བུ་མོ་ཆོས་དབྱངས་སྐྱིད་ལགས་སུ་མཚོ་སྔོན་ཞིང་ཆེན་གྱིས་རྒྱ་སྒོར་འབུམ་གསུམ་དང་། མཚོ་བྱང་ཁུལ་གྱིས་རྒྱ་སྒོར་འབུམ་གཉིས་དང་ཁང་པ་གཅིག་བཅས་ཀྱི་གསོལ་རས་སྤྲད་ཡོད་འདུག
ད་ལོའི་ལོན་ཌོན་ཨོ་རྩེད་འགྲན་ཚོགས་ཀྱི་བུད་མེད་འདུར་རྒྱུག་འགྲན་བསྡུར་ནང་ཟངས་ཀྱི་རྟགས་མ་ཐོབ་མཁན་བོད་རིགས་བུ་མོ་ཆོས་དབྱངས་སྐྱིད། ཟླ་འདིའི་ཕྱི་ཚེས་ ༡༨ ཉིན་གྱི་ཆུ་ཚོད་ ༡ སྟེང་ཕྱིར་ཕ་ཡུལ་མཚོ་སྔོན་ཟི་ལིང་གནམ་ཐང་དུ་འབྱོར་ཡོད་པ་དང་། དེ་རུ་མཚོ་སྔོན་ཞིང་ཆེན་གྱི་དྲུང་ཆེ་གཞོན་པ་ཀྲང་ཅན་མཱེན་ཕེབས་བསུར་བཅར་ཏེ་ཆོས་དབྱིངས་སྐྱིད་ཀྱིས་ལོན་ཌོན་ཨོ་རྩེད་འགྲན་ཚོགས་ནང་ཟངས་ཀྱི་རྟགས་མ་བླངས་པར། མཚོ་སྔོན་མི་མང་ཡོངས་ཀྱི་ཚབ་བྱས་ཏེ་བཀྲ་ཤིས་བདེ་ལེགས་ཞུ་བཞིན་ཡོད་ཅེས་བརྗོད་འདུག
ཉིན་དེའི་ཕྱི་དྲོར་ཞིང་ཆེན་སྲིད་གཞུང་གིས་གཟེངས་བསྟོད་མཛད་སྒོ་ཚོགས་ཏེ། ཞིང་ཆེན་དམར་ཤོག་དྲུང་ཆེ་ཆང་ཝེ་དང་། ཞིང་ཆེན་སྤྱི་ཁྱབ་ལོས་ཝེ་ཉཱེན་གཉིས་ཀྱིས་ཆོས་དབྱངས་སྐྱིད་ལ་འཚམས་འདྲི་ཞུས་པ་དང་འབྲེལ། དྲུང་ཆེ་ཆང་ཝེ་ཡིས་ “ ཁྱོད་ནི་མཚོ་སྔོན་ནས་འཚར་ལོངས་བྱུང་བའི་ལུས་རྩལ་པ་ཞིག་ཡིན་ལ། ཐེངས་འདིར་རྒྱལ་ཁབ་ཀྱི་ཚབ་བྱས་ཏེ་ཨོ་རྩད་འགྲན་ཚོགས་ལ་ཞུགས་པ་དེ་ནི་ཞིང་ཆེན་ཡོངས་ཀྱི་ལ་རྒྱ་རེད། འགྲན་བསྡུར་སྟེང་ཁྱོད་ཀྱིས་ཀུན་གྱི་རེ་བ་སྟོང་ཟད་དུ་མ་བཏང་བར་གཞན་ལས་ལྷག་པའི་ནུས་པ་བཏོན་ཏེ། སྤྱི་ལེ་ཉི་ཤུའི་འདུར་རྒྱུག་འགྲན་བསྡུར་ཁྲོད་ཨེ་ཤ་ཡའི་ཟིན་ཐོ་ལས་བརྒལ་བར་མ་ཟད། ཨོ་རྩད་འགྲན་ཚོགས་ཀྱི་ལོ་རྒྱུས་སྟེང་ཟངས་ཀྱི་རྟགས་མ་བླངས་པའི་བོད་ཀྱི་ལུས་རྩལ་པ་ཐོག་མར་གྱུར་ཡོད། ཁྱོད་ཀྱིས་མེས་རྒྱལ་དང་མཚོ་སྔོན་ལ་གཟི་བརྗིད་བརྩོན་ལེན་བྱས་ཤིང་། བོད་རིགས་སྤུན་ཟླའི་ལ་རྒྱ་བཟུང་ཡོད་” ཅེས་བརྗོད་འདུག
