རྒྱ་ནག་གི་རྒྱལ་སྟོན་དུས་ཆེན་ལ་ཕུལ།

ཐེ་བོ་ཤེས་རབ་རྒྱ་མཚོ། 

དེ་རིང་སྤྱི་ཟླ་ ༡༠ ཚེས་ ༡ རེད། སྤྱི་ཟླ་ ༡༠ ཚེས་ ༡ ལ་རྒྱ་ནག་གི་རྒྱལ་སྟོན་དུས་ཆེན་རེད། ཁྱེད་ཀྱིས་རྒྱ་ནག་གི་ལོ་རྒྱུས་ལ་བལྟས་མྱོང་ངམ། ལོ་རྒྱུས་ཐོག་ཁོ་ཚོའི་མི་རིགས་འདི་ལས་སླ་བོ་ཞིག་མ་རེད། ཤེས་རིག་དང་གང་ཅིའི་ཐད་བྱས་རྗེས་རླབས་ཆེན་བཞག་མྱོང་བའི་མི་རིགས་ཤིག་རེད། ཁོ་ཚོས་ཕྱི་ནང་གི་ཡ་ང་བའི་བཙན་དབང་དང་གདུག་རྩུབ་ཡང་ཤིན་ཏུ་མང་པོ་མྱངས་མྱོང་ཡོད་མོད། འོན་ཀྱང་། མཐའ་མཇུག་ཁོ་ཚོས་དཀའ་སྡུག་དེ་དག་ཐམས་ཅད་ལས་ཡོངས་སུ་རྒྱལ་བར་བྱས་མྱོང་།

ཡིན་ཡང་། ཁྱེད་ཀྱིས་དེ་རིང་འཚོ་བའི་ནང་གི་རྒྱ་ནག་ལ་བལྟས་མྱོང་ངམ། ཁོ་ཚོ་ཅི་ཞིག་རེད། ཁོ་ཚོས་རང་ཉིད་ནི་སྲིད་དབང་སྒེར་གཅོད་པའི་བྲན་གཡོག་གསར་པ་ཞིག་ཏུ་གྱུར་བའང་ཚོར་མེད། སྲིད་དབང་སྒེར་གཅོད་པའི་སེམས་ལ་ཁོ་ཚོ་ནི་དབང་བོ་སྣ་ལྔ་ཅན་གྱི་རྐང་སྟེགས་འཆའ་སའི་ཤིང་དུམ་བདེ་མོ་ཞིག་ཏུ་མཐོང་ཡོད་པས། སྲིད་དབང་སྒེར་གཅོད་པ་ཚོས་བློ་བདེ་བག་ཕེབས་ངང་ཁོ་ཚོའི་མགོ་ཐོག་ལ་ངལ་གསོས་ནས་བསྡད་འདུག ཁོ་ཚོས་སྡུག་ངལ་གྱི་རྒྱ་མཚོར་ལྷུང་བའི་ཁོ་ཚོའི་མགོ་ཐོག་ལ་སྐྱིད་རྒྱག་གི་འདུག མ་རེད། ངལ་གསོས་ནས་སྐྱིད་བརྒྱབ་པ་ཁོ་ན་ཙམ་ག་ལ་ཡིན། ངལ་གསོས་ནས་སྐྱིད་བརྒྱབ་པ་ཁོ་ན་ཙམ་ཡིན་ན་ཁོས་ཀྱང་སྡུག་སྐད་འདི་འདྲ་རྒྱག་མི་སྲིད། ཁོ་ཚོ་ནི་ཟུངས་ཁྲག་ཚ་བོ་ལ་བརྟེན་ནས་འཚོ་བཞིན་པའི་རྒྱ་གར་གྱི་དུག་སྦྲང་ཆེན་པོ་འདི་དག་དང་འདྲ་བར་ཁོ་ཚོའི་ལུས་ཐོག་ནས་ཟུངས་ཁྲག་ཚ་བོ་འཇིབ་ཀྱིན་ཡོད། ཁོ་ཚོའི་ལུས་ལ་ན་ཟུག་ཡ་ང་བ་རེ་ཡོད་ནའང་། ཁོ་ཚོས་དུག་སྦྲང་དེ་དག་དཀྲོགས་མི་ཤེས་ལ། ཁོ་ཚོས་སྡུག་སྐད་ཀྱང་རྒྱག་མི་ཤེས། ཐ་ན་རྐང་ལག་ཙམ་ཡང་འགུལ་མི་ཤེས་བའམ་འགུལ་མི་ནུས། ཁོ་ཚོས་སེམས་ལ་རང་ཉིད་ཀྱི་ཟུངས་ཁྲག་ཚ་བོ་དེ་ནི་ཁོ་ཚོའི་སྐེ་ལྟག་ལ་གཉེར་མ་ འབབ་སྤྱད་དམ་ལྟོ་བ་ལུག་ལུག་ཆགས་སྤྱད་ལོས་ཡིན་འདོད་ཡོད།

