ཉེ་ཆར་ཁེ་ན་ཊའི་གསར་འགོད་པ་ཞིག་གིས་ས་གནས་རྒྱ་ནག་ཞིན་ཧྭ་གསར་ཁང་གི་འགན་འཛིན་གྱིས། ཁོང་ལ་༸གོང་ས་མཆོག་ཁེ་ན་ཊར་ཕེབས་སྐབས་སོ་མྱུལ་རྗེས་འདེད་དགོས་པའི་བཀའ་བཀོད་བཏང་བའི་སྐོར་བརྗོད་འདུག
ཕྱི་ཚེས་ ༢༢ ཉིན་ཁེ་ན་ཊ་ག
སར་ཁང་ (The Canadian Press) གིས་རང་དབང་རྩོམ་པ་པོ་དང་གསར་འགོད་པ་མཱར་ཁི་བྷོ་རའེ་ (Mark Bourrie) ལགས་ལ་བཅར་འདྲིའི་སྐབས། ཁོང་གིས་དེ་སྔོན་༸གོང་ས་མཆོག་ཁེ་ན་ཊའི་ཨོ་ཌ་ཝར་ཆིབས་སྒྱུར་སྐབས། ཨོ་ཌ་ཝར་གནས་སྡོད་རྒྱ་ནག་ཞིན་ཧྭ་གསར་ཁང་གི་འགན་འཛིན་གྱིས་ཆེད་དུ་ཁོང་ལ་བཀའ་བཀོད་བཏང་སྟེ། ༸གོང་ས་མཆོག་ལ་སོ་མྱུལ་རྗེས་འདེད་བྱེད་དགོས་པ་བརྗོད་པར་བརྟེན། ཁོ་རང་ས་གནས་རྒྱ་ནག་ཞིན་ཧྭ་གསར་ཁང་གི་གསར་འགོད་པའི་ལས་གནས་ནས་ཕྱིར་འབུད་བྱ་དགོས་བྱུང་ཚུལ་བརྗོད་འདུག
དེ་བཞིན། ཕྱི་ཚེས་ ༢༣ ཉིན་གྱི་ཨོ་ཌ་ཝ་དུས་དེབ་(Ottawa Magazine)སྟེང་དུའང་། མཱར་ཁི་བྷོ་རའེ་ཡིས་གནས་ཚུལ་དེའི་སྐོར་གྱི་རྩོམ་ཡིག་ཅིག་སྤེལ་ཏེ། འདི་ལོའི་ཕྱི་ཟླ་ ༤ ནང་༸གོང་ས་མཆོག་ཁེ་ན་ཊའི་ཨོ་ཌ་ཝར་ཆིབས་སྒྱུར་སྐབས། ས་གནས་ཞིན་ཧྭ་གསར་ཁང་གི་འགན་འཛིན་གྱིས་བཀའ་བཀོད་བཏང་སྟེ། ཁོང་ལ་གནས་ཚུལ་གསར་འགོད་བྱེད་མ་དགོས་པར། ༸གོང་ས་མཆོག་གིས་གསར་འགོད་ལྷན་ཚོགས་ཐོག་གཏམ་བཤད་ག་རེ་གནང་གི་ཡོད་མེད་དང་། ཁེ་ན་ཊའི་སྲིད་བློན་ཧཱར་ཕེར་ (Stephen Harper) ལགས་དང་སྒེར་གྱི་མཇལ་འཕྲད་སྐབས་ཀྱི་ཞིབ་ཕྲའི་གནས་སྟངས་ཐད་རྗེས་འདེད་སོ་མྱུལ་བྱེད་དགོས་བརྗོད་ཡོད་པའི་སྐོར་བཀོད་འདུག
ཟླ་འདིའི་ཕྱི་ཚེས་ ༢༢ ཉིན་བྱང་སྣེ་ས་ཁུལ་དུ་ལྟ་སྐོར་གནང་བཞིན་པའི་ཁེ་ན་ཊའི་སྲིད་བློན་ཧཱར་ཕེར་ལ་རྗེས་འདེད་ལྟ་བུར་སླེབས་ཡོད་པའི། ཨོ་ཌ་ཝར་གནས་སྡོད་ཞིན་ཧྭ་གསར་ཁང་གི་འགན་འཛིན་ཀྲང་ཏཱ་ཁྲིན་གྱིས་གནས་ཚུལ་དེ་ངོས་ལེན་བྱས་མི་འདུག ཡིན་ནའང་། གནས་ཚུལ་དེའི་ཐད་ཁེ་ན་ཊའི་གྲོས་ཚོགས་ཀྱི་འབྲེལ་ཡོད་ལས་ཁུངས་ཀྱིས་མ་འོངས་པར། གསར་འགོད་པ་མཱར་ཁི་བྷོ་རའེ་དང་ས་གནས་རྒྱ་ནག་ཞིན་ཧྭ་གསར་ཁང་གི་འགན་འཛིན་གཉིས་སོ་སོར་འགྲེལ་བཤད་རྒྱག་འཇུག་རྒྱུ་ཡིན་འདུག
ཉེ་ཆར་གསར་དུ་བྱུང་བའི་རྒྱ་ནག་ཞིན་ཧྭ་གསར་ཁང་གི་བྱ་སྤྱོད་དེས། རྒྱལ་སྤྱིའི་སྤྱི་ཚོགས་དང་མི་མང་ཡོངས་ལ། རྒྱ་ནག་ཞིན་ཧྭ་གསར་ཁང་ནི་རྒྱ་དམར་གཞུང་གི་གསང་མྱུལ་རྩ་འཛུགས་སྡེ་ཁག་ཅིག་དང་། ཡང་ན་ཁྲིམས་མཐུན་གྱི་གསར་ཁང་ཞིག་ཡིན་མིན་ཐད་དོགས་སློང་ཆེན་པོ་སླེབས་ཡོད་པ་རེད།
མཱར་ཁི་བྷོ་རའེ་ནི་རང་དབང་རྩོམ་པ་པོ་ཞིག་ཡིན་པ་མ་ཟད། ཁོང་གིས་འདས་པའི་ལོ་གཉིས་རིང་ཁེ་ན་ཊར་གནས་སྡོད་རྒྱ་ནག་ཞིན་ཧྭ་གསར་ཁང་ལ་གསར་འགོད་པའི་ལས་ཀ་གཉེར་ཡོད་འདུག
