ་མ་ཐག་ཉེ་འཁོར་གྱི་སྐོར་བར་འགྲོ་མཁན་དག་གིས་མེ་གསོད་ཐབས་བྱས་ཡོད་ཀྱང་། རྗེས་སུ་བུ་མོ་དེ་སྐུ་གྲོངས་ཟིན་པའི་གནས་ཚུལ་ཞིག་ཀྱང་འབྱོར་སོང་། 

སྐད་འཇོག་མཁན་གྱིས་བརྗོད་དོན། “ གནས་ཚུལ་དེ་ངོ་མ་རེད། ང་རང་ཡུལ་དངོས་ན་ཡོད། སྐོར་བ་རྒྱག་མཁན་ཚོས་ཁོ་མོའི་ལུས་ཀྱི་མེ་བསད་དེ། ད་ལྟ་གྲྭ་མང་ཚོས་དགོན་པའི་གཞུང་གི་དོ་དམ་ཁང་དུ་སྲུང་འདུག ས་གནས་མང་ཚོགས་ཇེ་མང་དུ་འགྲོ་བཞིན་འདུག ”ཅེས་བརྗོད་འདུག

ཁོས་སྐད་སྐུར་གཉིས་པ་འབྱོར་བའི་ནང་། “ ད་ལྟ་རང་གཙོད་དགོན་པའི་འཁྲིས་སུ་བོད་རིགས་བུད་མེད་ཅིག་གིས་རང་ལུས་མེར་བསྲེགས་བཏང་ཟིན་པ་མ་ཟད། ཁོང་མོ་དེ་མ་ཐག་སྐུ་ཡང་གྲོངས་ཚར་འདུག ཁོང་མོ་གཙོད་རྟ་གསར་སྡེ་བ་ནས་རེད། མིང་ལ་སྒྲོལ་དཀར་མཚོ་( སྐྱིད)ཟེར་ཞིང་། ད་ལྟ་རང་ལོ་ ༢༦ རེད་འདུག” ཅེས་བརྗོད་འདུག

སྐད་སྐུར་གསུམ་པ་འབྱོར་བའི་ནང་། ” བུ་མོ་དེའི་ཨ་ཕའི་མིང་ལ་འབྲུག་རྒྱལ་མཁར་དང་། ཨ་མའི་མིང་ལ་སངས་རྒྱས་མཚོ་ཟེར་གྱི་འདུག མོས་རང་ལུས་མེར་བསྲེགས་བཏང་མ་ཐག་སྐུ་གྲོངས་ཚར་འདུག “ ཅེས་བརྗོད་འདུག

སྐད་སྐུར་བཞི་པ་འབྱོར་བའི་ནང་། ” བུ་མོ་དེས་མེར་བསྲེགས་གཏོང་སྐབས་སྐད་འབོད་ཤུགས་ཆེན་པོ་གནང་གི་འདུག ཉེ་འཁོར་གྱི་མི་ཚོས་བུ་མོ་དེས་༧རྒྱལ་བ་རིན་པོ་ཆེ་བོད་ནང་ཕེབས་འཇུག་དགོས། བོད་མི་རིགས་ལ་རང་དབང་དགོས་ཞེས་སྐད་འབོད་བྱས་སོང་ཟེར། གཞན་མོ་རང་གི་ལས་རིགས་སོགས་ད་དུང་ཤེས་ཐུབ་མ་སོང ” ཞེས་བརྗོད་འདུག