ན་ནིང་ཝང་ཨ་ནེ་ཚང་གི་མིང་ཙམ་གྱི་ཁང་པ་ཞིག་ཡིན་པའི་འགྱིག་ཤོག་གི་ཁང་གོག་རྙིང་ཧྲུལ་ཆུང་ཆུང་ཆུང་ཆུང་དེ་གང་ནས་ཡོང་མིན་མ་ཤེས་པའི་ས་འདེད་འཕྲུལ་འཁོར་ཆེན་པོ་ཆེན་པོ་ཞིག་གིས་གང་ཞིག་ལ་གཙང་མ་བྱས་ནས་དེད་སོང་བའི་ཤུལ་དུ་ད་ལོ་གནམ་ལ་ཟུག་པའི་ཁང་རྩེག་ཅིག་བརྒྱབ་ཡོད་པ་དང་། རྒྱུ་མཚན་ཅི་ཡིན་མ་ཤེས་མོད། འོན་ཀྱང་ཝང་ཨ་ནེ་རང་ཉིད་ཁང་པ་དེའི་ཉེ་འཁྲིས་སུའང་བཅར་མི་ཆོག་གི་མེད། ཡིན་ཡང་ཚུལ་དེར་ད་བར་པེ་ཅིན་སྲང་ལམ་གྱི་ཤར་ཕྱོགས་ཟམ་ཆེན་འོག་ཏུ་ཉལ་བཞིན་པའི་ཝང་ཨ་ནེ་ཚང་གིས་གང་ཡང་བཤད་མ་མྱོང་། འོན་ཀྱང་ཉིན་ཤས་སྔོན་ཝང་ཨ་ནེས་ལག་ཏུ་(打倒日本帝国主义。打倒日本鬼子。)ཞེས་བྲིས་ཡོད་པའི་ཤོག་བྱང་ཞིག་ལག་ཏུ་ཐོགས་ནས་རྔམ་སྟོན་ཁྲོམ་སྐོར་ལ་ཞུགས་ཡོད་པ་དང་། ཝང་ཨ་ནེ་ལྟ་བུའི་སྡོད་ཁང་གཞུང་གིས་དེད་སོང་བའམ་ཕྱགས་སོང་བའི་ཁོ་ཚོ་མང་པོ་ཞིག་ཀྱང་ལག་ཏུ་ཤོག་བྱང་ཆེན་པོ་རེ་ངོས་སུ་གོང་མཚུངས་ཀྱི་ཡི་གེ་བྲིས་པ་མང་པོ་བཟུང་ནས་རྔམ་སྟོན་ཁྲོམ་སྐོར་ལ་ཞུགས་ཡོད།

སྲིད་གཞུང་གི་མགོ་ཁྲིད་རིམ་པ་ཚོས་ལྐོག་ཟ་བྱས་པའི་དངུལ་གྱི་གྲངས་འབོར་བསྡོམས་ན་(钓鱼岛)གླིང་ཕྲན་ལྟ་ཅི། རྒྱ་ནག་རྒྱལ་ཁབ་(中国)ཉོ་སྤྱད་ཀྱི་སྒོར་མོ་ལས་ཀྱང་ལྡབ་བརྒྱ་འགྱུར་གྱིས་མང་མོད། འོན་ཀྱང་ཁོ་ཚོས་དེ་ནི་ཁོ་ཚོའི་འཇོན་ཐང་རེད། སོ་སོས་ཟ་མ་ཐུབ་ན་སྡུག་གྱོང་རེད་ཟེར་ནས། མི་འདོད་པའི་རྣམ་འགྱུར་ཙམ་ཡང་སྟོན་གྱི་མེད། ལྡོག་སྟེ་དེ་ནི་ལུགས་མཐུན་ཞིག་ཏུ་བསམ་ཡོད།