སྐབས་དེར་ཆོས་དབྱངས་སྐྱིད་ཀྱིས “ ཞིང་ཆེན་ཀྱི་མགོ་ཁྲིད་ཚོས་ཐུགས་འཁུར་དང་། མི་མང་གིས་རྒྱབ་སྐོར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། བྱ་དགའ་འདི་ཞིང་ཆེན་མི་མང་ལ་ཐོབ་པ་རེད། བྱ་དགའི་སྟེགས་བུ་ནས་བབས་པའི་སྐད་ཅིག་དེ་ནས་བཟུང་ཡོད་ཚད་བསྐྱར་དུ་མགོ་བརྩམས་དགོས་ལ། རྗེས་ཕྱོགས་ཀྱི་ལམ་གོམ་པ་རེ་རེ་བྱས་ཏེ་ལེགས་པར་བགྲོད་དགོས། སྔར་ལས་ལྷག་པར་དཀའ་བ་ཁྱད་དུ་བསད་དེ། འདི་ལས་ལྷག་པའི་གྲུབ་འབྲས་ལེན་པ་དང་། ཞིང་ཆེན་ཡོངས་ཀྱི་མི་མང་གི་བརྩེ་སེམས་དང་གཅེས་སྐྱོང་འཕྲོ་བརླག་ཏུ་མི་གཏོང་བ་བྱ་རྒྱུ་ཡིན” ཞེས་བརྗོད་འདུག
ཐེངས་འདིར་མཚོ་སྔོན་ཞིང་ཆེན་གྱིས་བུ་མོ་ཆོས་དབྱངས་སྐྱིད་ལ་རྒྱ་སྒོར་འབུམ་གསུམ་ ༣༠༠༠༠༠ སྤྲད་ཡོད་པ་དང་། མཚོ་བྱང་ཁུལ་གྱིས་རྒྱ་སྒོར་འབུམ་གཉིས་ ༢༠༠༠༠༠ དང་། ཁང་པ་གཅིག་བཅས་ཀྱི་གཟེངས་བསྟོད་བྱ་དགའ་སྤྲད་ཡོད་འདུག
ཚང་མའི་ཤེས་དགོས་བ་ཞིག་ལ་ཆོས་དབྱངས་སྐྱིད་ཀྱིས་བྱ་དགའ་ཐོབ་དེ་ང་ཚོ་ཚང་མའི་བྱ་དགའ་ཡིན་པ་ངོ་ཤེས་དགོས་དེ་རྒྱ་མི་རིགས་ཀྱི་བྱ་དགའ་ཡང་མ་ཡིན་ལ་རྒྱ་ནག་གི་བྱ་དགའ་ཡང་མིན་དེ་ནི་བོད་རང་གི་བྱ་དགའ་ཡིན་དེ་ནི་ཤ་ཁྲག་རས་གསུམ་བོད་ནས་བྱུང་བའི་ཆོས་དབྱངས་རང་གི་ཡིན་་་་ཆོས་དབྱངས་ལ་བཀྲ་ཤིས་བདེ་ལེགས་ཞུ།
ཕྱག་འཚལ་ཆོས་དབྱིངས་སྐྱིད་པའི་ཉི་མ།།
སྐྱིེ་བསེར་རླུང་གི་བང་རྩལ་ཞོན་མ།།
སྨུག་པོ་ལྡོང་གི་ཞལ་མདངས་ལྡན་མ།།
ཨེ་ཤ་ཡ་ཡི་ཟིན་ཐོ་གཏོར་མ།།
རྒྱལ་དར་མཐོང་ན་གད་མོ་དགོད་མ།།
བོད་སྐད་གོ་ན་བང་རྩལ་མྱུར་མ།།
སླད་མེད་འཛུམ་གྱིས་གོ་བརྡ་སྤྲད་མ།།
སྲོག་དང་བསྡོས་ཏེ་ལ་རྒྱ་རྩོད་མ།།
རྒྱལ་སྤྱིའི་རྩེད་འགྲན་ཆེན་མོར་ཞུགས་མ།།
རྒྱ་མོ་ལིག་གི་རྒྱུག་རྩལ་འཕྲོག་མ།།
བོད་ཀྱི་ལོ་རྒྱུས་ཁྲོད་དུ་འཛུལ་མ།།
རྒྱལ་ཁའི་འཛུམ་གྱིས་མིག་ཆུ་བཙིར་མ།།
མཐོ་སྒང་འབྲོག་མོའི་བཞིན་རས་ངོམས་མ།།
རྒྱ་སྐད་བཤད་ན་ཐོགས་པ་མེད་མ།།
ཀྲུང་གོ་ཞེས་པའི་ཚིག་གཅིག་མེད་མ།།
བོད་པ་ཡིན་ཞེས་དྲིས་ལན་འདེབས་མ།།
སྐྲ་ཉག་རེ་ནས་རྔུལ་ཆུ་འཛགས་མ།།
བསུབ་མེད་ལོ་རྒྱུས་བོད་ལ་འབྲི་མ།།
རྒྱལ་ཁའི་རྟགས་མ་རྒྱ་མིས་ཁྱེར་མ།།
བསམ་ཞིང་བསམ་ན་སེམས་པ་སྐྱོ་མ།།
