དམངས་གཙོའི་འདུ་ཤེས་བསྐྱེད་དགོས།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༥༦༦ སྟེང་གི་རྩོམ་སྒྲིག་པའི་གཏམ།

ད་ཆར་བཙན་བྱོལ་བོད་པའི་དམངས་གཙོའི་སྒྲོམ་གཞི་ལ་ཆ་ལག་ཡོངས་སུ་རྫོགས་པ་ཚང་ཡོད་ན། ད་ནས་ང་ཚོས་སེམས་པ་རྩེ་གཅིག་གིས་དམངས་གཙོའི་དམིགས་རྣམ་བསྐྱངས་ཏེ་དམངས་གཙོའི་འདུ་ཤེས་བསྐྱེད་དགོས་ཀྱི་འདུག

བཙན་བྱོལ་བོད་མིའི་དམངས་གཙོ་འདི་དགུང་ལོ་ང་གཉིས་ལ་སོན་ཡོད། གལ་སྲིད་མི་ཞིག་ཡིན་ན་གཞོན་པ་ནས་དར་མ་དང་དར་མ་ནས་རྒན་པའི་གྲས་སུ་གོམ་པ་སྤོས་ཡོད། ཉེ་ཆར་དམངས་གཙོའི་དུས་དྲན་ཉིན་མོར་བཀའ་ཤག་གིས་བཙན་བྱོལ་བོད་མིའི་ཆབ་སྲིད་ཀྱི་རང་བཞིན་དམངས་གཙོའི་ཆ་ལག་ཡོངས་སུ་རྫོགས་པ་བཙུགས་ཐུབ་པ་བྱུང་ཡོད་ཟེར། ཆ་ལག་ཡོངས་སུ་ཚང་བ་ཙམ་གྱིས་དམངས་གཙོའི་སྤུས་ཚད་འཇལ་མི་ཐུབ་ལ། ལོ་ངོ་སྟོང་ཕྲག་གི་ལོ་རྒྱུས་ཡོད་པའི་འཛམ་གླིང་དམངས་གཙོའི་འཕེལ་རིམ་ཁྲོད་དུ་བོད་པའི་དམངས་གཙོ་འདི་ད་དུང་བྱིས་པ་དམར་འབྱར་ཞིག་དང་། དེང་རབས་དམངས་གཙོའི་རྒྱལ་ཁབ་ཁག་གི་ཁྲོད་ནའང་བོད་མིའི་དམངས་གཙོ་འདི་ལོ་ན་ཧ་ཅང་གཞོན་གཞོན་ཡིན། གཞོན་ཉམས་དོད་པའི་དམངས་གཙོ་འདིས་མཚམས་རེར་ཧོལ་རྒྱུག་ཐོད་རྒལ་དང་། སྐབས་རེར་རྙིང་ཞེན་མཁྲེགས་འཛིན་གྱི་སྤྱོད་པ་ཡ་མ་བརླ་སྟོན་པའང་ཆོས་ཉིད་ཡིན།

སྤྱི་ཚོགས་ཤིག་གི་དམངས་གཙོའི་སྤུས་ཀ་གླེང་ན། སྤྱི་ཚོགས་དེའི་རིམ་པ་ཁག་གི་དམངས་གཙོའི་སྒྲོམ་གཞི་གྲུབ་སྟངས་དང་། མི་མང་སྤྱི་བྱིངས་ནང་དམངས་གཙོ་ལག་ལེན་བསྟར་ཕྱོགས། གང་ཟག་སྒེར་རེ་རེའི་དམངས་གཙོའི་འདུ་ཤེས་བཅས་ལ་བལྟ་དགོས། ང་ཚོར་སྒང་ནས་ཁྲིམས་དང་སྒྲིག་གཞིས་དམངས་གཙོ་མ་སྤྲད་པའི་དཀའ་ངལ་ཡེ་ནས་མེད། མགོ་བཙན་བྱོལ་བོད་མིའི་བཅའ་ཁྲིམས་ནས་གཞུག་ཚོགས་པ་ཁག་གི་སྒྲིག་གཞིའི་བར། ཡིག་ཐོག་ན་ང་ཚོར་དམངས་གཙོ་ཁྲ་ཆིལ་ལེར་འོད་ཆེམ་མེར་ཡོད་ཀྱང་། གང་ཟག་སྒེར་བའི་རྒྱུད་ན་དམངས་གཙོའི་སྨྱུ་གུ་འབུས་སའི་ཞིང་ས་གཤིན་པོ་མེད་སྟབས། སྤྱི་ཚོགས་ལག་ལེན་ཁྲོད་ན་ཁྲིམས་དང་སྒྲིག་གཞི་ལས་ལམ་དང་ལུགས་སྲོལ་གཙོ་བའི་སྟོང་ཆ་ཆེན་པོ་ལྷག་ཡོད།

