ཞལ་འདེབས་བྱུང་བ་འདི་ཡིན།

ཉེ་ཆར་དབུས་བོད་ཀྱི་གཞོན་ནུ་ལྷན་ཚོགས་ཀྱིས་ལོ་འཁོར་ལས་བསྡོམས་དེབ་ཆུང་ཞིག་འགྲེམས་སྤེལ་བྱས་ཏེ། སྔར་ལོའི་རྡོར་གདན་དུས་དབང་དང་ནའེ་ཡོག་ཟས་བཅད་ངོ་རྒོལ་སྐབས་ཀྱི་ཞལ་འདེབས་བྱུང་བ་ཁག་འགྲེལ་སྤེལ་གནང་འདུག 

ཉེ་ཆར་དབུས་བོད་ཀྱི་གཞོན་ནུ་ལྷན་ཚོགས་ཀྱིས་ཕྱི་ལོ་ ༢༠༡༡ ཟླ་ ༧ ཚེས་ ༡ ནས་ ༢༠༡༢ ཟླ་ ༧ ཚེས་ ༣༡ བར་གྱི་ལོ་འཁོར་ལས་བསྡོམས་དེབ་ཆུང་ཞིག་བཀྲམས་པའི་མཇུག་ཏུ། སྔར་ལོའི་རྡོར་གདན་དུས་དབང་སྐབས་ཀྱི་མི་མང་གི་ཞལ་འདེབས་སྐོར་བཀོད་པའི་ནང་། “༸གོང་ས་༧སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་དུས་དབང་ཐེངས་ ༣༢ པ་བསྩལ་སྐབས། བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་ལ་ཡིད་ཆེས་དང་རེ་བཅོལ་གྱིས་བོད་ནས་ཕེབས་པའི་ཆོས་ཞུ་བ་ཁག་ཅིག་གིས་དབུས་རྒྱུན་མཇལ་འཕྲད་ཀྱིས་དམིགས་བསལ་ཞལ་འདེབས་དང་། དེ་བཞིན་དུས་དབང་སྐབས་ཀྱི་ཕྱོགས་ཡོངས་ཀྱི་ཞལ་འདེབས་ཁྱོན་ཧིན་སྒོར་ ༡༣༢༡༢༣༤།༤༢ བྱུང་ཡོད” ཅེས་བཀོད་འདུག

རྡོར་གདན་དུས་དབང་སྐབས་གཞོན་ལྷན་གྱི་དཔལ་འབྱོར་བསྡུ་འགོད་སྐོར་བཀོད་པའི་ནང་། དུས་དབང་ཐེངས་ ༣༢ པའི་སྐབས་གཞོན་ནུ་ལྷན་ཚོགས་ཀྱི་དྲིལ་བསྒྲགས་འགན་འཛིན་བསྟན་འཛིན་དབྱངས་འཛོམས་ལགས་དང་། ཕྱི་དྲིལ་འགན་འཛིན་བསྟན་འཛིན་སྒྲོལ་མ། སྒྲིག་འཛུགས་འགན་འཛིན་སྤེན་པ་ཚེ་རིང་བཅས་ཀྱིས་གོ་སྒྲིག་འོག  བོད་ཀྱི་གཞོན་ནུ་ལྷན་ཚོགས་ཀྱི་དཔལ་འབྱོར་གསོག་ཆེད་གཞོན་ལྷན་གྱི་སྟབས་བདེ་ཟ་ཁང་ཞིག་བཙུགས་ཏེ། ཕྱི་ལོ་ ༢༠༡༡ ལོའི་ཕྱི་ཟླ་ ༡༢ པའི་ཚེས་ ༢༧ ནས་ ༢༠༡༢ ལོའི་ཕྱི་ཟླ་ ༡ ཚེས་ ༡༢ བར་གྱི་ཉིན་བཅུ་བདུན་རིང་དད་ལྡན་ཆོས་ཞུ་བ་རྣམས་ལ་ཞལ་ལག་འདྲ་མིན་བཙོང་བ་བརྒྱུད་ཁྱོན་ཧིན་སྒོར་ ༤༢༤༡༡༠།༠༠ དང་། སོང་ཧིན་སྒོར་ ༣༣༤༩༥༦།༠༠ ཁེ་བཟང་ཧིན་སྒོར་ ༨༩༡༥༤།༠༠ བྱུང་ཡོད” ཅེས་དང་། “དཔལ་འབྱོར་འགན་འཛིན་དཀོན་མཆོག་ཡར་འཕེལ་ལགས་ཀྱིས་སྣེ་འཁྲིད་འོག གཞོན་ལྷན་གྱི་རྒྱན་ཤོག་ཚོང་འགྲེམས་བྱས་ཏེ། ཁྱོན་ཧིན་སྒོར་ ༨༢༢༥༠༠།༤༢ བྱུང་ཡོད” ཅེས་བཀོད་འདུག

ཡང་ནའེ་ཡོག་ཟས་བཅད་ངོ་རྒོལ་སྐབས་ཀྱི་ཞལ་འདེབས་སྐོར་བཀོད་པའི་ནང་། “ཨ་རིའི་གྲོང་ཁྱེར་ནའེ་ཡོག་ཏུ་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་ལས་ཁུངས་མདུན་དུ། རྒྱལ་གཅེས་དཔའ་བོ་གསུམ་གྱིས་དགོསན་དུན་ལྔ་དང་། འབོད་སྐུལ་གཅིག་གི་ཐོག་དུས་ཚོད་ངེས་མེད་ཀྱི་ཟས་བཅད་ལས་འགུལ་ཁྱོན་ཉིན་གྲངས་ ༣༠ ཙམ་གནང་རིང་ཞལ་འདེབས་ཧོན་སྒོར་ ༣༩༢༣༨༥༡།༨༠ བྱུང་ཡོད”ཅེས་བཀོད་འདུག

གསར་འགོད་པ། དོན་གོ