ཨོང་ཤ་རྡོག་རྡོག་ཡིད་དུ་འོང་མ།།
ནུ་མ་ཆུང་ཆུང་ཡི་ག་འཆད་མ།།
འཛུམ་མདངས་ཆུང་ཆུང་སྙིང་ལ་གཙགས་མ།།
བལྟས་ཀྱིན་བལྟས་ཀྱིན་སྙིང་དུ་སྡུག་མ།།
ཕྱག་གཡོན་རྒྱ་དར་ཅུང་ཟད་སྦས་མ།།
ལ་རྒྱའི་སྙིང་གཏམ་ཁོག་ལ་སྦས་མ།།
ཅི་ཞིག་ཤོད་འདོད་མིད་པ་འགུལ་མ།།
ཤོད་པའི་གོ་སྐབས་མེད་པས་སྐྱོ་མ།།
རྒྱལ་སྤྱིའི་རྩེད་འགྲན་ཁྲོད་ནས་མཛངས་མ།།
འཛུམ་པའི་མདངས་ཀྱིས་ཀུན་ཡིད་འཕྲོག་མ།།
འདུར་རྒྱུག་ཁྲོད་ནས་ཟངས་རྟགས་བཞེས་མ།།
ང་ཡིས་མིག་ཆུ་བཙན་གྱིས་བཙིར་མ།།
རྒྱལ་ཁའི་རྟགས་མ་གསུམ་པ་ཐོབ་མ །།
ཨ་ཀས་འོ་ཞིག་བྱེད་འདོད་སྐྱེས་མ།།
རྒྱང་ཐག་རིང་བས་བཀོད་པ་མེད་མ།།
སེམས་པ་ཕམ་ཀྱང་བྱེད་ཐབས་མེད་མ།།
རྒྱལ་ཁའི་ཁྲོད་ནས་རྒྱ་དར་གཡོགས་མ།།
སྐར་ལྔའི་ཁྲག་དར་ཡིན་པས་སྐྱོ་མ།།
གངས་སེང་དར་ཆ་མེད་པས་སྡུག་མ།།
ང་ཡི་སྙིང་གི་ཆོས་དབྱིངས་སྐྱིད་མ།།
རྒྱ་མིའི་ཞ་མོ་ལམ་ནས་གཡུག་མ།།
བོད་པའི་འཛུམ་མདངས་སྤྱི་ལ་སྦྱིན་མ།།
མཐོ་སྒང་འགྲོ་བར་སེམས་ཤུགས་སྤར་མ།།
ཕྱག་འཚལ་བ་ནི་ཆོས་དབྱིངས་སྐྱིད་མ།།
རྟགས་མ་འདི་ལ། ལེགས་ཆ་བརྒྱ་༧༠%དང་ཉེས་ཆ་བརྒྱ་ཆ་༣༠%མེད་པ་མིན་སྙམ་ལགས།
ད་ག་འདྲ་འདུག རྡ་རམ་ས་ལས་ཐ་ན་གོ་སྐབས་བཟུང་ནས་རྟེན་འབྲེལ་ཞུ་བ་དང་སྦྲགས་རྒྱ་གཞུང་ལ་མུ་མཐུད་དུ་བོད་རིགས་གང་མང་ལ་གོ་སྐབས་སྤྲད་རོགས་ཞེས་པའི་འབོད་བསྐུལ་ཙམ་ཡང་བྱེད་ཐུབ་ཡོད་པ་མ་རེད། ད་དུང་བློ་ཕམ་ཡོད་ཚུལ་ལབ་ཡོད་པ་རེད། ག་རེ་བློ་ཕམ། རྒྱ་ནག་གི་རྩ་ཁྲིམས་འོག་ཏུ་འགྲོ་བར་བློ་ཕམ་མེད་པར་བོད་རིགས་ན་གཞོན་ཞིག་ལ་གོ་སྐབས་རེག་པར་བློ་ཕམ་བྱེད་དོན་གང་ཡིན་ནམ། ཁ་བཤད་དོན་ལ་མི་གནས་པ་ཞེས་པའི་དཔེར་མཚོན་འདི་ལས་གསལ་བོ་ཡོད་པ་མ་རེད། ད་ཡིན་ན་བོད་ནང་ནས་ད་དུང་མི་སྣ་གྲགས་ཆེན་མང་པོ་བྱུང་རྒྱུ་རེད་ལ། རྡ་སར་བློ་ཕམ་ཇེ་མང་ལ་འགྲོ་ངེས་པར་མ་ཟད། མཐའ་མར་ནད་དུ་གྱུར་ནས་རང་སྲོག་རང་གིས་གཅོད་ཉེན་འདུག འདིའང་ལོ་རྒྱུས་རང་བཞིན་གྱི་ཆོས་ཉིད་ཅིག་ཡིན་ཡང་སྲིད་པས། བོད་ལ་གྱོང་རེག་སྲིད་ཀྱི་མ་རེད།