ཡིག་ཐོག་གི་དམངས་གཙོའི་བཅའ་སྒྲིག་སྦོམ་བཤད་ལས་མི་སྒེར་གྱི་དམངས་གཙོའི་གཤིས་ཀ་བྱེ་བྲག་གིས་སྔོག་ན། བཙན་བྱོལ་སྤྱི་ཚོགས་འདི་མི་སྣ་བཞི་ལས་གྲུབ་པར་ངོས་འཛིན་བྱས་ཆོག ལྔ་བཅུ་དང་དྲུག་ཅུ་རེ་གྲངས་ནང་བཙན་བྱོལ་ལ་ཐོག་མར་འབྱོར་བའི་བོད་མི་རྙིང་ཞེན་ཅན་སྐོར་ཞིག་དང་། དགོན་པ་གྲྭ་ཚང་ཁག་གི་ཆོས་ལུགས་པ་སྐོར་ཞིག དེ་བཞིན། བོད་ནས་ཕྱིས་སུ་འབྱོར་བའི་རྒྱ་ནག་དམར་པོའི་སློབ་གསོ་ཐོབ་པ་སྐོར་ཞིག་དང་། བཙན་བྱོལ་སྤྱི་ཚོགས་ནང་འཚར་ལོངས་བྱུང་སྟེ་ཕྱི་ཕྱོགས་ཀྱི་སློབ་གསོར་བག་ཆགས་ཕྲན་བུ་ཡོད་པ་སྐོར་ཞིག་ཡིན། སྔ་མ་སྔ་མ་ལས་ཕྱི་མ་ཕྱི་མར་དམངས་གཙོའི་གཤིས་ཀ་ལྡན་པར་ཆ་འཇོག་བྱེད་དགོས་མོད། ཕྱི་མ་ཕྱི་མར་སྔ་མ་སྔ་མའི་བག་ཆགས་རྔམས་མཐུག་ཅིང་གཏིང་ཟབ་ལ། མི་སྒེར་གྱི་སྐད་ཆ་བཤད་སྟངས་དང་རྣམ་འགྱུར་སྟོན་སྟངས་ཚུན་ལའང་དམངས་གཙོ་སྐྱ་ཟད་སྔོ་གཏུགས་ཆགས་ཡོད།

ང་ཚོས་ནམ་རྒྱུན་བཙན་བྱོལ་བོད་མིའི་ཐུན་མོང་མ་ཡིན་པའི་དམངས་གཙོའི་ལམ་བཟང་ཞེས་སྒྲོག་གི་ཡོད་ལ། བསྒྲགས་ཀྱང་ལོས་ཆོག བོད་མིའི་དམངས་གཙོ་འདི་བྱུང་རབས་དང་ལྟ་བ། ལག་ལེན་གསུམ་ཐད་ནས་གཞན་དང་མི་འདྲ་ཀུན་དང་མི་མཚུངས་པ་ཞིག་ཡིན། ༧གོང་ས་མཆོག་གིས་གསོལ་རས་སུ་བསྩལ་བའི་དམངས་གཙོའི་བྱུང་རིམ་ཐུན་མོང་མ་ཡིན་པ་ཞིག་དང་། ནང་པའི་ཆོས་ཀྱི་ལྟ་གྲུབ་དང་འབྲེལ་བའི་དམངས་གཙོའི་ལྟ་བ་ཐུན་མོང་མ་ཡིན་པ་ཞིག རང་གི་ལུང་པ་མེད་པར་གཞན་དབང་སྟབས་བསྟུན་འོག་གི་དམངས་གཙོའི་ལག་ལེན་ཐུན་མོང་མ་ཡིན་པ་ཞིག་ཡོད། འོན་ཀྱང་ཐུན་མོང་མ་ཡིན་པ་ཟེར་བའི་ཚིག་ཟིན་ན་གཞན་ལས་ལེགས་པོ་ཡིན་པའི་ནང་དོན་མེད་ལ། ཐུན་མིན་གྱི་ཁྱད་ཆོས་འདི་དག་གིས་དམངས་གཙོ་ཡང་དག་པར་མཐུན་སྣང་ཡང་མི་གྲུབ་བོ།།