ད་དུང་དེས་ག་ལ་ཚད་དེ། མི་ལོ་ཉེར་གསུམ་གྱི་ཡར་སྔོན་དུ་(天安门)ཐང་ཆེན་དུ་སློབ་ཕྲུག་བརྒྱ་ཕྲག་མང་པོ་དམར་གསོད་བཏང་བ་དེ་ནི་ད་ལྟ་ཁོ་ཚོ་མང་པོ་ཞིག་གིས་ཤེས་ཀྱི་མེད་ལ། ལ་ལས་ཤེས་ཀྱང་འདི་ནི་གུང་ཁྲན་ཏང་གི་གནམ་འོག་ཡིན་པས་དེ་ནི་ཁོ་ཚོའི་མགོར་ཅིས་ཀྱང་འབབ་དགོས་པའི་ཉེས་ཆད་ཅིག་བབས་པ་ཙམ་རེད་ལ། ཁོ་ཚོས་ཀྱང་ངེས་བར་དུ་འཁུར་དགོས་པའི་ཉེས་ཆད་ཅིག་འཁུར་བ་ཙམ་རེད་ཟེར། ཁོ་ཚོ་མང་པོ་མང་པོ་ཞིག་གིས་ཀྱང་ཁོ་ཚོས་བཤད་པ་ལྟར་དེ་ནི་ཅིས་ཀྱང་འབབ་དགོས་པ་དང་འཁུར་དགོས་པའི་ཉེས་ཆད་ཅིག་ཡིན་ཤག་བྱས་ཡོད།

འོན་ཀྱང་། ཁོས་བཤད་ན། ཁོ་ཚོ་ད་ལྟ་རྨོངས་བའི་གྲོག་རོང་གི་གཏིང་ཟབ་ས་ན་གཉིད་དུ་ཡུར་ནས་བསྡད་ཡོད་ ནའང་། ནམ་ཉི་མ་གཉིད་ལས་སད་པའི་དུས་ཡོད་ཟེར། ཁོས་དེ་ལ་ལན་མ་བཏབ་གོང་ཁོས་ཡང་བསྐྱར། ནམ་ཉི་མ་ཁོ་ཚོ་གཉིད་ལས་སད་ཚེ་ཁོ་ཚོས་ཁོ་ཚོ་སྡོད་ས་ཙམ་མ་ཡིན་པར་སའི་གོ་ལ་ཆེན་པོ་འདིའི་སྣེ་འཁྲིད་ཐུབ་ངེས་ཡིན་ཟེར། འོན་ཀྱང་ཁོས་དཔེ་མི་སྲིད། ཁོ་ཚོས་ཁོ་ཚོའི་མི་གཤིས་ལ་གནད་དོན་འབུད་དུ་བཅུག་ཡོད་པས་དེ་ནི་དཔེ་སྲིད་པ་ཞིག་མ་རེད་ཅེས་ལན་བཏབ། ངོ་མ་རེད། མི་གཤིས་ལ་གནད་དོན་བུད་ཡོད་ཚེ་དེ་ནི་མི་སྡེ་ཆེན་པོ་ཞིག་ཡིན་ནའང་འཕྲུལ་འཁོར་གྱི་ཨ་མ་ལ་སྐྱོན་ཤོར་བའི་མེ་འཁོར་ཆེན་པོ་ཞིག་དང་འདྲ་བོ་ཡིན་པས། དེ་ལ་ནུས་པ་དང་བེད་སྤྱོད་ཅི་ཡང་མེད་པ་ཁོས་ད་དུང་གཏན་ནས་ཤེས་མི་འདུག དེར་བརྟེན་ཁོས་ཁོ་ཚོས་སའི་གོ་ལ་ལྟ་ཅི། ཁོ་ཚོ་རང་ཉིད་འཇུག་སའི་དམྱལ་མཁར་བཙན་པོ་དེའི་སྒོར་ཡང་འབུད་ཐུབ་རྒྱུ་མ་རེད་ ཟེར། གསལ་བོར་བཤད་ན་འདི་ནི་ཁོས་མཐོང་བའི་དེ་རིང་གི་འཚོ་བའི་ནང་གི་རྒྱ་ནག་ཡིན་སྐད།

༢༠༡༢   ༡༠  ༡ ཉིན།